೨. ಸಬ್ಬಞ್ಞೂಭಾವಪಞ್ಹೋ

೨. ರಾಜಾ ಆಹ ‘‘ಭನ್ತೇ ನಾಗಸೇನ, ಬುದ್ಧೋ ಸಬ್ಬಞ್ಞೂ ಸಬ್ಬದಸ್ಸಾವೀ’’ತಿ? ‘‘ಆಮ, ಮಹಾರಾಜ, ಭಗವಾ ಸಬ್ಬಞ್ಞೂ ಸಬ್ಬದಸ್ಸಾವೀ’’ತಿ. ‘‘ಅಥ ಕಿಸ್ಸ ನು ಖೋ, ಭನ್ತೇ ನಾಗಸೇನ, ಸಾವಕಾನಂ ಅನುಪುಬ್ಬೇನ ಸಿಕ್ಖಾಪದಂ ಪಞ್ಞಪೇಸೀ’’ತಿ? ‘‘ಅತ್ಥಿ ಪನ ತೇ ಮಹಾರಾಜ, ಕೋಚಿ ವೇಜ್ಜೋ, ಯೋ ಇಮಿಸ್ಸಂ ಪಥವಿಯಂ ಸಬ್ಬಭೇಸಜ್ಜಾನಿ ಜಾನಾತೀ’’ತಿ? ‘‘ಆಮ, ಭನ್ತೇ, ಅತ್ಥೀ’’ತಿ. ‘‘ಕಿಂನು ಖೋ, ಮಹಾರಾಜ, ಸೋ ವೇಜ್ಜೋ ಗಿಲಾನಕಂ ಸಮ್ಪತ್ತೇ ಕಾಲೇ ಭೇಸಜ್ಜಂ ಪಾಯೇತಿ, ಉದಾಹು ಅಸಮ್ಪತ್ತೇ ಕಾಲೇ’’ತಿ? ‘‘ಸಮ್ಪತ್ತೇ ಕಾಲೇ, ಭನ್ತೇ, ಗಿಲಾನಕಂ ಭೇಸಜ್ಜಂ ಪಾಯೇತಿ, ನೋ ಅಸಮ್ಪತ್ತೇ ಕಾಲೇ’’ತಿ? ‘‘ಏವಮೇವ ಖೋ, ಮಹಾರಾಜ, ಭಗವಾ ಸಬ್ಬಞ್ಞೂ ಸಬ್ಬದಸ್ಸಾವೀ ನ ಅಸಮ್ಪತ್ತೇ ಕಾಲೇ ಸಾವಕಾನಂ ಸಿಕ್ಖಾಪದಂ ಪಞ್ಞಾಪೇತಿ, ಸಮ್ಪತ್ತೇ ಕಾಲೇ ಸಾವಕಾನಂ ಸಿಕ್ಖಾಪದಂ ಪಞ್ಞಾಪೇತಿ ಯಾವಜೀವಂ ಅನತಿಕ್ಕಮನೀಯ’’ನ್ತಿ.

‘‘ಕಲ್ಲೋಸಿ, ಭನ್ತೇ ನಾಗಸೇನಾ’’ತಿ.

ಸಬ್ಬಞ್ಞೂಭಾವಪಞ್ಹೋ ದುತಿಯೋ.