೧೦. ಚಿರಕತಸರಣಪಞ್ಹೋ

೧೦. ರಾಜಾ ಆಹ ‘‘ಭನ್ತೇ ನಾಗಸೇನ, ಕೇನ ಅತೀತಂ ಚಿರಕತಂ ಸರತೀ’’ತಿ? ‘‘ಸತಿಯಾ, ಮಹಾರಾಜಾ’’ತಿ. ‘‘ನನು, ಭನ್ತೇ ನಾಗಸೇನ, ಚಿತ್ತೇನ ಸರತಿ ನೋ ಸತಿಯಾ’’ತಿ? ‘‘ಅಭಿಜಾನಾಸಿ ನು, ತ್ವಂ ಮಹಾರಾಜ, ಕಿಞ್ಚಿದೇವ ಕರಣೀಯಂ ಕತ್ವಾ ಪಮುಟ್ಠ’’ನ್ತಿ? ‘‘ಆಮ ಭನ್ತೇ’’ತಿ. ‘‘ಕಿಂ ನು ಖೋ, ತ್ವಂ ಮಹಾರಾಜ, ತಸ್ಮಿಂ ಸಮಯೇ ಅಚಿತ್ತಕೋ ಅಹೋಸೀ’’ತಿ? ‘‘ನ ಹಿ, ಭನ್ತೇ, ಸತಿ ತಸ್ಮಿಂ ಸಮಯೇ ನಾಹೋಸೀ’’ತಿ. ‘‘ಅಥ ಕಸ್ಮಾ, ತ್ವಂ ಮಹಾರಾಜ, ಏವಮಾಹ ‘ಚಿತ್ತೇನ ಸರತಿ, ನೋ ಸತಿಯಾ’’’ತಿ?

‘‘ಕಲ್ಲೋಸಿ, ಭನ್ತೇ ನಾಗಸೇನಾ’’ತಿ.

ಚಿರಕತಸರಣಪಞ್ಹೋ ದಸಮೋ.