೫. ಅಸಙ್ಕಮನಪಟಿಸನ್ದಹನಪಞ್ಹೋ

೫. ರಾಜಾ ಆಹ ‘‘ಭನ್ತೇ ನಾಗಸೇನ, ನ ಚ ಸಙ್ಕಮತಿ ಪಟಿಸನ್ದಹತಿ ಚಾ’’ತಿ? ‘‘ಆಮ, ಮಹಾರಾಜ, ನ ಚ ಸಙ್ಕಮತಿ ಪಟಿಸನ್ದಹತಿ ಚಾ’’ತಿ. ‘‘ಕಥಂ, ಭನ್ತೇ ನಾಗಸೇನ, ನ ಚ ಸಙ್ಕಮತಿ ಪಟಿಸನ್ದಹತಿ ಚ, ಓಪಮ್ಮಂ ಕರೋಹೀ’’ತಿ? ‘‘ಯಥಾ, ಮಹಾರಾಜ, ಕೋಚಿದೇವ ಪುರಿಸೋ ಪದೀಪತೋ ಪದೀಪಂ ಪದೀಪೇಯ್ಯ, ಕಿಂನು ಖೋ ಸೋ, ಮಹಾರಾಜ, ಪದೀಪೋ ಪದೀಪಮ್ಹಾ ಸಙ್ಕನ್ತೋ’’ತಿ? ‘‘ನ ಹಿ, ಭನ್ತೇ’’ತಿ. ‘‘ಏವಮೇವ ಖೋ, ಮಹಾರಾಜ, ನ ಚ ಸಙ್ಕಮತಿ ಪಟಿಸನ್ದಹತಿ ಚಾ’’ತಿ.

‘‘ಭಿಯ್ಯೋ ಓಪಮ್ಮಂ ಕರೋಹೀ’’ತಿ. ‘‘ಅಭಿಜಾನಾಸಿ ನು, ತ್ವಂ ಮಹಾರಾಜ, ದಹರಕೋ ಸನ್ತೋ ಸಿಲೋಕಾಚರಿಯಸ್ಸ ಸನ್ತಿಕೇ ಕಿಞ್ಚಿ ಸಿಲೋಕಂ ಗಹಿತ’’ನ್ತಿ? ‘‘ಆಮ, ಭನ್ತೇ’’ತಿ. ‘‘ಕಿಂನು ಖೋ, ಮಹಾರಾಜ, ಸೋ ಸಿಲೋಕೋ ಆಚರಿಯಮ್ಹಾ ಸಙ್ಕನ್ತೋ’’ತಿ? ‘‘ನ ಹಿ, ಭನ್ತೇ’’ತಿ. ‘‘ಏವಮೇವ ಖೋ, ಮಹಾರಾಜ, ನ ಚ ಸಙ್ಕಮತಿ ಪಟಿಸನ್ದಹತಿ ಚಾತಿ.

‘‘ಕಲ್ಲೋಸಿ, ಭನ್ತೇ ನಾಗಸೇನಾ’’ತಿ.

ಅಸಙ್ಕಮನಪಟಿಸನ್ದಹನಪಞ್ಹೋ ಪಞ್ಚಮೋ.