೭. ಸಬ್ಬಪರಿಞ್ಞಾಸುತ್ತಂ

೭. ವುತ್ತಞ್ಹೇತಂ ಭಗವತಾ, ವುತ್ತಮರಹತಾತಿ ಮೇ ಸುತಂ –

‘‘ಸಬ್ಬಂ, ಭಿಕ್ಖವೇ, ಅನಭಿಜಾನಂ ಅಪರಿಜಾನಂ ತತ್ಥ ಚಿತ್ತಂ ಅವಿರಾಜಯಂ ಅಪ್ಪಜಹಂ ಅಭಬ್ಬೋ ದುಕ್ಖಕ್ಖಯಾಯ. ಸಬ್ಬಞ್ಚ ಖೋ, ಭಿಕ್ಖವೇ, ಅಭಿಜಾನಂ ಪರಿಜಾನಂ ತತ್ಥ ಚಿತ್ತಂ ವಿರಾಜಯಂ ಪಜಹಂ ಭಬ್ಬೋ ದುಕ್ಖಕ್ಖಯಾಯಾ’’ತಿ. ಏತಮತ್ಥಂ ಭಗವಾ ಅವೋಚ. ತತ್ಥೇತಂ ಇತಿ ವುಚ್ಚತಿ –

‘‘ಯೋ ಸಬ್ಬಂ ಸಬ್ಬತೋ ಞತ್ವಾ, ಸಬ್ಬತ್ಥೇಸು ನ ರಜ್ಜತಿ;

ಸ ವೇ ಸಬ್ಬಪರಿಞ್ಞಾ [ಸಬ್ಬಂ ಪರಿಞ್ಞಾ (ಸ್ಯಾ. ಪೀ.)] ಸೋ, ಸಬ್ಬದುಕ್ಖಮುಪಚ್ಚಗಾ’’ತಿ [ಸಬ್ಬಂ ದುಕ್ಖಂ ಉಪಚ್ಚಗಾತಿ (ಸ್ಯಾ.), ಸಬ್ಬದುಕ್ಖಂ ಉಪಚ್ಚಗಾತಿ (ಪೀ. ಅಟ್ಠ.)].

ಅಯಮ್ಪಿ ಅತ್ಥೋ ವುತ್ತೋ ಭಗವತಾ, ಇತಿ ಮೇ ಸುತನ್ತಿ. ಸತ್ತಮಂ.