೧. ಸುತಮಯಞಾಣನಿದ್ದೇಸೋ

೧. ಕಥಂ ಸೋತಾವಧಾನೇ ಪಞ್ಞಾ ಸುತಮಯೇ ಞಾಣಂ?

‘‘ಇಮೇ ಧಮ್ಮಾ ಅಭಿಞ್ಞೇಯ್ಯಾ’’ತಿ ಸೋತಾವಧಾನಂ, ತಂಪಜಾನನಾ ಪಞ್ಞಾ ಸುತಮಯೇ ಞಾಣಂ.

‘‘ಇಮೇ ಧಮ್ಮಾ ಪರಿಞ್ಞೇಯ್ಯಾ’’ತಿ ಸೋತಾವಧಾನಂ, ತಂಪಜಾನನಾ ಪಞ್ಞಾ ಸುತಮಯೇ ಞಾಣಂ.

‘‘ಇಮೇ ಧಮ್ಮಾ ಪಹಾತಬ್ಬಾ’’ತಿ ಸೋತಾವಧಾನಂ, ತಂಪಜಾನನಾ ಪಞ್ಞಾ ಸುತಮಯೇ ಞಾಣಂ.

‘‘ಇಮೇ ಧಮ್ಮಾ ಭಾವೇತಬ್ಬಾ’’ತಿ ಸೋತಾವಧಾನಂ, ತಂಪಜಾನನಾ ಪಞ್ಞಾ ಸುತಮಯೇ ಞಾಣಂ.

‘‘ಇಮೇ ಧಮ್ಮಾ ಸಚ್ಛಿಕಾತಬ್ಬಾ’’ತಿ ಸೋತಾವಧಾನಂ, ತಂಪಜಾನನಾ ಪಞ್ಞಾ ಸುತಮಯೇ ಞಾಣಂ.

‘‘ಇಮೇ ಧಮ್ಮಾ ಹಾನಭಾಗಿಯಾ’’ತಿ ಸೋತಾವಧಾನಂ, ತಂಪಜಾನನಾ ಪಞ್ಞಾ ಸುತಮಯೇ ಞಾಣಂ.

‘‘ಇಮೇ ಧಮ್ಮಾ ಠಿತಿಭಾಗಿಯಾ’’ತಿ ಸೋತಾವಧಾನಂ, ತಂಪಜಾನನಾ ಪಞ್ಞಾ ಸುತಮಯೇ ಞಾಣಂ.

‘‘ಇಮೇ ಧಮ್ಮಾ ವಿಸೇಸಭಾಗಿಯಾ’’ತಿ ಸೋತಾವಧಾನಂ, ತಂಪಜಾನನಾ ಪಞ್ಞಾ ಸುತಮಯೇ ಞಾಣಂ.

‘‘ಇಮೇ ಧಮ್ಮಾ ನಿಬ್ಬೇಧಭಾಗಿಯಾ’’ತಿ ಸೋತಾವಧಾನಂ, ತಂಪಜಾನನಾ ಪಞ್ಞಾ ಸುತಮಯೇ ಞಾಣಂ.

‘‘ಸಬ್ಬೇ ಸಙ್ಖಾರಾ ಅನಿಚ್ಚಾ’’ತಿ ಸೋತಾವಧಾನಂ, ತಂಪಜಾನನಾ ಪಞ್ಞಾ ಸುತಮಯೇ ಞಾಣಂ.

‘‘ಸಬ್ಬೇ ಸಙ್ಖಾರಾ ದುಕ್ಖಾ’’ತಿ ಸೋತಾವಧಾನಂ, ತಂಪಜಾನನಾ ಪಞ್ಞಾ ಸುತಮಯೇ ಞಾಣಂ.

‘‘ಸಬ್ಬೇ ಧಮ್ಮಾ ಅನತ್ತಾ’’ತಿ ಸೋತಾವಧಾನಂ, ತಂಪಜಾನನಾ ಪಞ್ಞಾ ಸುತಮಯೇ ಞಾಣಂ.

‘‘ಇದಂ ದುಕ್ಖಂ ಅರಿಯಸಚ್ಚ’’ನ್ತಿ ಸೋತಾವಧಾನಂ, ತಂಪಜಾನನಾ ಪಞ್ಞಾ ಸುತಮಯೇ ಞಾಣಂ.

‘‘ಇದಂ ದುಕ್ಖಸಮುದಯಂ [ದುಕ್ಖಸಮುದಯೋ (ಸ್ಯಾ.)] ಅರಿಯಸಚ್ಚ’’ನ್ತಿ ಸೋತಾವಧಾನಂ, ತಂಪಜಾನನಾ ಪಞ್ಞಾ ಸುತಮಯೇ ಞಾಣಂ.

‘‘ಇದಂ ದುಕ್ಖನಿರೋಧಂ [ದುಕ್ಖನಿರೋಧೋ (ಸ್ಯಾ.) ಅಟ್ಠಕಥಾ ಓಲೋಕೇತಬ್ಬಾ] ಅರಿಯಸಚ್ಚ’’ನ್ತಿ ಸೋತಾವಧಾನಂ, ತಂಪಜಾನನಾ ಪಞ್ಞಾ ಸುತಮಯೇ ಞಾಣಂ.

‘‘ಇದಂ ದುಕ್ಖನಿರೋಧಗಾಮಿನೀ ಪಟಿಪದಾ ಅರಿಯಸಚ್ಚ’’ನ್ತಿ ಸೋತಾವಧಾನಂ, ತಂಪಜಾನನಾ ಪಞ್ಞಾ ಸುತಮಯೇ ಞಾಣಂ.

೨. ಕಥಂ ‘‘ಇಮೇ ಧಮ್ಮಾ ಅಭಿಞ್ಞೇಯ್ಯಾ’’ತಿ ಸೋತಾವಧಾನಂ, ತಂಪಜಾನನಾ ಪಞ್ಞಾ ಸುತಮಯೇ ಞಾಣಂ?

ಏಕೋ ಧಮ್ಮೋ ಅಭಿಞ್ಞೇಯ್ಯೋ – ಸಬ್ಬೇ ಸತ್ತಾ ಆಹಾರಟ್ಠಿತಿಕಾ. ದ್ವೇ ಧಮ್ಮಾ ಅಭಿಞ್ಞೇಯ್ಯಾ – ದ್ವೇ ಧಾತುಯೋ. ತಯೋ ಧಮ್ಮಾ ಅಭಿಞ್ಞೇಯ್ಯಾ – ತಿಸ್ಸೋ ಧಾತುಯೋ. ಚತ್ತಾರೋ ಧಮ್ಮಾ ಅಭಿಞ್ಞೇಯ್ಯಾ – ಚತ್ತಾರಿ ಅರಿಯಸಚ್ಚಾನಿ. ಪಞ್ಚ ಧಮ್ಮಾ ಅಭಿಞ್ಞೇಯ್ಯಾ – ಪಞ್ಚ ವಿಮುತ್ತಾಯತನಾನಿ. ಛ ಧಮ್ಮಾ ಅಭಿಞ್ಞೇಯ್ಯಾ – ಛ ಅನುತ್ತರಿಯಾನಿ. ಸತ್ತ ಧಮ್ಮಾ ಅಭಿಞ್ಞೇಯ್ಯಾ – ಸತ್ತ ನಿದ್ದಸವತ್ಥೂನಿ. ಅಟ್ಠ ಧಮ್ಮಾ ಅಭಿಞ್ಞೇಯ್ಯಾ – ಅಟ್ಠ ಅಭಿಭಾಯತನಾನಿ. ನವ ಧಮ್ಮಾ ಅಭಿಞ್ಞೇಯ್ಯಾ – ನವ ಅನುಪುಬ್ಬವಿಹಾರಾ. ದಸ ಧಮ್ಮಾ ಅಭಿಞ್ಞೇಯ್ಯಾ – ದಸ ನಿಜ್ಜರವತ್ಥೂನಿ.

೩. ‘‘ಸಬ್ಬಂ, ಭಿಕ್ಖವೇ, ಅಭಿಞ್ಞೇಯ್ಯಂ. ಕಿಞ್ಚ, ಭಿಕ್ಖವೇ, ಸಬ್ಬಂ ಅಭಿಞ್ಞೇಯ್ಯಂ? ಚಕ್ಖು [ಚಕ್ಖುಂ (ಸ್ಯಾ. ಕ.)], ಭಿಕ್ಖವೇ, ಅಭಿಞ್ಞೇಯ್ಯಂ; ರೂಪಾ ಅಭಿಞ್ಞೇಯ್ಯಾ; ಚಕ್ಖುವಿಞ್ಞಾಣಂ ಅಭಿಞ್ಞೇಯ್ಯಂ; ಚಕ್ಖುಸಮ್ಫಸ್ಸೋ ಅಭಿಞ್ಞೇಯ್ಯೋ; ಯಮ್ಪಿದಂ [ಯಮಿದಂ (ಕ.) ಸಂ. ನಿ. ೪.೫೨ ಪಸ್ಸಿತಬ್ಬೋ] ಚಕ್ಖುಸಮ್ಫಸ್ಸಪಚ್ಚಯಾ ಉಪ್ಪಜ್ಜತಿ ವೇದಯಿತಂ ಸುಖಂ ವಾ ದುಕ್ಖಂ ವಾ ಅದುಕ್ಖಮಸುಖಂ ವಾ, ತಮ್ಪಿ ಅಭಿಞ್ಞೇಯ್ಯಂ. ಸೋತಂ ಅಭಿಞ್ಞೇಯ್ಯಂ; ಸದ್ದಾ ಅಭಿಞ್ಞೇಯ್ಯಾ…ಪೇ… ಘಾನಂ ಅಭಿಞ್ಞೇಯ್ಯಂ; ಗನ್ಧಾ ಅಭಿಞ್ಞೇಯ್ಯಾ… ಜಿವ್ಹಾ ಅಭಿಞ್ಞೇಯ್ಯಾ; ರಸಾ ಅಭಿಞ್ಞೇಯ್ಯಾ… ಕಾಯೋ ಅಭಿಞ್ಞೇಯ್ಯೋ; ಫೋಟ್ಠಬ್ಬಾ ಅಭಿಞ್ಞೇಯ್ಯಾ… ಮನೋ ಅಭಿಞ್ಞೇಯ್ಯೋ; ಧಮ್ಮಾ ಅಭಿಞ್ಞೇಯ್ಯಾ; ಮನೋವಿಞ್ಞಾಣಂ ಅಭಿಞ್ಞೇಯ್ಯಂ, ಮನೋಸಮ್ಫಸ್ಸೋ ಅಭಿಞ್ಞೇಯ್ಯೋ; ಯಮ್ಪಿದಂ ಮನೋಸಮ್ಫಸ್ಸಪಚ್ಚಯಾ ಉಪ್ಪಜ್ಜತಿ ವೇದಯಿತಂ ಸುಖಂ ವಾ ದುಕ್ಖಂ ವಾ ಅದುಕ್ಖಮಸುಖಂ ವಾ, ತಮ್ಪಿ ಅಭಿಞ್ಞೇಯ್ಯಂ.’’

ರೂಪಂ ಅಭಿಞ್ಞೇಯ್ಯಂ; ವೇದನಾ ಅಭಿಞ್ಞೇಯ್ಯಾ; ಸಞ್ಞಾ ಅಭಿಞ್ಞೇಯ್ಯಾ; ಸಙ್ಖಾರಾ ಅಭಿಞ್ಞೇಯ್ಯಾ; ವಿಞ್ಞಾಣಂ ಅಭಿಞ್ಞೇಯ್ಯಂ.

ಚಕ್ಖು ಅಭಿಞ್ಞೇಯ್ಯಂ; ಸೋತಂ ಅಭಿಞ್ಞೇಯ್ಯಂ; ಘಾನಂ ಅಭಿಞ್ಞೇಯ್ಯಂ; ಜಿವ್ಹಾ ಅಭಿಞ್ಞೇಯ್ಯಾ; ಕಾಯೋ ಅಭಿಞ್ಞೇಯ್ಯೋ; ಮನೋ ಅಭಿಞ್ಞೇಯ್ಯೋ. ರೂಪಾ ಅಭಿಞ್ಞೇಯ್ಯಾ; ಸದ್ದಾ ಅಭಿಞ್ಞೇಯ್ಯಾ; ಗನ್ಧಾ ಅಭಿಞ್ಞೇಯ್ಯಾ; ರಸಾ ಅಭಿಞ್ಞೇಯ್ಯಾ; ಫೋಟ್ಠಬ್ಬಾ ಅಭಿಞ್ಞೇಯ್ಯಾ; ಧಮ್ಮಾ ಅಭಿಞ್ಞೇಯ್ಯಾ. ಚಕ್ಖುವಿಞ್ಞಾಣಂ ಅಭಿಞ್ಞೇಯ್ಯಂ; ಸೋತವಿಞ್ಞಾಣಂ ಅಭಿಞ್ಞೇಯ್ಯಂ; ಘಾನವಿಞ್ಞಾಣಂ ಅಭಿಞ್ಞೇಯ್ಯಂ; ಜಿವ್ಹಾವಿಞ್ಞಾಣಂ ಅಭಿಞ್ಞೇಯ್ಯಂ; ಕಾಯವಿಞ್ಞಾಣಂ ಅಭಿಞ್ಞೇಯ್ಯಂ; ಮನೋವಿಞ್ಞಾಣಂ ಅಭಿಞ್ಞೇಯ್ಯಂ. ಚಕ್ಖುಸಮ್ಫಸ್ಸೋ ಅಭಿಞ್ಞೇಯ್ಯೋ; ಸೋತಸಮ್ಫಸ್ಸೋ ಅಭಿಞ್ಞೇಯ್ಯೋ; ಘಾನಸಮ್ಫಸ್ಸೋ ಅಭಿಞ್ಞೇಯ್ಯೋ; ಜಿವ್ಹಾಸಮ್ಫಸ್ಸೋ ಅಭಿಞ್ಞೇಯ್ಯೋ; ಕಾಯಸಮ್ಫಸ್ಸೋ ಅಭಿಞ್ಞೇಯ್ಯೋ; ಮನೋಸಮ್ಫಸ್ಸೋ ಅಭಿಞ್ಞೇಯ್ಯೋ; ಚಕ್ಖುಸಮ್ಫಸ್ಸಜಾ ವೇದನಾ ಅಭಿಞ್ಞೇಯ್ಯಾ; ಸೋತಸಮ್ಫಸ್ಸಜಾ ವೇದನಾ ಅಭಿಞ್ಞೇಯ್ಯಾ; ಘಾನಸಮ್ಫಸ್ಸಜಾ ವೇದನಾ ಅಭಿಞ್ಞೇಯ್ಯಾ; ಜಿವ್ಹಾಸಮ್ಫಸ್ಸಜಾ ವೇದನಾ ಅಭಿಞ್ಞೇಯ್ಯಾ; ಕಾಯಸಮ್ಫಸ್ಸಜಾ ವೇದನಾ ಅಭಿಞ್ಞೇಯ್ಯಾ; ಮನೋಸಮ್ಫಸ್ಸಜಾ ವೇದನಾ ಅಭಿಞ್ಞೇಯ್ಯಾ. ರೂಪಸಞ್ಞಾ ಅಭಿಞ್ಞೇಯ್ಯಾ; ಸದ್ದಸಞ್ಞಾ ಅಭಿಞ್ಞೇಯ್ಯಾ; ಗನ್ಧಸಞ್ಞಾ ಅಭಿಞ್ಞೇಯ್ಯಾ; ರಸಸಞ್ಞಾ ಅಭಿಞ್ಞೇಯ್ಯಾ; ಫೋಟ್ಠಬ್ಬಸಞ್ಞಾ ಅಭಿಞ್ಞೇಯ್ಯಾ; ಧಮ್ಮಸಞ್ಞಾ ಅಭಿಞ್ಞೇಯ್ಯಾ. ರೂಪಸಞ್ಚೇತನಾ ಅಭಿಞ್ಞೇಯ್ಯಾ; ಸದ್ದಸಞ್ಚೇತನಾ ಅಭಿಞ್ಞೇಯ್ಯಾ; ಗನ್ಧಸಞ್ಚೇತನಾ ಅಭಿಞ್ಞೇಯ್ಯಾ; ರಸಸಞ್ಚೇತನಾ ಅಭಿಞ್ಞೇಯ್ಯಾ; ಫೋಟ್ಠಬ್ಬಸಞ್ಚೇತನಾ ಅಭಿಞ್ಞೇಯ್ಯಾ; ಧಮ್ಮಸಞ್ಚೇತನಾ ಅಭಿಞ್ಞೇಯ್ಯಾ. ರೂಪತಣ್ಹಾ ಅಭಿಞ್ಞೇಯ್ಯಾ; ಸದ್ದತಣ್ಹಾ ಅಭಿಞ್ಞೇಯ್ಯಾ; ಗನ್ಧತಣ್ಹಾ ಅಭಿಞ್ಞೇಯ್ಯಾ; ರಸತಣ್ಹಾ ಅಭಿಞ್ಞೇಯ್ಯಾ; ಫೋಟ್ಠಬ್ಬತಣ್ಹಾ ಅಭಿಞ್ಞೇಯ್ಯಾ; ಧಮ್ಮತಣ್ಹಾ ಅಭಿಞ್ಞೇಯ್ಯಾ. ರೂಪವಿತಕ್ಕೋ ಅಭಿಞ್ಞೇಯ್ಯೋ; ಸದ್ದವಿತಕ್ಕೋ ಅಭಿಞ್ಞೇಯ್ಯೋ; ಗನ್ಧವಿತಕ್ಕೋ ಅಭಿಞ್ಞೇಯ್ಯೋ; ರಸವಿತಕ್ಕೋ ಅಭಿಞ್ಞೇಯ್ಯೋ; ಫೋಟ್ಠಬ್ಬವಿತಕ್ಕೋ ಅಭಿಞ್ಞೇಯ್ಯೋ; ಧಮ್ಮವಿತಕ್ಕೋ ಅಭಿಞ್ಞೇಯ್ಯೋ. ರೂಪವಿಚಾರೋ ಅಭಿಞ್ಞೇಯ್ಯೋ; ಸದ್ದವಿಚಾರೋ ಅಭಿಞ್ಞೇಯ್ಯೋ; ಗನ್ಧವಿಚಾರೋ ಅಭಿಞ್ಞೇಯ್ಯೋ; ರಸವಿಚಾರೋ ಅಭಿಞ್ಞೇಯ್ಯೋ; ಫೋಟ್ಠಬ್ಬವಿಚಾರೋ ಅಭಿಞ್ಞೇಯ್ಯೋ; ಧಮ್ಮವಿಚಾರೋ ಅಭಿಞ್ಞೇಯ್ಯೋ.

೪. ಪಥವೀಧಾತು ಅಭಿಞ್ಞೇಯ್ಯಾ; ಆಪೋಧಾತು ಅಭಿಞ್ಞೇಯ್ಯಾ; ತೇಜೋಧಾತು ಅಭಿಞ್ಞೇಯ್ಯಾ; ವಾಯೋಧಾತು ಅಭಿಞ್ಞೇಯ್ಯಾ; ಆಕಾಸಧಾತು ಅಭಿಞ್ಞೇಯ್ಯಾ; ವಿಞ್ಞಾಣಧಾತು ಅಭಿಞ್ಞೇಯ್ಯಾ.

ಪಥವೀಕಸಿಣಂ ಅಭಿಞ್ಞೇಯ್ಯಂ; ಆಪೋಕಸಿಣಂ ಅಭಿಞ್ಞೇಯ್ಯಂ; ತೇಜೋಕಸಿಣಂ ಅಭಿಞ್ಞೇಯ್ಯಂ; ವಾಯೋಕಸಿಣಂ ಅಭಿಞ್ಞೇಯ್ಯಂ; ನೀಲಕಸಿಣಂ ಅಭಿಞ್ಞೇಯ್ಯಂ; ಪೀತಕಸಿಣಂ ಅಭಿಞ್ಞೇಯ್ಯಂ; ಲೋಹಿತಕಸಿಣಂ ಅಭಿಞ್ಞೇಯ್ಯಂ; ಓದಾತಕಸಿಣಂ ಅಭಿಞ್ಞೇಯ್ಯಂ; ಆಕಾಸಕಸಿಣಂ ಅಭಿಞ್ಞೇಯ್ಯಂ; ವಿಞ್ಞಾಣಕಸಿಣಂ ಅಭಿಞ್ಞೇಯ್ಯಂ.

ಕೇಸಾ ಅಭಿಞ್ಞೇಯ್ಯಾ; ಲೋಮಾ ಅಭಿಞ್ಞೇಯ್ಯಾ; ನಖಾ ಅಭಿಞ್ಞೇಯ್ಯಾ; ದನ್ತಾ ಅಭಿಞ್ಞೇಯ್ಯಾ; ತಚೋ ಅಭಿಞ್ಞೇಯ್ಯೋ, ಮಂಸಂ ಅಭಿಞ್ಞೇಯ್ಯಂ; ನ್ಹಾರೂ [ನಹಾರೂ (ಸ್ಯಾ.)] ಅಭಿಞ್ಞೇಯ್ಯಾ; ಅಟ್ಠೀ ಅಭಿಞ್ಞೇಯ್ಯಾ; ಅಟ್ಠಿಮಿಞ್ಜಾ ಅಭಿಞ್ಞೇಯ್ಯಾ [ಅಟ್ಠಿಮಞ್ಜಂ ಅಭಿಞ್ಞೇಯ್ಯಂ (ಸ್ಯಾ. ಕ.)]; ವಕ್ಕಂ ಅಭಿಞ್ಞೇಯ್ಯಂ; ಹದಯಂ ಅಭಿಞ್ಞೇಯ್ಯಂ; ಯಕನಂ ಅಭಿಞ್ಞೇಯ್ಯಂ; ಕಿಲೋಮಕಂ ಅಭಿಞ್ಞೇಯ್ಯಂ; ಪಿಹಕಂ ಅಭಿಞ್ಞೇಯ್ಯಂ; ಪಪ್ಫಾಸಂ ಅಭಿಞ್ಞೇಯ್ಯಂ; ಅನ್ತಂ ಅಭಿಞ್ಞೇಯ್ಯಂ ಅನ್ತಗುಣಂ ಅಭಿಞ್ಞೇಯ್ಯಂ; ಉದರಿಯಂ ಅಭಿಞ್ಞೇಯ್ಯಂ; ಕರೀಸಂ ಅಭಿಞ್ಞೇಯ್ಯಂ; ಪಿತ್ತಂ ಅಭಿಞ್ಞೇಯ್ಯಂ; ಸೇಮ್ಹಂ ಅಭಿಞ್ಞೇಯ್ಯಂ; ಪುಬ್ಬೋ ಅಭಿಞ್ಞೇಯ್ಯೋ; ಲೋಹಿತಂ ಅಭಿಞ್ಞೇಯ್ಯಂ; ಸೇದೋ ಅಭಿಞ್ಞೇಯ್ಯೋ; ಮೇದೋ ಅಭಿಞ್ಞೇಯ್ಯೋ; ಅಸ್ಸು ಅಭಿಞ್ಞೇಯ್ಯಂ; ವಸಾ ಅಭಿಞ್ಞೇಯ್ಯಾ; ಖೇಳೋ ಅಭಿಞ್ಞೇಯ್ಯೋ; ಸಿಙ್ಘಾಣಿಕಾ ಅಭಿಞ್ಞೇಯ್ಯಾ; ಲಸಿಕಾ ಅಭಿಞ್ಞೇಯ್ಯಾ; ಮುತ್ತಂ ಅಭಿಞ್ಞೇಯ್ಯಂ; ಮತ್ಥಲುಙ್ಗಂ ಅಭಿಞ್ಞೇಯ್ಯಂ.

ಚಕ್ಖಾಯತನಂ ಅಭಿಞ್ಞೇಯ್ಯಂ; ರೂಪಾಯತನಂ ಅಭಿಞ್ಞೇಯ್ಯಂ. ಸೋತಾಯತನಂ ಅಭಿಞ್ಞೇಯ್ಯಂ; ಸದ್ದಾಯತನಂ ಅಭಿಞ್ಞೇಯ್ಯಂ. ಘಾನಾಯತನಂ ಅಭಿಞ್ಞೇಯ್ಯಂ; ಗನ್ಧಾಯತನಂ ಅಭಿಞ್ಞೇಯ್ಯಂ. ಜಿವ್ಹಾಯತನಂ ಅಭಿಞ್ಞೇಯ್ಯಂ; ರಸಾಯತನಂ ಅಭಿಞ್ಞೇಯ್ಯಂ. ಕಾಯಾಯತನಂ ಅಭಿಞ್ಞೇಯ್ಯಂ; ಫೋಟ್ಠಬ್ಬಾಯತನಂ ಅಭಿಞ್ಞೇಯ್ಯಂ. ಮನಾಯತನಂ ಅಭಿಞ್ಞೇಯ್ಯಂ; ಧಮ್ಮಾಯತನಂ ಅಭಿಞ್ಞೇಯ್ಯಂ.

ಚಕ್ಖುಧಾತು ಅಭಿಞ್ಞೇಯ್ಯಾ; ರೂಪಧಾತು ಅಭಿಞ್ಞೇಯ್ಯಾ; ಚಕ್ಖುವಿಞ್ಞಾಣಧಾತು ಅಭಿಞ್ಞೇಯ್ಯಾ. ಸೋತಧಾತು ಅಭಿಞ್ಞೇಯ್ಯಾ; ಸದ್ದಧಾತು ಅಭಿಞ್ಞೇಯ್ಯಾ; ಸೋತವಿಞ್ಞಾಣಧಾತು ಅಭಿಞ್ಞೇಯ್ಯಾ. ಘಾನಧಾತು ಅಭಿಞ್ಞೇಯ್ಯಾ; ಗನ್ಧಧಾತು ಅಭಿಞ್ಞೇಯ್ಯಾ; ಘಾನವಿಞ್ಞಾಣಧಾತು ಅಭಿಞ್ಞೇಯ್ಯಾ. ಜಿವ್ಹಾಧಾತು ಅಭಿಞ್ಞೇಯ್ಯಾ; ರಸಧಾತು ಅಭಿಞ್ಞೇಯ್ಯಾ; ಜಿವ್ಹಾವಿಞ್ಞಾಣಧಾತು ಅಭಿಞ್ಞೇಯ್ಯಾ. ಕಾಯಧಾತು ಅಭಿಞ್ಞೇಯ್ಯಾ; ಫೋಟ್ಠಬ್ಬಧಾತು ಅಭಿಞ್ಞೇಯ್ಯಾ; ಕಾಯವಿಞ್ಞಾಣಧಾತು ಅಭಿಞ್ಞೇಯ್ಯಾ. ಮನೋಧಾತು ಅಭಿಞ್ಞೇಯ್ಯಾ; ಧಮ್ಮಧಾತು ಅಭಿಞ್ಞೇಯ್ಯಾ; ಮನೋವಿಞ್ಞಾಣಧಾತು ಅಭಿಞ್ಞೇಯ್ಯಾ.

ಚಕ್ಖುನ್ದ್ರಿಯಂ ಅಭಿಞ್ಞೇಯ್ಯಂ; ಸೋತಿನ್ದ್ರಿಯಂ ಅಭಿಞ್ಞೇಯ್ಯಂ; ಘಾನಿನ್ದ್ರಿಯಂ ಅಭಿಞ್ಞೇಯ್ಯಂ; ಜಿವ್ಹಿನ್ದ್ರಿಯಂ ಅಭಿಞ್ಞೇಯ್ಯಂ; ಕಾಯಿನ್ದ್ರಿಯಂ ಅಭಿಞ್ಞೇಯ್ಯಂ; ಮನಿನ್ದ್ರಿಯಂ ಅಭಿಞ್ಞೇಯ್ಯಂ; ಜೀವಿತಿನ್ದ್ರಿಯಂ ಅಭಿಞ್ಞೇಯ್ಯಂ; ಇತ್ಥಿನ್ದ್ರಿಯಂ ಅಭಿಞ್ಞೇಯ್ಯಂ; ಪುರಿಸಿನ್ದ್ರಿಯಂ ಅಭಿಞ್ಞೇಯ್ಯಂ; ಸುಖಿನ್ದ್ರಿಯಂ ಅಭಿಞ್ಞೇಯ್ಯಂ; ದುಕ್ಖಿನ್ದ್ರಿಯಂ ಅಭಿಞ್ಞೇಯ್ಯಂ; ಸೋಮನಸ್ಸಿನ್ದ್ರಿಯಂ ಅಭಿಞ್ಞೇಯ್ಯಂ; ದೋಮನಸ್ಸಿನ್ದ್ರಿಯಂ ಅಭಿಞ್ಞೇಯ್ಯಂ; ಉಪೇಕ್ಖಿನ್ದ್ರಿಯಂ ಅಭಿಞ್ಞೇಯ್ಯಂ; ಸದ್ಧಿನ್ದ್ರಿಯಂ ಅಭಿಞ್ಞೇಯ್ಯಂ; ವೀರಿಯಿನ್ದ್ರಿಯಂ [ವಿರಿಯಿನ್ದ್ರಿಯಂ (ಸ್ಯಾ.)] ಅಭಿಞ್ಞೇಯ್ಯಂ; ಸತಿನ್ದ್ರಿಯಂ ಅಭಿಞ್ಞೇಯ್ಯಂ; ಸಮಾಧಿನ್ದ್ರಿಯಂ ಅಭಿಞ್ಞೇಯ್ಯಂ; ಪಞ್ಞಿನ್ದ್ರಿಯಂ ಅಭಿಞ್ಞೇಯ್ಯಂ; ಅನಞ್ಞಾತಞ್ಞಸ್ಸಾಮೀತಿನ್ದ್ರಿಯಂ ಅಭಿಞ್ಞೇಯ್ಯಂ; ಅಞ್ಞಿನ್ದ್ರಿಯಂ ಅಭಿಞ್ಞೇಯ್ಯಂ; ಅಞ್ಞಾತಾವಿನ್ದ್ರಿಯಂ ಅಭಿಞ್ಞೇಯ್ಯಂ.

೫. ಕಾಮಧಾತು ಅಭಿಞ್ಞೇಯ್ಯಾ; ರೂಪಧಾತು ಅಭಿಞ್ಞೇಯ್ಯಾ; ಅರೂಪಧಾತು ಅಭಿಞ್ಞೇಯ್ಯಾ. ಕಾಮಭವೋ ಅಭಿಞ್ಞೇಯ್ಯೋ; ರೂಪಭವೋ ಅಭಿಞ್ಞೇಯ್ಯೋ; ಅರೂಪಭವೋ ಅಭಿಞ್ಞೇಯ್ಯೋ. ಸಞ್ಞಾಭವೋ ಅಭಿಞ್ಞೇಯ್ಯೋ; ಅಸಞ್ಞಾಭವೋ ಅಭಿಞ್ಞೇಯ್ಯೋ; ನೇವಸಞ್ಞಾನಾಸಞ್ಞಾಭವೋ ಅಭಿಞ್ಞೇಯ್ಯೋ. ಏಕವೋಕಾರಭವೋ ಅಭಿಞ್ಞೇಯ್ಯೋ; ಚತುವೋಕಾರಭವೋ ಅಭಿಞ್ಞೇಯ್ಯೋ; ಪಞ್ಚವೋಕಾರಭವೋ ಅಭಿಞ್ಞೇಯ್ಯೋ.

೬. ಪಠಮಂ ಝಾನಂ [ಪಠಮಜ್ಝಾನಂ (ಸ್ಯಾ.) ಏವಮೀದಿಸೇಸು ಠಾನೇಸು] ಅಭಿಞ್ಞೇಯ್ಯಂ; ದುತಿಯಂ ಝಾನಂ ಅಭಿಞ್ಞೇಯ್ಯಂ; ತತಿಯಂ ಝಾನಂ ಅಭಿಞ್ಞೇಯ್ಯಂ; ಚತುತ್ಥಂ ಝಾನಂ ಅಭಿಞ್ಞೇಯ್ಯಂ. ಮೇತ್ತಾಚೇತೋವಿಮುತ್ತಿ ಅಭಿಞ್ಞೇಯ್ಯಾ; ಕರುಣಾಚೇತೋವಿಮುತ್ತಿ ಅಭಿಞ್ಞೇಯ್ಯಾ; ಮುದಿತಾಚೇತೋವಿಮುತ್ತಿ ಅಭಿಞ್ಞೇಯ್ಯಾ; ಉಪೇಕ್ಖಾಚೇತೋವಿಮುತ್ತಿ ಅಭಿಞ್ಞೇಯ್ಯಾ. ಆಕಾಸಾನಞ್ಚಾಯತನಸಮಾಪತ್ತಿ ಅಭಿಞ್ಞೇಯ್ಯಾ; ವಿಞ್ಞಾಣಞ್ಚಾಯತನಸಮಾಪತ್ತಿ ಅಭಿಞ್ಞೇಯ್ಯಾ; ಆಕಿಞ್ಚಞ್ಞಾಯತನಸಮಾಪತ್ತಿ ಅಭಿಞ್ಞೇಯ್ಯಾ; ನೇವಸಞ್ಞಾನಾಸಞ್ಞಾಯತನಸಮಾಪತ್ತಿ ಅಭಿಞ್ಞೇಯ್ಯಾ.

ಅವಿಜ್ಜಾ ಅಭಿಞ್ಞೇಯ್ಯಾ; ಸಙ್ಖಾರಾ ಅಭಿಞ್ಞೇಯ್ಯಾ; ವಿಞ್ಞಾಣಂ ಅಭಿಞ್ಞೇಯ್ಯಂ; ನಾಮರೂಪಂ ಅಭಿಞ್ಞೇಯ್ಯಂ; ಸಳಾಯತನಂ ಅಭಿಞ್ಞೇಯ್ಯಂ; ಫಸ್ಸೋ ಅಭಿಞ್ಞೇಯ್ಯೋ; ವೇದನಾ ಅಭಿಞ್ಞೇಯ್ಯಾ; ತಣ್ಹಾ ಅಭಿಞ್ಞೇಯ್ಯಾ; ಉಪಾದಾನಂ ಅಭಿಞ್ಞೇಯ್ಯಂ; ಭವೋ ಅಭಿಞ್ಞೇಯ್ಯೋ; ಜಾತಿ ಅಭಿಞ್ಞೇಯ್ಯಾ; ಜರಾಮರಣಂ ಅಭಿಞ್ಞೇಯ್ಯಂ.

೭. ದುಕ್ಖಂ ಅಭಿಞ್ಞೇಯ್ಯಂ; ದುಕ್ಖಸಮುದಯೋ ಅಭಿಞ್ಞೇಯ್ಯೋ; ದುಕ್ಖನಿರೋಧೋ ಅಭಿಞ್ಞೇಯ್ಯೋ; ದುಕ್ಖನಿರೋಧಗಾಮಿನೀ ಪಟಿಪದಾ ಅಭಿಞ್ಞೇಯ್ಯಾ. ರೂಪಂ ಅಭಿಞ್ಞೇಯ್ಯಂ; ರೂಪಸಮುದಯೋ ಅಭಿಞ್ಞೇಯ್ಯೋ; ರೂಪನಿರೋಧೋ ಅಭಿಞ್ಞೇಯ್ಯೋ; ರೂಪನಿರೋಧಗಾಮಿನೀ ಪಟಿಪದಾ ಅಭಿಞ್ಞೇಯ್ಯಾ. ವೇದನಾ ಅಭಿಞ್ಞೇಯ್ಯಾ…ಪೇ… ಸಞ್ಞಾ ಅಭಿಞ್ಞೇಯ್ಯಾ…ಪೇ… ಸಙ್ಖಾರಾ ಅಭಿಞ್ಞೇಯ್ಯಾ…ಪೇ… ವಿಞ್ಞಾಣಂ ಅಭಿಞ್ಞೇಯ್ಯಂ. ಚಕ್ಖು ಅಭಿಞ್ಞೇಯ್ಯಂ…ಪೇ… ಜರಾಮರಣಂ ಅಭಿಞ್ಞೇಯ್ಯಂ; ಜರಾಮರಣಸಮುದಯೋ ಅಭಿಞ್ಞೇಯ್ಯೋ; ಜರಾಮರಣನಿರೋಧೋ ಅಭಿಞ್ಞೇಯ್ಯೋ; ಜರಾಮರಣನಿರೋಧಗಾಮಿನೀ ಪಟಿಪದಾ ಅಭಿಞ್ಞೇಯ್ಯಾ.

ದುಕ್ಖಸ್ಸ ಪರಿಞ್ಞಟ್ಠೋ ಅಭಿಞ್ಞೇಯ್ಯೋ; ದುಕ್ಖಸಮುದಯಸ್ಸ ಪಹಾನಟ್ಠೋ ಅಭಿಞ್ಞೇಯ್ಯೋ; ದುಕ್ಖನಿರೋಧಸ್ಸ ಸಚ್ಛಿಕಿರಿಯಟ್ಠೋ ಅಭಿಞ್ಞೇಯ್ಯೋ; ದುಕ್ಖನಿರೋಧಗಾಮಿನಿಯಾ ಪಟಿಪದಾಯ ಭಾವನಟ್ಠೋ ಅಭಿಞ್ಞೇಯ್ಯೋ. ರೂಪಸ್ಸ ಪರಿಞ್ಞಟ್ಠೋ ಅಭಿಞ್ಞೇಯ್ಯೋ; ರೂಪಸಮುದಯಸ್ಸ ಪಹಾನಟ್ಠೋ ಅಭಿಞ್ಞೇಯ್ಯೋ; ರೂಪನಿರೋಧಸ್ಸ ಸಚ್ಛಿಕಿರಿಯಟ್ಠೋ ಅಭಿಞ್ಞೇಯ್ಯೋ; ರೂಪನಿರೋಧಗಾಮಿನಿಯಾ ಪಟಿಪದಾಯ ಭಾವನಟ್ಠೋ ಅಭಿಞ್ಞೇಯ್ಯೋ. ವೇದನಾಯ…ಪೇ… ಸಞ್ಞಾಯ… ಸಙ್ಖಾರಾನಂ… ವಿಞ್ಞಾಣಸ್ಸ… ಚಕ್ಖುಸ್ಸ…ಪೇ… ಜರಾಮರಣಸ್ಸ ಪರಿಞ್ಞಟ್ಠೋ ಅಭಿಞ್ಞೇಯ್ಯೋ; ಜರಾಮರಣಸಮುದಯಸ್ಸ ಪಹಾನಟ್ಠೋ ಅಭಿಞ್ಞೇಯ್ಯೋ; ಜರಾಮರಣನಿರೋಧಸ್ಸ ಸಚ್ಛಿಕಿರಿಯಟ್ಠೋ ಅಭಿಞ್ಞೇಯ್ಯೋ; ಜರಾಮರಣನಿರೋಧಗಾಮಿನಿಯಾ ಪಟಿಪದಾಯ ಭಾವನಟ್ಠೋ ಅಭಿಞ್ಞೇಯ್ಯೋ.

ದುಕ್ಖಸ್ಸ ಪರಿಞ್ಞಾಪಟಿವೇಧಟ್ಠೋ ಅಭಿಞ್ಞೇಯ್ಯೋ; ದುಕ್ಖಸಮುದಯಸ್ಸ ಪಹಾನಪಟಿವೇಧಟ್ಠೋ ಅಭಿಞ್ಞೇಯ್ಯೋ; ದುಕ್ಖನಿರೋಧಸ್ಸ ಸಚ್ಛಿಕಿರಿಯಾಪಟಿವೇಧಟ್ಠೋ ಅಭಿಞ್ಞೇಯ್ಯೋ; ದುಕ್ಖನಿರೋಧಗಾಮಿನಿಯಾ ಪಟಿಪದಾಯ ಭಾವನಾಪಟಿವೇಧಟ್ಠೋ ಅಭಿಞ್ಞೇಯ್ಯೋ. ರೂಪಸ್ಸ ಪರಿಞ್ಞಾಪಟಿವೇಧಟ್ಠೋ ಅಭಿಞ್ಞೇಯ್ಯೋ; ರೂಪಸಮುದಯಸ್ಸ ಪಹಾನಪಟಿವೇಧಟ್ಠೋ ಅಭಿಞ್ಞೇಯ್ಯೋ; ರೂಪನಿರೋಧಸ್ಸ ಸಚ್ಛಿಕಿರಿಯಾಪಟಿವೇಧಟ್ಠೋ ಅಭಿಞ್ಞೇಯ್ಯೋ; ರೂಪನಿರೋಧಗಾಮಿನಿಯಾ ಪಟಿಪದಾಯ ಭಾವನಾಪಟಿವೇಧಟ್ಠೋ ಅಭಿಞ್ಞೇಯ್ಯೋ. ವೇದನಾಯ…ಪೇ… ಸಞ್ಞಾಯ… ಸಙ್ಖಾರಾನಂ… ವಿಞ್ಞಾಣಸ್ಸ… ಚಕ್ಖುಸ್ಸ…ಪೇ… ಜರಾಮರಣಸ್ಸ ಪರಿಞ್ಞಾಪಟಿವೇಧಟ್ಠೋ ಅಭಿಞ್ಞೇಯ್ಯೋ; ಜರಾಮರಣಸಮುದಯಸ್ಸ ಪಹಾನಪಟಿವೇಧಟ್ಠೋ ಅಭಿಞ್ಞೇಯ್ಯೋ; ಜರಾಮರಣನಿರೋಧಸ್ಸ ಸಚ್ಛಿಕಿರಿಯಾಪಟಿವೇಧಟ್ಠೋ ಅಭಿಞ್ಞೇಯ್ಯೋ; ಜರಾಮರಣನಿರೋಧಗಾಮಿನಿಯಾ ಪಟಿಪದಾಯ ಭಾವನಾಪಟಿವೇಧಟ್ಠೋ ಅಭಿಞ್ಞೇಯ್ಯೋ.

೮. ದುಕ್ಖಂ ಅಭಿಞ್ಞೇಯ್ಯಂ; ದುಕ್ಖಸಮುದಯೋ ಅಭಿಞ್ಞೇಯ್ಯೋ; ದುಕ್ಖನಿರೋಧೋ ಅಭಿಞ್ಞೇಯ್ಯೋ; ದುಕ್ಖಸ್ಸ ಸಮುದಯನಿರೋಧೋ ಅಭಿಞ್ಞೇಯ್ಯೋ; ದುಕ್ಖಸ್ಸ ಛನ್ದರಾಗನಿರೋಧೋ ಅಭಿಞ್ಞೇಯ್ಯೋ; ದುಕ್ಖಸ್ಸ ಅಸ್ಸಾದೋ ಅಭಿಞ್ಞೇಯ್ಯೋ; ದುಕ್ಖಸ್ಸ ಆದೀನವೋ ಅಭಿಞ್ಞೇಯ್ಯೋ; ದುಕ್ಖಸ್ಸ ನಿಸ್ಸರಣಂ ಅಭಿಞ್ಞೇಯ್ಯಂ. ರೂಪಂ ಅಭಿಞ್ಞೇಯ್ಯಂ; ರೂಪಸಮುದಯೋ ಅಭಿಞ್ಞೇಯ್ಯೋ; ರೂಪನಿರೋಧೋ ಅಭಿಞ್ಞೇಯ್ಯೋ; ರೂಪಸ್ಸ ಸಮುದಯನಿರೋಧೋ ಅಭಿಞ್ಞೇಯ್ಯೋ; ರೂಪಸ್ಸ ಛನ್ದರಾಗನಿರೋಧೋ ಅಭಿಞ್ಞೇಯ್ಯೋ; ರೂಪಸ್ಸ ಅಸ್ಸಾದೋ ಅಭಿಞ್ಞೇಯ್ಯೋ; ರೂಪಸ್ಸ ಆದೀನವೋ ಅಭಿಞ್ಞೇಯ್ಯೋ; ರೂಪಸ್ಸ ನಿಸ್ಸರಣಂ ಅಭಿಞ್ಞೇಯ್ಯಂ. ವೇದನಾ ಅಭಿಞ್ಞೇಯ್ಯಾ…ಪೇ… ಸಞ್ಞಾ ಅಭಿಞ್ಞೇಯ್ಯಾ… ಸಙ್ಖಾರಾ ಅಭಿಞ್ಞೇಯ್ಯಾ… ವಿಞ್ಞಾಣಂ ಅಭಿಞ್ಞೇಯ್ಯಂ… ಚಕ್ಖು ಅಭಿಞ್ಞೇಯ್ಯಂ…ಪೇ… ಜರಾಮರಣಂ ಅಭಿಞ್ಞೇಯ್ಯಂ; ಜರಾಮರಣಸಮುದಯೋ ಅಭಿಞ್ಞೇಯ್ಯೋ; ಜರಾಮರಣನಿರೋಧೋ ಅಭಿಞ್ಞೇಯ್ಯೋ; ಜರಾಮರಣಸ್ಸ ಸಮುದಯನಿರೋಧೋ ಅಭಿಞ್ಞೇಯ್ಯೋ; ಜರಾಮರಣಸ್ಸ ಛನ್ದರಾಗನಿರೋಧೋ ಅಭಿಞ್ಞೇಯ್ಯೋ; ಜರಾಮರಣಸ್ಸ ಅಸ್ಸಾದೋ ಅಭಿಞ್ಞೇಯ್ಯೋ; ಜರಾಮರಣಸ್ಸ ಆದೀನವೋ ಅಭಿಞ್ಞೇಯ್ಯೋ; ಜರಾಮರಣಸ್ಸ ನಿಸ್ಸರಣಂ ಅಭಿಞ್ಞೇಯ್ಯಂ.

ದುಕ್ಖಂ ಅಭಿಞ್ಞೇಯ್ಯಂ; ದುಕ್ಖಸಮುದಯೋ ಅಭಿಞ್ಞೇಯ್ಯೋ; ದುಕ್ಖನಿರೋಧೋ ಅಭಿಞ್ಞೇಯ್ಯೋ; ದುಕ್ಖನಿರೋಧಗಾಮಿನೀ ಪಟಿಪದಾ ಅಭಿಞ್ಞೇಯ್ಯಾ; ದುಕ್ಖಸ್ಸ ಅಸ್ಸಾದೋ ಅಭಿಞ್ಞೇಯ್ಯೋ; ದುಕ್ಖಸ್ಸ ಆದೀನವೋ ಅಭಿಞ್ಞೇಯ್ಯೋ; ದುಕ್ಖಸ್ಸ ನಿಸ್ಸರಣಂ ಅಭಿಞ್ಞೇಯ್ಯಂ. ರೂಪಂ ಅಭಿಞ್ಞೇಯ್ಯಂ; ರೂಪಸಮುದಯೋ ಅಭಿಞ್ಞೇಯ್ಯೋ; ರೂಪನಿರೋಧೋ ಅಭಿಞ್ಞೇಯ್ಯೋ; ರೂಪನಿರೋಧಗಾಮಿನೀ ಪಟಿಪದಾ ಅಭಿಞ್ಞೇಯ್ಯಾ; ರೂಪಸ್ಸ ಅಸ್ಸಾದೋ ಅಭಿಞ್ಞೇಯ್ಯೋ; ರೂಪಸ್ಸ ಆದೀನವೋ ಅಭಿಞ್ಞೇಯ್ಯೋ; ರೂಪಸ್ಸ ನಿಸ್ಸರಣಂ ಅಭಿಞ್ಞೇಯ್ಯಂ. ವೇದನಾ ಅಭಿಞ್ಞೇಯ್ಯಾ…ಪೇ… ಸಞ್ಞಾ ಅಭಿಞ್ಞೇಯ್ಯಾ… ಸಙ್ಖಾರಾ ಅಭಿಞ್ಞೇಯ್ಯಾ… ವಿಞ್ಞಾಣಂ ಅಭಿಞ್ಞೇಯ್ಯಂ… ಚಕ್ಖು ಅಭಿಞ್ಞೇಯ್ಯಂ…ಪೇ… ಜರಾಮರಣಂ ಅಭಿಞ್ಞೇಯ್ಯಂ; ಜರಾಮರಣಸಮುದಯೋ ಅಭಿಞ್ಞೇಯ್ಯೋ; ಜರಾಮರಣನಿರೋಧೋ ಅಭಿಞ್ಞೇಯ್ಯೋ; ಜರಾಮರಣನಿರೋಧಗಾಮಿನೀ ಪಟಿಪದಾ ಅಭಿಞ್ಞೇಯ್ಯಾ; ಜರಾಮರಣಸ್ಸ ಅಸ್ಸಾದೋ ಅಭಿಞ್ಞೇಯ್ಯೋ; ಜರಾಮರಣಸ್ಸ ಆದೀನವೋ ಅಭಿಞ್ಞೇಯ್ಯೋ; ಜರಾಮರಣಸ್ಸ ನಿಸ್ಸರಣಂ ಅಭಿಞ್ಞೇಯ್ಯಂ.

೯. ಅನಿಚ್ಚಾನುಪಸ್ಸನಾ ಅಭಿಞ್ಞೇಯ್ಯಾ; ದುಕ್ಖಾನುಪಸ್ಸನಾ ಅಭಿಞ್ಞೇಯ್ಯಾ; ಅನತ್ತಾನುಪಸ್ಸನಾ ಅಭಿಞ್ಞೇಯ್ಯಾ; ನಿಬ್ಬಿದಾನುಪಸ್ಸನಾ ಅಭಿಞ್ಞೇಯ್ಯಾ; ವಿರಾಗಾನುಪಸ್ಸನಾ ಅಭಿಞ್ಞೇಯ್ಯಾ; ನಿರೋಧಾನುಪಸ್ಸನಾ ಅಭಿಞ್ಞೇಯ್ಯಾ; ಪಟಿನಿಸ್ಸಗ್ಗಾನುಪಸ್ಸನಾ ಅಭಿಞ್ಞೇಯ್ಯಾ. ರೂಪೇ ಅನಿಚ್ಚಾನುಪಸ್ಸನಾ ಅಭಿಞ್ಞೇಯ್ಯಾ; ರೂಪೇ ದುಕ್ಖಾನುಪಸ್ಸನಾ ಅಭಿಞ್ಞೇಯ್ಯಾ; ರೂಪೇ ಅನತ್ತಾನುಪಸ್ಸನಾ ಅಭಿಞ್ಞೇಯ್ಯಾ; ರೂಪೇ ನಿಬ್ಬಿದಾನುಪಸ್ಸನಾ ಅಭಿಞ್ಞೇಯ್ಯಾ; ರೂಪೇ ವಿರಾಗಾನುಪಸ್ಸನಾ ಅಭಿಞ್ಞೇಯ್ಯಾ; ರೂಪೇ ನಿರೋಧಾನುಪಸ್ಸನಾ ಅಭಿಞ್ಞೇಯ್ಯಾ; ರೂಪೇ ಪಟಿನಿಸ್ಸಗ್ಗಾನುಪಸ್ಸನಾ ಅಭಿಞ್ಞೇಯ್ಯಾ. ವೇದನಾಯ…ಪೇ… ಸಞ್ಞಾಯ… ಸಙ್ಖಾರೇಸು… ವಿಞ್ಞಾಣೇ… ಚಕ್ಖುಸ್ಮಿಂ…ಪೇ… ಜರಾಮರಣೇ ಅನಿಚ್ಚಾನುಪಸ್ಸನಾ ಅಭಿಞ್ಞೇಯ್ಯಾ; ಜರಾಮರಣೇ ದುಕ್ಖಾನುಪಸ್ಸನಾ ಅಭಿಞ್ಞೇಯ್ಯಾ; ಜರಾಮರಣೇ ಅನತ್ತಾನುಪಸ್ಸನಾ ಅಭಿಞ್ಞೇಯ್ಯಾ; ಜರಾಮರಣೇ ನಿಬ್ಬಿದಾನುಪಸ್ಸನಾ ಅಭಿಞ್ಞೇಯ್ಯಾ; ಜರಾಮರಣೇ ವಿರಾಗಾನುಪಸ್ಸನಾ ಅಭಿಞ್ಞೇಯ್ಯಾ; ಜರಾಮರಣೇ ನಿರೋಧಾನುಪಸ್ಸನಾ ಅಭಿಞ್ಞೇಯ್ಯಾ; ಜರಾಮರಣೇ ಪಟಿನಿಸ್ಸಗ್ಗಾನುಪಸ್ಸನಾ ಅಭಿಞ್ಞೇಯ್ಯಾ.

೧೦. ಉಪ್ಪಾದೋ ಅಭಿಞ್ಞೇಯ್ಯೋ; ಪವತ್ತಂ ಅಭಿಞ್ಞೇಯ್ಯಂ; ನಿಮಿತ್ತಂ ಅಭಿಞ್ಞೇಯ್ಯಂ; ಆಯೂಹನಾ [ಆಯುಹನಾ (ಸ್ಯಾ.) ಏವಮುಪರಿಪಿ] ಅಭಿಞ್ಞೇಯ್ಯಾ; ಪಟಿಸನ್ಧಿ ಅಭಿಞ್ಞೇಯ್ಯಾ; ಗತಿ ಅಭಿಞ್ಞೇಯ್ಯಾ; ನಿಬ್ಬತ್ತಿ ಅಭಿಞ್ಞೇಯ್ಯಾ; ಉಪಪತ್ತಿ ಅಭಿಞ್ಞೇಯ್ಯಾ; ಜಾತಿ ಅಭಿಞ್ಞೇಯ್ಯಾ; ಜರಾ ಅಭಿಞ್ಞೇಯ್ಯಾ; ಬ್ಯಾಧಿ ಅಭಿಞ್ಞೇಯ್ಯೋ, ಮರಣಂ ಅಭಿಞ್ಞೇಯ್ಯಂ; ಸೋಕೋ ಅಭಿಞ್ಞೇಯ್ಯೋ; ಪರಿದೇವೋ ಅಭಿಞ್ಞೇಯ್ಯೋ; ಉಪಾಯಾಸೋ ಅಭಿಞ್ಞೇಯ್ಯೋ.

ಅನುಪ್ಪಾದೋ ಅಭಿಞ್ಞೇಯ್ಯೋ; ಅಪ್ಪವತ್ತಂ ಅಭಿಞ್ಞೇಯ್ಯಂ; ಅನಿಮಿತ್ತಂ ಅಭಿಞ್ಞೇಯ್ಯಂ; ಅನಾಯೂಹನಾ [ಅನಾಯುಹನಾ (ಸ್ಯಾ.) ಏವಮುಪರಿಪಿ] ಅಭಿಞ್ಞೇಯ್ಯಾ; ಅಪ್ಪಟಿಸನ್ಧಿ ಅಭಿಞ್ಞೇಯ್ಯಾ; ಅಗತಿ ಅಭಿಞ್ಞೇಯ್ಯಾ; ಅನಿಬ್ಬತ್ತಿ ಅಭಿಞ್ಞೇಯ್ಯಾ; ಅನುಪಪತ್ತಿ ಅಭಿಞ್ಞೇಯ್ಯಾ; ಅಜಾತಿ ಅಭಿಞ್ಞೇಯ್ಯಾ; ಅಜರಾ ಅಭಿಞ್ಞೇಯ್ಯಾ; ಅಬ್ಯಾಧಿ ಅಭಿಞ್ಞೇಯ್ಯೋ; ಅಮತಂ ಅಭಿಞ್ಞೇಯ್ಯಂ; ಅಸೋಕೋ ಅಭಿಞ್ಞೇಯ್ಯೋ; ಅಪರಿದೇವೋ ಅಭಿಞ್ಞೇಯ್ಯೋ; ಅನುಪಾಯಾಸೋ ಅಭಿಞ್ಞೇಯ್ಯೋ.

ಉಪ್ಪಾದೋ ಅಭಿಞ್ಞೇಯ್ಯೋ; ಅನುಪ್ಪಾದೋ ಅಭಿಞ್ಞೇಯ್ಯೋ; ಪವತ್ತಂ ಅಭಿಞ್ಞೇಯ್ಯಂ; ಅಪ್ಪವತ್ತಂ ಅಭಿಞ್ಞೇಯ್ಯಂ. ನಿಮಿತ್ತಂ ಅಭಿಞ್ಞೇಯ್ಯಂ; ಅನಿಮಿತ್ತಂ ಅಭಿಞ್ಞೇಯ್ಯಂ. ಆಯೂಹನಾ ಅಭಿಞ್ಞೇಯ್ಯಾ; ಅನಾಯೂಹನಾ ಅಭಿಞ್ಞೇಯ್ಯಾ. ಪಟಿಸನ್ಧಿ ಅಭಿಞ್ಞೇಯ್ಯಾ; ಅಪ್ಪಟಿಸನ್ಧಿ ಅಭಿಞ್ಞೇಯ್ಯಾ. ಗತಿ ಅಭಿಞ್ಞೇಯ್ಯಾ; ಅಗತಿ ಅಭಿಞ್ಞೇಯ್ಯಾ. ನಿಬ್ಬತ್ತಿ ಅಭಿಞ್ಞೇಯ್ಯಾ; ಅನಿಬ್ಬತ್ತಿ ಅಭಿಞ್ಞೇಯ್ಯಾ. ಉಪಪತ್ತಿ ಅಭಿಞ್ಞೇಯ್ಯಾ; ಅನುಪಪತ್ತಿ ಅಭಿಞ್ಞೇಯ್ಯಾ. ಜಾತಿ ಅಭಿಞ್ಞೇಯ್ಯಾ; ಅಜಾತಿ ಅಭಿಞ್ಞೇಯ್ಯಾ. ಜರಾ ಅಭಿಞ್ಞೇಯ್ಯಾ; ಅಜರಾ ಅಭಿಞ್ಞೇಯ್ಯಾ. ಬ್ಯಾಧಿ ಅಭಿಞ್ಞೇಯ್ಯೋ; ಅಬ್ಯಾಧಿ ಅಭಿಞ್ಞೇಯ್ಯೋ. ಮರಣಂ ಅಭಿಞ್ಞೇಯ್ಯಂ; ಅಮತಂ ಅಭಿಞ್ಞೇಯ್ಯಂ. ಸೋಕೋ ಅಭಿಞ್ಞೇಯ್ಯೋ; ಅಸೋಕೋ ಅಭಿಞ್ಞೇಯ್ಯೋ. ಪರಿದೇವೋ ಅಭಿಞ್ಞೇಯ್ಯೋ; ಅಪರಿದೇವೋ ಅಭಿಞ್ಞೇಯ್ಯೋ. ಉಪಾಯಾಸೋ ಅಭಿಞ್ಞೇಯ್ಯೋ; ಅನುಪಾಯಾಸೋ ಅಭಿಞ್ಞೇಯ್ಯೋ.

ಉಪ್ಪಾದೋ ದುಕ್ಖನ್ತಿ ಅಭಿಞ್ಞೇಯ್ಯಂ. ಪವತ್ತಂ ದುಕ್ಖನ್ತಿ ಅಭಿಞ್ಞೇಯ್ಯಂ. ನಿಮಿತ್ತಂ ದುಕ್ಖನ್ತಿ ಅಭಿಞ್ಞೇಯ್ಯಂ. ಆಯೂಹನಾ ದುಕ್ಖನ್ತಿ ಅಭಿಞ್ಞೇಯ್ಯಂ. ಪಟಿಸನ್ಧಿ ದುಕ್ಖನ್ತಿ ಅಭಿಞ್ಞೇಯ್ಯಂ. ಗತಿ ದುಕ್ಖನ್ತಿ ಅಭಿಞ್ಞೇಯ್ಯಂ. ನಿಬ್ಬತ್ತಿ ದುಕ್ಖನ್ತಿ ಅಭಿಞ್ಞೇಯ್ಯಂ. ಉಪಪತ್ತಿ ದುಕ್ಖನ್ತಿ ಅಭಿಞ್ಞೇಯ್ಯಂ. ಜಾತಿ ದುಕ್ಖನ್ತಿ ಅಭಿಞ್ಞೇಯ್ಯಂ. ಜರಾ ದುಕ್ಖನ್ತಿ ಅಭಿಞ್ಞೇಯ್ಯಂ. ಬ್ಯಾಧಿ ದುಕ್ಖನ್ತಿ ಅಭಿಞ್ಞೇಯ್ಯಂ. ಮರಣಂ ದುಕ್ಖನ್ತಿ ಅಭಿಞ್ಞೇಯ್ಯಂ. ಸೋಕೋ ದುಕ್ಖನ್ತಿ ಅಭಿಞ್ಞೇಯ್ಯಂ. ಪರಿದೇವೋ ದುಕ್ಖನ್ತಿ ಅಭಿಞ್ಞೇಯ್ಯಂ. ಉಪಾಯಾಸೋ ದುಕ್ಖನ್ತಿ ಅಭಿಞ್ಞೇಯ್ಯಂ.

ಅನುಪ್ಪಾದೋ ಸುಖನ್ತಿ ಅಭಿಞ್ಞೇಯ್ಯಂ. ಅಪ್ಪವತ್ತಂ ಸುಖನ್ತಿ ಅಭಿಞ್ಞೇಯ್ಯಂ. ಅನಿಮಿತ್ತಂ ಸುಖನ್ತಿ ಅಭಿಞ್ಞೇಯ್ಯಂ. ಅನಾಯೂಹನಾ ಸುಖನ್ತಿ ಅಭಿಞ್ಞೇಯ್ಯಂ. ಅಪ್ಪಟಿಸನ್ಧಿ ಸುಖನ್ತಿ ಅಭಿಞ್ಞೇಯ್ಯಂ. ಅಗತಿ ಸುಖನ್ತಿ ಅಭಿಞ್ಞೇಯ್ಯಂ. ಅನಿಬ್ಬತ್ತಿ ಸುಖನ್ತಿ ಅಭಿಞ್ಞೇಯ್ಯಂ. ಅನುಪಪತ್ತಿ ಸುಖನ್ತಿ ಅಭಿಞ್ಞೇಯ್ಯಂ. ಅಜಾತಿ ಸುಖನ್ತಿ ಅಭಿಞ್ಞೇಯ್ಯಂ. ಅಜರಾ ಸುಖನ್ತಿ ಅಭಿಞ್ಞೇಯ್ಯಂ. ಅಬ್ಯಾಧಿ ಸುಖನ್ತಿ ಅಭಿಞ್ಞೇಯ್ಯಂ. ಅಮತಂ ಸುಖನ್ತಿ ಅಭಿಞ್ಞೇಯ್ಯಂ. ಅಸೋಕೋ ಸುಖನ್ತಿ ಅಭಿಞ್ಞೇಯ್ಯಂ. ಅಪರಿದೇವೋ ಸುಖನ್ತಿ ಅಭಿಞ್ಞೇಯ್ಯಂ. ಅನುಪಾಯಾಸೋ ಸುಖನ್ತಿ ಅಭಿಞ್ಞೇಯ್ಯಂ.

ಉಪ್ಪಾದೋ ದುಕ್ಖಂ, ಅನುಪ್ಪಾದೋ ಸುಖನ್ತಿ ಅಭಿಞ್ಞೇಯ್ಯಂ. ಪವತ್ತಂ ದುಕ್ಖಂ, ಅಪ್ಪವತ್ತಂ ಸುಖನ್ತಿ ಅಭಿಞ್ಞೇಯ್ಯಂ. ನಿಮಿತ್ತಂ ದುಕ್ಖಂ, ಅನಿಮಿತ್ತಂ ಸುಖನ್ತಿ ಅಭಿಞ್ಞೇಯ್ಯಂ. ಆಯೂಹನಾ ದುಕ್ಖಂ, ಅನಾಯೂಹನಾ ಸುಖನ್ತಿ ಅಭಿಞ್ಞೇಯ್ಯಂ. ಪಟಿಸನ್ಧಿ ದುಕ್ಖಂ, ಅಪ್ಪಟಿಸನ್ಧಿ ಸುಖನ್ತಿ ಅಭಿಞ್ಞೇಯ್ಯಂ. ಗತಿ ದುಕ್ಖಂ, ಅಗತಿ ಸುಖನ್ತಿ ಅಭಿಞ್ಞೇಯ್ಯಂ. ನಿಬ್ಬತ್ತಿ ದುಕ್ಖಂ, ಅನಿಬ್ಬತ್ತಿ ಸುಖನ್ತಿ ಅಭಿಞ್ಞೇಯ್ಯಂ. ಉಪಪತ್ತಿ ದುಕ್ಖಂ, ಅನುಪಪತ್ತಿ ಸುಖನ್ತಿ ಅಭಿಞ್ಞೇಯ್ಯಂ. ಜಾತಿ ದುಕ್ಖಂ, ಅಜಾತಿ ಸುಖನ್ತಿ ಅಭಿಞ್ಞೇಯ್ಯಂ. ಜರಾ ದುಕ್ಖಂ, ಅಜರಾ ಸುಖನ್ತಿ ಅಭಿಞ್ಞೇಯ್ಯಂ. ಬ್ಯಾಧಿ ದುಕ್ಖಂ, ಅಬ್ಯಾಧಿ ಸುಖನ್ತಿ ಅಭಿಞ್ಞೇಯ್ಯಂ. ಮರಣಂ ದುಕ್ಖಂ, ಅಮತಂ ಸುಖನ್ತಿ ಅಭಿಞ್ಞೇಯ್ಯಂ. ಸೋಕೋ ದುಕ್ಖಂ, ಅಸೋಕೋ ಸುಖನ್ತಿ ಅಭಿಞ್ಞೇಯ್ಯಂ. ಪರಿದೇವೋ ದುಕ್ಖಂ, ಅಪರಿದೇವೋ ಸುಖನ್ತಿ ಅಭಿಞ್ಞೇಯ್ಯಂ. ಉಪಾಯಾಸೋ ದುಕ್ಖಂ, ಅನುಪಾಯಾಸೋ ಸುಖನ್ತಿ ಅಭಿಞ್ಞೇಯ್ಯಂ.

ಉಪ್ಪಾದೋ ಭಯನ್ತಿ ಅಭಿಞ್ಞೇಯ್ಯಂ. ಪವತ್ತಂ ಭಯನ್ತಿ ಅಭಿಞ್ಞೇಯ್ಯಂ. ನಿಮಿತ್ತಂ ಭಯನ್ತಿ ಅಭಿಞ್ಞೇಯ್ಯಂ. ಆಯೂಹನಾ ಭಯನ್ತಿ ಅಭಿಞ್ಞೇಯ್ಯಂ. ಪಟಿಸನ್ಧಿ ಭಯನ್ತಿ ಅಭಿಞ್ಞೇಯ್ಯಂ. ಗತಿ ಭಯನ್ತಿ ಅಭಿಞ್ಞೇಯ್ಯಂ. ನಿಬ್ಬತ್ತಿ ಭಯನ್ತಿ ಅಭಿಞ್ಞೇಯ್ಯಂ. ಉಪಪತ್ತಿ ಭಯನ್ತಿ ಅಭಿಞ್ಞೇಯ್ಯಂ. ಜಾತಿ ಭಯನ್ತಿ ಅಭಿಞ್ಞೇಯ್ಯಂ. ಜರಾ ಭಯನ್ತಿ ಅಭಿಞ್ಞೇಯ್ಯಂ. ಬ್ಯಾಧಿ ಭಯನ್ತಿ ಅಭಿಞ್ಞೇಯ್ಯಂ. ಮರಣಂ ಭಯನ್ತಿ ಅಭಿಞ್ಞೇಯ್ಯಂ. ಸೋಕೋ ಭಯನ್ತಿ ಅಭಿಞ್ಞೇಯ್ಯಂ. ಪರಿದೇವೋ ಭಯನ್ತಿ ಅಭಿಞ್ಞೇಯ್ಯಂ. ಉಪಾಯಾಸೋ ಭಯನ್ತಿ ಅಭಿಞ್ಞೇಯ್ಯಂ.

ಅನುಪ್ಪಾದೋ ಖೇಮನ್ತಿ ಅಭಿಞ್ಞೇಯ್ಯಂ. ಅಪ್ಪವತ್ತಂ ಖೇಮನ್ತಿ ಅಭಿಞ್ಞೇಯ್ಯಂ. ಅನಿಮಿತ್ತಂ ಖೇಮನ್ತಿ ಅಭಿಞ್ಞೇಯ್ಯಂ. ಅನಾಯೂಹನಾ ಖೇಮನ್ತಿ ಅಭಿಞ್ಞೇಯ್ಯಂ. ಅಪ್ಪಟಿಸನ್ಧಿ ಖೇಮನ್ತಿ ಅಭಿಞ್ಞೇಯ್ಯಂ. ಅಗತಿ ಖೇಮನ್ತಿ ಅಭಿಞ್ಞೇಯ್ಯಂ. ಅನಿಬ್ಬತ್ತಿ ಖೇಮನ್ತಿ ಅಭಿಞ್ಞೇಯ್ಯಂ. ಅನುಪಪತ್ತಿ ಖೇಮನ್ತಿ ಅಭಿಞ್ಞೇಯ್ಯಂ. ಅಜಾತಿ ಖೇಮನ್ತಿ ಅಭಿಞ್ಞೇಯ್ಯಂ. ಅಜರಾ ಖೇಮನ್ತಿ ಅಭಿಞ್ಞೇಯ್ಯಂ. ಅಬ್ಯಾಧಿ ಖೇಮನ್ತಿ ಅಭಿಞ್ಞೇಯ್ಯಂ. ಅಮತಂ ಖೇಮನ್ತಿ ಅಭಿಞ್ಞೇಯ್ಯಂ. ಅಸೋಕೋ ಖೇಮನ್ತಿ ಅಭಿಞ್ಞೇಯ್ಯಂ. ಅಪರಿದೇವೋ ಖೇಮನ್ತಿ ಅಭಿಞ್ಞೇಯ್ಯಂ. ಅನುಪಾಯಾಸೋ ಖೇಮನ್ತಿ ಅಭಿಞ್ಞೇಯ್ಯಂ.

ಉಪ್ಪಾದೋ ಭಯಂ, ಅನುಪ್ಪಾದೋ ಖೇಮನ್ತಿ ಅಭಿಞ್ಞೇಯ್ಯಂ. ಪವತ್ತಂ ಭಯಂ, ಅಪ್ಪವತ್ತಂ ಖೇಮನ್ತಿ ಅಭಿಞ್ಞೇಯ್ಯಂ. ನಿಮಿತ್ತಂ ಭಯಂ, ಅನಿಮಿತ್ತಂ ಖೇಮನ್ತಿ ಅಭಿಞ್ಞೇಯ್ಯಂ. ಆಯೂಹನಾ ಭಯಂ, ಅನಾಯೂಹನಾ ಖೇಮನ್ತಿ ಅಭಿಞ್ಞೇಯ್ಯಂ. ಪಟಿಸನ್ಧಿ ಭಯಂ, ಅಪ್ಪಟಿಸನ್ಧಿ ಖೇಮನ್ತಿ ಅಭಿಞ್ಞೇಯ್ಯಂ. ಗತಿ ಭಯಂ, ಅಗತಿ ಖೇಮನ್ತಿ ಅಭಿಞ್ಞೇಯ್ಯಂ. ನಿಬ್ಬತ್ತಿ ಭಯಂ, ಅನಿಬ್ಬತ್ತಿ ಖೇಮನ್ತಿ ಅಭಿಞ್ಞೇಯ್ಯಂ. ಉಪಪತ್ತಿ ಭಯಂ, ಅನುಪಪತ್ತಿ ಖೇಮನ್ತಿ ಅಭಿಞ್ಞೇಯ್ಯಂ. ಜಾತಿ ಭಯಂ, ಅಜಾತಿ ಖೇಮನ್ತಿ ಅಭಿಞ್ಞೇಯ್ಯಂ. ಜರಾ ಭಯಂ, ಅಜರಾ ಖೇಮನ್ತಿ ಅಭಿಞ್ಞೇಯ್ಯಂ. ಬ್ಯಾಧಿ ಭಯಂ, ಅಬ್ಯಾಧಿ ಖೇಮನ್ತಿ ಅಭಿಞ್ಞೇಯ್ಯಂ. ಮರಣಂ ಭಯಂ, ಅಮತಂ ಖೇಮನ್ತಿ ಅಭಿಞ್ಞೇಯ್ಯಂ. ಸೋಕೋ ಭಯಂ, ಅಸೋಕೋ ಖೇಮನ್ತಿ ಅಭಿಞ್ಞೇಯ್ಯಂ. ಪರಿದೇವೋ ಭಯಂ, ಅಪರಿದೇವೋ ಖೇಮನ್ತಿ ಅಭಿಞ್ಞೇಯ್ಯಂ. ಉಪಾಯಾಸೋ ಭಯಂ, ಅನುಪಾಯಾಸೋ ಖೇಮನ್ತಿ ಅಭಿಞ್ಞೇಯ್ಯಂ.

ಉಪ್ಪಾದೋ ಸಾಮಿಸನ್ತಿ ಅಭಿಞ್ಞೇಯ್ಯಂ. ಪವತ್ತಂ ಸಾಮಿಸನ್ತಿ ಅಭಿಞ್ಞೇಯ್ಯಂ. ನಿಮಿತ್ತಂ ಸಾಮಿಸನ್ತಿ ಅಭಿಞ್ಞೇಯ್ಯಂ. ಆಯೂಹನಾ ಸಾಮಿಸನ್ತಿ ಅಭಿಞ್ಞೇಯ್ಯಂ. ಪಟಿಸನ್ಧಿ ಸಾಮಿಸನ್ತಿ ಅಭಿಞ್ಞೇಯ್ಯಂ. ಗತಿ ಸಾಮಿಸನ್ತಿ ಅಭಿಞ್ಞೇಯ್ಯಂ. ನಿಬ್ಬತ್ತಿ ಸಾಮಿಸನ್ತಿ ಅಭಿಞ್ಞೇಯ್ಯಂ. ಉಪಪತ್ತಿ ಸಾಮಿಸನ್ತಿ ಅಭಿಞ್ಞೇಯ್ಯಂ. ಜಾತಿ ಸಾಮಿಸನ್ತಿ ಅಭಿಞ್ಞೇಯ್ಯಂ. ಜರಾ ಸಾಮಿಸನ್ತಿ ಅಭಿಞ್ಞೇಯ್ಯಂ. ಬ್ಯಾಧಿ ಸಾಮಿಸನ್ತಿ ಅಭಿಞ್ಞೇಯ್ಯಂ. ಮರಣಂ ಸಾಮಿಸನ್ತಿ ಅಭಿಞ್ಞೇಯ್ಯಂ. ಸೋಕೋ ಸಾಮಿಸನ್ತಿ ಅಭಿಞ್ಞೇಯ್ಯಂ. ಪರಿದೇವೋ ಸಾಮಿಸನ್ತಿ ಅಭಿಞ್ಞೇಯ್ಯಂ. ಉಪಾಯಾಸೋ ಸಾಮಿಸನ್ತಿ ಅಭಿಞ್ಞೇಯ್ಯಂ.

ಅನುಪ್ಪಾದೋ ನಿರಾಮಿಸನ್ತಿ ಅಭಿಞ್ಞೇಯ್ಯಂ. ಅಪ್ಪವತ್ತಂ ನಿರಾಮಿಸನ್ತಿ ಅಭಿಞ್ಞೇಯ್ಯಂ. ಅನಿಮಿತ್ತಂ ನಿರಾಮಿಸನ್ತಿ ಅಭಿಞ್ಞೇಯ್ಯಂ. ಅನಾಯೂಹನಾ ನಿರಾಮಿಸನ್ತಿ ಅಭಿಞ್ಞೇಯ್ಯಂ. ಅಪ್ಪಟಿಸನ್ಧಿ ನಿರಾಮಿಸನ್ತಿ ಅಭಿಞ್ಞೇಯ್ಯಂ. ಅಗತಿ ನಿರಾಮಿಸನ್ತಿ ಅಭಿಞ್ಞೇಯ್ಯಂ. ಅನಿಬ್ಬತ್ತಿ ನಿರಾಮಿಸನ್ತಿ ಅಭಿಞ್ಞೇಯ್ಯಂ. ಅನುಪಪತ್ತಿ ನಿರಾಮಿಸನ್ತಿ ಅಭಿಞ್ಞೇಯ್ಯಂ. ಅಜಾತಿ ನಿರಾಮಿಸನ್ತಿ ಅಭಿಞ್ಞೇಯ್ಯಂ. ಅಜರಾ ನಿರಾಮಿಸನ್ತಿ ಅಭಿಞ್ಞೇಯ್ಯಂ. ಅಬ್ಯಾಧಿ ನಿರಾಮಿಸನ್ತಿ ಅಭಿಞ್ಞೇಯ್ಯಂ. ಅಮತಂ ನಿರಾಮಿಸನ್ತಿ ಅಭಿಞ್ಞೇಯ್ಯಂ. ಅಸೋಕೋ ನಿರಾಮಿಸನ್ತಿ ಅಭಿಞ್ಞೇಯ್ಯಂ. ಅಪರಿದೇವೋ ನಿರಾಮಿಸನ್ತಿ ಅಭಿಞ್ಞೇಯ್ಯಂ. ಅನುಪಾಯಾಸೋ ನಿರಾಮಿಸನ್ತಿ ಅಭಿಞ್ಞೇಯ್ಯಂ.

ಉಪ್ಪಾದೋ ಸಾಮಿಸಂ, ಅನುಪ್ಪಾದೋ ನಿರಾಮಿಸನ್ತಿ ಅಭಿಞ್ಞೇಯ್ಯಂ. ಪವತ್ತಂ ಸಾಮಿಸಂ, ಅಪ್ಪವತ್ತಂ ನಿರಾಮಿಸನ್ತಿ ಅಭಿಞ್ಞೇಯ್ಯಂ. ನಿಮಿತ್ತಂ ಸಾಮಿಸಂ, ಅನಿಮಿತ್ತಂ ನಿರಾಮಿಸನ್ತಿ ಅಭಿಞ್ಞೇಯ್ಯಂ. ಆಯೂಹನಾ ಸಾಮಿಸಂ, ಅನಾಯೂಹನಾ ನಿರಾಮಿಸನ್ತಿ ಅಭಿಞ್ಞೇಯ್ಯಂ. ಪಟಿಸನ್ಧಿ ಸಾಮಿಸಂ, ಅಪ್ಪಟಿಸನ್ಧಿ ನಿರಾಮಿಸನ್ತಿ ಅಭಿಞ್ಞೇಯ್ಯಂ. ಗತಿ ಸಾಮಿಸಂ, ಅಗತಿ ನಿರಾಮಿಸನ್ತಿ ಅಭಿಞ್ಞೇಯ್ಯಂ. ನಿಬ್ಬತ್ತಿ ಸಾಮಿಸಂ, ಅನಿಬ್ಬತ್ತಿ ನಿರಾಮಿಸನ್ತಿ ಅಭಿಞ್ಞೇಯ್ಯಂ. ಉಪಪತ್ತಿ ಸಾಮಿಸಂ, ಅನುಪಪತ್ತಿ ನಿರಾಮಿಸನ್ತಿ ಅಭಿಞ್ಞೇಯ್ಯಂ. ಜಾತಿ ಸಾಮಿಸಂ, ಅಜಾತಿ ನಿರಾಮಿಸನ್ತಿ ಅಭಿಞ್ಞೇಯ್ಯಂ. ಜರಾ ಸಾಮಿಸಂ, ಅಜರಾ ನಿರಾಮಿಸನ್ತಿ ಅಭಿಞ್ಞೇಯ್ಯಂ. ಬ್ಯಾಧಿ ಸಾಮಿಸಂ, ಅಬ್ಯಾಧಿ ನಿರಾಮಿಸನ್ತಿ ಅಭಿಞ್ಞೇಯ್ಯಂ. ಮರಣಂ ಸಾಮಿಸಂ, ಅಮತಂ ನಿರಾಮಿಸನ್ತಿ ಅಭಿಞ್ಞೇಯ್ಯಂ. ಸೋಕೋ ಸಾಮಿಸಂ, ಅಸೋಕೋ ನಿರಾಮಿಸನ್ತಿ ಅಭಿಞ್ಞೇಯ್ಯಂ. ಪರಿದೇವೋ ಸಾಮಿಸಂ, ಅಪರಿದೇವೋ ನಿರಾಮಿಸನ್ತಿ ಅಭಿಞ್ಞೇಯ್ಯಂ. ಉಪಾಯಾಸೋ ಸಾಮಿಸಂ, ಅನುಪಾಯಾಸೋ ನಿರಾಮಿಸನ್ತಿ ಅಭಿಞ್ಞೇಯ್ಯಂ.

ಉಪ್ಪಾದೋ ಸಙ್ಖಾರಾತಿ ಅಭಿಞ್ಞೇಯ್ಯಂ. ಪವತ್ತಂ ಸಙ್ಖಾರಾತಿ ಅಭಿಞ್ಞೇಯ್ಯಂ. ನಿಮಿತ್ತಂ ಸಙ್ಖಾರಾತಿ ಅಭಿಞ್ಞೇಯ್ಯಂ. ಆಯೂಹನಾ ಸಙ್ಖಾರಾತಿ ಅಭಿಞ್ಞೇಯ್ಯಂ. ಪಟಿಸನ್ಧಿ ಸಙ್ಖಾರಾತಿ ಅಭಿಞ್ಞೇಯ್ಯಂ. ಗತಿ ಸಙ್ಖಾರಾತಿ ಅಭಿಞ್ಞೇಯ್ಯಂ. ನಿಬ್ಬತ್ತಿ ಸಙ್ಖಾರಾತಿ ಅಭಿಞ್ಞೇಯ್ಯಂ. ಉಪಪತ್ತಿ ಸಙ್ಖಾರಾತಿ ಅಭಿಞ್ಞೇಯ್ಯಂ. ಜಾತಿ ಸಙ್ಖಾರಾತಿ ಅಭಿಞ್ಞೇಯ್ಯಂ. ಜರಾ ಸಙ್ಖಾರಾತಿ ಅಭಿಞ್ಞೇಯ್ಯಂ. ಬ್ಯಾಧಿ ಸಙ್ಖಾರಾತಿ ಅಭಿಞ್ಞೇಯ್ಯಂ. ಮರಣಂ ಸಙ್ಖಾರಾತಿ ಅಭಿಞ್ಞೇಯ್ಯಂ. ಸೋಕೋ ಸಙ್ಖಾರಾತಿ ಅಭಿಞ್ಞೇಯ್ಯಂ. ಪರಿದೇವೋ ಸಙ್ಖಾರಾತಿ ಅಭಿಞ್ಞೇಯ್ಯಂ. ಉಪಾಯಾಸೋ ಸಙ್ಖಾರಾತಿ ಅಭಿಞ್ಞೇಯ್ಯಂ.

ಅನುಪ್ಪಾದೋ ನಿಬ್ಬಾನನ್ತಿ ಅಭಿಞ್ಞೇಯ್ಯಂ. ಅಪ್ಪವತ್ತಂ ನಿಬ್ಬಾನನ್ತಿ ಅಭಿಞ್ಞೇಯ್ಯಂ. ಅನಿಮಿತ್ತಂ ನಿಬ್ಬಾನನ್ತಿ ಅಭಿಞ್ಞೇಯ್ಯಂ. ಅನಾಯೂಹನಾ ನಿಬ್ಬಾನನ್ತಿ ಅಭಿಞ್ಞೇಯ್ಯಂ. ಅಪ್ಪಟಿಸನ್ಧಿ ನಿಬ್ಬಾನನ್ತಿ ಅಭಿಞ್ಞೇಯ್ಯಂ. ಅಗತಿ ನಿಬ್ಬಾನನ್ತಿ ಅಭಿಞ್ಞೇಯ್ಯಂ. ಅನಿಬ್ಬತ್ತಿ ನಿಬ್ಬಾನನ್ತಿ ಅಭಿಞ್ಞೇಯ್ಯಂ. ಅನುಪಪತ್ತಿ ನಿಬ್ಬಾನನ್ತಿ ಅಭಿಞ್ಞೇಯ್ಯಂ. ಅಜಾತಿ ನಿಬ್ಬಾನನ್ತಿ ಅಭಿಞ್ಞೇಯ್ಯಂ. ಅಜರಂ ನಿಬ್ಬಾನನ್ತಿ ಅಭಿಞ್ಞೇಯ್ಯಂ. ಅಬ್ಯಾಧಿ ನಿಬ್ಬಾನನ್ತಿ ಅಭಿಞ್ಞೇಯ್ಯಂ. ಅಮತಂ ನಿಬ್ಬಾನನ್ತಿ ಅಭಿಞ್ಞೇಯ್ಯಂ. ಅಸೋಕೋ ನಿಬ್ಬಾನನ್ತಿ ಅಭಿಞ್ಞೇಯ್ಯಂ. ಅಪರಿದೇವೋ ನಿಬ್ಬಾನನ್ತಿ ಅಭಿಞ್ಞೇಯ್ಯಂ. ಅನುಪಾಯಾಸೋ ನಿಬ್ಬಾನನ್ತಿ ಅಭಿಞ್ಞೇಯ್ಯಂ.

ಉಪ್ಪಾದೋ ಸಙ್ಖಾರಾ, ಅನುಪ್ಪಾದೋ ನಿಬ್ಬಾನನ್ತಿ ಅಭಿಞ್ಞೇಯ್ಯಂ. ಪವತ್ತಂ ಸಙ್ಖಾರಾ, ಅಪ್ಪವತ್ತಂ ನಿಬ್ಬಾನನ್ತಿ ಅಭಿಞ್ಞೇಯ್ಯಂ. ನಿಮಿತ್ತಂ ಸಙ್ಖಾರಾ, ಅನಿಮಿತ್ತಂ ನಿಬ್ಬಾನನ್ತಿ ಅಭಿಞ್ಞೇಯ್ಯಂ. ಆಯೂಹನಾ ಸಙ್ಖಾರಾ, ಅನಾಯೂಹನಾ ನಿಬ್ಬಾನನ್ತಿ ಅಭಿಞ್ಞೇಯ್ಯಂ. ಪಟಿಸನ್ಧಿ ಸಙ್ಖಾರಾ, ಅಪ್ಪಟಿಸನ್ಧಿ ನಿಬ್ಬಾನನ್ತಿ ಅಭಿಞ್ಞೇಯ್ಯಂ. ಗತಿ ಸಙ್ಖಾರಾ, ಅಗತಿ ನಿಬ್ಬಾನನ್ತಿ ಅಭಿಞ್ಞೇಯ್ಯಂ. ನಿಬ್ಬತ್ತಿ ಸಙ್ಖಾರಾ, ಅನಿಬ್ಬತ್ತಿ ನಿಬ್ಬಾನನ್ತಿ ಅಭಿಞ್ಞೇಯ್ಯಂ. ಉಪಪತ್ತಿ ಸಙ್ಖಾರಾ, ಅನುಪಪತ್ತಿ ನಿಬ್ಬಾನನ್ತಿ ಅಭಿಞ್ಞೇಯ್ಯಂ. ಜಾತಿ ಸಙ್ಖಾರಾ, ಅಜಾತಿ ನಿಬ್ಬಾನನ್ತಿ ಅಭಿಞ್ಞೇಯ್ಯಂ. ಜರಾ ಸಙ್ಖಾರಾ, ಅಜರಾ ನಿಬ್ಬಾನನ್ತಿ ಅಭಿಞ್ಞೇಯ್ಯಂ. ಬ್ಯಾಧಿ ಸಙ್ಖಾರಾ, ಅಬ್ಯಾಧಿ ನಿಬ್ಬಾನ’’ನ್ತಿ ಅಭಿಞ್ಞೇಯ್ಯಂ. ಮರಣಂ ಸಙ್ಖಾರಾ, ಅಮತಂ ನಿಬ್ಬಾನನ್ತಿ ಅಭಿಞ್ಞೇಯ್ಯಂ. ಸೋಕೋ ಸಙ್ಖಾರಾ, ಅಸೋಕೋ ನಿಬ್ಬಾನನ್ತಿ ಅಭಿಞ್ಞೇಯ್ಯಂ. ಪರಿದೇವೋ ಸಙ್ಖಾರಾ, ಅಪರಿದೇವೋ ನಿಬ್ಬಾನನ್ತಿ ಅಭಿಞ್ಞೇಯ್ಯಂ. ಉಪಾಯಾಸೋ ಸಙ್ಖಾರಾ, ಅನುಪಾಯಾಸೋ ನಿಬ್ಬಾನನ್ತಿ ಅಭಿಞ್ಞೇಯ್ಯಂ.

ಪಠಮಭಾಣವಾರೋ.

೧೧. ಪರಿಗ್ಗಹಟ್ಠೋ ಅಭಿಞ್ಞೇಯ್ಯೋ; ಪರಿವಾರಟ್ಠೋ ಅಭಿಞ್ಞೇಯ್ಯೋ; ಪರಿಪೂರಟ್ಠೋ [ಪರಿಪೂರಣಟ್ಠೋ (ಕ.), ಪರಿಪೂರಿಟ್ಠೋ (ಸೀ. ಅಟ್ಠ.)] ಅಭಿಞ್ಞೇಯ್ಯೋ; ಏಕಗ್ಗಟ್ಠೋ ಅಭಿಞ್ಞೇಯ್ಯೋ; ಅವಿಕ್ಖೇಪಟ್ಠೋ ಅಭಿಞ್ಞೇಯ್ಯೋ; ಪಗ್ಗಹಟ್ಠೋ ಅಭಿಞ್ಞೇಯ್ಯೋ; ಅವಿಸಾರಟ್ಠೋ ಅಭಿಞ್ಞೇಯ್ಯೋ; ಅನಾವಿಲಟ್ಠೋ ಅಭಿಞ್ಞೇಯ್ಯೋ; ಅನಿಞ್ಜನಟ್ಠೋ ಅಭಿಞ್ಞೇಯ್ಯೋ; ಏಕತ್ತುಪಟ್ಠಾನವಸೇನ ಚಿತ್ತಸ್ಸ ಠಿತಟ್ಠೋ ಅಭಿಞ್ಞೇಯ್ಯೋ; ಆರಮ್ಮಣಟ್ಠೋ ಅಭಿಞ್ಞೇಯ್ಯೋ; ಗೋಚರಟ್ಠೋ ಅಭಿಞ್ಞೇಯ್ಯೋ; ಪಹಾನಟ್ಠೋ ಅಭಿಞ್ಞೇಯ್ಯೋ; ಪರಿಚ್ಚಾಗಟ್ಠೋ ಅಭಿಞ್ಞೇಯ್ಯೋ; ವುಟ್ಠಾನಟ್ಠೋ ಅಭಿಞ್ಞೇಯ್ಯೋ; ವಿವಟ್ಟನಟ್ಠೋ [ನಿವತ್ತನಟ್ಠೋ (ಕ.)] ಅಭಿಞ್ಞೇಯ್ಯೋ; ಸನ್ತಟ್ಠೋ ಅಭಿಞ್ಞೇಯ್ಯೋ; ಪಣೀತಟ್ಠೋ ಅಭಿಞ್ಞೇಯ್ಯೋ; ವಿಮುತ್ತಟ್ಠೋ ಅಭಿಞ್ಞೇಯ್ಯೋ; ಅನಾಸವಟ್ಠೋ ಅಭಿಞ್ಞೇಯ್ಯೋ; ತರಣಟ್ಠೋ ಅಭಿಞ್ಞೇಯ್ಯೋ; ಅನಿಮಿತ್ತಟ್ಠೋ ಅಭಿಞ್ಞೇಯ್ಯೋ; ಅಪ್ಪಣಿಹಿತಟ್ಠೋ ಅಭಿಞ್ಞೇಯ್ಯೋ; ಸುಞ್ಞತಟ್ಠೋ ಅಭಿಞ್ಞೇಯ್ಯೋ; ಏಕರಸಟ್ಠೋ ಅಭಿಞ್ಞೇಯ್ಯೋ; ಅನತಿವತ್ತನಟ್ಠೋ ಅಭಿಞ್ಞೇಯ್ಯೋ; ಯುಗನದ್ಧಟ್ಠೋ [ಯುಗನನ್ಧನಟ್ಠೋ (ಕ.)] ಅಭಿಞ್ಞೇಯ್ಯೋ; ನಿಯ್ಯಾನಟ್ಠೋ ಅಭಿಞ್ಞೇಯ್ಯೋ; ಹೇತುಟ್ಠೋ [ಹೇತಟ್ಠೋ (ಸ್ಯಾ.)] ಅಭಿಞ್ಞೇಯ್ಯೋ; ದಸ್ಸನಟ್ಠೋ ಅಭಿಞ್ಞೇಯ್ಯೋ; ಆಧಿಪತೇಯ್ಯಟ್ಠೋ ಅಭಿಞ್ಞೇಯ್ಯೋ.

೧೨. ಸಮಥಸ್ಸ ಅವಿಕ್ಖೇಪಟ್ಠೋ ಅಭಿಞ್ಞೇಯ್ಯೋ; ವಿಪಸ್ಸನಾಯ ಅನುಪಸ್ಸನಟ್ಠೋ ಅಭಿಞ್ಞೇಯ್ಯೋ; ಸಮಥವಿಪಸ್ಸನಾನಂ ಏಕರಸಟ್ಠೋ ಅಭಿಞ್ಞೇಯ್ಯೋ; ಯುಗನದ್ಧಸ್ಸ ಅನತಿವತ್ತನಟ್ಠೋ ಅಭಿಞ್ಞೇಯ್ಯೋ; ಸಿಕ್ಖಾಯ ಸಮಾದಾನಟ್ಠೋ ಅಭಿಞ್ಞೇಯ್ಯೋ; ಆರಮ್ಮಣಸ್ಸ ಗೋಚರಟ್ಠೋ ಅಭಿಞ್ಞೇಯ್ಯೋ; ಲೀನಸ್ಸ ಚಿತ್ತಸ್ಸ ಪಗ್ಗಹಟ್ಠೋ ಅಭಿಞ್ಞೇಯ್ಯೋ; ಉದ್ಧತಸ್ಸ ಚಿತ್ತಸ್ಸ ನಿಗ್ಗಹಟ್ಠೋ ಅಭಿಞ್ಞೇಯ್ಯೋ; ಉಭೋವಿಸುದ್ಧಾನಂ ಅಜ್ಝುಪೇಕ್ಖನಟ್ಠೋ ಅಭಿಞ್ಞೇಯ್ಯೋ; ವಿಸೇಸಾಧಿಗಮಟ್ಠೋ ಅಭಿಞ್ಞೇಯ್ಯೋ; ಉತ್ತರಿ ಪಟಿವೇಧಟ್ಠೋ ಅಭಿಞ್ಞೇಯ್ಯೋ; ಸಚ್ಚಾಭಿಸಮಯಟ್ಠೋ ಅಭಿಞ್ಞೇಯ್ಯೋ; ನಿರೋಧೇ ಪತಿಟ್ಠಾಪಕಟ್ಠೋ ಅಭಿಞ್ಞೇಯ್ಯೋ.

ಸದ್ಧಿನ್ದ್ರಿಯಸ್ಸ ಅಧಿಮೋಕ್ಖಟ್ಠೋ ಅಭಿಞ್ಞೇಯ್ಯೋ; ವೀರಿಯಿನ್ದ್ರಿಯಸ್ಸ ಪಗ್ಗಹಟ್ಠೋ ಅಭಿಞ್ಞೇಯ್ಯೋ; ಸತಿನ್ದ್ರಿಯಸ್ಸ ಉಪಟ್ಠಾನಟ್ಠೋ ಅಭಿಞ್ಞೇಯ್ಯೋ; ಸಮಾಧಿನ್ದ್ರಿಯಸ್ಸ ಅವಿಕ್ಖೇಪಟ್ಠೋ ಅಭಿಞ್ಞೇಯ್ಯೋ; ಪಞ್ಞಿನ್ದ್ರಿಯಸ್ಸ ದಸ್ಸನಟ್ಠೋ ಅಭಿಞ್ಞೇಯ್ಯೋ.

ಸದ್ಧಾಬಲಸ್ಸ ಅಸ್ಸದ್ಧಿಯೇ ಅಕಮ್ಪಿಯಟ್ಠೋ ಅಭಿಞ್ಞೇಯ್ಯೋ; ವೀರಿಯಬಲಸ್ಸ ಕೋಸಜ್ಜೇ ಅಕಮ್ಪಿಯಟ್ಠೋ ಅಭಿಞ್ಞೇಯ್ಯೋ; ಸತಿಬಲಸ್ಸ ಪಮಾದೇ ಅಕಮ್ಪಿಯಟ್ಠೋ ಅಭಿಞ್ಞೇಯ್ಯೋ; ಸಮಾಧಿಬಲಸ್ಸ ಉದ್ಧಚ್ಚೇ ಅಕಮ್ಪಿಯಟ್ಠೋ ಅಭಿಞ್ಞೇಯ್ಯೋ; ಪಞ್ಞಾಬಲಸ್ಸ ಅವಿಜ್ಜಾಯ ಅಕಮ್ಪಿಯಟ್ಠೋ ಅಭಿಞ್ಞೇಯ್ಯೋ.

ಸತಿಸಮ್ಬೋಜ್ಝಙ್ಗಸ್ಸ ಉಪಟ್ಠಾನಟ್ಠೋ ಅಭಿಞ್ಞೇಯ್ಯೋ; ಧಮ್ಮವಿಚಯಸಮ್ಬೋಜ್ಝಙ್ಗಸ್ಸ ಪವಿಚಯಟ್ಠೋ ಅಭಿಞ್ಞೇಯ್ಯೋ; ವೀರಿಯಸಮ್ಬೋಜ್ಝಙ್ಗಸ್ಸ ಪಗ್ಗಹಟ್ಠೋ ಅಭಿಞ್ಞೇಯ್ಯೋ; ಪೀತಿಸಮ್ಬೋಜ್ಝಙ್ಗಸ್ಸ ಫರಣಟ್ಠೋ ಅಭಿಞ್ಞೇಯ್ಯೋ; ಪಸ್ಸದ್ಧಿಸಮ್ಬೋಜ್ಝಙ್ಗಸ್ಸ ಉಪಸಮಟ್ಠೋ ಅಭಿಞ್ಞೇಯ್ಯೋ; ಸಮಾಧಿಸಮ್ಬೋಜ್ಝಙ್ಗಸ್ಸ ಅವಿಕ್ಖೇಪಟ್ಠೋ ಅಭಿಞ್ಞೇಯ್ಯೋ; ಉಪೇಕ್ಖಾಸಮ್ಬೋಜ್ಝಙ್ಗಸ್ಸ ಪಟಿಸಙ್ಖಾನಟ್ಠೋ ಅಭಿಞ್ಞೇಯ್ಯೋ.

ಸಮ್ಮಾದಿಟ್ಠಿಯಾ ದಸ್ಸನಟ್ಠೋ ಅಭಿಞ್ಞೇಯ್ಯೋ; ಸಮ್ಮಾಸಙ್ಕಪ್ಪಸ್ಸ ಅಭಿನಿರೋಪನಟ್ಠೋ ಅಭಿಞ್ಞೇಯ್ಯೋ; ಸಮ್ಮಾವಾಚಾಯ ಪರಿಗ್ಗಹಟ್ಠೋ ಅಭಿಞ್ಞೇಯ್ಯೋ; ಸಮ್ಮಾಕಮ್ಮನ್ತಸ್ಸ ಸಮುಟ್ಠಾನಟ್ಠೋ ಅಭಿಞ್ಞೇಯ್ಯೋ; ಸಮ್ಮಾಆಜೀವಸ್ಸ ವೋದಾನಟ್ಠೋ ಅಭಿಞ್ಞೇಯ್ಯೋ; ಸಮ್ಮಾವಾಯಾಮಸ್ಸ ಪಗ್ಗಹಟ್ಠೋ ಅಭಿಞ್ಞೇಯ್ಯೋ; ಸಮ್ಮಾಸತಿಯಾ ಉಪಟ್ಠಾನಟ್ಠೋ ಅಭಿಞ್ಞೇಯ್ಯೋ; ಸಮ್ಮಾಸಮಾಧಿಸ್ಸ ಅವಿಕ್ಖೇಪಟ್ಠೋ ಅಭಿಞ್ಞೇಯ್ಯೋ.

೧೩. ಇನ್ದ್ರಿಯಾನಂ ಆಧಿಪತೇಯ್ಯಟ್ಠೋ ಅಭಿಞ್ಞೇಯ್ಯೋ; ಬಲಾನಂ ಅಕಮ್ಪಿಯಟ್ಠೋ ಅಭಿಞ್ಞೇಯ್ಯೋ; ಬೋಜ್ಝಙ್ಗಾನಂ ನಿಯ್ಯಾನಟ್ಠೋ ಅಭಿಞ್ಞೇಯ್ಯೋ; ಮಗ್ಗಸ್ಸ ಹೇತುಟ್ಠೋ ಅಭಿಞ್ಞೇಯ್ಯೋ; ಸತಿಪಟ್ಠಾನಾನಂ ಉಪಟ್ಠಾನಟ್ಠೋ ಅಭಿಞ್ಞೇಯ್ಯೋ; ಸಮ್ಮಪ್ಪಧಾನಾನಂ ಪದಹನಟ್ಠೋ ಅಭಿಞ್ಞೇಯ್ಯೋ; ಇದ್ಧಿಪಾದಾನಂ ಇಜ್ಝನಟ್ಠೋ ಅಭಿಞ್ಞೇಯ್ಯೋ; ಸಚ್ಚಾನಂ ತಥಟ್ಠೋ ಅಭಿಞ್ಞೇಯ್ಯೋ; ಪಯೋಗಾನಂ [ಮಗ್ಗಾನಂ (ಸಬ್ಬತ್ಥ) ಅಟ್ಠಕಥಾ ಪಸ್ಸಿತಬ್ಬಾ] ಪಟಿಪ್ಪಸ್ಸದ್ಧಟ್ಠೋ ಅಭಿಞ್ಞೇಯ್ಯೋ; ಫಲಾನಂ ಸಚ್ಛಿಕಿರಿಯಟ್ಠೋ ಅಭಿಞ್ಞೇಯ್ಯೋ.

ವಿತಕ್ಕಸ್ಸ ಅಭಿನಿರೋಪನಟ್ಠೋ ಅಭಿಞ್ಞೇಯ್ಯೋ; ವಿಚಾರಸ್ಸ ಉಪವಿಚಾರಟ್ಠೋ ಅಭಿಞ್ಞೇಯ್ಯೋ; ಪೀತಿಯಾ ಫರಣಟ್ಠೋ ಅಭಿಞ್ಞೇಯ್ಯೋ; ಸುಖಸ್ಸ ಅಭಿಸನ್ದನಟ್ಠೋ ಅಭಿಞ್ಞೇಯ್ಯೋ. ಚಿತ್ತಸ್ಸ ಏಕಗ್ಗಟ್ಠೋ ಅಭಿಞ್ಞೇಯ್ಯೋ. ಆವಜ್ಜನಟ್ಠೋ ಅಭಿಞ್ಞೇಯ್ಯೋ; ವಿಜಾನನಟ್ಠೋ ಅಭಿಞ್ಞೇಯ್ಯೋ; ಪಜಾನನಟ್ಠೋ ಅಭಿಞ್ಞೇಯ್ಯೋ; ಸಞ್ಜಾನನಟ್ಠೋ ಅಭಿಞ್ಞೇಯ್ಯೋ; ಏಕೋದಟ್ಠೋ ಅಭಿಞ್ಞೇಯ್ಯೋ. ಅಭಿಞ್ಞಾಯ ಞಾತಟ್ಠೋ ಅಭಿಞ್ಞೇಯ್ಯೋ; ಪರಿಞ್ಞಾಯ ತೀರಣಟ್ಠೋ ಅಭಿಞ್ಞೇಯ್ಯೋ; ಪಹಾನಸ್ಸ ಪರಿಚ್ಚಾಗಟ್ಠೋ ಅಭಿಞ್ಞೇಯ್ಯೋ; ಭಾವನಾಯ ಏಕರಸಟ್ಠೋ ಅಭಿಞ್ಞೇಯ್ಯೋ; ಸಚ್ಛಿಕಿರಿಯಾಯ ಫಸ್ಸನಟ್ಠೋ ಅಭಿಞ್ಞೇಯ್ಯೋ; ಖನ್ಧಾನಂ ಖನ್ಧಟ್ಠೋ ಅಭಿಞ್ಞೇಯ್ಯೋ; ಧಾತೂನಂ ಧಾತುಟ್ಠೋ [ಧಾತಟ್ಠೋ (ಸ್ಯಾ.)] ಅಭಿಞ್ಞೇಯ್ಯೋ; ಆಯತನಾನಂ ಆಯತನಟ್ಠೋ ಅಭಿಞ್ಞೇಯ್ಯೋ; ಸಙ್ಖತಾನಂ ಸಙ್ಖತಟ್ಠೋ ಅಭಿಞ್ಞೇಯ್ಯೋ; ಅಸಙ್ಖತಸ್ಸ ಅಸಙ್ಖತಟ್ಠೋ ಅಭಿಞ್ಞೇಯ್ಯೋ.

೧೪. ಚಿತ್ತಟ್ಠೋ ಅಭಿಞ್ಞೇಯ್ಯೋ; ಚಿತ್ತಾನನ್ತರಿಯಟ್ಠೋ ಅಭಿಞ್ಞೇಯ್ಯೋ; ಚಿತ್ತಸ್ಸ ವುಟ್ಠಾನಟ್ಠೋ ಅಭಿಞ್ಞೇಯ್ಯೋ; ಚಿತ್ತಸ್ಸ ವಿವಟ್ಟನಟ್ಠೋ ಅಭಿಞ್ಞೇಯ್ಯೋ; ಚಿತ್ತಸ್ಸ ಹೇತುಟ್ಠೋ ಅಭಿಞ್ಞೇಯ್ಯೋ; ಚಿತ್ತಸ್ಸ ಪಚ್ಚಯಟ್ಠೋ ಅಭಿಞ್ಞೇಯ್ಯೋ; ಚಿತ್ತಸ್ಸ ವತ್ಥುಟ್ಠೋ [ವತ್ಥಟ್ಠೋ (ಸ್ಯಾ.)] ಅಭಿಞ್ಞೇಯ್ಯೋ; ಚಿತ್ತಸ್ಸ ಭೂಮಟ್ಠೋ [ಭುಮ್ಮಟ್ಠೋ (ಸ್ಯಾ. ಸೀ. ಅಟ್ಠ.) (ಏಕತ್ತೇ ಉಪನಿಬನ್ಧನಟ್ಠೋ ಅಭಿಞ್ಞೇಯ್ಯೋ) (ಕ.) ಅಟ್ಠಕಥಾ ಪಸ್ಸಿತಬ್ಬಾ] ಅಭಿಞ್ಞೇಯ್ಯೋ; ಚಿತ್ತಸ್ಸ ಆರಮ್ಮಣಟ್ಠೋ ಅಭಿಞ್ಞೇಯ್ಯೋ; ಚಿತ್ತಸ್ಸ ಗೋಚರಟ್ಠೋ ಅಭಿಞ್ಞೇಯ್ಯೋ; ಚಿತ್ತಸ್ಸ ಚರಿಯಟ್ಠೋ ಅಭಿಞ್ಞೇಯ್ಯೋ; ಚಿತ್ತಸ್ಸ ಗತಟ್ಠೋ ಅಭಿಞ್ಞೇಯ್ಯೋ; ಚಿತ್ತಸ್ಸ ಅಭಿನೀಹಾರಟ್ಠೋ ಅಭಿಞ್ಞೇಯ್ಯೋ; ಚಿತ್ತಸ್ಸ ನಿಯ್ಯಾನಟ್ಠೋ ಅಭಿಞ್ಞೇಯ್ಯೋ; ಚಿತ್ತಸ್ಸ ನಿಸ್ಸರಣಟ್ಠೋ ಅಭಿಞ್ಞೇಯ್ಯೋ.

೧೫. ಏಕತ್ತೇ ಆವಜ್ಜನಟ್ಠೋ ಅಭಿಞ್ಞೇಯ್ಯೋ; ಏಕತ್ತೇ ವಿಜಾನನಟ್ಠೋ ಅಭಿಞ್ಞೇಯ್ಯೋ; ಏಕತ್ತೇ ಪಜಾನನಟ್ಠೋ ಅಭಿಞ್ಞೇಯ್ಯೋ; ಏಕತ್ತೇ ಸಞ್ಜಾನನಟ್ಠೋ ಅಭಿಞ್ಞೇಯ್ಯೋ; ಏಕತ್ತೇ ಏಕದಟ್ಠೋ ಅಭಿಞ್ಞೇಯ್ಯೋ; ಏಕತ್ತೇ ಉಪನಿಬನ್ಧಟ್ಠೋ ಅಭಿಞ್ಞೇಯ್ಯೋ; ಏಕತ್ತೇ ಪಕ್ಖನ್ದನಟ್ಠೋ ಅಭಿಞ್ಞೇಯ್ಯೋ; ಏಕತ್ತೇ ಪಸೀದನಟ್ಠೋ ಅಭಿಞ್ಞೇಯ್ಯೋ; ಏಕತ್ತೇ ಸನ್ತಿಟ್ಠನಟ್ಠೋ ಅಭಿಞ್ಞೇಯ್ಯೋ; ಏಕತ್ತೇ ವಿಮುಚ್ಚನಟ್ಠೋ ಅಭಿಞ್ಞೇಯ್ಯೋ; ಏಕತ್ತೇ ‘‘ಏತಂ ಸನ್ತ’’ನ್ತಿ ಪಸ್ಸನಟ್ಠೋ ಅಭಿಞ್ಞೇಯ್ಯೋ; ಏಕತ್ತೇ ಯಾನೀಕತಟ್ಠೋ ಅಭಿಞ್ಞೇಯ್ಯೋ; ಏಕತ್ತೇ ವತ್ಥುಕತಟ್ಠೋ ಅಭಿಞ್ಞೇಯ್ಯೋ; ಏಕತ್ತೇ ಅನುಟ್ಠಿತಟ್ಠೋ ಅಭಿಞ್ಞೇಯ್ಯೋ; ಏಕತ್ತೇ ಪರಿಚಿತಟ್ಠೋ ಅಭಿಞ್ಞೇಯ್ಯೋ; ಏಕತ್ತೇ ಸುಸಮಾರದ್ಧಟ್ಠೋ ಅಭಿಞ್ಞೇಯ್ಯೋ; ಏಕತ್ತೇ ಪರಿಗ್ಗಹಟ್ಠೋ ಅಭಿಞ್ಞೇಯ್ಯೋ; ಏಕತ್ತೇ ಪರಿವಾರಟ್ಠೋ ಅಭಿಞ್ಞೇಯ್ಯೋ; ಏಕತ್ತೇ ಪರಿಪೂರಟ್ಠೋ ಅಭಿಞ್ಞೇಯ್ಯೋ; ಏಕತ್ತೇ ಸಮೋಧಾನಟ್ಠೋ ಅಭಿಞ್ಞೇಯ್ಯೋ; ಏಕತ್ತೇ ಅಧಿಟ್ಠಾನಟ್ಠೋ ಅಭಿಞ್ಞೇಯ್ಯೋ; ಏಕತ್ತೇ ಆಸೇವನಟ್ಠೋ ಅಭಿಞ್ಞೇಯ್ಯೋ; ಏಕತ್ತೇ ಭಾವನಟ್ಠೋ ಅಭಿಞ್ಞೇಯ್ಯೋ; ಏಕತ್ತೇ ಬಹುಲೀಕಮ್ಮಟ್ಠೋ ಅಭಿಞ್ಞೇಯ್ಯೋ; ಏಕತ್ತೇ ಸುಸಮುಗ್ಗತಟ್ಠೋ ಅಭಿಞ್ಞೇಯ್ಯೋ; ಏಕತ್ತೇ ಸುವಿಮುತ್ತಟ್ಠೋ ಅಭಿಞ್ಞೇಯ್ಯೋ; ಏಕತ್ತೇ ಬುಜ್ಝನಟ್ಠೋ ಅಭಿಞ್ಞೇಯ್ಯೋ; ಏಕತ್ತೇ ಅನುಬುಜ್ಝನಟ್ಠೋ ಅಭಿಞ್ಞೇಯ್ಯೋ; ಏಕತ್ತೇ ಪಟಿಬುಜ್ಝನಟ್ಠೋ ಅಭಿಞ್ಞೇಯ್ಯೋ; ಏಕತ್ತೇ ಸಮ್ಬುಜ್ಝನಟ್ಠೋ ಅಭಿಞ್ಞೇಯ್ಯೋ; ಏಕತ್ತೇ ಬೋಧನಟ್ಠೋ ಅಭಿಞ್ಞೇಯ್ಯೋ; ಏಕತ್ತೇ ಅನುಬೋಧನಟ್ಠೋ ಅಭಿಞ್ಞೇಯ್ಯೋ; ಏಕತ್ತೇ ಪಟಿಬೋಧನಟ್ಠೋ ಅಭಿಞ್ಞೇಯ್ಯೋ; ಏಕತ್ತೇ ಸಮ್ಬೋಧನಟ್ಠೋ ಅಭಿಞ್ಞೇಯ್ಯೋ; ಏಕತ್ತೇ ಬೋಧಿಪಕ್ಖಿಯಟ್ಠೋ ಅಭಿಞ್ಞೇಯ್ಯೋ; ಏಕತ್ತೇ ಅನುಬೋಧಿಪಕ್ಖಿಯಟ್ಠೋ ಅಭಿಞ್ಞೇಯ್ಯೋ; ಏಕತ್ತೇ ಪಟಿಬೋಧಿಪಕ್ಖಿಯಟ್ಠೋ ಅಭಿಞ್ಞೇಯ್ಯೋ; ಏಕತ್ತೇ ಸಮ್ಬೋಧಿಪಕ್ಖಿಯಟ್ಠೋ ಅಭಿಞ್ಞೇಯ್ಯೋ; ಏಕತ್ತೇ ಜೋತನಟ್ಠೋ ಅಭಿಞ್ಞೇಯ್ಯೋ; ಏಕತ್ತೇ ಉಜ್ಜೋತನಟ್ಠೋ ಅಭಿಞ್ಞೇಯ್ಯೋ; ಏಕತ್ತೇ ಅನುಜೋತನಟ್ಠೋ ಅಭಿಞ್ಞೇಯ್ಯೋ; ಏಕತ್ತೇ ಪಟಿಜೋತನಟ್ಠೋ ಅಭಿಞ್ಞೇಯ್ಯೋ; ಏಕತ್ತೇ ಸಞ್ಜೋತನಟ್ಠೋ ಅಭಿಞ್ಞೇಯ್ಯೋ.

೧೬. ಪತಾಪನಟ್ಠೋ [ಪಕಾಸನಟ್ಠೋ (ಕ.)] ಅಭಿಞ್ಞೇಯ್ಯೋ; ವಿರೋಚನಟ್ಠೋ ಅಭಿಞ್ಞೇಯ್ಯೋ; ಕಿಲೇಸಾನಂ ಸನ್ತಾಪನಟ್ಠೋ ಅಭಿಞ್ಞೇಯ್ಯೋ; ಅಮಲಟ್ಠೋ ಅಭಿಞ್ಞೇಯ್ಯೋ; ವಿಮಲಟ್ಠೋ ಅಭಿಞ್ಞೇಯ್ಯೋ; ನಿಮ್ಮಲಟ್ಠೋ ಅಭಿಞ್ಞೇಯ್ಯೋ; ಸಮಟ್ಠೋ ಅಭಿಞ್ಞೇಯ್ಯೋ; ಸಮಯಟ್ಠೋ ಅಭಿಞ್ಞೇಯ್ಯೋ; ವಿವೇಕಟ್ಠೋ ಅಭಿಞ್ಞೇಯ್ಯೋ; ವಿವೇಕಚರಿಯಟ್ಠೋ ಅಭಿಞ್ಞೇಯ್ಯೋ; ವಿರಾಗಟ್ಠೋ ಅಭಿಞ್ಞೇಯ್ಯೋ; ವಿರಾಗಚರಿಯಟ್ಠೋ ಅಭಿಞ್ಞೇಯ್ಯೋ; ನಿರೋಧಟ್ಠೋ ಅಭಿಞ್ಞೇಯ್ಯೋ; ನಿರೋಧಚರಿಯಟ್ಠೋ ಅಭಿಞ್ಞೇಯ್ಯೋ; ವೋಸಗ್ಗಟ್ಠೋ [ವೋಸ್ಸಗ್ಗಟ್ಠೋ (ಸ್ಯಾ. ಕ.)] ಅಭಿಞ್ಞೇಯ್ಯೋ; ವೋಸಗ್ಗಚರಿಯಟ್ಠೋ ಅಭಿಞ್ಞೇಯ್ಯೋ; ವಿಮುತ್ತಟ್ಠೋ ಅಭಿಞ್ಞೇಯ್ಯೋ; ವಿಮುತ್ತಿಚರಿಯಟ್ಠೋ ಅಭಿಞ್ಞೇಯ್ಯೋ.

ಛನ್ದಟ್ಠೋ ಅಭಿಞ್ಞೇಯ್ಯೋ; ಛನ್ದಸ್ಸ ಮೂಲಟ್ಠೋ ಅಭಿಞ್ಞೇಯ್ಯೋ; ಛನ್ದಸ್ಸ ಪಾದಟ್ಠೋ ಅಭಿಞ್ಞೇಯ್ಯೋ; ಛನ್ದಸ್ಸ ಪಧಾನಟ್ಠೋ ಅಭಿಞ್ಞೇಯ್ಯೋ; ಛನ್ದಸ್ಸ ಇಜ್ಝನಟ್ಠೋ ಅಭಿಞ್ಞೇಯ್ಯೋ; ಛನ್ದಸ್ಸ ಅಧಿಮೋಕ್ಖಟ್ಠೋ ಅಭಿಞ್ಞೇಯ್ಯೋ; ಛನ್ದಸ್ಸ ಪಗ್ಗಹಟ್ಠೋ ಅಭಿಞ್ಞೇಯ್ಯೋ; ಛನ್ದಸ್ಸ ಉಪಟ್ಠಾನಟ್ಠೋ ಅಭಿಞ್ಞೇಯ್ಯೋ; ಛನ್ದಸ್ಸ ಅವಿಕ್ಖೇಪಟ್ಠೋ ಅಭಿಞ್ಞೇಯ್ಯೋ; ಛನ್ದಸ್ಸ ದಸ್ಸನಟ್ಠೋ ಅಭಿಞ್ಞೇಯ್ಯೋ.

ವೀರಿಯಟ್ಠೋ ಅಭಿಞ್ಞೇಯ್ಯೋ; ವೀರಿಯಸ್ಸ ಮೂಲಟ್ಠೋ ಅಭಿಞ್ಞೇಯ್ಯೋ; ವೀರಿಯಸ್ಸ ಪಾದಟ್ಠೋ ಅಭಿಞ್ಞೇಯ್ಯೋ; ವೀರಿಯಸ್ಸ ಪಧಾನಟ್ಠೋ ಅಭಿಞ್ಞೇಯ್ಯೋ; ವೀರಿಯಸ್ಸ ಇಜ್ಝನಟ್ಠೋ ಅಭಿಞ್ಞೇಯ್ಯೋ; ವೀರಿಯಸ್ಸ ಅಧಿಮೋಕ್ಖಟ್ಠೋ ಅಭಿಞ್ಞೇಯ್ಯೋ; ವೀರಿಯಸ್ಸ ಪಗ್ಗಹಟ್ಠೋ ಅಭಿಞ್ಞೇಯ್ಯೋ; ವೀರಿಯಸ್ಸ ಉಪಟ್ಠಾನಟ್ಠೋ ಅಭಿಞ್ಞೇಯ್ಯೋ; ವೀರಿಯಸ್ಸ ಅವಿಕ್ಖೇಪಟ್ಠೋ ಅಭಿಞ್ಞೇಯ್ಯೋ; ವೀರಿಯಸ್ಸ ದಸ್ಸನಟ್ಠೋ ಅಭಿಞ್ಞೇಯ್ಯೋ.

ಚಿತ್ತಟ್ಠೋ ಅಭಿಞ್ಞೇಯ್ಯೋ; ಚಿತ್ತಸ್ಸ ಮೂಲಟ್ಠೋ ಅಭಿಞ್ಞೇಯ್ಯೋ; ಚಿತ್ತಸ್ಸ ಪಾದಟ್ಠೋ ಅಭಿಞ್ಞೇಯ್ಯೋ; ಚಿತ್ತಸ್ಸ ಪಧಾನಟ್ಠೋ ಅಭಿಞ್ಞೇಯ್ಯೋ; ಚಿತ್ತಸ್ಸ ಇಜ್ಝನಟ್ಠೋ ಅಭಿಞ್ಞೇಯ್ಯೋ; ಚಿತ್ತಸ್ಸ ಅಧಿಮೋಕ್ಖಟ್ಠೋ ಅಭಿಞ್ಞೇಯ್ಯೋ; ಚಿತ್ತಸ್ಸ ಪಗ್ಗಹಟ್ಠೋ ಅಭಿಞ್ಞೇಯ್ಯೋ; ಚಿತ್ತಸ್ಸ ಉಪಟ್ಠಾನಟ್ಠೋ ಅಭಿಞ್ಞೇಯ್ಯೋ; ಚಿತ್ತಸ್ಸ ಅವಿಕ್ಖೇಪಟ್ಠೋ ಅಭಿಞ್ಞೇಯ್ಯೋ; ಚಿತ್ತಸ್ಸ ದಸ್ಸನಟ್ಠೋ ಅಭಿಞ್ಞೇಯ್ಯೋ.

ವೀಮಂಸಟ್ಠೋ ಅಭಿಞ್ಞೇಯ್ಯೋ; ವೀಮಂಸಾಯ ಮೂಲಟ್ಠೋ ಅಭಿಞ್ಞೇಯ್ಯೋ; ವೀಮಂಸಾಯ ಪಾದಟ್ಠೋ ಅಭಿಞ್ಞೇಯ್ಯೋ; ವೀಮಂಸಾಯ ಪಧಾನಟ್ಠೋ ಅಭಿಞ್ಞೇಯ್ಯೋ; ವೀಮಂಸಾಯ ಇಜ್ಝನಟ್ಠೋ ಅಭಿಞ್ಞೇಯ್ಯೋ; ವೀಮಂಸಾಯ ಅಧಿಮೋಕ್ಖಟ್ಠೋ ಅಭಿಞ್ಞೇಯ್ಯೋ; ವೀಮಂಸಾಯ ಪಗ್ಗಹಟ್ಠೋ ಅಭಿಞ್ಞೇಯ್ಯೋ; ವೀಮಂಸಾಯ ಉಪಟ್ಠಾನಟ್ಠೋ ಅಭಿಞ್ಞೇಯ್ಯೋ; ವೀಮಂಸಾಯ ಅವಿಕ್ಖೇಪಟ್ಠೋ ಅಭಿಞ್ಞೇಯ್ಯೋ; ವೀಮಂಸಾಯ ದಸ್ಸನಟ್ಠೋ ಅಭಿಞ್ಞೇಯ್ಯೋ.

೧೭. ದುಕ್ಖಟ್ಠೋ ಅಭಿಞ್ಞೇಯ್ಯೋ; ದುಕ್ಖಸ್ಸ ಪೀಳನಟ್ಠೋ ಅಭಿಞ್ಞೇಯ್ಯೋ; ದುಕ್ಖಸ್ಸ ಸಙ್ಖತಟ್ಠೋ ಅಭಿಞ್ಞೇಯ್ಯೋ; ದುಕ್ಖಸ್ಸ ಸನ್ತಾಪಟ್ಠೋ ಅಭಿಞ್ಞೇಯ್ಯೋ; ದುಕ್ಖಸ್ಸ ವಿಪರಿಣಾಮಟ್ಠೋ ಅಭಿಞ್ಞೇಯ್ಯೋ. ಸಮುದಯಟ್ಠೋ ಅಭಿಞ್ಞೇಯ್ಯೋ; ಸಮುದಯಸ್ಸ ಆಯೂಹನಟ್ಠೋ [ಆಯುಹನಟ್ಠೋ (ಸ್ಯಾ.)] ಅಭಿಞ್ಞೇಯ್ಯೋ; ಸಮುದಯಸ್ಸ ನಿದಾನಟ್ಠೋ ಅಭಿಞ್ಞೇಯ್ಯೋ; ಸಮುದಯಸ್ಸ ಸಞ್ಞೋಗಟ್ಠೋ ಅಭಿಞ್ಞೇಯ್ಯೋ; ಸಮುದಯಸ್ಸ ಪಲಿಬೋಧಟ್ಠೋ ಅಭಿಞ್ಞೇಯ್ಯೋ; ನಿರೋಧಟ್ಠೋ ಅಭಿಞ್ಞೇಯ್ಯೋ; ನಿರೋಧಸ್ಸ ನಿಸ್ಸರಣಟ್ಠೋ ಅಭಿಞ್ಞೇಯ್ಯೋ; ನಿರೋಧಸ್ಸ ವಿವೇಕಟ್ಠೋ ಅಭಿಞ್ಞೇಯ್ಯೋ; ನಿರೋಧಸ್ಸ ಅಸಙ್ಖತಟ್ಠೋ ಅಭಿಞ್ಞೇಯ್ಯೋ; ನಿರೋಧಸ್ಸ ಅಮತಟ್ಠೋ ಅಭಿಞ್ಞೇಯ್ಯೋ. ಮಗ್ಗಟ್ಠೋ ಅಭಿಞ್ಞೇಯ್ಯೋ; ಮಗ್ಗಸ್ಸ ನಿಯ್ಯಾನಟ್ಠೋ ಅಭಿಞ್ಞೇಯ್ಯೋ; ಮಗ್ಗಸ್ಸ ಹೇತುಟ್ಠೋ ಅಭಿಞ್ಞೇಯ್ಯೋ; ಮಗ್ಗಸ್ಸ ದಸ್ಸನಟ್ಠೋ ಅಭಿಞ್ಞೇಯ್ಯೋ; ಮಗ್ಗಸ್ಸ ಆಧಿಪತೇಯ್ಯಟ್ಠೋ ಅಭಿಞ್ಞೇಯ್ಯೋ.

ತಥಟ್ಠೋ ಅಭಿಞ್ಞೇಯ್ಯೋ; ಅನತ್ತಟ್ಠೋ ಅಭಿಞ್ಞೇಯ್ಯೋ; ಸಚ್ಚಟ್ಠೋ ಅಭಿಞ್ಞೇಯ್ಯೋ; ಪಟಿವೇಧಟ್ಠೋ ಅಭಿಞ್ಞೇಯ್ಯೋ; ಅಭಿಜಾನನಟ್ಠೋ ಅಭಿಞ್ಞೇಯ್ಯೋ; ಪರಿಜಾನನಟ್ಠೋ ಅಭಿಞ್ಞೇಯ್ಯೋ; ಧಮ್ಮಟ್ಠೋ ಅಭಿಞ್ಞೇಯ್ಯೋ; ಧಾತುಟ್ಠೋ ಅಭಿಞ್ಞೇಯ್ಯೋ; ಞಾತಟ್ಠೋ ಅಭಿಞ್ಞೇಯ್ಯೋ; ಸಚ್ಛಿಕಿರಿಯಟ್ಠೋ ಅಭಿಞ್ಞೇಯ್ಯೋ; ಫಸ್ಸನಟ್ಠೋ ಅಭಿಞ್ಞೇಯ್ಯೋ; ಅಭಿಸಮಯಟ್ಠೋ ಅಭಿಞ್ಞೇಯ್ಯೋ.

೧೮. ನೇಕ್ಖಮ್ಮಂ ಅಭಿಞ್ಞೇಯ್ಯಂ; ಅಬ್ಯಾಪಾದೋ ಅಭಿಞ್ಞೇಯ್ಯೋ; ಆಲೋಕಸಞ್ಞಾ ಅಭಿಞ್ಞೇಯ್ಯಾ; ಅವಿಕ್ಖೇಪೋ ಅಭಿಞ್ಞೇಯ್ಯೋ; ಧಮ್ಮವವತ್ಥಾನಂ ಅಭಿಞ್ಞೇಯ್ಯಂ; ಞಾಣಂ ಅಭಿಞ್ಞೇಯ್ಯಂ; ಪಾಮೋಜ್ಜಂ [ಪಾಮುಜ್ಜಂ (ಸ್ಯಾ.)] ಅಭಿಞ್ಞೇಯ್ಯಂ.

ಪಠಮಂ ಝಾನಂ ಅಭಿಞ್ಞೇಯ್ಯಂ; ದುತಿಯಂ ಝಾನಂ ಅಭಿಞ್ಞೇಯ್ಯಂ; ತತಿಯಂ ಝಾನಂ ಅಭಿಞ್ಞೇಯ್ಯಂ; ಚತುತ್ಥಂ ಝಾನಂ ಅಭಿಞ್ಞೇಯ್ಯಂ. ಆಕಾಸಾನಞ್ಚಾಯತನಸಮಾಪತ್ತಿ ಅಭಿಞ್ಞೇಯ್ಯಾ; ವಿಞ್ಞಾಣಞ್ಚಾಯತನಸಮಾಪತ್ತಿ ಅಭಿಞ್ಞೇಯ್ಯಾ; ಆಕಿಞ್ಚಞ್ಞಾಯತನಸಮಾಪತ್ತಿ ಅಭಿಞ್ಞೇಯ್ಯಾ; ನೇವಸಞ್ಞಾನಾಸಞ್ಞಾಯತನಸಮಾಪತ್ತಿ ಅಭಿಞ್ಞೇಯ್ಯಾ.

ಅನಿಚ್ಚಾನುಪಸ್ಸನಾ ಅಭಿಞ್ಞೇಯ್ಯಾ; ದುಕ್ಖಾನುಪಸ್ಸನಾ ಅಭಿಞ್ಞೇಯ್ಯಾ; ಅನತ್ತಾನುಪಸ್ಸನಾ ಅಭಿಞ್ಞೇಯ್ಯಾ; ನಿಬ್ಬಿದಾನುಪಸ್ಸನಾ ಅಭಿಞ್ಞೇಯ್ಯಾ; ವಿರಾಗಾನುಪಸ್ಸನಾ ಅಭಿಞ್ಞೇಯ್ಯಾ; ನಿರೋಧಾನುಪಸ್ಸನಾ ಅಭಿಞ್ಞೇಯ್ಯಾ; ಪಟಿನಿಸ್ಸಗ್ಗಾನುಪಸ್ಸನಾ ಅಭಿಞ್ಞೇಯ್ಯಾ; ಖಯಾನುಪಸ್ಸನಾ ಅಭಿಞ್ಞೇಯ್ಯಾ; ವಯಾನುಪಸ್ಸನಾ ಅಭಿಞ್ಞೇಯ್ಯಾ; ವಿಪರಿಣಾಮಾನುಪಸ್ಸನಾ ಅಭಿಞ್ಞೇಯ್ಯಾ; ಅನಿಮಿತ್ತಾನುಪಸ್ಸನಾ ಅಭಿಞ್ಞೇಯ್ಯಾ; ಅಪ್ಪಣಿಹಿತಾನುಪಸ್ಸನಾ ಅಭಿಞ್ಞೇಯ್ಯಾ; ಸುಞ್ಞತಾನುಪಸ್ಸನಾ ಅಭಿಞ್ಞೇಯ್ಯಾ; ಅಧಿಪಞ್ಞಾಧಮ್ಮವಿಪಸ್ಸನಾ ಅಭಿಞ್ಞೇಯ್ಯಾ; ಯಥಾಭೂತಞಾಣದಸ್ಸನಂ ಅಭಿಞ್ಞೇಯ್ಯಂ; ಆದೀನವಾನುಪಸ್ಸನಾ ಅಭಿಞ್ಞೇಯ್ಯಾ; ಪಟಿಸಙ್ಖಾನುಪಸ್ಸನಾ ಅಭಿಞ್ಞೇಯ್ಯಾ; ವಿವಟ್ಟನಾನುಪಸ್ಸನಾ ಅಭಿಞ್ಞೇಯ್ಯಾ.

೧೯. ಸೋತಾಪತ್ತಿಮಗ್ಗೋ ಅಭಿಞ್ಞೇಯ್ಯೋ; ಸೋತಾಪತ್ತಿಫಲಸಮಾಪತ್ತಿ ಅಭಿಞ್ಞೇಯ್ಯಾ; ಸಕದಾಗಾಮಿಮಗ್ಗೋ ಅಭಿಞ್ಞೇಯ್ಯೋ; ಸಕದಾಗಾಮಿಫಲಸಮಾಪತ್ತಿ ಅಭಿಞ್ಞೇಯ್ಯಾ; ಅನಾಗಾಮಿಮಗ್ಗೋ ಅಭಿಞ್ಞೇಯ್ಯೋ; ಅನಾಗಾಮಿಫಲಸಮಾಪತ್ತಿ ಅಭಿಞ್ಞೇಯ್ಯಾ; ಅರಹತ್ತಮಗ್ಗೋ ಅಭಿಞ್ಞೇಯ್ಯೋ; ಅರಹತ್ತಫಲಸಮಾಪತ್ತಿ ಅಭಿಞ್ಞೇಯ್ಯಾ.

ಅಧಿಮೋಕ್ಖಟ್ಠೇನ ಸದ್ಧಿನ್ದ್ರಿಯಂ ಅಭಿಞ್ಞೇಯ್ಯಂ; ಪಗ್ಗಹಟ್ಠೇನ ವೀರಿಯಿನ್ದ್ರಿಯಂ ಅಭಿಞ್ಞೇಯ್ಯಂ; ಉಪಟ್ಠಾನಟ್ಠೇನ ಸತಿನ್ದ್ರಿಯಂ ಅಭಿಞ್ಞೇಯ್ಯಂ; ಅವಿಕ್ಖೇಪಟ್ಠೇನ ಸಮಾಧಿನ್ದ್ರಿಯಂ ಅಭಿಞ್ಞೇಯ್ಯಂ; ದಸ್ಸನಟ್ಠೇನ ಪಞ್ಞಿನ್ದ್ರಿಯಂ ಅಭಿಞ್ಞೇಯ್ಯಂ; ಅಸ್ಸದ್ಧಿಯೇ ಅಕಮ್ಪಿಯಟ್ಠೇನ ಸದ್ಧಾಬಲಂ ಅಭಿಞ್ಞೇಯ್ಯಂ; ಕೋಸಜ್ಜೇ ಅಕಮ್ಪಿಯಟ್ಠೇನ ವೀರಿಯಬಲಂ ಅಭಿಞ್ಞೇಯ್ಯಂ; ಪಮಾದೇ ಅಕಮ್ಪಿಯಟ್ಠೇನ ಸತಿಬಲಂ ಅಭಿಞ್ಞೇಯ್ಯಂ; ಉದ್ಧಚ್ಚೇ ಅಕಮ್ಪಿಯಟ್ಠೇನ ಸಮಾಧಿಬಲಂ ಅಭಿಞ್ಞೇಯ್ಯಂ; ಅವಿಜ್ಜಾಯ ಅಕಮ್ಪಿಯಟ್ಠೇನ ಪಞ್ಞಾಬಲಂ ಅಭಿಞ್ಞೇಯ್ಯಂ; ಉಪಟ್ಠಾನಟ್ಠೇನ ಸತಿಸಮ್ಬೋಜ್ಝಙ್ಗೋ ಅಭಿಞ್ಞೇಯ್ಯೋ; ಪವಿಚಯಟ್ಠೇನ ಧಮ್ಮವಿಚಯಸಮ್ಬೋಜ್ಝಙ್ಗೋ ಅಭಿಞ್ಞೇಯ್ಯೋ; ಪಗ್ಗಹಟ್ಠೇನ ವೀರಿಯಸಮ್ಬೋಜ್ಝಙ್ಗೋ ಅಭಿಞ್ಞೇಯ್ಯೋ; ಫರಣಟ್ಠೇನ ಪೀತಿಸಮ್ಬೋಜ್ಝಙ್ಗೋ ಅಭಿಞ್ಞೇಯ್ಯೋ; ಉಪಸಮಟ್ಠೇನ ಪಸ್ಸದ್ಧಿಸಮ್ಬೋಜ್ಝಙ್ಗೋ ಅಭಿಞ್ಞೇಯ್ಯೋ; ಅವಿಕ್ಖೇಪಟ್ಠೇನ ಸಮಾಧಿಸಮ್ಬೋಜ್ಝಙ್ಗೋ ಅಭಿಞ್ಞೇಯ್ಯೋ; ಪಟಿಸಙ್ಖಾನಟ್ಠೇನ ಉಪೇಕ್ಖಾಸಮ್ಬೋಜ್ಝಙ್ಗೋ ಅಭಿಞ್ಞೇಯ್ಯೋ.

ದಸ್ಸನಟ್ಠೇನ ಸಮ್ಮಾದಿಟ್ಠಿ ಅಭಿಞ್ಞೇಯ್ಯಾ; ಅಭಿನಿರೋಪನಟ್ಠೇನ ಸಮ್ಮಾಸಙ್ಕಪ್ಪೋ ಅಭಿಞ್ಞೇಯ್ಯೋ; ಪರಿಗ್ಗಹಟ್ಠೇನ ಸಮ್ಮಾವಾಚಾ ಅಭಿಞ್ಞೇಯ್ಯಾ; ಸಮುಟ್ಠಾನಟ್ಠೇನ ಸಮ್ಮಾಕಮ್ಮನ್ತೋ ಅಭಿಞ್ಞೇಯ್ಯೋ; ವೋದಾನಟ್ಠೇನ ಸಮ್ಮಾಆಜೀವೋ ಅಭಿಞ್ಞೇಯ್ಯೋ; ಪಗ್ಗಹಟ್ಠೇನ ಸಮ್ಮಾವಾಯಾಮೋ ಅಭಿಞ್ಞೇಯ್ಯೋ; ಉಪಟ್ಠಾನಟ್ಠೇನ ಸಮ್ಮಾಸತಿ ಅಭಿಞ್ಞೇಯ್ಯಾ; ಅವಿಕ್ಖೇಪಟ್ಠೇನ ಸಮ್ಮಾಸಮಾಧಿ ಅಭಿಞ್ಞೇಯ್ಯೋ.

ಆಧಿಪತೇಯ್ಯಟ್ಠೇನ ಇನ್ದ್ರಿಯಾ ಅಭಿಞ್ಞೇಯ್ಯಾ; ಅಕಮ್ಪಿಯಟ್ಠೇನ ಬಲಾ ಅಭಿಞ್ಞೇಯ್ಯಾ; ನಿಯ್ಯಾನಟ್ಠೇನ ಬೋಜ್ಝಙ್ಗಾ ಅಭಿಞ್ಞೇಯ್ಯಾ; ಹೇತುಟ್ಠೇನ ಮಗ್ಗೋ ಅಭಿಞ್ಞೇಯ್ಯೋ; ಉಪಟ್ಠಾನಟ್ಠೇನ ಸತಿಪಟ್ಠಾನಾ ಅಭಿಞ್ಞೇಯ್ಯಾ; ಪದಹನಟ್ಠೇನ ಸಮ್ಮಪ್ಪಧಾನಾ ಅಭಿಞ್ಞೇಯ್ಯಾ; ಇಜ್ಝನಟ್ಠೇನ ಇದ್ಧಿಪಾದಾ ಅಭಿಞ್ಞೇಯ್ಯಾ; ತಥಟ್ಠೇನ ಸಚ್ಚಾ ಅಭಿಞ್ಞೇಯ್ಯಾ; ಅವಿಕ್ಖೇಪಟ್ಠೇನ ಸಮಥೋ ಅಭಿಞ್ಞೇಯ್ಯೋ; ಅನುಪಸ್ಸನಟ್ಠೇನ ವಿಪಸ್ಸನಾ ಅಭಿಞ್ಞೇಯ್ಯಾ; ಏಕರಸಟ್ಠೇನ ಸಮಥವಿಪಸ್ಸನಾ ಅಭಿಞ್ಞೇಯ್ಯಾ; ಅನತಿವತ್ತನಟ್ಠೇನ ಯುಗನದ್ಧಂ ಅಭಿಞ್ಞೇಯ್ಯಂ.

ಸಂವರಟ್ಠೇನ ಸೀಲವಿಸುದ್ಧಿ ಅಭಿಞ್ಞೇಯ್ಯಾ; ಅವಿಕ್ಖೇಪಟ್ಠೇನ ಚಿತ್ತವಿಸುದ್ಧಿ ಅಭಿಞ್ಞೇಯ್ಯಾ; ದಸ್ಸನಟ್ಠೇನ ದಿಟ್ಠಿವಿಸುದ್ಧಿ ಅಭಿಞ್ಞೇಯ್ಯಾ; ಮುತ್ತಟ್ಠೇನ ವಿಮೋಕ್ಖೋ ಅಭಿಞ್ಞೇಯ್ಯೋ; ಪಟಿವೇಧಟ್ಠೇನ ವಿಜ್ಜಾ ಅಭಿಞ್ಞೇಯ್ಯಾ; ಪರಿಚ್ಚಾಗಟ್ಠೇನ ವಿಮುತ್ತಿ ಅಭಿಞ್ಞೇಯ್ಯಾ; ಸಮುಚ್ಛೇದಟ್ಠೇನ ಖಯೇ ಞಾಣಂ ಅಭಿಞ್ಞೇಯ್ಯಂ; ಪಟಿಪ್ಪಸ್ಸದ್ಧಟ್ಠೇನ ಅನುಪ್ಪಾದೇ ಞಾಣಂ ಅಭಿಞ್ಞೇಯ್ಯಂ.

೨೦. ಛನ್ದೋ ಮೂಲಟ್ಠೇನ ಅಭಿಞ್ಞೇಯ್ಯೋ; ಮನಸಿಕಾರೋ ಸಮುಟ್ಠಾನಟ್ಠೇನ ಅಭಿಞ್ಞೇಯ್ಯೋ; ಫಸ್ಸೋ ಸಮೋಧಾನಟ್ಠೇನ ಅಭಿಞ್ಞೇಯ್ಯೋ; ವೇದನಾ ಸಮೋಸರಣಟ್ಠೇನ ಅಭಿಞ್ಞೇಯ್ಯಾ; ಸಮಾಧಿ ಪಮುಖಟ್ಠೇನ ಅಭಿಞ್ಞೇಯ್ಯೋ; ಸತಿ ಆಧಿಪತೇಯ್ಯಟ್ಠೇನ ಅಭಿಞ್ಞೇಯ್ಯಾ; ಪಞ್ಞಾ ತತುತ್ತರಟ್ಠೇನ ಅಭಿಞ್ಞೇಯ್ಯಾ; ವಿಮುತ್ತಿ ಸಾರಟ್ಠೇನ ಅಭಿಞ್ಞೇಯ್ಯಾ; ಅಮತೋಗಧಂ ನಿಬ್ಬಾನಂ ಪರಿಯೋಸಾನಟ್ಠೇನ ಅಭಿಞ್ಞೇಯ್ಯಂ.

ಯೇ ಯೇ ಧಮ್ಮಾ ಅಭಿಞ್ಞಾತಾ ಹೋನ್ತಿ ತೇ ತೇ ಧಮ್ಮಾ ಞಾತಾ ಹೋನ್ತಿ. ತಂ ಞಾತಟ್ಠೇನ ಞಾಣಂ, ಪಜಾನನಟ್ಠೇನ ಪಞ್ಞಾ. ತೇನ ವುಚ್ಚತಿ – ‘‘ಇಮೇ ಧಮ್ಮಾ ಅಭಿಞ್ಞೇಯ್ಯಾತಿ ಸೋತಾವಧಾನಂ, ತಂಪಜಾನನಾ ಪಞ್ಞಾ ಸುತಮಯೇ ಞಾಣ’’ನ್ತಿ.

ದುತಿಯಭಾಣವಾರೋ.

೨೧. ಕಥಂ ‘‘ಇಮೇ ಧಮ್ಮಾ ಪರಿಞ್ಞೇಯ್ಯಾ’’ತಿ ಸೋತಾವಧಾನಂ, ತಂಪಜಾನನಾ ಪಞ್ಞಾ ಸುತಮಯೇ ಞಾಣಂ?

ಏಕೋ ಧಮ್ಮೋ ಪರಿಞ್ಞೇಯ್ಯೋ – ಫಸ್ಸೋ ಸಾಸವೋ ಉಪಾದಾನಿಯೋ. ದ್ವೇ ಧಮ್ಮಾ ಪರಿಞ್ಞೇಯ್ಯಾ – ನಾಮಞ್ಚ ರೂಪಞ್ಚ. ತಯೋ ಧಮ್ಮಾ ಪರಿಞ್ಞೇಯ್ಯಾ – ತಿಸ್ಸೋ ವೇದನಾ. ಚತ್ತಾರೋ ಧಮ್ಮಾ ಪರಿಞ್ಞೇಯ್ಯಾ – ಚತ್ತಾರೋ ಆಹಾರಾ. ಪಞ್ಚ ಧಮ್ಮಾ ಪರಿಞ್ಞೇಯ್ಯಾ – ಪಞ್ಚುಪಾದಾನಕ್ಖನ್ಧಾ. ಛ ಧಮ್ಮಾ ಪರಿಞ್ಞೇಯ್ಯಾ – ಛ ಅಜ್ಝತ್ತಿಕಾನಿ ಆಯತನಾನಿ. ಸತ್ತ ಧಮ್ಮಾ ಪರಿಞ್ಞೇಯ್ಯಾ – ಸತ್ತ ವಿಞ್ಞಾಣಟ್ಠಿತಿಯೋ. ಅಟ್ಠ ಧಮ್ಮಾ ಪರಿಞ್ಞೇಯ್ಯಾ – ಅಟ್ಠ ಲೋಕಧಮ್ಮಾ. ನವ ಧಮ್ಮಾ ಪರಿಞ್ಞೇಯ್ಯಾ – ನವ ಸತ್ತಾವಾಸಾ. ದಸ ಧಮ್ಮಾ ಪರಿಞ್ಞೇಯ್ಯಾ – ದಸಾಯತನಾನಿ.

‘‘ಸಬ್ಬಂ, ಭಿಕ್ಖವೇ, ಪರಿಞ್ಞೇಯ್ಯಂ. ಕಿಞ್ಚ, ಭಿಕ್ಖವೇ, ಸಬ್ಬಂ ಪರಿಞ್ಞೇಯ್ಯಂ? ಚಕ್ಖು, ಭಿಕ್ಖವೇ, ಪರಿಞ್ಞೇಯ್ಯಂ; ರೂಪಾ ಪರಿಞ್ಞೇಯ್ಯಾ; ಚಕ್ಖುವಿಞ್ಞಾಣಂ ಪರಿಞ್ಞೇಯ್ಯಂ; ಚಕ್ಖುಸಮ್ಫಸ್ಸೋ ಪರಿಞ್ಞೇಯ್ಯೋ; ಯಮ್ಪಿದಂ ಚಕ್ಖುಸಮ್ಫಸ್ಸಪಚ್ಚಯಾ ಉಪ್ಪಜ್ಜತಿ ವೇದಯಿತಂ ಸುಖಂ ವಾ ದುಕ್ಖಂ ವಾ ಅದುಕ್ಖಮಸುಖಂ ವಾ, ತಮ್ಪಿ ಪರಿಞ್ಞೇಯ್ಯಂ. ಸೋತಂ ಪರಿಞ್ಞೇಯ್ಯಂ; ಸದ್ದಾ ಪರಿಞ್ಞೇಯ್ಯಾ…ಪೇ… ಘಾನಂ ಪರಿಞ್ಞೇಯ್ಯಂ, ಗನ್ಧಾ ಪರಿಞ್ಞೇಯ್ಯಾ… ಜಿವ್ಹಾ ಪರಿಞ್ಞೇಯ್ಯಾ; ರಸಾ ಪರಿಞ್ಞೇಯ್ಯಾ… ಕಾಯೋ ಪರಿಞ್ಞೇಯ್ಯೋ; ಫೋಟ್ಠಬ್ಬಾ ಪರಿಞ್ಞೇಯ್ಯಾ…ಪೇ… ಮನೋ ಪರಿಞ್ಞೇಯ್ಯೋ; ಧಮ್ಮಾ ಪರಿಞ್ಞೇಯ್ಯಾ… ಮನೋವಿಞ್ಞಾಣಂ ಪರಿಞ್ಞೇಯ್ಯಂ; ಮನೋಸಮ್ಫಸ್ಸೋ ಪರಿಞ್ಞೇಯ್ಯೋ; ಯಮ್ಪಿದಂ ಮನೋಸಮ್ಫಸ್ಸಪಚ್ಚಯಾ ಉಪ್ಪಜ್ಜತಿ ವೇದಯಿತಂ ಸುಖಂ ವಾ ದುಕ್ಖಂ ವಾ ಅದುಕ್ಖಮಸುಖಂ ವಾ, ತಮ್ಪಿ ಪರಿಞ್ಞೇಯ್ಯಂ.’’ ರೂಪಂ ಪರಿಞ್ಞೇಯ್ಯಂ…ಪೇ… ವೇದನಾ ಪರಿಞ್ಞೇಯ್ಯಾ… ಸಞ್ಞಾ ಪರಿಞ್ಞೇಯ್ಯಾ… ಸಙ್ಖಾರಾ ಪರಿಞ್ಞೇಯ್ಯಾ… ವಿಞ್ಞಾಣಂ ಪರಿಞ್ಞೇಯ್ಯಂ… ಚಕ್ಖು ಪರಿಞ್ಞೇಯ್ಯಂ…ಪೇ… ಜರಾಮರಣಂ ಪರಿಞ್ಞೇಯ್ಯಂ… ಅಮತೋಗಧಂ ನಿಬ್ಬಾನಂ ಪರಿಯೋಸಾನಟ್ಠೇನ ಪರಿಞ್ಞೇಯ್ಯಂ. ಯೇಸಂ ಯೇಸಂ ಧಮ್ಮಾನಂ ಪಟಿಲಾಭತ್ಥಾಯ ವಾಯಮನ್ತಸ್ಸ ತೇ ತೇ ಧಮ್ಮಾ ಪಟಿಲದ್ಧಾ ಹೋನ್ತಿ, ಏವಂ ತೇ ಧಮ್ಮಾ ಪರಿಞ್ಞಾತಾ ಚೇವ ಹೋನ್ತಿ ತೀರಿತಾ ಚ.

೨೨. ನೇಕ್ಖಮ್ಮಂ ಪಟಿಲಾಭತ್ಥಾಯ ವಾಯಮನ್ತಸ್ಸ ನೇಕ್ಖಮ್ಮಂ ಪಟಿಲದ್ಧಂ ಹೋತಿ. ಏವಂ ಸೋ ಧಮ್ಮೋ ಪರಿಞ್ಞಾತೋ ಚೇವ ಹೋತಿ ತೀರಿತೋ ಚ. ಅಬ್ಯಾಪಾದಂ ಪಟಿಲಾಭತ್ಥಾಯ ವಾಯಮನ್ತಸ್ಸ ಅಬ್ಯಾಪಾದೋ ಪಟಿಲದ್ಧೋ ಹೋತಿ. ಏವಂ ಸೋ ಧಮ್ಮೋ ಪರಿಞ್ಞಾತೋ ಚೇವ ಹೋತಿ ತೀರಿತೋ ಚ. ಆಲೋಕಸಞ್ಞಂ ಪಟಿಲಾಭತ್ಥಾಯ ವಾಯಮನ್ತಸ್ಸ ಆಲೋಕಸಞ್ಞಾ ಪಟಿಲದ್ಧಾ ಹೋತಿ. ಏವಂ ಸೋ ಧಮ್ಮೋ ಪರಿಞ್ಞಾತೋ ಚೇವ ಹೋತಿ ತೀರಿತೋ ಚ. ಅವಿಕ್ಖೇಪಂ ಪಟಿಲಾಭತ್ಥಾಯ ವಾಯಮನ್ತಸ್ಸ ಅವಿಕ್ಖೇಪೋ ಪಟಿಲದ್ಧೋ ಹೋತಿ. ಏವಂ ಸೋ ಧಮ್ಮೋ ಪರಿಞ್ಞಾತೋ ಚೇವ ಹೋತಿ ತೀರಿತೋ ಚ. ಧಮ್ಮವವತ್ಥಾನಂ ಪಟಿಲಾಭತ್ಥಾಯ ವಾಯಮನ್ತಸ್ಸ ಧಮ್ಮವವತ್ಥಾನಂ ಪಟಿಲದ್ಧಂ ಹೋತಿ. ಏವಂ ಸೋ ಧಮ್ಮೋ ಪರಿಞ್ಞಾತೋ ಚೇವ ಹೋತಿ ತೀರಿತೋ ಚ. ಞಾಣಂ ಪಟಿಲಾಭತ್ಥಾಯ ವಾಯಮನ್ತಸ್ಸ ಞಾಣಂ ಪಟಿಲದ್ಧಂ ಹೋತಿ. ಏವಂ ಸೋ ಧಮ್ಮೋ ಪರಿಞ್ಞಾತೋ ಚೇವ ಹೋತಿ ತೀರಿತೋ ಚ. ಪಾಮೋಜ್ಜಂ ಪಟಿಲಾಭತ್ಥಾಯ ವಾಯಮನ್ತಸ್ಸ ಪಾಮೋಜ್ಜಂ ಪಟಿಲದ್ಧಂ ಹೋತಿ. ಏವಂ ಸೋ ಧಮ್ಮೋ ಪರಿಞ್ಞಾತೋ ಚೇವ ಹೋತಿ ತೀರಿತೋ ಚ.

ಪಠಮಂ ಝಾನಂ ಪಟಿಲಾಭತ್ಥಾಯ ವಾಯಮನ್ತಸ್ಸ ಪಠಮಂ ಝಾನಂ ಪಟಿಲದ್ಧಂ ಹೋತಿ. ಏವಂ ಸೋ ಧಮ್ಮೋ ಪರಿಞ್ಞಾತೋ ಚೇವ ಹೋತಿ ತೀರಿತೋ ಚ. ದುತಿಯಂ ಝಾನಂ…ಪೇ… ತತಿಯಂ ಝಾನಂ… ಚತುತ್ಥಂ ಝಾನಂ ಪಟಿಲಾಭತ್ಥಾಯ ವಾಯಮನ್ತಸ್ಸ ಚತುತ್ಥಂ ಝಾನಂ ಪಟಿಲದ್ಧಂ ಹೋತಿ. ಏವಂ ಸೋ ಧಮ್ಮೋ ಪರಿಞ್ಞಾತೋ ಚೇವ ಹೋತಿ ತೀರಿತೋ ಚ. ಆಕಾಸಾನಞ್ಚಾಯತನಸಮಾಪತ್ತಿಂ ಪಟಿಲಾಭತ್ಥಾಯ ವಾಯಮನ್ತಸ್ಸ ಆಕಾಸಾನಞ್ಚಾಯತನಸಮಾಪತ್ತಿ ಪಟಿಲದ್ಧಾ ಹೋತಿ. ಏವಂ ಸೋ ಧಮ್ಮೋ ಪರಿಞ್ಞಾತೋ ಚೇವ ಹೋತಿ ತೀರಿತೋ ಚ. ವಿಞ್ಞಾಣಞ್ಚಾಯತನಸಮಾಪತ್ತಿಂ ಪಟಿಲಾಭತ್ಥಾಯ ವಾಯಮನ್ತಸ್ಸ ವಿಞ್ಞಾಣಞ್ಚಾಯತನಸಮಾಪತ್ತಿ ಪಟಿಲದ್ಧಾ ಹೋತಿ. ಏವಂ ಸೋ ಧಮ್ಮೋ ಪರಿಞ್ಞಾತೋ ಚೇವ ಹೋತಿ ತೀರಿತೋ ಚ. ಆಕಿಞ್ಚಞ್ಞಾಯತನಸಮಾಪತ್ತಿಂ ಪಟಿಲಾಭತ್ಥಾಯ ವಾಯಮನ್ತಸ್ಸ ಆಕಿಞ್ಚಞ್ಞಾಯತನಸಮಾಪತ್ತಿ ಪಟಿಲದ್ಧಾ ಹೋತಿ. ಏವಂ ಸೋ ಧಮ್ಮೋ ಪರಿಞ್ಞಾತೋ ಚೇವ ಹೋತಿ ತೀರಿತೋ ಚ. ನೇವಸಞ್ಞಾನಾಸಞ್ಞಾಯತನಸಮಾಪತ್ತಿಂ ಪಟಿಲಾಭತ್ಥಾಯ ವಾಯಮನ್ತಸ್ಸ ನೇವಸಞ್ಞಾನಾಸಞ್ಞಾಯತನಸಮಾಪತ್ತಿ ಪಟಿಲದ್ಧಾ ಹೋತಿ. ಏವಂ ಸೋ ಧಮ್ಮೋ ಪರಿಞ್ಞಾತೋ ಚೇವ ಹೋತಿ ತೀರಿತೋ ಚ.

ಅನಿಚ್ಚಾನುಪಸ್ಸನಂ ಪಟಿಲಾಭತ್ಥಾಯ ವಾಯಮನ್ತಸ್ಸ ಅನಿಚ್ಚಾನುಪಸ್ಸನಾ ಪಟಿಲದ್ಧಾ ಹೋತಿ. ಏವಂ ಸೋ ಧಮ್ಮೋ ಪರಿಞ್ಞಾತೋ ಚೇವ ಹೋತಿ ತೀರಿತೋ ಚ. ದುಕ್ಖಾನುಪಸ್ಸನಂ ಪಟಿಲಾಭತ್ಥಾಯ ವಾಯಮನ್ತಸ್ಸ ದುಕ್ಖಾನುಪಸ್ಸನಾ ಪಟಿಲದ್ಧಾ ಹೋತಿ. ಏವಂ ಸೋ ಧಮ್ಮೋ ಪರಿಞ್ಞಾತೋ ಚೇವ ಹೋತಿ ತೀರಿತೋ ಚ. ಅನತ್ತಾನುಪಸ್ಸನಂ ಪಟಿಲಾಭತ್ಥಾಯ ವಾಯಮನ್ತಸ್ಸ ಅನತ್ತಾನುಪಸ್ಸನಾ ಪಟಿಲದ್ಧಾ ಹೋತಿ. ಏವಂ ಸೋ ಧಮ್ಮೋ ಪರಿಞ್ಞಾತೋ ಚೇವ ಹೋತಿ ತೀರಿತೋ ಚ. ನಿಬ್ಬಿದಾನುಪಸ್ಸನಂ ಪಟಿಲಾಭತ್ಥಾಯ ವಾಯಮನ್ತಸ್ಸ ನಿಬ್ಬಿದಾನುಪಸ್ಸನಾ ಪಟಿಲದ್ಧಾ ಹೋತಿ. ಏವಂ ಸೋ ಧಮ್ಮೋ ಪರಿಞ್ಞಾತೋ ಚೇವ ಹೋತಿ ತೀರಿತೋ ಚ. ವಿರಾಗಾನುಪಸ್ಸನಂ ಪಟಿಲಾಭತ್ಥಾಯ ವಾಯಮನ್ತಸ್ಸ ವಿರಾಗಾನುಪಸ್ಸನಾ ಪಟಿಲದ್ಧಾ ಹೋತಿ. ಏವಂ ಸೋ ಧಮ್ಮೋ ಪರಿಞ್ಞಾತೋ ಚೇವ ಹೋತಿ ತೀರಿತೋ ಚ. ನಿರೋಧಾನುಪಸ್ಸನಂ ಪಟಿಲಾಭತ್ಥಾಯ ವಾಯಮನ್ತಸ್ಸ ನಿರೋಧಾನುಪಸ್ಸನಾ ಪಟಿಲದ್ಧಾ ಹೋತಿ. ಏವಂ ಸೋ ಧಮ್ಮೋ ಪರಿಞ್ಞಾತೋ ಚೇವ ಹೋತಿ ತೀರಿತೋ ಚ. ಪಟಿನಿಸ್ಸಗ್ಗಾನುಪಸ್ಸನಂ ಪಟಿಲಾಭತ್ಥಾಯ ವಾಯಮನ್ತಸ್ಸ ಪಟಿನಿಸ್ಸಗ್ಗಾನುಪಸ್ಸನಾ ಪಟಿಲದ್ಧಾ ಹೋತಿ. ಏವಂ ಸೋ ಧಮ್ಮೋ ಪರಿಞ್ಞಾತೋ ಚೇವ ಹೋತಿ ತೀರಿತೋ ಚ. ಖಯಾನುಪಸ್ಸನಂ ಪಟಿಲಾಭತ್ಥಾಯ ವಾಯಮನ್ತಸ್ಸ ಖಯಾನುಪಸ್ಸನಾ ಪಟಿಲದ್ಧಾ ಹೋತಿ. ಏವಂ ಸೋ ಧಮ್ಮೋ ಪರಿಞ್ಞಾತೋ ಚೇವ ಹೋತಿ ತೀರಿತೋ ಚ. ವಯಾನುಪಸ್ಸನಂ ಪಟಿಲಾಭತ್ಥಾಯ ವಾಯಮನ್ತಸ್ಸ ವಯಾನುಪಸ್ಸನಾ ಪಟಿಲದ್ಧಾ ಹೋತಿ. ಏವಂ ಸೋ ಧಮ್ಮೋ ಪರಿಞ್ಞಾತೋ ಚೇವ ಹೋತಿ ತೀರಿತೋ ಚ. ವಿಪರಿಣಾಮಾನುಪಸ್ಸನಂ ಪಟಿಲಾಭತ್ಥಾಯ ವಾಯಮನ್ತಸ್ಸ ವಿಪರಿಣಾಮಾನುಪಸ್ಸನಾ ಪಟಿಲದ್ಧಾ ಹೋತಿ. ಏವಂ ಸೋ ಧಮ್ಮೋ ಪರಿಞ್ಞಾತೋ ಚೇವ ಹೋತಿ ತೀರಿತೋ ಚ. ಅನಿಮಿತ್ತಾನುಪಸ್ಸನಂ ಪಟಿಲಾಭತ್ಥಾಯ ವಾಯಮನ್ತಸ್ಸ ಅನಿಮಿತ್ತಾನುಪಸ್ಸನಾ ಪಟಿಲದ್ಧಾ ಹೋತಿ. ಏವಂ ಸೋ ಧಮ್ಮೋ ಪರಿಞ್ಞಾತೋ ಚೇವ ಹೋತಿ ತೀರಿತೋ ಚ. ಅಪ್ಪಣಿಹಿತಾನುಪಸ್ಸನಂ ಪಟಿಲಾಭತ್ಥಾಯ ವಾಯಮನ್ತಸ್ಸ ಅಪ್ಪಣಿಹಿತಾನುಪಸ್ಸನಾ ಪಟಿಲದ್ಧಾ ಹೋತಿ. ಏವಂ ಸೋ ಧಮ್ಮೋ ಪರಿಞ್ಞಾತೋ ಚೇವ ಹೋತಿ ತೀರಿತೋ ಚ. ಸುಞ್ಞತಾನುಪಸ್ಸನಂ ಪಟಿಲಾಭತ್ಥಾಯ ವಾಯಮನ್ತಸ್ಸ ಸುಞ್ಞತಾನುಪಸ್ಸನಾ ಪಟಿಲದ್ಧಾ ಹೋತಿ. ಏವಂ ಸೋ ಧಮ್ಮೋ ಪರಿಞ್ಞಾತೋ ಚೇವ ಹೋತಿ ತೀರಿತೋ ಚ.

ಅಧಿಪಞ್ಞಾಧಮ್ಮವಿಪಸ್ಸನಂ ಪಟಿಲಾಭತ್ಥಾಯ ವಾಯಮನ್ತಸ್ಸ ಅಧಿಪಞ್ಞಾಧಮ್ಮವಿಪಸ್ಸನಾ ಪಟಿಲದ್ಧಾ ಹೋತಿ. ಏವಂ ಸೋ ಧಮ್ಮೋ ಪರಿಞ್ಞಾತೋ ಚೇವ ಹೋತಿ ತೀರಿತೋ ಚ. ಯಥಾಭೂತಞಾಣದಸ್ಸನಂ ಪಟಿಲಾಭತ್ಥಾಯ ವಾಯಮನ್ತಸ್ಸ ಯಥಾಭೂತಞಾಣದಸ್ಸನಂ ಪಟಿಲದ್ಧಂ ಹೋತಿ. ಏವಂ ಸೋ ಧಮ್ಮೋ ಪರಿಞ್ಞಾತೋ ಚೇವ ಹೋತಿ ತೀರಿತೋ ಚ. ಆದೀನವಾನುಪಸ್ಸನಂ ಪಟಿಲಾಭತ್ಥಾಯ ವಾಯಮನ್ತಸ್ಸ ಆದೀನವಾನುಪಸ್ಸನಾ ಪಟಿಲದ್ಧಾ ಹೋತಿ. ಏವಂ ಸೋ ಧಮ್ಮೋ ಪರಿಞ್ಞಾತೋ ಚೇವ ಹೋತಿ ತೀರಿತೋ ಚ. ಪಟಿಸಙ್ಖಾನುಪಸ್ಸನಂ ಪಟಿಲಾಭತ್ಥಾಯ ವಾಯಮನ್ತಸ್ಸ ಪಟಿಸಙ್ಖಾನುಪಸ್ಸನಾ ಪಟಿಲದ್ಧಾ ಹೋತಿ. ಏವಂ ಸೋ ಧಮ್ಮೋ ಪರಿಞ್ಞಾತೋ ಚೇವ ಹೋತಿ ತೀರಿತೋ ಚ. ವಿವಟ್ಟನಾನುಪಸ್ಸನಂ ಪಟಿಲಾಭತ್ಥಾಯ ವಾಯಮನ್ತಸ್ಸ ವಿವಟ್ಟನಾನುಪಸ್ಸನಾ ಪಟಿಲದ್ಧಾ ಹೋತಿ. ಏವಂ ಸೋ ಧಮ್ಮೋ ಪರಿಞ್ಞಾತೋ ಚೇವ ಹೋತಿ ತೀರಿತೋ ಚ.

ಸೋತಾಪತ್ತಿಮಗ್ಗಂ ಪಟಿಲಾಭತ್ಥಾಯ ವಾಯಮನ್ತಸ್ಸ ಸೋತಾಪತ್ತಿಮಗ್ಗೋ ಪಟಿಲದ್ಧೋ ಹೋತಿ. ಏವಂ ಸೋ ಧಮ್ಮೋ ಪರಿಞ್ಞಾತೋ ಚೇವ ಹೋತಿ ತೀರಿತೋ ಚ. ಸಕದಾಗಾಮಿಮಗ್ಗಂ ಪಟಿಲಾಭತ್ಥಾಯ ವಾಯಮನ್ತಸ್ಸ ಸಕದಾಗಾಮಿಮಗ್ಗೋ ಪಟಿಲದ್ಧೋ ಹೋತಿ. ಏವಂ ಸೋ ಧಮ್ಮೋ ಪರಿಞ್ಞಾತೋ ಚೇವ ಹೋತಿ ತೀರಿತೋ ಚ. ಅನಾಗಾಮಿಮಗ್ಗಂ ಪಟಿಲಾಭತ್ಥಾಯ ವಾಯಮನ್ತಸ್ಸ ಅನಾಗಾಮಿಮಗ್ಗೋ ಪಟಿಲದ್ಧೋ ಹೋತಿ. ಏವಂ ಸೋ ಧಮ್ಮೋ ಪರಿಞ್ಞಾತೋ ಚೇವ ಹೋತಿ ತೀರಿತೋ ಚ. ಅರಹತ್ತಮಗ್ಗಂ ಪಟಿಲಾಭತ್ಥಾಯ ವಾಯಮನ್ತಸ್ಸ ಅರಹತ್ತಮಗ್ಗೋ ಪಟಿಲದ್ಧೋ ಹೋತಿ. ಏವಂ ಸೋ ಧಮ್ಮೋ ಪರಿಞ್ಞಾತೋ ಚೇವ ಹೋತಿ ತೀರಿತೋ ಚ.

ಯೇಸಂ ಯೇಸಂ ಧಮ್ಮಾನಂ ಪಟಿಲಾಭತ್ಥಾಯ ವಾಯಮನ್ತಸ್ಸ ತೇ ತೇ ಧಮ್ಮಾ ಪಟಿಲದ್ಧಾ ಹೋನ್ತಿ. ಏವಂ ತೇ ಧಮ್ಮಾ ಪರಿಞ್ಞಾತಾ ಚೇವ ಹೋನ್ತಿ ತೀರಿತಾ ಚ. ತಂ ಞಾತಟ್ಠೇನ ಞಾಣಂ, ಪಜಾನನಟ್ಠೇನ ಪಞ್ಞಾ. ತೇನ ವುಚ್ಚತಿ – ‘‘ಇಮೇ ಧಮ್ಮಾ ಪರಿಞ್ಞೇಯ್ಯಾತಿ ಸೋತಾವಧಾನಂ, ತಂಪಜಾನನಾ ಪಞ್ಞಾ ಸುತಮಯೇ ಞಾಣ’’ನ್ತಿ.

೨೩. ಕಥಂ ‘‘ಇಮೇ ಧಮ್ಮಾ ಪಹಾತಬ್ಬಾ’’ತಿ ಸೋತಾವಧಾನಂ, ತಂಪಜಾನನಾ ಪಞ್ಞಾ ಸುತಮಯೇ ಞಾಣಂ?

ಏಕೋ ಧಮ್ಮೋ ಪಹಾತಬ್ಬೋ – ಅಸ್ಮಿಮಾನೋ. ದ್ವೇ ಧಮ್ಮಾ ಪಹಾತಬ್ಬಾ – ಅವಿಜ್ಜಾ ಚ ಭವತಣ್ಹಾ ಚ. ತಯೋ ಧಮ್ಮಾ ಪಹಾತಬ್ಬಾ – ತಿಸ್ಸೋ ತಣ್ಹಾ. ಚತ್ತಾರೋ ಧಮ್ಮಾ ಪಹಾತಬ್ಬಾ – ಚತ್ತಾರೋ ಓಘಾ. ಪಞ್ಚ ಧಮ್ಮಾ ಪಹಾತಬ್ಬಾ – ಪಞ್ಚ ನೀವರಣಾನಿ. ಛ ಧಮ್ಮಾ ಪಹಾತಬ್ಬಾ – ಛ ತಣ್ಹಾಕಾಯಾ. ಸತ್ತ ಧಮ್ಮಾ ಪಹಾತಬ್ಬಾ – ಸತ್ತಾನುಸಯಾ. ಅಟ್ಠ ಧಮ್ಮಾ ಪಹಾತಬ್ಬಾ – ಅಟ್ಠ ಮಿಚ್ಛತ್ತಾ. ನವ ಧಮ್ಮಾ ಪಹಾತಬ್ಬಾ – ನವ ತಣ್ಹಾಮೂಲಕಾ. ದಸ ಧಮ್ಮಾ ಪಹಾತಬ್ಬಾ – ದಸ ಮಿಚ್ಛತ್ತಾ.

೨೪. ದ್ವೇ ಪಹಾನಾನಿ – ಸಮುಚ್ಛೇದಪ್ಪಹಾನಂ, ಪಟಿಪ್ಪಸ್ಸದ್ಧಿಪ್ಪಹಾನಂ. ಸಮುಚ್ಛೇದಪ್ಪಹಾನಞ್ಚ ಲೋಕುತ್ತರಂ ಖಯಗಾಮಿಮಗ್ಗಂ ಭಾವಯತೋ; ಪಟಿಪ್ಪಸ್ಸದ್ಧಿಪ್ಪಹಾನಞ್ಚ ಫಲಕ್ಖಣೇ. ತೀಣಿ ಪಹಾನಾನಿ – ಕಾಮಾನಮೇತಂ ನಿಸ್ಸರಣಂ ಯದಿದಂ ನೇಕ್ಖಮ್ಮಂ; ರೂಪಾನಮೇತಂ ನಿಸ್ಸರಣಂ ಯದಿದಂ ಆರುಪ್ಪಂ; ಯಂ ಖೋ ಪನ ಕಿಞ್ಚಿ ಭೂತಂ ಸಙ್ಖತಂ ಪಟಿಚ್ಚಸಮುಪ್ಪನ್ನಂ, ನಿರೋಧೋ ತಸ್ಸ ನಿಸ್ಸರಣಂ. ನೇಕ್ಖಮ್ಮಂ ಪಟಿಲದ್ಧಸ್ಸ ಕಾಮಾ ಪಹೀನಾ ಚೇವ ಹೋನ್ತಿ ಪರಿಚ್ಚತ್ತಾ ಚ. ಆರುಪ್ಪಂ ಪಟಿಲದ್ಧಸ್ಸ ರೂಪಾ ಪಹೀನಾ ಚೇವ ಹೋನ್ತಿ ಪರಿಚ್ಚತ್ತಾ ಚ. ನಿರೋಧಂ ಪಟಿಲದ್ಧಸ್ಸ ಸಙ್ಖಾರಾ ಪಹೀನಾ ಚೇವ ಹೋನ್ತಿ ಪರಿಚ್ಚತ್ತಾ ಚ. ಚತ್ತಾರಿ ಪಹಾನಾನಿ ದುಕ್ಖಸಚ್ಚಂ ಪರಿಞ್ಞಾಪಟಿವೇಧಂ ಪಟಿವಿಜ್ಝನ್ತೋ ಪಜಹತಿ; ಸಮುದಯಸಚ್ಚಂ ಪಹಾನಪಟಿವೇಧಂ ಪಟಿವಿಜ್ಝನ್ತೋ ಪಜಹತಿ; ನಿರೋಧಸಚ್ಚಂ ಸಚ್ಛಿಕಿರಿಯಾಪಟಿವೇಧಂ ಪಟಿವಿಜ್ಝನ್ತೋ ಪಜಹತಿ; ಮಗ್ಗಸಚ್ಚಂ ಭಾವನಾಪಟಿವೇಧಂ ಪಟಿವಿಜ್ಝನ್ತೋ ಪಜಹತಿ. ಪಞ್ಚ ಪಹಾನಾನಿ – ವಿಕ್ಖಮ್ಭನಪ್ಪಹಾನಂ, ತದಙ್ಗಪ್ಪಹಾನಂ, ಸಮುಚ್ಛೇದಪ್ಪಹಾನಂ, ಪಟಿಪ್ಪಸ್ಸದ್ಧಿಪ್ಪಹಾನಂ, ನಿಸ್ಸರಣಪ್ಪಹಾನಂ. ವಿಕ್ಖಮ್ಭನಪ್ಪಹಾನಞ್ಚ ನೀವರಣಾನಂ ಪಠಮಂ ಝಾನಂ ಭಾವಯತೋ; ತದಙ್ಗಪ್ಪಹಾನಞ್ಚ ದಿಟ್ಠಿಗತಾನಂ ನಿಬ್ಬೇಧಭಾಗಿಯಂ ಸಮಾಧಿಂ ಭಾವಯತೋ; ಸಮುಚ್ಛೇದಪ್ಪಹಾನಞ್ಚ ಲೋಕುತ್ತರಂ ಖಯಗಾಮಿಮಗ್ಗಂ ಭಾವಯತೋ; ಪಟಿಪ್ಪಸ್ಸದ್ಧಿಪ್ಪಹಾನಞ್ಚ ಫಲಕ್ಖಣೇ; ನಿಸ್ಸರಣಪ್ಪಹಾನಞ್ಚ ನಿರೋಧೋ ನಿಬ್ಬಾನಂ.

‘‘ಸಬ್ಬಂ, ಭಿಕ್ಖವೇ, ಪಹಾತಬ್ಬಂ. ಕಿಞ್ಚ, ಭಿಕ್ಖವೇ, ಸಬ್ಬಂ ಪಹಾತಬ್ಬಂ? ಚಕ್ಖು, ಭಿಕ್ಖವೇ, ಪಹಾತಬ್ಬಂ; ರೂಪಾ ಪಹಾತಬ್ಬಾ; ಚಕ್ಖುವಿಞ್ಞಾಣಂ ಪಹಾತಬ್ಬಂ; ಚಕ್ಖುಸಮ್ಫಸ್ಸೋ ಪಹಾತಬ್ಬೋ; ಯಮ್ಪಿದಂ ಚಕ್ಖುಸಮ್ಫಸ್ಸಪಚ್ಚಯಾ ಉಪ್ಪಜ್ಜತಿ ವೇದಯಿತಂ ಸುಖಂ ವಾ ದುಕ್ಖಂ ವಾ ಅದುಕ್ಖಮಸುಖಂ ವಾ, ತಮ್ಪಿ ಪಹಾತಬ್ಬಂ. ಸೋತಂ ಪಹಾತಬ್ಬಂ; ಸದ್ದಾ ಪಹಾತಬ್ಬಾ…ಪೇ… ಘಾನಂ ಪಹಾತಬ್ಬಂ; ಗನ್ಧಾ ಪಹಾತಬ್ಬಾ… ಜಿವ್ಹಾ ಪಹಾತಬ್ಬಾ; ರಸಾ ಪಹಾತಬ್ಬಾ… ಕಾಯೋ ಪಹಾತಬ್ಬೋ; ಫೋಟ್ಠಬ್ಬಾ ಪಹಾತಬ್ಬಾ… ಮನೋ ಪಹಾತಬ್ಬೋ; ಧಮ್ಮಾ ಪಹಾತಬ್ಬಾ… ಮನೋವಿಞ್ಞಾಣಂ ಪಹಾತಬ್ಬಂ;… ಮನೋಸಮ್ಫಸ್ಸೋ ಪಹಾತಬ್ಬೋ; ಯಮ್ಪಿದಂ ಮನೋಸಮ್ಫಸ್ಸಪಚ್ಚಯಾ ಉಪ್ಪಜ್ಜತಿ ವೇದಯಿತಂ ಸುಖಂ ವಾ ದುಕ್ಖಂ ವಾ ಅದುಕ್ಖಮಸುಖಂ ವಾ, ತಮ್ಪಿ ಪಹಾತಬ್ಬಂ.’’ ರೂಪಂ ಪಸ್ಸನ್ತೋ ಪಜಹತಿ, ವೇದನಂ ಪಸ್ಸನ್ತೋ ಪಜಹತಿ, ಸಞ್ಞಂ ಪಸ್ಸನ್ತೋ ಪಜಹತಿ, ಸಙ್ಖಾರೇ ಪಸ್ಸನ್ತೋ ಪಜಹತಿ, ವಿಞ್ಞಾಣಂ ಪಸ್ಸನ್ತೋ ಪಜಹತಿ. ಚಕ್ಖುಂ…ಪೇ… ಜರಾಮರಣಂ…ಪೇ… ಅಮತೋಗಧಂ ನಿಬ್ಬಾನಂ ಪರಿಯೋಸಾನಟ್ಠೇನ ಪಸ್ಸನ್ತೋ ಪಜಹತಿ. ಯೇ ಯೇ ಧಮ್ಮಾ ಪಹೀನಾ ಹೋನ್ತಿ ತೇ ತೇ ಧಮ್ಮಾ ಪರಿಚ್ಚತ್ತಾ ಹೋನ್ತಿ. ತಂ ಞಾತಟ್ಠೇನ ಞಾಣಂ, ಪಜಾನನಟ್ಠೇನ ಪಞ್ಞಾ. ತೇನ ವುಚ್ಚತಿ – ‘‘ಇಮೇ ಧಮ್ಮಾ ಪಹಾತಬ್ಬಾತಿ ಸೋತಾವಧಾನಂ, ತಂ ಪಜಾನನಾ ಪಞ್ಞಾ ಸುತಮಯೇ ಞಾಣ’’ನ್ತಿ.

ತತಿಯಭಾಣವಾರೋ.

೨೫. ಕಥಂ ‘‘ಇಮೇ ಧಮ್ಮಾ ಭಾವೇತಬ್ಬಾ’’ತಿ ಸೋತಾವಧಾನಂ, ತಂಪಜಾನನಾ ಪಞ್ಞಾ ಸುತಮಯೇ ಞಾಣಂ?

ಏಕೋ ಧಮ್ಮೋ ಭಾವೇತಬ್ಬೋ – ಕಾಯಗತಾಸತಿ ಸಾತಸಹಗತಾ. ದ್ವೇ ಧಮ್ಮಾ ಭಾವೇತಬ್ಬಾ – ಸಮಥೋ ಚ ವಿಪಸ್ಸನಾ ಚ. ತಯೋ ಧಮ್ಮಾ ಭಾವೇತಬ್ಬಾ – ತಯೋ ಸಮಾಧೀ. ಚತ್ತಾರೋ ಧಮ್ಮಾ ಭಾವೇತಬ್ಬಾ – ಚತ್ತಾರೋ ಸತಿಪಟ್ಠಾನಾ. ಪಞ್ಚ ಧಮ್ಮಾ ಭಾವೇತಬ್ಬಾ – ಪಞ್ಚಙ್ಗಿಕೋ ಸಮಾಧಿ [ಸಮ್ಮಾಸಮಾಧೀ (ಸ್ಯಾ.)]. ಛ ಧಮ್ಮಾ ಭಾವೇತಬ್ಬಾ – ಛ ಅನುಸ್ಸತಿಟ್ಠಾನಾನಿ. ಸತ್ತ ಧಮ್ಮಾ ಭಾವೇತಬ್ಬಾ – ಸತ್ತ ಬೋಜ್ಝಙ್ಗಾ. ಅಟ್ಠ ಧಮ್ಮಾ ಭಾವೇತಬ್ಬಾ – ಅರಿಯೋ ಅಟ್ಠಙ್ಗಿಕೋ ಮಗ್ಗೋ. ನವ ಧಮ್ಮಾ ಭಾವೇತಬ್ಬಾ – ನವ ಪಾರಿಸುದ್ಧಿಪಧಾನಿಯಙ್ಗಾನಿ. ದಸ ಧಮ್ಮಾ ಭಾವೇತಬ್ಬಾ – ದಸ ಕಸಿಣಾಯತನಾನಿ.

೨೬. ದ್ವೇ ಭಾವನಾ – ಲೋಕಿಯಾ ಚ ಭಾವನಾ, ಲೋಕುತ್ತರಾ ಚ ಭಾವನಾ. ತಿಸ್ಸೋ ಭಾವನಾ – ರೂಪಾವಚರಕುಸಲಾನಂ ಧಮ್ಮಾನಂ ಭಾವನಾ, ಅರೂಪಾವಚರಕುಸಲಾನಂ ಧಮ್ಮಾನಂ ಭಾವನಾ, ಅಪರಿಯಾಪನ್ನಕುಸಲಾನಂ ಧಮ್ಮಾನಂ ಭಾವನಾ. ರೂಪಾವಚರಕುಸಲಾನಂ ಧಮ್ಮಾನಂ ಭಾವನಾ ಅತ್ಥಿ ಹೀನಾ, ಅತ್ಥಿ ಮಜ್ಝಿಮಾ, ಅತ್ಥಿ ಪಣೀತಾ. ಅರೂಪಾವಚರಕುಸಲಾನಂ ಧಮ್ಮಾನಂ ಭಾವನಾ ಅತ್ಥಿ ಹೀನಾ, ಅತ್ಥಿ ಮಜ್ಝಿಮಾ, ಅತ್ಥಿ ಪಣೀತಾ. ಅಪರಿಯಾಪನ್ನಕುಸಲಾನಂ ಧಮ್ಮಾನಂ ಭಾವನಾ ಪಣೀತಾ.

೨೭. ಚತಸ್ಸೋ ಭಾವನಾ – ದುಕ್ಖಸಚ್ಚಂ ಪರಿಞ್ಞಾಪಟಿವೇಧಂ ಪಟಿವಿಜ್ಝನ್ತೋ ಭಾವೇತಿ, ಸಮುದಯಸಚ್ಚಂ ಪಹಾನಪ್ಪಟಿವೇಧಂ ಪಟಿವಿಜ್ಝನ್ತೋ ಭಾವೇತಿ, ನಿರೋಧಸಚ್ಚಂ ಸಚ್ಛಿಕಿರಿಯಾಪಟಿವೇಧಂ ಪಟಿವಿಜ್ಝನ್ತೋ ಭಾವೇತಿ, ಮಗ್ಗಸಚ್ಚಂ ಭಾವನಾಪಟಿವೇಧಂ ಪಟಿವಿಜ್ಝನ್ತೋ ಭಾವೇತಿ. ಇಮಾ ಚತಸ್ಸೋ ಭಾವನಾ.

ಅಪರಾಪಿ ಚತಸ್ಸೋ ಭಾವನಾ – ಏಸನಾಭಾವನಾ, ಪಟಿಲಾಭಾಭಾವನಾ, ಏಕರಸಾಭಾವನಾ, ಆಸೇವನಾಭಾವನಾ. ಕತಮಾ ಏಸನಾಭಾವನಾ? ಸಬ್ಬೇಸಂ ಸಮಾಧಿಂ ಸಮಾಪಜ್ಜನ್ತಾನಂ ತತ್ಥ ಜಾತಾ ಧಮ್ಮಾ ಏಕರಸಾ ಹೋನ್ತೀತಿ – ಅಯಂ ಏಸನಾಭಾವನಾ. ಕತಮಾ ಪಟಿಲಾಭಾಭಾವನಾ? ಸಬ್ಬೇಸಂ ಸಮಾಧಿಂ ಸಮಾಪನ್ನಾನಂ ತತ್ಥ ಜಾತಾ ಧಮ್ಮಾ ಅಞ್ಞಮಞ್ಞಂ ನಾತಿವತ್ತನ್ತೀತಿ – ಅಯಂ ಪಟಿಲಾಭಾಭಾವನಾ. ಕತಮಾ ಏಕರಸಾಭಾವನಾ? ಅಧಿಮೋಕ್ಖಟ್ಠೇನ ಸದ್ಧಿನ್ದ್ರಿಯಂ ಭಾವಯತೋ ಸದ್ಧಿನ್ದ್ರಿಯಸ್ಸ ವಸೇನ ಚತ್ತಾರಿ ಇನ್ದ್ರಿಯಾನಿ ಏಕರಸಾ ಹೋನ್ತೀತಿ – ಇನ್ದ್ರಿಯಾನಂ ಏಕರಸಟ್ಠೇನ ಭಾವನಾ. ಪಗ್ಗಹಟ್ಠೇನ ವೀರಿಯಿನ್ದ್ರಿಯಂ ಭಾವಯತೋ ವೀರಿಯಿನ್ದ್ರಿಯಸ್ಸ ವಸೇನ ಚತ್ತಾರಿ ಇನ್ದ್ರಿಯಾನಿ ಏಕರಸಾ ಹೋನ್ತೀತಿ – ಇನ್ದ್ರಿಯಾನಂ ಏಕರಸಟ್ಠೇನ ಭಾವನಾ. ಉಪಟ್ಠಾನಟ್ಠೇನ ಸತಿನ್ದ್ರಿಯಂ ಭಾವಯತೋ ಸತಿನ್ದ್ರಿಯಸ್ಸ ವಸೇನ ಚತ್ತಾರಿ ಇನ್ದ್ರಿಯಾನಿ ಏಕರಸಾ ಹೋನ್ತೀತಿ – ಇನ್ದ್ರಿಯಾನಂ ಏಕರಸಟ್ಠೇನ ಭಾವನಾ. ಅವಿಕ್ಖೇಪಟ್ಠೇನ ಸಮಾಧಿನ್ದ್ರಿಯಂ ಭಾವಯತೋ ಸಮಾಧಿನ್ದ್ರಿಯಸ್ಸ ವಸೇನ ಚತ್ತಾರಿ ಇನ್ದ್ರಿಯಾನಿ ಏಕರಸಾ ಹೋನ್ತೀತಿ – ಇನ್ದ್ರಿಯಾನಂ ಏಕರಸಟ್ಠೇನ ಭಾವನಾ. ದಸ್ಸನಟ್ಠೇನ ಪಞ್ಞಿನ್ದ್ರಿಯಂ ಭಾವಯತೋ ಪಞ್ಞಿನ್ದ್ರಿಯಸ್ಸ ವಸೇನ ಚತ್ತಾರಿ ಇನ್ದ್ರಿಯಾನಿ ಏಕರಸಾ ಹೋನ್ತೀತಿ – ಇನ್ದ್ರಿಯಾನಂ ಏಕರಸಟ್ಠೇನ ಭಾವನಾ.

ಅಸ್ಸದ್ಧಿಯೇ ಅಕಮ್ಪಿಯಟ್ಠೇನ ಸದ್ಧಾಬಲಂ ಭಾವಯತೋ ಸದ್ಧಾಬಲಸ್ಸ ವಸೇನ ಚತ್ತಾರಿ ಬಲಾನಿ ಏಕರಸಾ ಹೋನ್ತೀತಿ – ಬಲಾನಂ ಏಕರಸಟ್ಠೇನ ಭಾವನಾ. ಕೋಸಜ್ಜೇ ಅಕಮ್ಪಿಯಟ್ಠೇನ ವೀರಿಯಬಲಂ ಭಾವಯತೋ ವೀರಿಯಬಲಸ್ಸ ವಸೇನ ಚತ್ತಾರಿ ಬಲಾನಿ ಏಕರಸಾ ಹೋನ್ತೀತಿ – ಬಲಾನಂ ಏಕರಸಟ್ಠೇನ ಭಾವನಾ. ಪಮಾದೇ ಅಕಮ್ಪಿಯಟ್ಠೇನ ಸತಿಬಲಂ ಭಾವಯತೋ ಸತಿಬಲಸ್ಸ ವಸೇನ ಚತ್ತಾರಿ ಬಲಾನಿ ಏಕರಸಾ ಹೋನ್ತೀತಿ – ಬಲಾನಂ ಏಕರಸಟ್ಠೇನ ಭಾವನಾ. ಉದ್ಧಚ್ಚೇ ಅಕಮ್ಪಿಯಟ್ಠೇನ ಸಮಾಧಿಬಲಂ ಭಾವಯತೋ ಸಮಾಧಿಬಲಸ್ಸ ವಸೇನ ಚತ್ತಾರಿ ಬಲಾನಿ ಏಕರಸಾ ಹೋನ್ತೀತಿ – ಬಲಾನಂ ಏಕರಸಟ್ಠೇನ ಭಾವನಾ. ಅವಿಜ್ಜಾಯ ಅಕಮ್ಪಿಯಟ್ಠೇನ ಪಞ್ಞಾಬಲಂ ಭಾವಯತೋ ಪಞ್ಞಾಬಲಸ್ಸ ವಸೇನ ಚತ್ತಾರಿ ಬಲಾನಿ ಏಕರಸಾ ಹೋನ್ತೀತಿ – ಬಲಾನಂ ಏಕರಸಟ್ಠೇನ ಭಾವನಾ.

ಉಪಟ್ಠಾನಟ್ಠೇನ ಸತಿಸಮ್ಬೋಜ್ಝಙ್ಗಂ ಭಾವಯತೋ ಸತಿಸಮ್ಬೋಜ್ಝಙ್ಗಸ್ಸ ವಸೇನ ಛ ಬೋಜ್ಝಙ್ಗಾ ಏಕರಸಾ ಹೋನ್ತೀತಿ – ಬೋಜ್ಝಙ್ಗಾನಂ ಏಕರಸಟ್ಠೇನ ಭಾವನಾ. ಪವಿಚಯಟ್ಠೇನ ಧಮ್ಮವಿಚಯಸಮ್ಬೋಜ್ಝಙ್ಗಂ ಭಾವಯತೋ ಧಮ್ಮವಿಚಯಸಮ್ಬೋಜ್ಝಙ್ಗಸ್ಸ ವಸೇನ ಛ ಬೋಜ್ಝಙ್ಗಾ ಏಕರಸಾ ಹೋನ್ತೀತಿ – ಬೋಜ್ಝಙ್ಗಾನಂ ಏಕರಸಟ್ಠೇನ ಭಾವನಾ. ಪಗ್ಗಹಟ್ಠೇನ ವೀರಿಯಸಮ್ಬೋಜ್ಝಙ್ಗಂ ಭಾವಯತೋ ವೀರಿಯಸಮ್ಬೋಜ್ಝಙ್ಗಸ್ಸ ವಸೇನ ಛ ಬೋಜ್ಝಙ್ಗಾ ಏಕರಸಾ ಹೋನ್ತೀತಿ – ಬೋಜ್ಝಙ್ಗಾನಂ ಏಕರಸಟ್ಠೇನ ಭಾವನಾ. ಫರಣಟ್ಠೇನ ಪೀತಿಸಮ್ಬೋಜ್ಝಙ್ಗಂ ಭಾವಯತೋ ಪೀತಿಸಮ್ಬೋಜ್ಝಙ್ಗಸ್ಸ ವಸೇನ ಛ ಬೋಜ್ಝಙ್ಗಾ ಏಕರಸಾ ಹೋನ್ತೀತಿ – ಬೋಜ್ಝಙ್ಗಾನಂ ಏಕರಸಟ್ಠೇನ ಭಾವನಾ. ಉಪಸಮಟ್ಠೇನ ಪಸ್ಸದ್ಧಿಸಮ್ಬೋಜ್ಝಙ್ಗಂ ಭಾವಯತೋ ಪಸ್ಸದ್ಧಿಸಮ್ಬೋಜ್ಝಙ್ಗಸ್ಸ ವಸೇನ ಛ ಬೋಜ್ಝಙ್ಗಾ ಏಕರಸಾ ಹೋನ್ತೀತಿ – ಬೋಜ್ಝಙ್ಗಾನಂ ಏಕರಸಟ್ಠೇನ ಭಾವನಾ. ಅವಿಕ್ಖೇಪಟ್ಠೇನ ಸಮಾಧಿಸಮ್ಬೋಜ್ಝಙ್ಗಂ ಭಾವಯತೋ ಸಮಾಧಿಸಮ್ಬೋಜ್ಝಙ್ಗಸ್ಸ ವಸೇನ ಛ ಬೋಜ್ಝಙ್ಗಾ ಏಕರಸಾ ಹೋನ್ತೀತಿ – ಬೋಜ್ಝಙ್ಗಾನಂ ಏಕರಸಟ್ಠೇನ ಭಾವನಾ. ಪಟಿಸಙ್ಖಾನಟ್ಠೇನ ಉಪೇಕ್ಖಾಸಮ್ಬೋಜ್ಝಙ್ಗಂ ಭಾವಯತೋ ಉಪೇಕ್ಖಾಸಮ್ಬೋಜ್ಝಙ್ಗಸ್ಸ ವಸೇನ ಛ ಬೋಜ್ಝಙ್ಗಾ ಏಕರಸಾ ಹೋನ್ತೀತಿ – ಬೋಜ್ಝಙ್ಗಾನಂ ಏಕರಸಟ್ಠೇನ ಭಾವನಾ.

ದಸ್ಸನಟ್ಠೇನ ಸಮ್ಮಾದಿಟ್ಠಿಂ ಭಾವಯತೋ ಸಮ್ಮಾದಿಟ್ಠಿಯಾ ವಸೇನ ಸತ್ತ ಮಗ್ಗಙ್ಗಾ ಏಕರಸಾ ಹೋನ್ತೀತಿ – ಮಗ್ಗಙ್ಗಾನಂ ಏಕರಸಟ್ಠೇನ ಭಾವನಾ. ಅಭಿನಿರೋಪನಟ್ಠೇನ ಸಮ್ಮಾಸಙ್ಕಪ್ಪಂ ಭಾವಯತೋ ಸಮ್ಮಾಸಙ್ಕಪ್ಪಸ್ಸ ವಸೇನ ಸತ್ತ ಮಗ್ಗಙ್ಗಾ ಏಕರಸಾ ಹೋನ್ತೀತಿ – ಮಗ್ಗಙ್ಗಾನಂ ಏಕರಸಟ್ಠೇನ ಭಾವನಾ. ಪರಿಗ್ಗಹಟ್ಠೇನ ಸಮ್ಮಾವಾಚಂ ಭಾವಯತೋ ಸಮ್ಮಾವಾಚಾಯ ವಸೇನ ಸತ್ತ ಮಗ್ಗಙ್ಗಾ ಏಕರಸಾ ಹೋನ್ತೀತಿ – ಮಗ್ಗಙ್ಗಾನಂ ಏಕರಸಟ್ಠೇನ ಭಾವನಾ. ಸಮುಟ್ಠಾನಟ್ಠೇನ ಸಮ್ಮಾಕಮ್ಮನ್ತಂ ಭಾವಯತೋ ಸಮ್ಮಾಕಮ್ಮನ್ತಸ್ಸ ವಸೇನ ಸತ್ತ ಮಗ್ಗಙ್ಗಾ ಏಕರಸಾ ಹೋನ್ತೀತಿ – ಮಗ್ಗಙ್ಗಾನಂ ಏಕರಸಟ್ಠೇನ ಭಾವನಾ. ವೋದಾನಟ್ಠೇನ ಸಮ್ಮಾಆಜೀವಂ ಭಾವಯತೋ ಸಮ್ಮಾಆಜೀವಸ್ಸ ವಸೇನ ಸತ್ತ ಮಗ್ಗಙ್ಗಾ ಏಕರಸಾ ಹೋನ್ತೀತಿ – ಮಗ್ಗಙ್ಗಾನಂ ಏಕರಸಟ್ಠೇನ ಭಾವನಾ. ಪಗ್ಗಹಟ್ಠೇನ ಸಮ್ಮಾವಾಯಾಮಂ ಭಾವಯತೋ ಸಮ್ಮಾವಾಯಾಮಸ್ಸ ವಸೇನ ಸತ್ತ ಮಗ್ಗಙ್ಗಾ ಏಕರಸಾ ಹೋನ್ತೀತಿ – ಮಗ್ಗಙ್ಗಾನಂ ಏಕರಸಟ್ಠೇನ ಭಾವನಾ. ಉಪಟ್ಠಾನಟ್ಠೇನ ಸಮ್ಮಾಸತಿಂ ಭಾವಯತೋ ಸಮ್ಮಾಸತಿಯಾ ವಸೇನ ಸತ್ತ ಮಗ್ಗಙ್ಗಾ ಏಕರಸಾ ಹೋನ್ತೀತಿ – ಮಗ್ಗಙ್ಗಾನಂ ಏಕರಸಟ್ಠೇನ ಭಾವನಾ. ಅವಿಕ್ಖೇಪಟ್ಠೇನ ಸಮ್ಮಾಸಮಾಧಿಂ ಭಾವಯತೋ ಸಮ್ಮಾಸಮಾಧಿಸ್ಸ ವಸೇನ ಸತ್ತ ಮಗ್ಗಙ್ಗಾ ಏಕರಸಾ ಹೋನ್ತೀತಿ – ಮಗ್ಗಙ್ಗಾನಂ ಏಕರಸಟ್ಠೇನ ಭಾವನಾ. ಅಯಂ ಏಕರಸಾಭಾವನಾ.

ಕತಮಾ ಆಸೇವನಾಭಾವನಾ? ಇಧ ಭಿಕ್ಖು ಪುಬ್ಬಣ್ಹಸಮಯಂ ಆಸೇವತಿ, ಮಜ್ಝನ್ಹಿಕಸಮಯಮ್ಪಿ [ಮಜ್ಝನ್ತಿಕಸಮಯಮ್ಪಿ (ಸ್ಯಾ. ಕ.)] ಆಸೇವತಿ, ಸಾಯನ್ಹಸಮಯಮ್ಪಿ ಆಸೇವತಿ, ಪುರೇಭತ್ತಮ್ಪಿ ಆಸೇವತಿ, ಪಚ್ಛಾಭತ್ತಮ್ಪಿ ಆಸೇವತಿ, ಪುರಿಮೇಪಿ ಯಾಮೇ ಆಸೇವತಿ, ಮಜ್ಝಿಮೇಪಿ ಯಾಮೇ ಆಸೇವತಿ, ಪಚ್ಛಿಮೇಪಿ ಯಾಮೇ ಆಸೇವತಿ, ರತ್ತಿಮ್ಪಿ ಆಸೇವತಿ, ದಿವಾಪಿ ಆಸೇವತಿ, ರತ್ತಿನ್ದಿವಾಪಿ [ರತ್ತಿದಿವಾಪಿ (ಕ.)] ಆಸೇವತಿ, ಕಾಳೇಪಿ ಆಸೇವತಿ, ಜುಣ್ಹೇಪಿ ಆಸೇವತಿ, ವಸ್ಸೇಪಿ ಆಸೇವತಿ, ಹೇಮನ್ತೇಪಿ ಆಸೇವತಿ, ಗಿಮ್ಹೇಪಿ ಆಸೇವತಿ, ಪುರಿಮೇಪಿ ವಯೋಖನ್ಧೇ ಆಸೇವತಿ, ಮಜ್ಝಿಮೇಪಿ ವಯೋಖನ್ಧೇ ಆಸೇವತಿ, ಪಚ್ಛಿಮೇಪಿ ವಯೋಖನ್ಧೇ ಆಸೇವತಿ – ಅಯಂ ಆಸೇವನಾಭಾವನಾ. ಇಮಾ ಚತಸ್ಸೋ ಭಾವನಾ.

೨೮. ಅಪರಾಪಿ ಚತಸ್ಸೋ ಭಾವನಾ – ತತ್ಥ ಜಾತಾನಂ ಧಮ್ಮಾನಂ ಅನತಿವತ್ತನಟ್ಠೇನ ಭಾವನಾ, ಇನ್ದ್ರಿಯಾನಂ ಏಕರಸಟ್ಠೇನ ಭಾವನಾ, ತದುಪಗವೀರಿಯವಾಹನಟ್ಠೇನ ಭಾವನಾ, ಆಸೇವನಟ್ಠೇನ ಭಾವನಾ. ಕಥಂ ತತ್ಥ ಜಾತಾನಂ ಧಮ್ಮಾನಂ ಅನತಿವತ್ತನಟ್ಠೇನ ಭಾವನಾ? ಕಾಮಚ್ಛನ್ದಂ ಪಜಹತೋ ನೇಕ್ಖಮ್ಮವಸೇನ ಜಾತಾ ಧಮ್ಮಾ ಅಞ್ಞಮಞ್ಞಂ ನಾತಿವತ್ತನ್ತೀತಿ – ತತ್ಥ ಜಾತಾನಂ ಧಮ್ಮಾನಂ ಅನತಿವತ್ತನಟ್ಠೇನ ಭಾವನಾ. ಬ್ಯಾಪಾದಂ ಪಜಹತೋ ಅಬ್ಯಾಪಾದವಸೇನ ಜಾತಾ ಧಮ್ಮಾ ಅಞ್ಞಮಞ್ಞಂ ನಾತಿವತ್ತನ್ತೀತಿ – ತತ್ಥ ಜಾತಾನಂ ಧಮ್ಮಾನಂ ಅನತಿವತ್ತನಟ್ಠೇನ ಭಾವನಾ. ಥಿನಮಿದ್ಧಂ [ಥೀನಮಿದ್ಧಂ (ಸ್ಯಾ. ಸೀ. ಅಟ್ಠ.)] ಪಜಹತೋ ಆಲೋಕಸಞ್ಞಾವಸೇನ ಜಾತಾ ಧಮ್ಮಾ ಅಞ್ಞಮಞ್ಞಂ ನಾತಿವತ್ತನ್ತೀತಿ – ತತ್ಥ ಜಾತಾನಂ ಧಮ್ಮಾನಂ ಅನತಿವತ್ತನಟ್ಠೇನ ಭಾವನಾ. ಉದ್ಧಚ್ಚಂ ಪಜಹತೋ ಅವಿಕ್ಖೇಪವಸೇನ ಜಾತಾ ಧಮ್ಮಾ ಅಞ್ಞಮಞ್ಞಂ ನಾತಿವತ್ತನ್ತೀತಿ – ತತ್ಥ ಜಾತಾನಂ ಧಮ್ಮಾನಂ ಅನತಿವತ್ತನಟ್ಠೇನ ಭಾವನಾ. ವಿಚಿಕಿಚ್ಛಂ ಪಜಹತೋ ಧಮ್ಮವವತ್ಥಾನವಸೇನ ಜಾತಾ ಧಮ್ಮಾ ಅಞ್ಞಮಞ್ಞಂ ನಾತಿವತ್ತನ್ತೀತಿ – ತತ್ಥ ಜಾತಾನಂ ಧಮ್ಮಾನಂ ಅನತಿವತ್ತನಟ್ಠೇನ ಭಾವನಾ. ಅವಿಜ್ಜಂ ಪಜಹತೋ ಞಾಣವಸೇನ ಜಾತಾ ಧಮ್ಮಾ ಅಞ್ಞಮಞ್ಞಂ ನಾತಿವತ್ತನ್ತೀತಿ – ತತ್ಥ ಜಾತಾನಂ ಧಮ್ಮಾನಂ ಅನತಿವತ್ತನಟ್ಠೇನ ಭಾವನಾ. ಅರತಿಂ ಪಜಹತೋ ಪಾಮೋಜ್ಜವಸೇನ ಜಾತಾ ಧಮ್ಮಾ ಅಞ್ಞಮಞ್ಞಂ ನಾತಿವತ್ತನ್ತೀತಿ – ತತ್ಥ ಜಾತಾನಂ ಧಮ್ಮಾನಂ ಅನತಿವತ್ತನಟ್ಠೇನ ಭಾವನಾ. ನೀವರಣೇ ಪಜಹತೋ ಪಠಮಜ್ಝಾನವಸೇನ ಜಾತಾ ಧಮ್ಮಾ ಅಞ್ಞಮಞ್ಞಂ ನಾತಿವತ್ತನ್ತೀತಿ – ತತ್ಥ ಜಾತಾನಂ ಧಮ್ಮಾನಂ ಅನತಿವತ್ತನಟ್ಠೇನ ಭಾವನಾ. ವಿತಕ್ಕವಿಚಾರೇ ಪಜಹತೋ ದುತಿಯಜ್ಝಾನವಸೇನ ಜಾತಾ ಧಮ್ಮಾ ಅಞ್ಞಮಞ್ಞಂ ನಾತಿವತ್ತನ್ತೀತಿ – ತತ್ಥ ಜಾತಾನಂ ಧಮ್ಮಾನಂ ಅನತಿವತ್ತನಟ್ಠೇನ ಭಾವನಾ. ಪೀತಿಂ ಪಜಹತೋ ತತಿಯಜ್ಝಾನವಸೇನ ಜಾತಾ ಧಮ್ಮಾ ಅಞ್ಞಮಞ್ಞಂ ನಾತಿವತ್ತನ್ತೀತಿ – ತತ್ಥ ಜಾತಾನಂ ಧಮ್ಮಾನಂ ಅನತಿವತ್ತನಟ್ಠೇನ ಭಾವನಾ. ಸುಖದುಕ್ಖೇ ಪಜಹತೋ ಚತುತ್ಥಜ್ಝಾನವಸೇನ ಜಾತಾ ಧಮ್ಮಾ ಅಞ್ಞಮಞ್ಞಂ ನಾತಿವತ್ತನ್ತೀತಿ – ತತ್ಥ ಜಾತಾನಂ ಧಮ್ಮಾನಂ ಅನತಿವತ್ತನಟ್ಠೇನ ಭಾವನಾ.

ರೂಪಸಞ್ಞಂ ಪಟಿಘಸಞ್ಞಂ ನಾನತ್ತಸಞ್ಞಂ ಪಜಹತೋ ಆಕಾಸಾನಞ್ಚಾಯತನಸಮಾಪತ್ತಿವಸೇನ ಜಾತಾ ಧಮ್ಮಾ ಅಞ್ಞಮಞ್ಞಂ ನಾತಿವತ್ತನ್ತೀತಿ – ತತ್ಥ ಜಾತಾನಂ ಧಮ್ಮಾನಂ ಅನತಿವತ್ತನಟ್ಠೇನ ಭಾವನಾ. ಆಕಾಸಾನಞ್ಚಾಯತನಸಞ್ಞಂ ಪಜಹತೋ ವಿಞ್ಞಾಣಞ್ಚಾಯತನಸಮಾಪತ್ತಿವಸೇನ ಜಾತಾ ಧಮ್ಮಾ ಅಞ್ಞಮಞ್ಞಂ ನಾತಿವತ್ತನ್ತೀತಿ – ತತ್ಥ ಜಾತಾನಂ ಧಮ್ಮಾನಂ ಅನತಿವತ್ತನಟ್ಠೇನ ಭಾವನಾ. ವಿಞ್ಞಾಣಞ್ಚಾಯತನಸಞ್ಞಂ ಪಜಹತೋ ಆಕಿಞ್ಚಞ್ಞಾಯತನಸಮಾಪತ್ತಿವಸೇನ ಜಾತಾ ಧಮ್ಮಾ ಅಞ್ಞಮಞ್ಞಂ ನಾತಿವತ್ತನ್ತೀತಿ – ತತ್ಥ ಜಾತಾನಂ ಧಮ್ಮಾನಂ ಅನತಿವತ್ತನಟ್ಠೇನ ಭಾವನಾ. ಆಕಿಞ್ಚಞ್ಞಾಯತನಸಞ್ಞಂ ಪಜಹತೋ ನೇವಸಞ್ಞಾನಾಸಞ್ಞಾಯತನಸಮಾಪತ್ತಿವಸೇನ ಜಾತಾ ಧಮ್ಮಾ ಅಞ್ಞಮಞ್ಞಂ ನಾತಿವತ್ತನ್ತೀತಿ – ತತ್ಥ ಜಾತಾನಂ ಧಮ್ಮಾನಂ ಅನತಿವತ್ತನಟ್ಠೇನ ಭಾವನಾ.

ನಿಚ್ಚಸಞ್ಞಂ ಪಜಹತೋ ಅನಿಚ್ಚಾನುಪಸ್ಸನಾವಸೇನ ಜಾತಾ ಧಮ್ಮಾ ಅಞ್ಞಮಞ್ಞಂ ನಾತಿವತ್ತನ್ತೀತಿ – ತತ್ಥ ಜಾತಾನಂ ಧಮ್ಮಾನಂ ಅನತಿವತ್ತನಟ್ಠೇನ ಭಾವನಾ. ಸುಖಸಞ್ಞಂ ಪಜಹತೋ ದುಕ್ಖಾನುಪಸ್ಸನಾವಸೇನ ಜಾತಾ ಧಮ್ಮಾ ಅಞ್ಞಮಞ್ಞಂ ನಾತಿವತ್ತನ್ತೀತಿ – ತತ್ಥ ಜಾತಾನಂ ಧಮ್ಮಾನಂ ಅನತಿವತ್ತನಟ್ಠೇನ ಭಾವನಾ. ಅತ್ತಸಞ್ಞಂ ಪಜಹತೋ ಅನತ್ತಾನುಪಸ್ಸನಾವಸೇನ ಜಾತಾ ಧಮ್ಮಾ ಅಞ್ಞಮಞ್ಞಂ ನಾತಿವತ್ತನ್ತೀತಿ – ತತ್ಥ ಜಾತಾನಂ ಧಮ್ಮಾನಂ ಅನತಿವತ್ತನಟ್ಠೇನ ಭಾವನಾ. ನನ್ದಿಂ ಪಜಹತೋ ನಿಬ್ಬಿದಾನುಪಸ್ಸನಾವಸೇನ ಜಾತಾ ಧಮ್ಮಾ ಅಞ್ಞಮಞ್ಞಂ ನಾತಿವತ್ತನ್ತೀತಿ – ತತ್ಥ ಜಾತಾನಂ ಧಮ್ಮಾನಂ ಅನತಿವತ್ತನಟ್ಠೇನ ಭಾವನಾ. ರಾಗಂ ಪಜಹತೋ ವಿರಾಗಾನುಪಸ್ಸನಾವಸೇನ ಜಾತಾ ಧಮ್ಮಾ ಅಞ್ಞಮಞ್ಞಂ ನಾತಿವತ್ತನ್ತೀತಿ – ತತ್ಥ ಜಾತಾನಂ ಧಮ್ಮಾನಂ ಅನತಿವತ್ತನಟ್ಠೇನ ಭಾವನಾ. ಸಮುದಯಂ ಪಜಹತೋ ನಿರೋಧಾನುಪಸ್ಸನಾವಸೇನ ಜಾತಾ ಧಮ್ಮಾ ಅಞ್ಞಮಞ್ಞಂ ನಾತಿವತ್ತನ್ತೀತಿ – ತತ್ಥ ಜಾತಾನಂ ಧಮ್ಮಾನಂ ಅನತಿವತ್ತನಟ್ಠೇನ ಭಾವನಾ. ಆದಾನಂ ಪಜಹತೋ ಪಟಿನಿಸ್ಸಗ್ಗಾನುಪಸ್ಸನಾವಸೇನ ಜಾತಾ ಧಮ್ಮಾ ಅಞ್ಞಮಞ್ಞಂ ನಾತಿವತ್ತನ್ತೀತಿ – ತತ್ಥ ಜಾತಾನಂ ಧಮ್ಮಾನಂ ಅನತಿವತ್ತನಟ್ಠೇನ ಭಾವನಾ. ಘನಸಞ್ಞಂ ಪಜಹತೋ ಖಯಾನುಪಸ್ಸನಾವಸೇನ ಜಾತಾ ಧಮ್ಮಾ ಅಞ್ಞಮಞ್ಞಂ ನಾತಿವತ್ತನ್ತೀತಿ – ತತ್ಥ ಜಾತಾನಂ ಧಮ್ಮಾನಂ ಅನತಿವತ್ತನಟ್ಠೇನ ಭಾವನಾ. ಆಯೂಹನಂ ಪಜಹತೋ ವಯಾನುಪಸ್ಸನಾವಸೇನ ಜಾತಾ ಧಮ್ಮಾ ಅಞ್ಞಮಞ್ಞಂ ನಾತಿವತ್ತನ್ತೀತಿ – ತತ್ಥ ಜಾತಾನಂ ಧಮ್ಮಾನಂ ಅನತಿವತ್ತನಟ್ಠೇನ ಭಾವನಾ. ಧುವಸಞ್ಞಂ ಪಜಹತೋ ವಿಪರಿಣಾಮಾನುಪಸ್ಸನಾವಸೇನ ಜಾತಾ ಧಮ್ಮಾ ಅಞ್ಞಮಞ್ಞಂ ನಾತಿವತ್ತನ್ತೀತಿ – ತತ್ಥ ಜಾತಾನಂ ಧಮ್ಮಾನಂ ಅನತಿವತ್ತನಟ್ಠೇನ ಭಾವನಾ. ನಿಮಿತ್ತಂ ಪಜಹತೋ ಅನಿಮಿತ್ತಾನುಪಸ್ಸನಾವಸೇನ ಜಾತಾ ಧಮ್ಮಾ ಅಞ್ಞಮಞ್ಞಂ ನಾತಿವತ್ತನ್ತೀತಿ – ತತ್ಥ ಜಾತಾನಂ ಧಮ್ಮಾನಂ ಅನತಿವತ್ತನಟ್ಠೇನ ಭಾವನಾ. ಪಣಿಧಿಂ ಪಜಹತೋ ಅಪ್ಪಣಿಹಿತಾನುಪಸ್ಸನಾವಸೇನ ಜಾತಾ ಧಮ್ಮಾ ಅಞ್ಞಮಞ್ಞಂ ನಾತಿವತ್ತನ್ತೀತಿ – ತತ್ಥ ಜಾತಾನಂ ಧಮ್ಮಾನಂ ಅನತಿವತ್ತನಟ್ಠೇನ ಭಾವನಾ. ಅಭಿನಿವೇಸಂ ಪಜಹತೋ ಸುಞ್ಞತಾನುಪಸ್ಸನಾವಸೇನ ಜಾತಾ ಧಮ್ಮಾ ಅಞ್ಞಮಞ್ಞಂ ನಾತಿವತ್ತನ್ತೀತಿ – ತತ್ಥ ಜಾತಾನಂ ಧಮ್ಮಾನಂ ಅನತಿವತ್ತನಟ್ಠೇನ ಭಾವನಾ. ಸಾರಾದಾನಾಭಿನಿವೇಸಂ ಪಜಹತೋ ಅಧಿಪಞ್ಞಾ ಧಮ್ಮವಿಪಸ್ಸನಾವಸೇನ ಜಾತಾ ಧಮ್ಮಾ ಅಞ್ಞಮಞ್ಞಂ ನಾತಿವತ್ತನ್ತೀತಿ – ತತ್ಥ ಜಾತಾನಂ ಧಮ್ಮಾನಂ ಅನತಿವತ್ತನಟ್ಠೇನ ಭಾವನಾ. ಸಮ್ಮೋಹಾಭಿನಿವೇಸಂ ಪಜಹತೋ ಯಥಾಭೂತಞಾಣದಸ್ಸನವಸೇನ ಜಾತಾ ಧಮ್ಮಾ ಅಞ್ಞಮಞ್ಞಂ ನಾತಿವತ್ತನ್ತೀತಿ – ತತ್ಥ ಜಾತಾನಂ ಧಮ್ಮಾನಂ ಅನತಿವತ್ತನಟ್ಠೇನ ಭಾವನಾ. ಆಲಯಾಭಿನಿವೇಸಂ ಪಜಹತೋ ಆದೀನವಾನುಪಸ್ಸನಾವಸೇನ ಜಾತಾ ಧಮ್ಮಾ ಅಞ್ಞಮಞ್ಞಂ ನಾತಿವತ್ತನ್ತೀತಿ – ತತ್ಥ ಜಾತಾನಂ ಧಮ್ಮಾನಂ ಅನತಿವತ್ತನಟ್ಠೇನ ಭಾವನಾ. ಅಪ್ಪಟಿಸಙ್ಖಂ ಪಜಹತೋ ಪಟಿಸಙ್ಖಾನುಪಸ್ಸನಾವಸೇನ ಜಾತಾ ಧಮ್ಮಾ ಅಞ್ಞಮಞ್ಞಂ ನಾತಿವತ್ತನ್ತೀತಿ – ತತ್ಥ ಜಾತಾನಂ ಧಮ್ಮಾನಂ ಅನತಿವತ್ತನಟ್ಠೇನ ಭಾವನಾ. ಸಞ್ಞೋಗಾಭಿನಿವೇಸಂ ಪಜಹತೋ ವಿವಟ್ಟನಾನುಪಸ್ಸನಾವಸೇನ ಜಾತಾ ಧಮ್ಮಾ ಅಞ್ಞಮಞ್ಞಂ ನಾತಿವತ್ತನ್ತೀತಿ – ತತ್ಥ ಜಾತಾನಂ ಧಮ್ಮಾನಂ ಅನತಿವತ್ತನಟ್ಠೇನ ಭಾವನಾ.

ದಿಟ್ಠೇಕಟ್ಠೇ ಕಿಲೇಸೇ ಪಜಹತೋ ಸೋತಾಪತ್ತಿಮಗ್ಗವಸೇನ ಜಾತಾ ಧಮ್ಮಾ ಅಞ್ಞಮಞ್ಞಂ ನಾತಿವತ್ತನ್ತೀತಿ – ತತ್ಥ ಜಾತಾನಂ ಧಮ್ಮಾನಂ ಅನತಿವತ್ತನಟ್ಠೇನ ಭಾವನಾ. ಓಳಾರಿಕೇ ಕಿಲೇಸೇ ಪಜಹತೋ ಸಕದಾಗಾಮಿಮಗ್ಗವಸೇನ ಜಾತಾ ಧಮ್ಮಾ ಅಞ್ಞಮಞ್ಞಂ ನಾತಿವತ್ತನ್ತೀತಿ – ತತ್ಥ ಜಾತಾನಂ ಧಮ್ಮಾನಂ ಅನತಿವತ್ತನಟ್ಠೇನ ಭಾವನಾ. ಅನುಸಹಗತೇ ಕಿಲೇಸೇ ಪಜಹತೋ ಅನಾಗಾಮಿಮಗ್ಗವಸೇನ ಜಾತಾ ಧಮ್ಮಾ ಅಞ್ಞಮಞ್ಞಂ ನಾತಿವತ್ತನ್ತೀತಿ – ತತ್ಥ ಜಾತಾನಂ ಧಮ್ಮಾನಂ ಅನತಿವತ್ತನಟ್ಠೇನ ಭಾವನಾ. ಸಬ್ಬಕಿಲೇಸೇ ಪಜಹತೋ ಅರಹತ್ತಮಗ್ಗವಸೇನ ಜಾತಾ ಧಮ್ಮಾ ಅಞ್ಞಮಞ್ಞಂ ನಾತಿವತ್ತನ್ತೀತಿ – ತತ್ಥ ಜಾತಾನಂ ಧಮ್ಮಾನಂ ಅನತಿವತ್ತನಟ್ಠೇನ ಭಾವನಾ. ಏವಂ ತತ್ಥ ಜಾತಾನಂ ಧಮ್ಮಾನಂ ಅನತಿವತ್ತನಟ್ಠೇನ ಭಾವನಾ.

ಕಥಂ ಇನ್ದ್ರಿಯಾನಂ ಏಕರಸಟ್ಠೇನ ಭಾವನಾ? ಕಾಮಚ್ಛನ್ದಂ ಪಜಹತೋ ನೇಕ್ಖಮ್ಮವಸೇನ ಪಞ್ಚಿನ್ದ್ರಿಯಾನಿ ಏಕರಸಾ ಹೋನ್ತೀತಿ – ಇನ್ದ್ರಿಯಾನಂ ಏಕರಸಟ್ಠೇನ ಭಾವನಾ. ಬ್ಯಾಪಾದಂ ಪಜಹತೋ ಅಬ್ಯಾಪಾದವಸೇನ ಪಞ್ಚಿನ್ದ್ರಿಯಾನಿ ಏಕರಸಾ ಹೋನ್ತೀತಿ – ಇನ್ದ್ರಿಯಾನಂ ಏಕರಸಟ್ಠೇನ ಭಾವನಾ…ಪೇ… ಸಬ್ಬಕಿಲೇಸೇ ಪಜಹತೋ ಅರಹತ್ತಮಗ್ಗವಸೇನ ಪಞ್ಚಿನ್ದ್ರಿಯಾನಿ ಏಕರಸಾ ಹೋನ್ತೀತಿ – ಇನ್ದ್ರಿಯಾನಂ ಏಕರಸಟ್ಠೇನ ಭಾವನಾ. ಏವಂ ಇನ್ದ್ರಿಯಾನಂ ಏಕರಸಟ್ಠೇನ ಭಾವನಾ.

ಕಥಂ ತದುಪಗವೀರಿಯವಾಹನಟ್ಠೇನ ಭಾವನಾ? ಕಾಮಚ್ಛನ್ದಂ ಪಜಹತೋ ನೇಕ್ಖಮ್ಮವಸೇನ ವೀರಿಯಂ ವಾಹೇತೀತಿ – ತದುಪಗವೀರಿಯವಾಹನಟ್ಠೇನ ಭಾವನಾ. ಬ್ಯಾಪಾದಂ ಪಜಹತೋ ಅಬ್ಯಾಪಾದವಸೇನ ವೀರಿಯಂ ವಾಹೇತೀತಿ – ತದುಪಗವೀರಿಯವಾಹನಟ್ಠೇನ ಭಾವನಾ…ಪೇ… ಸಬ್ಬಕಿಲೇಸೇ ಪಜಹತೋ ಅರಹತ್ತಮಗ್ಗವಸೇನ ವೀರಿಯಂ ವಾಹೇತೀತಿ – ತದುಪಗವೀರಿಯವಾಹನಟ್ಠೇನ ಭಾವನಾ. ಏವಂ ತದುಪಗವೀರಿಯವಾಹನಟ್ಠೇನ ಭಾವನಾ.

ಕಥಂ ಆಸೇವನಟ್ಠೇನ ಭಾವನಾ? ಕಾಮಚ್ಛನ್ದಂ ಪಜಹನ್ತೋ ನೇಕ್ಖಮ್ಮಂ ಆಸೇವತೀತಿ – ಆಸೇವನಟ್ಠೇನ ಭಾವನಾ. ಬ್ಯಾಪಾದಂ ಪಜಹನ್ತೋ ಅಬ್ಯಾಪಾದಂ ಆಸೇವತೀತಿ – ಆಸೇವನಟ್ಠೇನ ಭಾವನಾ…ಪೇ… ಸಬ್ಬಕಿಲೇಸೇ ಪಜಹನ್ತೋ ಅರಹತ್ತಮಗ್ಗಂ ಆಸೇವತೀತಿ – ಆಸೇವನಟ್ಠೇನ ಭಾವನಾ. ಏವಂ ಆಸೇವನಟ್ಠೇನ ಭಾವನಾ.

ಇಮಾ ಚತಸ್ಸೋ ಭಾವನಾ ರೂಪಂ ಪಸ್ಸನ್ತೋ ಭಾವೇತಿ, ವೇದನಂ ಪಸ್ಸನ್ತೋ ಭಾವೇತಿ, ಸಞ್ಞಂ ಪಸ್ಸನ್ತೋ ಭಾವೇತಿ, ಸಙ್ಖಾರೇ ಪಸ್ಸನ್ತೋ ಭಾವೇತಿ, ವಿಞ್ಞಾಣಂ ಪಸ್ಸನ್ತೋ ಭಾವೇತಿ, ಚಕ್ಖುಂ…ಪೇ… ಜರಾಮರಣಂ…ಪೇ… ಅಮತೋಗಧಂ ನಿಬ್ಬಾನಂ ಪರಿಯೋಸಾನಟ್ಠೇನ ಪಸ್ಸನ್ತೋ ಭಾವೇತಿ. ಯೇ ಯೇ ಧಮ್ಮಾ ಭಾವಿತಾ ಹೋನ್ತಿ ತೇ ತೇ ಧಮ್ಮಾ ಏಕರಸಾ ಹೋನ್ತಿ. ತಂ ಞಾತಟ್ಠೇನ ಞಾಣಂ, ಪಜಾನನಟ್ಠೇನ ಪಞ್ಞಾ. ತೇನ ವುಚ್ಚತಿ – ‘‘ಇಮೇ ಧಮ್ಮಾ ಭಾವೇತಬ್ಬಾತಿ ಸೋತಾವಧಾನಂ, ತಂಪಜಾನನಾ ಪಞ್ಞಾ ಸುತಮಯೇ ಞಾಣ’’ನ್ತಿ.

ಚತುತ್ಥಭಾಣವಾರೋ.

೨೯. ಕಥಂ ‘‘ಇಮೇ ಧಮ್ಮಾ ಸಚ್ಛಿಕಾತಬ್ಬಾ’’ತಿ ಸೋತಾವಧಾನಂ, ತಂಪಜಾನನಾ ಪಞ್ಞಾ ಸುತಮಯೇ ಞಾಣಂ?

ಏಕೋ ಧಮ್ಮೋ ಸಚ್ಛಿಕಾತಬ್ಬೋ – ಅಕುಪ್ಪಾ ಚೇತೋವಿಮುತ್ತಿ. ದ್ವೇ ಧಮ್ಮಾ ಸಚ್ಛಿಕಾತಬ್ಬಾ – ವಿಜ್ಜಾ ಚ ವಿಮುತ್ತಿ ಚ. ತಯೋ ಧಮ್ಮಾ ಸಚ್ಛಿಕಾತಬ್ಬಾ – ತಿಸ್ಸೋ ವಿಜ್ಜಾ. ಚತ್ತಾರೋ ಧಮ್ಮಾ ಸಚ್ಛಿಕಾತಬ್ಬಾ – ಚತ್ತಾರಿ ಸಾಮಞ್ಞಫಲಾನಿ. ಪಞ್ಚ ಧಮ್ಮಾ ಸಚ್ಛಿಕಾತಬ್ಬಾ – ಪಞ್ಚ ಧಮ್ಮಕ್ಖನ್ಧಾ. ಛ ಧಮ್ಮಾ ಸಚ್ಛಿಕಾತಬ್ಬಾ – ಛ ಅಭಿಞ್ಞಾ. ಸತ್ತ ಧಮ್ಮಾ ಸಚ್ಛಿಕಾತಬ್ಬಾ – ಸತ್ತ ಖೀಣಾಸವಬಲಾನಿ. ಅಟ್ಠ ಧಮ್ಮಾ ಸಚ್ಛಿಕಾತಬ್ಬಾ – ಅಟ್ಠ ವಿಮೋಕ್ಖಾ. ನವ ಧಮ್ಮಾ ಸಚ್ಛಿಕಾತಬ್ಬಾ – ನವ ಅನುಪುಬ್ಬನಿರೋಧಾ. ದಸ ಧಮ್ಮಾ ಸಚ್ಛಿಕಾತಬ್ಬಾ – ದಸ ಅಸೇಕ್ಖಾ ಧಮ್ಮಾ.

‘‘ಸಬ್ಬಂ, ಭಿಕ್ಖವೇ, ಸಚ್ಛಿಕಾತಬ್ಬಂ. ಕಿಞ್ಚ, ಭಿಕ್ಖವೇ, ಸಬ್ಬಂ ಸಚ್ಛಿಕಾತಬ್ಬಂ? ಚಕ್ಖು, ಭಿಕ್ಖವೇ, ಸಚ್ಛಿಕಾತಬ್ಬಂ; ರೂಪಾ ಸಚ್ಛಿಕಾತಬ್ಬಾ; ಚಕ್ಖುವಿಞ್ಞಾಣಂ ಸಚ್ಛಿಕಾತಬ್ಬಂ; ಚಕ್ಖುಸಮ್ಫಸ್ಸೋ ಸಚ್ಛಿಕಾತಬ್ಬೋ; ಯಮ್ಪಿದಂ ಚಕ್ಖುಸಮ್ಫಸ್ಸಪಚ್ಚಯಾ ಉಪ್ಪಜ್ಜತಿ ವೇದಯಿತಂ ಸುಖಂ ವಾ ದುಕ್ಖಂ ವಾ ಅದುಕ್ಖಮಸುಖಂ ವಾ, ತಮ್ಪಿ ಸಚ್ಛಿಕಾತಬ್ಬಂ. ಸೋತಂ ಸಚ್ಛಿಕಾತಬ್ಬಂ; ಸದ್ದಾ ಸಚ್ಛಿಕಾತಬ್ಬಾ…ಪೇ… ಘಾನಂ ಸಚ್ಛಿಕಾತಬ್ಬಂ; ಗನ್ಧಾ ಸಚ್ಛಿಕಾತಬ್ಬಾ… ಜಿವ್ಹಾ ಸಚ್ಛಿಕಾತಬ್ಬಾ; ರಸಾ ಸಚ್ಛಿಕಾತಬ್ಬಾ… ಕಾಯೋ ಸಚ್ಛಿಕಾತಬ್ಬೋ; ಫೋಟ್ಠಬ್ಬಾ ಸಚ್ಛಿಕಾತಬ್ಬಾ… ಮನೋ ಸಚ್ಛಿಕಾತಬ್ಬೋ; ಧಮ್ಮಾ ಸಚ್ಛಿಕಾತಬ್ಬಾ; ಮನೋವಿಞ್ಞಾಣಂ ಸಚ್ಛಿಕಾತಬ್ಬಂ; ಮನೋಸಮ್ಫಸ್ಸೋ ಸಚ್ಛಿಕಾತಬ್ಬೋ; ಯಮ್ಪಿದಂ ಮನೋಸಮ್ಫಸ್ಸಪಚ್ಚಯಾ ಉಪ್ಪಜ್ಜತಿ ವೇದಯಿತಂ ಸುಖಂ ವಾ ದುಕ್ಖಂ ವಾ ಅದುಕ್ಖಮಸುಖಂ ವಾ, ತಮ್ಪಿ ಸಚ್ಛಿಕಾತಬ್ಬಂ’’. ರೂಪಂ ಪಸ್ಸನ್ತೋ ಸಚ್ಛಿಕರೋತಿ, ವೇದನಂ ಪಸ್ಸನ್ತೋ ಸಚ್ಛಿಕರೋತಿ, ಸಞ್ಞಂ ಪಸ್ಸನ್ತೋ ಸಚ್ಛಿಕರೋತಿ, ಸಙ್ಖಾರೇ ಪಸ್ಸನ್ತೋ ಸಚ್ಛಿಕರೋತಿ, ವಿಞ್ಞಾಣಂ ಪಸ್ಸನ್ತೋ ಸಚ್ಛಿಕರೋತಿ. ಚಕ್ಖುಂ…ಪೇ… ಜರಾಮರಣಂ…ಪೇ… ಅಮತೋಗಧಂ ನಿಬ್ಬಾನಂ ಪರಿಯೋಸಾನಟ್ಠೇನ ಪಸ್ಸನ್ತೋ ಸಚ್ಛಿಕರೋತಿ. ಯೇ ಯೇ ಧಮ್ಮಾ ಸಚ್ಛಿಕತಾ ಹೋನ್ತಿ ತೇ ತೇ ಧಮ್ಮಾ ಫಸ್ಸಿತಾ [ಫುಸಿತಾ (ಸ್ಯಾ.)] ಹೋನ್ತಿ. ತಂ ಞಾತಟ್ಠೇನ ಞಾಣಂ, ಪಜಾನನಟ್ಠೇನ ಪಞ್ಞಾ. ತೇನ ವುಚ್ಚತಿ – ‘‘ಇಮೇ ಧಮ್ಮಾ ಸಚ್ಛಿಕಾತಬ್ಬಾತಿ ಸೋತಾವಧಾನಂ, ತಂಪಜಾನನಾ ಪಞ್ಞಾ ಸುತಮಯೇ ಞಾಣ’’ನ್ತಿ.

೩೦. ಕಥಂ ‘‘ಇಮೇ ಧಮ್ಮಾ ಹಾನಭಾಗಿಯಾ, ಇಮೇ ಧಮ್ಮಾ ಠಿತಿಭಾಗಿಯಾ, ಇಮೇ ಧಮ್ಮಾ ವಿಸೇಸಭಾಗಿಯಾ, ಇಮೇ ಧಮ್ಮಾ ನಿಬ್ಬೇಧಭಾಗಿಯಾ’’ತಿ ಸೋತಾವಧಾನಂ, ತಂಪಜಾನನಾ ಪಞ್ಞಾ ಸುತಮಯೇ ಞಾಣಂ?

ಪಠಮಸ್ಸ ಝಾನಸ್ಸ ಲಾಭಿಂ ಕಾಮಸಹಗತಾ ಸಞ್ಞಾಮನಸಿಕಾರಾ ಸಮುದಾಚರನ್ತಿ – ಹಾನಭಾಗಿಯೋ ಧಮ್ಮೋ. ತದನುಧಮ್ಮತಾ ಸತಿ ಸನ್ತಿಟ್ಠತಿ – ಠಿತಿಭಾಗಿಯೋ ಧಮ್ಮೋ. ಅವಿತಕ್ಕಸಹಗತಾ ಸಞ್ಞಾಮನಸಿಕಾರಾ ಸಮುದಾಚರನ್ತಿ – ವಿಸೇಸಭಾಗಿಯೋ ಧಮ್ಮೋ. ನಿಬ್ಬಿದಾಸಹಗತಾ ಸಞ್ಞಾಮನಸಿಕಾರಾ ಸಮುದಾಚರನ್ತಿ ವಿರಾಗೂಪಸಂಹಿತಾ – ನಿಬ್ಬೇಧಭಾಗಿಯೋ ಧಮ್ಮೋ.

ದುತಿಯಸ್ಸ ಝಾನಸ್ಸ ಲಾಭಿಂ ವಿತಕ್ಕಸಹಗತಾ ಸಞ್ಞಾಮನಸಿಕಾರಾ ಸಮುದಾಚರನ್ತಿ – ಹಾನಭಾಗಿಯೋ ಧಮ್ಮೋ. ತದನುಧಮ್ಮತಾ ಸತಿ ಸನ್ತಿಟ್ಠತಿ – ಠಿತಿಭಾಗಿಯೋ ಧಮ್ಮೋ. ಉಪೇಕ್ಖಾಸುಖಸಹಗತಾ ಸಞ್ಞಾಮನಸಿಕಾರಾ ಸಮುದಾಚರನ್ತಿ – ವಿಸೇಸಭಾಗಿಯೋ ಧಮ್ಮೋ. ನಿಬ್ಬಿದಾಸಹಗತಾ ಸಞ್ಞಾಮನಸಿಕಾರಾ ಸಮುದಾಚರನ್ತಿ ವಿರಾಗೂಪಸಂಹಿತಾ – ನಿಬ್ಬೇಧಭಾಗಿಯೋ ಧಮ್ಮೋ.

ತತಿಯಸ್ಸ ಝಾನಸ್ಸ ಲಾಭಿಂ ಪೀತಿಸುಖಸಹಗತಾ ಸಞ್ಞಾಮನಸಿಕಾರಾ ಸಮುದಾಚರನ್ತಿ – ಹಾನಭಾಗಿಯೋ ಧಮ್ಮೋ. ತದನುಧಮ್ಮತಾ ಸತಿ ಸನ್ತಿಟ್ಠತಿ – ಠಿತಿಭಾಗಿಯೋ ಧಮ್ಮೋ. ಅದುಕ್ಖಮಸುಖಸಹಗತಾ ಸಞ್ಞಾಮನಸಿಕಾರಾ ಸಮುದಾಚರನ್ತಿ – ವಿಸೇಸಭಾಗಿಯೋ ಧಮ್ಮೋ. ನಿಬ್ಬಿದಾಸಹಗತಾ ಸಞ್ಞಾಮನಸಿಕಾರಾ ಸಮುದಾಚರನ್ತಿ ವಿರಾಗೂಪಸಂಹಿತಾ – ನಿಬ್ಬೇಧಭಾಗಿಯೋ ಧಮ್ಮೋ.

ಚತುತ್ಥಸ್ಸ ಝಾನಸ್ಸ ಲಾಭಿಂ ಉಪೇಕ್ಖಾಸಹಗತಾ ಸಞ್ಞಾಮನಸಿಕಾರಾ ಸಮುದಾಚರನ್ತಿ – ಹಾನಭಾಗಿಯೋ ಧಮ್ಮೋ. ತದನುಧಮ್ಮತಾ ಸತಿ ಸನ್ತಿಟ್ಠತಿ – ಠಿತಿಭಾಗಿಯೋ ಧಮ್ಮೋ. ಆಕಾಸಾನಞ್ಚಾಯತನಸಹಗತಾ ಸಞ್ಞಾಮನಸಿಕಾರಾ ಸಮುದಾಚರನ್ತಿ – ವಿಸೇಸಭಾಗಿಯೋ ಧಮ್ಮೋ. ನಿಬ್ಬಿದಾಸಹಗತಾ ಸಞ್ಞಾಮನಸಿಕಾರಾ ಸಮುದಾಚರನ್ತಿ ವಿರಾಗೂಪಸಂಹಿತಾ – ನಿಬ್ಬೇಧಭಾಗಿಯೋ ಧಮ್ಮೋ.

ಆಕಾಸಾನಞ್ಚಾಯತನಸ್ಸ ಲಾಭಿಂ ರೂಪಸಹಗತಾ ಸಞ್ಞಾಮನಸಿಕಾರಾ ಸಮುದಾಚರನ್ತಿ – ಹಾನಭಾಗಿಯೋ ಧಮ್ಮೋ. ತದನುಧಮ್ಮತಾ ಸತಿ ಸನ್ತಿಟ್ಠತಿ – ಠಿತಿಭಾಗಿಯೋ ಧಮ್ಮೋ. ವಿಞ್ಞಾಣಞ್ಚಾಯತನಸಹಗತಾ ಸಞ್ಞಾಮನಸಿಕಾರಾ ಸಮುದಾಚರನ್ತಿ – ವಿಸೇಸಭಾಗಿಯೋ ಧಮ್ಮೋ. ನಿಬ್ಬಿದಾಸಹಗತಾ ಸಞ್ಞಾಮನಸಿಕಾರಾ ಸಮುದಾಚರನ್ತಿ ವಿರಾಗೂಪಸಂಹಿತಾ – ನಿಬ್ಬೇಧಭಾಗಿಯೋ ಧಮ್ಮೋ.

ವಿಞ್ಞಾಣಞ್ಚಾಯತನಸ್ಸ ಲಾಭಿಂ ಆಕಾಸಾನಞ್ಚಾಯತನಸಹಗತಾ ಸಞ್ಞಾಮನಸಿಕಾರಾ ಸಮುದಾಚರನ್ತಿ – ಹಾನಭಾಗಿಯೋ ಧಮ್ಮೋ. ತದನುಧಮ್ಮತಾ ಸತಿ ಸನ್ತಿಟ್ಠತಿ – ಠಿತಿಭಾಗಿಯೋ ಧಮ್ಮೋ. ಆಕಿಞ್ಚಞ್ಞಾಯತನಸಹಗತಾ ಸಞ್ಞಾಮನಸಿಕಾರಾ ಸಮುದಾಚರನ್ತಿ – ವಿಸೇಸಭಾಗಿಯೋ ಧಮ್ಮೋ. ನಿಬ್ಬಿದಾಸಹಗತಾ ಸಞ್ಞಾಮನಸಿಕಾರಾ ಸಮುದಾಚರನ್ತಿ ವಿರಾಗೂಪಸಂಹಿತಾ – ನಿಬ್ಬೇಧಭಾಗಿಯೋ ಧಮ್ಮೋ.

ಆಕಿಞ್ಚಞ್ಞಾಯತನಸ್ಸ ಲಾಭಿಂ ವಿಞ್ಞಾಣಞ್ಚಾಯತನಸಹಗತಾ ಸಞ್ಞಾಮನಸಿಕಾರಾ ಸಮುದಾಚರನ್ತಿ – ಹಾನಭಾಗಿಯೋ ಧಮ್ಮೋ. ತದನುಧಮ್ಮತಾ ಸತಿ ಸನ್ತಿಟ್ಠತಿ – ಠಿತಿಭಾಗಿಯೋ ಧಮ್ಮೋ. ನೇವಸಞ್ಞಾನಾಸಞ್ಞಾಯತನಸಹಗತಾ ಸಞ್ಞಾಮನಸಿಕಾರಾ ಸಮುದಾಚರನ್ತಿ – ವಿಸೇಸಭಾಗಿಯೋ ಧಮ್ಮೋ. ನಿಬ್ಬಿದಾಸಹಗತಾ ಸಞ್ಞಾಮನಸಿಕಾರಾ ಸಮುದಾಚರನ್ತಿ ವಿರಾಗೂಪಸಂಹಿತಾ – ನಿಬ್ಬೇಧಭಾಗಿಯೋ ಧಮ್ಮೋ. ತಂ ಞಾತಟ್ಠೇನ ಞಾಣಂ, ಪಜಾನನಟ್ಠೇನ ಪಞ್ಞಾ. ತೇನ ವುಚ್ಚತಿ – ‘‘ಇಮೇ ಧಮ್ಮಾ ಹಾನಭಾಗಿಯಾ, ಇಮೇ ಧಮ್ಮಾ ಠಿತಿಭಾಗಿಯಾ, ಇಮೇ ಧಮ್ಮಾ ವಿಸೇಸಭಾಗಿಯಾ, ಇಮೇ ಧಮ್ಮಾ ನಿಬ್ಬೇಧಭಾಗಿಯಾತಿ ಸೋತಾವಧಾನಂ, ತಂಪಜಾನನಾ ಪಞ್ಞಾ ಸುತಮಯೇ ಞಾಣಂ’’.

೩೧. ಕಥಂ ‘‘ಸಬ್ಬೇ ಸಙ್ಖಾರಾ ಅನಿಚ್ಚಾ, ಸಬ್ಬೇ ಸಙ್ಖಾರಾ ದುಕ್ಖಾ, ಸಬ್ಬೇ ಧಮ್ಮಾ ಅನತ್ತಾ’’ತಿ ಸೋತಾವಧಾನಂ, ತಂಪಜಾನನಾ ಪಞ್ಞಾ ಸುತಮಯೇ ಞಾಣಂ? ‘‘ರೂಪಂ ಅನಿಚ್ಚಂ ಖಯಟ್ಠೇನ, ದುಕ್ಖಂ ಭಯಟ್ಠೇನ, ಅನತ್ತಾ ಅಸಾರಕಟ್ಠೇನಾ’’ತಿ ಸೋತಾವಧಾನಂ, ತಂಪಜಾನನಾ ಪಞ್ಞಾ ಸುತಮಯೇ ಞಾಣಂ. ‘‘ವೇದನಾ…ಪೇ… ಸಞ್ಞಾ… ಸಙ್ಖಾರಾ… ವಿಞ್ಞಾಣಂ… ಚಕ್ಖು…ಪೇ… ಜರಾಮರಣಂ ಅನಿಚ್ಚಂ ಖಯಟ್ಠೇನ, ದುಕ್ಖಂ ಭಯಟ್ಠೇನ, ಅನತ್ತಾ ಅಸಾರಕಟ್ಠೇನಾ’’ತಿ ಸೋತಾವಧಾನಂ, ತಂಪಜಾನನಾ ಪಞ್ಞಾ ಸುತಮಯೇ ಞಾಣಂ. ತಂ ಞಾತಟ್ಠೇನ ಞಾಣಂ, ಪಜಾನನಟ್ಠೇನ ಪಞ್ಞಾ. ತೇನ ವುಚ್ಚತಿ – ‘‘ಸಬ್ಬೇ ಸಙ್ಖಾರಾ ಅನಿಚ್ಚಾ, ಸಬ್ಬೇ ಸಙ್ಖಾರಾ ದುಕ್ಖಾ, ಸಬ್ಬೇ ಧಮ್ಮಾ ಅನತ್ತಾ’’ತಿ ಸೋತಾವಧಾನಂ, ತಂಪಜಾನನಾ ಪಞ್ಞಾ ಸುತಮಯೇ ಞಾಣಂ.

೩೨. ಕಥಂ ‘‘ಇದಂ ದುಕ್ಖಂ ಅರಿಯಸಚ್ಚಂ, ಇದಂ ದುಕ್ಖಸಮುದಯಂ ಅರಿಯಸಚ್ಚಂ, ಇದಂ ದುಕ್ಖನಿರೋಧಂ ಅರಿಯಸಚ್ಚಂ, ಇದಂ ದುಕ್ಖನಿರೋಧಗಾಮಿನೀ ಪಟಿಪದಾ ಅರಿಯಸಚ್ಚ’’ನ್ತಿ ಸೋತಾವಧಾನಂ, ತಂಪಜಾನನಾ ಪಞ್ಞಾ ಸುತಮಯೇ ಞಾಣಂ?

೩೩. ತತ್ಥ ಕತಮಂ ದುಕ್ಖಂ ಅರಿಯಸಚ್ಚಂ? ಜಾತಿಪಿ ದುಕ್ಖಾ, ಜರಾಪಿ ದುಕ್ಖಾ, ಮರಣಮ್ಪಿ ದುಕ್ಖಂ, ಸೋಕಪರಿದೇವದುಕ್ಖದೋಮನಸ್ಸುಪಾಯಾಸಾಪಿ ದುಕ್ಖಾ, ಅಪ್ಪಿಯೇಹಿ ಸಮ್ಪಯೋಗೋ ದುಕ್ಖೋ, ಪಿಯೇಹಿ ವಿಪ್ಪಯೋಗೋ ದುಕ್ಖೋ, ಯಮ್ಪಿಚ್ಛಂ ನ ಲಭತಿ ತಮ್ಪಿ ದುಕ್ಖಂ; ಸಙ್ಖಿತ್ತೇನ ಪಞ್ಚುಪಾದಾನಕ್ಖನ್ಧಾ [ಪಞ್ಚುಪಾದಾನಕ್ಖನ್ಧಾಪಿ (ಕ.) ಸತಿಪಟ್ಠಾನಸುತ್ತೇ ಸಚ್ಚವಿಭಙ್ಗೇ ಚ ಪಸ್ಸಿತಬ್ಬಂ] ದುಕ್ಖಾ.

ತತ್ಥ ಕತಮಾ ಜಾತಿ? ಯಾ ತೇಸಂ ತೇಸಂ ಸತ್ತಾನಂ ತಮ್ಹಿ ತಮ್ಹಿ ಸತ್ತನಿಕಾಯೇ ಜಾತಿ ಸಞ್ಜಾತಿ ಓಕ್ಕನ್ತಿ ಅಭಿನಿಬ್ಬತ್ತಿ ಖನ್ಧಾನಂ ಪಾತುಭಾವೋ ಆಯತನಾನಂ ಪಟಿಲಾಭೋ – ಅಯಂ ವುಚ್ಚತಿ ಜಾತಿ.

ತತ್ಥ ಕತಮಾ ಜರಾ ಯಾ ತೇಸಂ ತೇಸಂ ಸತ್ತಾನಂ ತಮ್ಹಿ ತಮ್ಹಿ ಸತ್ತನಿಕಾಯೇ ಜರಾ ಜೀರಣತಾ ಖಣ್ಡಿಚ್ಚಂ ಪಾಲಿಚ್ಚಂ ವಲಿತ್ತಚತಾ ಆಯುನೋ ಸಂಹಾನಿ ಇನ್ದ್ರಿಯಾನಂ ಪರಿಪಾಕೋ – ಅಯಂ ವುಚ್ಚತಿ ಜರಾ.

ತತ್ಥ ಕತಮಂ ಮರಣಂ? ಯಾ ತೇಸಂ ತೇಸಂ ಸತ್ತಾನಂ ತಮ್ಹಾ ತಮ್ಹಾ ಸತ್ತನಿಕಾಯಾ ಚುತಿ ಚವನತಾ ಭೇದೋ ಅನ್ತರಧಾನಂ ಮಚ್ಚು ಮರಣಂ ಕಾಲಕಿರಿಯಾ [ಕಾಲಂಕಿರಿಯಾ (ಕ.)] ಖನ್ಧಾನಂ ಭೇದೋ ಕಳೇವರಸ್ಸ ನಿಕ್ಖೇಪೋ ಜೀವಿತಿನ್ದ್ರಿಯಸ್ಸುಪಚ್ಛೇದೋ – ಇದಂ ವುಚ್ಚತಿ ಮರಣಂ.

ತತ್ಥ ಕತಮೋ ಸೋಕೋ? ಞಾತಿಬ್ಯಸನೇನ [ಯೋ ಞಾತಿಬ್ಯಸನೇನ (ಸ್ಯಾ.) ಪಸ್ಸ ಸಚ್ಚವಿಭಙ್ಗೇ] ವಾ ಫುಟ್ಠಸ್ಸ, ಭೋಗಬ್ಯಸನೇನ ವಾ ಫುಟ್ಠಸ್ಸ, ರೋಗಬ್ಯಸನೇನ ವಾ ಫುಟ್ಠಸ್ಸ, ಸೀಲಬ್ಯಸನೇನ ವಾ ಫುಟ್ಠಸ್ಸ, ದಿಟ್ಠಿಬ್ಯಸನೇನ ವಾ ಫುಟ್ಠಸ್ಸ, ಅಞ್ಞತರಞ್ಞತರೇನ ಬ್ಯಸನೇನ ಸಮನ್ನಾಗತಸ್ಸ, ಅಞ್ಞತರಞ್ಞತರೇನ ದುಕ್ಖಧಮ್ಮೇನ ಫುಟ್ಠಸ್ಸ ಸೋಕೋ ಸೋಚನಾ ಸೋಚಿತತ್ತಂ ಅನ್ತೋಸೋಕೋ ಅನ್ತೋಪರಿಸೋಕೋ ಚೇತಸೋ ಪರಿಜ್ಝಾಯನಾ ದೋಮನಸ್ಸಂ ಸೋಕಸಲ್ಲಂ – ಅಯಂ ವುಚ್ಚತಿ ಸೋಕೋ.

ತತ್ಥ ಕತಮೋ ಪರಿದೇವೋ? ಞಾತಿಬ್ಯಸನೇನ ವಾ ಫುಟ್ಠಸ್ಸ, ಭೋಗಬ್ಯಸನೇನ ವಾ ಫುಟ್ಠಸ್ಸ, ರೋಗಬ್ಯಸನೇನ ವಾ ಫುಟ್ಠಸ್ಸ, ಸೀಲಬ್ಯಸನೇನ ವಾ ಫುಟ್ಠಸ್ಸ, ದಿಟ್ಠಿಬ್ಯಸನೇನ ವಾ ಫುಟ್ಠಸ್ಸ, ಅಞ್ಞತರಞ್ಞತರೇನ ಬ್ಯಸನೇನ ಸಮನ್ನಾಗತಸ್ಸ, ಅಞ್ಞತರಞ್ಞತರೇನ ದುಕ್ಖಧಮ್ಮೇನ ಫುಟ್ಠಸ್ಸ ಆದೇವೋ ಪರಿದೇವೋ ಆದೇವನಾ, ಪರಿದೇವನಾ ಆದೇವಿತತ್ತಂ ಪರಿದೇವಿತತ್ತಂ ವಾಚಾ ಪಲಾಪೋ ವಿಪ್ಪಲಾಪೋ ಲಾಲಪ್ಪೋ ಲಾಲಪ್ಪನಾ ಲಾಲಪ್ಪಿತತ್ತಂ – ಅಯಂ ವುಚ್ಚತಿ ಪರಿದೇವೋ.

ತತ್ಥ ಕತಮಂ ದುಕ್ಖಂ? ಯಂ ಕಾಯಿಕಂ ಅಸಾತಂ ಕಾಯಿಕಂ ದುಕ್ಖಂ ಕಾಯಸಮ್ಫಸ್ಸಜಂ ಅಸಾತಂ ದುಕ್ಖಂ ವೇದಯಿತಂ, ಕಾಯಸಮ್ಫಸ್ಸಜಾ ಅಸಾತಾ ದುಕ್ಖಾ ವೇದನಾ – ಇದಂ ವುಚ್ಚತಿ ದುಕ್ಖಂ.

ತತ್ಥ ಕತಮಂ ದೋಮನಸ್ಸಂ? ಯಂ ಚೇತಸಿಕಂ ಅಸಾತಂ ಚೇತಸಿಕಂ ದುಕ್ಖಂ, ಚೇತೋಸಮ್ಫಸ್ಸಜಂ ಅಸಾತಂ ವೇದಯಿತಂ, ಚೇತೋಸಮ್ಫಸ್ಸಜಾ ಅಸಾತಾ ದುಕ್ಖಾ ವೇದನಾ – ಇದಂ ವುಚ್ಚತಿ ದೋಮನಸ್ಸಂ.

ತತ್ಥ ಕತಮೋ ಉಪಾಯಾಸೋ? ಞಾತಿಬ್ಯಸನೇನ ವಾ ಫುಟ್ಠಸ್ಸ, ಭೋಗಬ್ಯಸನೇನ ವಾ ಫುಟ್ಠಸ್ಸ, ರೋಗಬ್ಯಸನೇನ ವಾ ಫುಟ್ಠಸ್ಸ, ಸೀಲಬ್ಯಸನೇನ ವಾ ಫುಟ್ಠಸ್ಸ, ದಿಟ್ಠಿಬ್ಯಸನೇನ ವಾ ಫುಟ್ಠಸ್ಸ, ಅಞ್ಞತರಞ್ಞತರೇನ ಬ್ಯಸನೇನ ಸಮನ್ನಾಗತಸ್ಸ, ಅಞ್ಞತರಞ್ಞತರೇನ ದುಕ್ಖಧಮ್ಮೇನ ಫುಟ್ಠಸ್ಸ ಆಯಾಸೋ ಉಪಾಯಾಸೋ ಆಯಾಸನಾ ಉಪಾಯಾಸನಾ ಆಯಾಸಿತತ್ತಂ ಉಪಾಯಾಸಿತತ್ತಂ – ಅಯಂ ವುಚ್ಚತಿ ಉಪಾಯಾಸೋ.

ತತ್ಥ ಕತಮೋ ಅಪ್ಪಿಯೇಹಿ ಸಮ್ಪಯೋಗೋ ದುಕ್ಖೋ? ಇಧ ಯಸ್ಸ ತೇ ಹೋನ್ತಿ ಅನಿಟ್ಠಾ ಅಕನ್ತಾ ಅಮನಾಪಾ ರೂಪಾ ಸದ್ದಾ ಗನ್ಧಾ ರಸಾ ಫೋಟ್ಠಬ್ಬಾ, ಯೇ ವಾ ಪನಸ್ಸ ತೇ ಹೋನ್ತಿ ಅನತ್ಥಕಾಮಾ ಅಹಿತಕಾಮಾ ಅಫಾಸುಕಾಮಾ ಅಯೋಗಕ್ಖೇಮಕಾಮಾ, ಯಾ ತೇಹಿ ಸದ್ಧಿಂ ಸಙ್ಗತಿ ಸಮಾಗಮೋ ಸಮೋಧಾನಂ ಮಿಸ್ಸೀಭಾವೋ – ಅಯಂ ವುಚ್ಚತಿ ಅಪ್ಪಿಯೇಹಿ ಸಮ್ಪಯೋಗೋ ದುಕ್ಖೋ.

ತತ್ಥ ಕತಮೋ ಪಿಯೇಹಿ ವಿಪ್ಪಯೋಗೋ ದುಕ್ಖೋ? ಇಧ ಯಸ್ಸ ತೇ ಹೋನ್ತಿ ಇಟ್ಠಾ ಕನ್ತಾ ಮನಾಪಾ ರೂಪಾ ಸದ್ದಾ ಗನ್ಧಾ ರಸಾ ಫೋಟ್ಠಬ್ಬಾ, ಯೇ ವಾ ಪನಸ್ಸ ತೇ ಹೋನ್ತಿ ಅತ್ಥಕಾಮಾ ಹಿತಕಾಮಾ ಫಾಸುಕಾಮಾ ಯೋಗಕ್ಖೇಮಕಾಮಾ ಮಾತಾ ವಾ ಪಿತಾ ವಾ ಭಾತಾ ವಾ ಭಗಿನೀ ವಾ ಮಿತ್ತಾ ವಾ ಅಮಚ್ಚಾ ವಾ ಞಾತೀ ವಾ ಸಾಲೋಹಿತಾ ವಾ, ಯಾ ತೇಹಿ ಸದ್ಧಿಂ ಅಸಙ್ಗತಿ ಅಸಮಾಗಮೋ ಅಸಮೋಧಾನಂ ಅಮಿಸ್ಸೀಭಾವೋ – ಅಯಂ ವುಚ್ಚತಿ ಪಿಯೇಹಿ ವಿಪ್ಪಯೋಗೋ ದುಕ್ಖೋ.

ತತ್ಥ ಕತಮಂ ಯಮ್ಪಿಚ್ಛಂ ನ ಲಭತಿ ತಮ್ಪಿ ದುಕ್ಖಂ? ಜಾತಿಧಮ್ಮಾನಂ ಸತ್ತಾನಂ ಏವಂ ಇಚ್ಛಾ ಉಪ್ಪಜ್ಜತಿ – ‘‘ಅಹೋ ವತ ಮಯಂ ನ ಜಾತಿಧಮ್ಮಾ ಅಸ್ಸಾಮ, ನ ಚ ವತ ನೋ ಜಾತಿ ಆಗಚ್ಛೇಯ್ಯಾ’’ತಿ. ನ ಖೋ ಪನೇತಂ ಇಚ್ಛಾಯ ಪತ್ತಬ್ಬಂ – ಇದಮ್ಪಿ ಯಮ್ಪಿಚ್ಛಂ ನ ಲಭತಿ ತಮ್ಪಿ ದುಕ್ಖಂ. ಜರಾಧಮ್ಮಾನಂ ಸತ್ತಾನಂ…ಪೇ… ಬ್ಯಾಧಿಧಮ್ಮಾನಂ ಸತ್ತಾನಂ… ಮರಣಧಮ್ಮಾನಂ ಸತ್ತಾನಂ… ಸೋಕಪರಿದೇವದುಕ್ಖದೋಮನಸ್ಸುಪಾಯಾಸಧಮ್ಮಾನಂ ಸತ್ತಾನಂ ಏವಂ ಇಚ್ಛಾ ಉಪ್ಪಜ್ಜತಿ – ‘‘ಅಹೋ ವತ ಮಯಂ ನ ಸೋಕಪರಿದೇವದುಕ್ಖದೋಮನಸ್ಸುಪಾಯಾಸಧಮ್ಮಾ ಅಸ್ಸಾಮ, ನ ಚ ವತ ನೋ ಸೋಕಪರಿದೇವದುಕ್ಖದೋಮನಸ್ಸುಪಾಯಾಸಾ ಆಗಚ್ಛೇಯ್ಯು’’ನ್ತಿ. ನ ಖೋ ಪನೇತಂ ಇಚ್ಛಾಯ ಪತ್ತಬ್ಬಂ – ಇದಮ್ಪಿ ಯಮ್ಪಿಚ್ಛಂ ನ ಲಭತಿ ತಮ್ಪಿ ದುಕ್ಖಂ.

ತತ್ಥ ಕತಮೇ ಸಙ್ಖಿತ್ತೇನ ಪಞ್ಚುಪಾದಾನಕ್ಖನ್ಧಾ ದುಕ್ಖಾ? ಸೇಯ್ಯಥಿದಂ [ಸೇಯ್ಯಥೀದಂ (ಸ್ಯಾ. ಸೀ. ಅಟ್ಠ.)] – ರೂಪುಪಾದಾನಕ್ಖನ್ಧೋ, [ರೂಪೂಪಾದಾನಕ್ಖನ್ಧೋ (ಸ್ಯಾ.) ಏವಮುಪರಿಪಿ], ವೇದನುಪಾದಾನಕ್ಖನ್ಧೋ ಸಞ್ಞುಪಾದಾನಕ್ಖನ್ಧೋ, ಸಙ್ಖಾರುಪಾದಾನಕ್ಖನ್ಧೋ, ವಿಞ್ಞಾಣುಪಾದಾನಕ್ಖನ್ಧೋ – ಇಮೇ ವುಚ್ಚನ್ತಿ ಸಙ್ಖಿತ್ತೇನ ಪಞ್ಚುಪಾದಾನಕ್ಖನ್ಧಾ ದುಕ್ಖಾ. ಇದಂ ವುಚ್ಚತಿ ದುಕ್ಖಂ ಅರಿಯಸಚ್ಚಂ.

೩೪. ತತ್ಥ ಕತಮಂ ದುಕ್ಖಸಮುದಯಂ ಅರಿಯಸಚ್ಚಂ? ಯಾಯಂ ತಣ್ಹಾ ಪೋನೋಭವಿಕಾ [ಪೋನೋಬ್ಭವಿಕಾ (ಸ್ಯಾ.)] ನನ್ದಿರಾಗಸಹಗತಾ ತತ್ರತತ್ರಾಭಿನನ್ದಿನೀ, ಸೇಯ್ಯಥಿದಂ – ಕಾಮತಣ್ಹಾ ಭವತಣ್ಹಾ ವಿಭವತಣ್ಹಾ, ಸಾ ಖೋ ಪನೇಸಾ ತಣ್ಹಾ ಕತ್ಥ ಉಪ್ಪಜ್ಜಮಾನಾ ಉಪ್ಪಜ್ಜತಿ, ಕತ್ಥ ನಿವಿಸಮಾನಾ ನಿವಿಸತಿ? ಯಂ ಲೋಕೇ ಪಿಯರೂಪಂ ಸಾತರೂಪಂ, ಏತ್ಥೇಸಾ ತಣ್ಹಾ ಉಪ್ಪಜ್ಜಮಾನಾ ಉಪ್ಪಜ್ಜತಿ, ಏತ್ಥ ನಿವಿಸಮಾನಾ ನಿವಿಸತಿ. ಕಿಞ್ಚ ಲೋಕೇ ಪಿಯರೂಪಂ ಸಾತರೂಪಂ? ಚಕ್ಖು ಲೋಕೇ ಪಿಯರೂಪಂ ಸಾತರೂಪಂ, ಏತ್ಥೇಸಾ ತಣ್ಹಾ ಉಪ್ಪಜ್ಜಮಾನಾ ಉಪ್ಪಜ್ಜತಿ, ಏತ್ಥ ನಿವಿಸಮಾನಾ ನಿವಿಸತಿ. ಸೋತಂ ಲೋಕೇ…ಪೇ… ಘಾನಂ ಲೋಕೇ… ಜಿವ್ಹಾ ಲೋಕೇ… ಕಾಯೋ ಲೋಕೇ… ಮನೋ ಲೋಕೇ ಪಿಯರೂಪಂ ಸಾತರೂಪಂ, ಏತ್ಥೇಸಾ ತಣ್ಹಾ ಉಪ್ಪಜ್ಜಮಾನಾ ಉಪ್ಪಜ್ಜತಿ, ಏತ್ಥ ನಿವಿಸಮಾನಾ ನಿವಿಸತಿ. ರೂಪಾ ಲೋಕೇ ಪಿಯರೂಪಂ ಸಾತರೂಪಂ, ಏತ್ಥೇಸಾ ತಣ್ಹಾ ಉಪ್ಪಜ್ಜಮಾನಾ ಉಪ್ಪಜ್ಜತಿ, ಏತ್ಥ ನಿವಿಸಮಾನಾ ನಿವಿಸತಿ. ಸದ್ದಾ ಲೋಕೇ ಪಿಯರೂಪಂ ಸಾತರೂಪಂ…ಪೇ… ಧಮ್ಮಾ ಲೋಕೇ… ಚಕ್ಖುವಿಞ್ಞಾಣಂ ಲೋಕೇ…ಪೇ… ಮನೋವಿಞ್ಞಾಣಂ ಲೋಕೇ… ಚಕ್ಖುಸಮ್ಫಸ್ಸೋ ಲೋಕೇ…ಪೇ… ಮನೋಸಮ್ಫಸ್ಸೋ ಲೋಕೇ… ಚಕ್ಖುಸಮ್ಫಸ್ಸಜಾ ವೇದನಾ ಲೋಕೇ…ಪೇ… ಮನೋಸಮ್ಫಸ್ಸಜಾ ವೇದನಾ ಲೋಕೇ… ರೂಪಸಞ್ಞಾ ಲೋಕೇ…ಪೇ… ಧಮ್ಮಸಞ್ಞಾ ಲೋಕೇ… ರೂಪಸಞ್ಚೇತನಾ ಲೋಕೇ…ಪೇ… ಧಮ್ಮಸಞ್ಚೇತನಾ ಲೋಕೇ… ರೂಪತಣ್ಹಾ ಲೋಕೇ…ಪೇ… ಧಮ್ಮತಣ್ಹಾ ಲೋಕೇ… ರೂಪವಿತಕ್ಕೋ ಲೋಕೇ…ಪೇ… ಧಮ್ಮವಿತಕ್ಕೋ ಲೋಕೇ… ರೂಪವಿಚಾರೋ ಲೋಕೇ…ಪೇ… ಧಮ್ಮವಿಚಾರೋ ಲೋಕೇ ಪಿಯರೂಪಂ ಸಾತರೂಪಂ, ಏತ್ಥೇಸಾ ತಣ್ಹಾ ಉಪ್ಪಜ್ಜಮಾನಾ ಉಪ್ಪಜ್ಜತಿ, ಏತ್ಥ ನಿವಿಸಮಾನಾ ನಿವಿಸತಿ. ಇದಂ ವುಚ್ಚತಿ ದುಕ್ಖಸಮುದಯಂ ಅರಿಯಸಚ್ಚಂ.

೩೫. ತತ್ಥ ಕತಮಂ ದುಕ್ಖನಿರೋಧಂ ಅರಿಯಸಚ್ಚಂ? ಯೋ ತಸ್ಸಾಯೇವ ತಣ್ಹಾಯ ಅಸೇಸವಿರಾಗನಿರೋಧೋ ಚಾಗೋ ಪಟಿನಿಸ್ಸಗ್ಗೋ ಮುತ್ತಿ ಅನಾಲಯೋ, ಸಾ ಖೋ ಪನೇಸಾ ತಣ್ಹಾ ಕತ್ಥ ಪಹೀಯಮಾನಾ ಪಹೀಯತಿ, ಕತ್ಥ ನಿರುಜ್ಝಮಾನಾ ನಿರುಜ್ಝತಿ? ಯಂ ಲೋಕೇ ಪಿಯರೂಪಂ ಸಾತರೂಪಂ, ಏತ್ಥೇಸಾ ತಣ್ಹಾ ಪಹೀಯಮಾನಾ ಪಹೀಯತಿ, ಏತ್ಥ ನಿರುಜ್ಝಮಾನಾ ನಿರುಜ್ಝತಿ. ಕಿಞ್ಚ ಲೋಕೇ ಪಿಯರೂಪಂ ಸಾತರೂಪಂ? ಚಕ್ಖುಲೋಕೇ ಪಿಯರೂಪಂ ಸಾತರೂಪಂ, ಏತ್ಥೇಸಾ ತಣ್ಹಾ ಪಹೀಯಮಾನಾ ಪಹೀಯತಿ, ಏತ್ಥ ನಿರುಜ್ಝಮಾನಾ ನಿರುಜ್ಝತಿ…ಪೇ… ಧಮ್ಮವಿಚಾರೋ ಲೋಕೇ ಪಿಯರೂಪಂ ಸಾತರೂಪಂ, ಏತ್ಥೇಸಾ ತಣ್ಹಾ ಪಹೀಯಮಾನಾ ಪಹೀಯತಿ, ಏತ್ಥ ನಿರುಜ್ಝಮಾನಾ ನಿರುಜ್ಝತಿ. ಇದಂ ವುಚ್ಚತಿ ದುಕ್ಖನಿರೋಧಂ ಅರಿಯಸಚ್ಚಂ.

೩೬. ತತ್ಥ ಕತಮಂ ದುಕ್ಖನಿರೋಧಗಾಮಿನೀ ಪಟಿಪದಾ ಅರಿಯಸಚ್ಚಂ? ಅಯಮೇವ ಅರಿಯೋ ಅಟ್ಠಙ್ಗಿಕೋ ಮಗ್ಗೋ, ಸೇಯ್ಯಥಿದಂ – ಸಮ್ಮಾದಿಟ್ಠಿ ಸಮ್ಮಾಸಙ್ಕಪ್ಪೋ ಸಮ್ಮಾವಾಚಾ ಸಮ್ಮಾಕಮ್ಮನ್ತೋ ಸಮ್ಮಾಆಜೀವೋ ಸಮ್ಮಾವಾಯಾಮೋ ಸಮ್ಮಾಸತಿ ಸಮ್ಮಾಸಮಾಧಿ. ತತ್ಥ ಕತಮಾ ಸಮ್ಮಾದಿಟ್ಠಿ? ದುಕ್ಖೇ ಞಾಣಂ, ದುಕ್ಖಸಮುದಯೇ ಞಾಣಂ, ದುಕ್ಖನಿರೋಧೇ ಞಾಣಂ, ದುಕ್ಖನಿರೋಧಗಾಮಿನಿಯಾ ಪಟಿಪದಾಯ ಞಾಣಂ – ಅಯಂ ವುಚ್ಚತಿ ಸಮ್ಮಾದಿಟ್ಠಿ.

ತತ್ಥ ಕತಮೋ ಸಮ್ಮಾಸಙ್ಕಪ್ಪೋ? ನೇಕ್ಖಮ್ಮಸಙ್ಕಪ್ಪೋ, ಅಬ್ಯಾಪಾದಸಙ್ಕಪ್ಪೋ, ಅವಿಹಿಂಸಾಸಙ್ಕಪ್ಪೋ – ಅಯಂ ವುಚ್ಚತಿ ಸಮ್ಮಾಸಙ್ಕಪ್ಪೋ.

ತತ್ಥ ಕತಮಾ ಸಮ್ಮಾವಾಚಾ? ಮುಸಾವಾದಾ ವೇರಮಣೀ [ವೇರಮಣಿ (ಕ.)], ಪಿಸುಣಾಯ ವಾಚಾಯ ವೇರಮಣೀ, ಫರುಸಾಯ ವಾಚಾಯ ವೇರಮಣೀ, ಸಮ್ಫಪ್ಪಲಾಪಾ ವೇರಮಣೀ – ಅಯಂ ವುಚ್ಚತಿ ಸಮ್ಮಾವಾಚಾ.

ತತ್ಥ ಕತಮೋ ಸಮ್ಮಾಕಮ್ಮನ್ತೋ? ಪಾಣಾತಿಪಾತಾ ವೇರಮಣೀ, ಅದಿನ್ನಾದಾನಾ ವೇರಮಣೀ, ಕಾಮೇಸುಮಿಚ್ಛಾಚಾರಾ ವೇರಮಣೀ – ಅಯಂ ವುಚ್ಚತಿ ಸಮ್ಮಾಕಮ್ಮನ್ತೋ.

ತತ್ಥ ಕತಮೋ ಸಮ್ಮಾಆಜೀವೋ? ಇಧ ಅರಿಯಸಾವಕೋ ಮಿಚ್ಛಾಆಜೀವಂ ಪಹಾಯ ಸಮ್ಮಾಆಜೀವೇನ ಜೀವಿಕಂ [ಜೀವಿತಂ (ಕ.)] ಕಪ್ಪೇತಿ – ಅಯಂ ವುಚ್ಚತಿ ಸಮ್ಮಾಆಜೀವೋ.

ತತ್ಥ ಕತಮೋ ಸಮ್ಮಾವಾಯಾಮೋ? ಇಧ ಭಿಕ್ಖು ಅನುಪ್ಪನ್ನಾನಂ ಪಾಪಕಾನಂ ಅಕುಸಲಾನಂ ಧಮ್ಮಾನಂ ಅನುಪ್ಪಾದಾಯ ಛನ್ದಂ ಜನೇತಿ ವಾಯಮತಿ ವೀರಿಯಂ ಆರಭತಿ ಚಿತ್ತಂ ಪಗ್ಗಣ್ಹಾತಿ ಪದಹತಿ, ಉಪ್ಪನ್ನಾನಂ ಪಾಪಕಾನಂ ಅಕುಸಲಾನಂ ಧಮ್ಮಾನಂ ಪಹಾನಾಯ…ಪೇ… ಅನುಪ್ಪನ್ನಾನಂ ಕುಸಲಾನಂ ಧಮ್ಮಾನಂ ಉಪ್ಪಾದಾಯ …ಪೇ… ಉಪ್ಪನ್ನಾನಂ ಕುಸಲಾನಂ ಧಮ್ಮಾನಂ ಠಿತಿಯಾ ಅಸಮ್ಮೋಸಾಯ ಭಿಯ್ಯೋಭಾವಾಯ ವೇಪುಲ್ಲಾಯ ಭಾವನಾಯ ಪಾರಿಪೂರಿಯಾ ಛನ್ದಂ ಜನೇತಿ ವಾಯಮತಿ ವೀರಿಯಂ ಆರಭತಿ ಚಿತ್ತಂ ಪಗ್ಗಣ್ಹಾತಿ ಪದಹತಿ – ಅಯಂ ವುಚ್ಚತಿ ಸಮ್ಮಾವಾಯಾಮೋ.

ತತ್ಥ ಕತಮಾ ಸಮ್ಮಾಸತಿ? ಇಧ ಭಿಕ್ಖು ಕಾಯೇ ಕಾಯಾನುಪಸ್ಸೀ ವಿಹರತಿ ಆತಾಪೀ ಸಮ್ಪಜಾನೋ ಸತಿಮಾ ವಿನೇಯ್ಯ ಲೋಕೇ ಅಭಿಜ್ಝಾದೋಮನಸ್ಸಂ. ವೇದನಾಸು…ಪೇ… ಚಿತ್ತೇ…ಪೇ… ಧಮ್ಮೇಸು ಧಮ್ಮಾನುಪಸ್ಸೀ ವಿಹರತಿ ಆತಾಪೀ ಸಮ್ಪಜಾನೋ ಸತಿಮಾ ವಿನೇಯ್ಯ ಲೋಕೇ ಅಭಿಜ್ಝಾದೋಮನಸ್ಸಂ – ಅಯಂ ವುಚ್ಚತಿ ಸಮ್ಮಾಸತಿ.

ತತ್ಥ ಕತಮೋ ಸಮ್ಮಾಸಮಾಧಿ? ಇಧ ಭಿಕ್ಖು ವಿವಿಚ್ಚೇವ ಕಾಮೇಹಿ ವಿವಿಚ್ಚ ಅಕುಸಲೇಹಿ ಧಮ್ಮೇಹಿ ಸವಿತಕ್ಕಂ ಸವಿಚಾರಂ ವಿವೇಕಜಂ ಪೀತಿಸುಖಂ ಪಠಮಂ ಝಾನಂ ಉಪಸಮ್ಪಜ್ಜ ವಿಹರತಿ. ವಿತಕ್ಕವಿಚಾರಾನಂ ವೂಪಸಮಾ ಅಜ್ಝತ್ತಂ ಸಮ್ಪಸಾದನಂ ಚೇತಸೋ ಏಕೋದಿಭಾವಂ ಅವಿತಕ್ಕಂ ಅವಿಚಾರಂ ಸಮಾಧಿಜಂ ಪೀತಿಸುಖಂ ದುತಿಯಂ ಝಾನಂ ಉಪಸಮ್ಪಜ್ಜ ವಿಹರತಿ. ಪೀತಿಯಾ ಚ ವಿರಾಗಾ ಉಪೇಕ್ಖಕೋ ಚ ವಿಹರತಿ ಸತೋ ಚ ಸಮ್ಪಜಾನೋ ಸುಖಞ್ಚ ಕಾಯೇನ ಪಟಿಸಂವೇದೇತಿ, ಯಂ ತಂ ಅರಿಯಾ ಆಚಿಕ್ಖನ್ತಿ – ‘‘ಉಪೇಕ್ಖಕೋ ಸತಿಮಾ ಸುಖವಿಹಾರೀ’’ತಿ ತತಿಯಂ ಝಾನಂ ಉಪಸಮ್ಪಜ್ಜ ವಿಹರತಿ. ಸುಖಸ್ಸ ಚ ಪಹಾನಾ ದುಕ್ಖಸ್ಸ ಚ ಪಹಾನಾ ಪುಬ್ಬೇವ ಸೋಮನಸ್ಸದೋಮನಸ್ಸಾನಂ ಅತ್ಥಙ್ಗಮಾ ಅದುಕ್ಖಮಸುಖಂ ಉಪೇಕ್ಖಾಸತಿಪಾರಿಸುದ್ಧಿಂ ಚತುತ್ಥಂ ಝಾನಂ ಉಪಸಮ್ಪಜ್ಜ ವಿಹರತಿ. ಅಯಂ ವುಚ್ಚತಿ ಸಮ್ಮಾಸಮಾಧಿ. ಇದಂ ವುಚ್ಚತಿ ದುಕ್ಖನಿರೋಧಗಾಮಿನೀ ಪಟಿಪದಾ ಅರಿಯಸಚ್ಚಂ. ತಂ ಞಾತಟ್ಠೇನ ಞಾಣಂ, ಪಜಾನನಟ್ಠೇನ ಪಞ್ಞಾ. ತೇನ ವುಚ್ಚತಿ – ‘‘ಇದಂ ದುಕ್ಖಂ ಅರಿಯಸಚ್ಚಂ, ಇದಂ ದುಕ್ಖಸಮುದಯಂ ಅರಿಯಸಚ್ಚಂ, ಇದಂ ದುಕ್ಖನಿರೋಧಂ ಅರಿಯಸಚ್ಚಂ, ಇದಂ ದುಕ್ಖನಿರೋಧಗಾಮಿನೀ ಪಟಿಪದಾ ಅರಿಯಸಚ್ಚ’’ನ್ತಿ ಸೋತಾವಧಾನಂ, ತಂಪಜಾನನಾ ಪಞ್ಞಾ ಸುತಮಯೇ ಞಾಣಂ. ಏವಂ ಸೋತಾವಧಾನೇ ಪಞ್ಞಾ ಸುತಮಯೇ ಞಾಣಂ.