೫. ಮಙ್ಗಲಸುತ್ತಂ

೧. ಏವಂ ಮೇ ಸುತಂ – ಏಕಂ ಸಮಯಂ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ಅಥ ಖೋ ಅಞ್ಞತರಾ ದೇವತಾ ಅಭಿಕ್ಕನ್ತಾಯ ರತ್ತಿಯಾ ಅಭಿಕ್ಕನ್ತವಣ್ಣಾ ಕೇವಲಕಪ್ಪಂ ಜೇತವನಂ ಓಭಾಸೇತ್ವಾ ಯೇನ ಭಗವಾ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ಅಟ್ಠಾಸಿ. ಏಕಮನ್ತಂ ಠಿತಾ ಖೋ ಸಾ ದೇವತಾ ಭಗವನ್ತಂ ಗಾಥಾಯ ಅಜ್ಝಭಾಸಿ –

೨. ‘‘ಬಹೂ ದೇವಾ ಮನುಸ್ಸಾ ಚ, ಮಙ್ಗಲಾನಿ ಅಚಿನ್ತಯುಂ;

ಆಕಙ್ಖಮಾನಾ ಸೋತ್ಥಾನಂ, ಬ್ರೂಹಿ ಮಙ್ಗಲಮುತ್ತಮಂ’’.

೩. ‘‘ಅಸೇವನಾ ಚ ಬಾಲಾನಂ, ಪಣ್ಡಿತಾನಞ್ಚ ಸೇವನಾ;

ಪೂಜಾ ಚ ಪೂಜನೇಯ್ಯಾನಂ [ಪೂಜನೀಯಾನಂ (ಸೀ. ಸ್ಯಾ. ಕಂ. ಪೀ.)], ಏತಂ ಮಙ್ಗಲಮುತ್ತಮಂ.

೪. ‘‘ಪತಿರೂಪದೇಸವಾಸೋ ಚ, ಪುಬ್ಬೇ ಚ ಕತಪುಞ್ಞತಾ;

ಅತ್ತಸಮ್ಮಾಪಣಿಧಿ [ಅತ್ಥಸಮ್ಮಾಪಣೀಧೀ (ಕತ್ಥಚಿ)] ಚ, ಏತಂ ಮಙ್ಗಲಮುತ್ತಮಂ.

೫. ‘‘ಬಾಹುಸಚ್ಚಞ್ಚ ಸಿಪ್ಪಞ್ಚ, ವಿನಯೋ ಚ ಸುಸಿಕ್ಖಿತೋ;

ಸುಭಾಸಿತಾ ಚ ಯಾ ವಾಚಾ, ಏತಂ ಮಙ್ಗಲಮುತ್ತಮಂ.

೬. ‘‘ಮಾತಾಪಿತು ಉಪಟ್ಠಾನಂ, ಪುತ್ತದಾರಸ್ಸ ಸಙ್ಗಹೋ;

ಅನಾಕುಲಾ ಚ ಕಮ್ಮನ್ತಾ, ಏತಂ ಮಙ್ಗಲಮುತ್ತಮಂ.

೭. ‘‘ದಾನಞ್ಚ ಧಮ್ಮಚರಿಯಾ ಚ, ಞಾತಕಾನಞ್ಚ ಸಙ್ಗಹೋ;

ಅನವಜ್ಜಾನಿ ಕಮ್ಮಾನಿ, ಏತಂ ಮಙ್ಗಲಮುತ್ತಮಂ.

೮. ‘‘ಆರತೀ ವಿರತೀ ಪಾಪಾ, ಮಜ್ಜಪಾನಾ ಚ ಸಂಯಮೋ;

ಅಪ್ಪಮಾದೋ ಚ ಧಮ್ಮೇಸು, ಏತಂ ಮಙ್ಗಲಮುತ್ತಮಂ.

೯. ‘‘ಗಾರವೋ ಚ ನಿವಾತೋ ಚ, ಸನ್ತುಟ್ಠಿ ಚ ಕತಞ್ಞುತಾ;

ಕಾಲೇನ ಧಮ್ಮಸ್ಸವನಂ [ಧಮ್ಮಸ್ಸಾವಣಂ (ಕ. ಸೀ.), ಧಮ್ಮಸವನಂ (ಕ. ಸೀ.)], ಏತಂ ಮಙ್ಗಲಮುತ್ತಮಂ.

೧೦. ‘‘ಖನ್ತೀ ಚ ಸೋವಚಸ್ಸತಾ, ಸಮಣಾನಞ್ಚ ದಸ್ಸನಂ;

ಕಾಲೇನ ಧಮ್ಮಸಾಕಚ್ಛಾ, ಏತಂ ಮಙ್ಗಲಮುತ್ತಮಂ.

೧೧. ‘‘ತಪೋ ಚ ಬ್ರಹ್ಮಚರಿಯಞ್ಚ, ಅರಿಯಸಚ್ಚಾನ ದಸ್ಸನಂ;

ನಿಬ್ಬಾನಸಚ್ಛಿಕಿರಿಯಾ ಚ, ಏತಂ ಮಙ್ಗಲಮುತ್ತಮಂ.

೧೨. ‘‘ಫುಟ್ಠಸ್ಸ ಲೋಕಧಮ್ಮೇಹಿ, ಚಿತ್ತಂ ಯಸ್ಸ ನ ಕಮ್ಪತಿ;

ಅಸೋಕಂ ವಿರಜಂ ಖೇಮಂ, ಏತಂ ಮಙ್ಗಲಮುತ್ತಮಂ.

೧೩. ‘‘ಏತಾದಿಸಾನಿ ಕತ್ವಾನ, ಸಬ್ಬತ್ಥಮಪರಾಜಿತಾ;

ಸಬ್ಬತ್ಥ ಸೋತ್ಥಿಂ ಗಚ್ಛನ್ತಿ, ತಂ ತೇಸಂ ಮಙ್ಗಲಮುತ್ತಮ’’ನ್ತಿ.

ಮಙ್ಗಲಸುತ್ತಂ ನಿಟ್ಠಿತಂ.