೧೬. ಪಿಙ್ಗಿಯಮಾಣವಪುಚ್ಛಾ

೧೪೫. ‘‘ಜಿಣ್ಣೋಹಮಸ್ಮಿ ಅಬಲೋ ವೀತವಣ್ಣೋ, [ಇಚ್ಚಾಯಸ್ಮಾ ಪಿಙ್ಗಿಯೋ]

ನೇತ್ತಾ ನ ಸುದ್ಧಾ ಸವನಂ ನ ಫಾಸು;

ಮಾಹಂ ನಸ್ಸಂ ಮೋಮುಹೋ ಅನ್ತರಾವ, ಆಚಿಕ್ಖ ಧಮ್ಮಂ ಯಮಹಂ ವಿಜಞ್ಞಂ;

ಜಾತಿಜರಾಯ ಇಧ ವಿಪ್ಪಹಾನಂ’’.

೧೪೬. ‘‘ದಿಸ್ವಾನ ರೂಪೇಸು ವಿಹಞ್ಞಮಾನೇ, [ಪಿಙ್ಗಿಯಾತಿ ಭಗವಾ]

ರುಪ್ಪನ್ತಿ ರೂಪೇಸು ಜನಾ ಪಮತ್ತಾ;

ತಸ್ಮಾ ತುವಂ ಪಿಙ್ಗಿಯ ಅಪ್ಪಮತ್ತೋ, ಜಹಸ್ಸು ರೂಪಂ ಅಪುನಬ್ಭವಾಯ’’.

೧೪೭. ‘‘ದಿಸಾ ಚತಸ್ಸೋ ವಿದಿಸಾ ಚತಸ್ಸೋ, ಉದ್ಧಂ ಅಧೋ ದಸ ದಿಸಾ ಇಮಾಯೋ;

ನ ತುಯ್ಹಂ ಅದಿಟ್ಠಂ ಅಸುತಂ ಅಮುತಂ [ಅಸುತಂ ಅಮುತಂ ವಾ (ಸೀ.), ಅಸುತಾಮುತಂ ವಾ (ಸ್ಯಾ.), ಅಸುತಂ’ಮುತಂ ವಾ (ಪೀ.)], ಅಥೋ ಅವಿಞ್ಞಾತಂ ಕಿಞ್ಚನಮತ್ಥಿ [ಕಞ್ಚಿ ಮತ್ಥಿ (ಸ್ಯಾ.), ಕಿಞ್ಚಿ ನತ್ಥಿ (ಪೀ.), ಕಿಞ್ಚಿನಮತ್ಥಿ (ಕ.)] ಲೋಕೇ;

ಆಚಿಕ್ಖ ಧಮ್ಮಂ ಯಮಹಂ ವಿಜಞ್ಞಂ, ಜಾತಿಜರಾಯ ಇಧ ವಿಪ್ಪಹಾನಂ’’.

೧೪೮. ‘‘ತಣ್ಹಾಧಿಪನ್ನೇ ಮನುಜೇ ಪೇಕ್ಖಮಾನೋ, [ಪಿಙ್ಗಿಯಾತಿ ಭಗವಾ]

ಸನ್ತಾಪಜಾತೇ ಜರಸಾ ಪರೇತೇ;

ತಸ್ಮಾ ತುವಂ ಪಿಙ್ಗಿಯ ಅಪ್ಪಮತ್ತೋ, ಜಹಸ್ಸು ತಣ್ಹಂ ಅಪುನಬ್ಭವಾಯಾ’’ತಿ.

ಪಿಙ್ಗಿಯಮಾಣವಪುಚ್ಛಾ ಸೋಳಸಮಾ.