೯. ವಟ್ಟಪೋತಕಚರಿಯಾ

೭೨. ‘‘ಪುನಾಪರಂ ಯದಾ ಹೋಮಿ, ಮಗಧೇ ವಟ್ಟಪೋತಕೋ;

ಅಜಾತಪಕ್ಖೋ ತರುಣೋ, ಮಂಸಪೇಸಿ ಕುಲಾವಕೇ.

೭೩. ‘‘ಮುಖತುಣ್ಡಕೇನಾಹರಿತ್ವಾ [ಮುಖತುಣ್ಡೇನಾಹರಿತ್ವಾ (ಸೀ.)], ಮಾತಾ ಪೋಸಯತೀ ಮಮಂ;

ತಸ್ಸಾ ಫಸ್ಸೇನ ಜೀವಾಮಿ, ನತ್ಥಿ ಮೇ ಕಾಯಿಕಂ ಬಲಂ.

೭೪. ‘‘ಸಂವಚ್ಛರೇ ಗಿಮ್ಹಸಮಯೇ, ದವಡಾಹೋ [ವನದಾಹೋ (ಕ.)] ಪದಿಪ್ಪತಿ;

ಉಪಗಚ್ಛತಿ ಅಮ್ಹಾಕಂ, ಪಾವಕೋ ಕಣ್ಹವತ್ತನೀ.

೭೫. ‘‘ಧಮಧಮಾ ಇತಿಏವಂ, ಸದ್ದಾಯನ್ತೋ ಮಹಾಸಿಖೀ;

ಅನುಪುಬ್ಬೇನ ಝಾಪೇನ್ತೋ, ಅಗ್ಗಿ ಮಮಮುಪಾಗಮಿ.

೭೬. ‘‘ಅಗ್ಗಿವೇಗಭಯಾತೀತಾ, ತಸಿತಾ ಮಾತಾಪಿತಾ ಮಮ;

ಕುಲಾವಕೇ ಮಂ ಛಡ್ಡೇತ್ವಾ, ಅತ್ತಾನಂ ಪರಿಮೋಚಯುಂ.

೭೭. ‘‘ಪಾದೇ ಪಕ್ಖೇ ಪಜಹಾಮಿ, ನತ್ಥಿ ಮೇ ಕಾಯಿಕಂ ಬಲಂ;

ಸೋಹಂ ಅಗತಿಕೋ ತತ್ಥ, ಏವಂ ಚಿನ್ತೇಸಹಂ ತದಾ.

೭೮. ‘‘‘ಯೇಸಾಹಂ ಉಪಧಾವೇಯ್ಯಂ, ಭೀತೋ ತಸಿತವೇಧಿತೋ;

ತೇ ಮಂ ಓಹಾಯ ಪಕ್ಕನ್ತಾ, ಕಥಂ ಮೇ ಅಜ್ಜ ಕಾತವೇ.

೭೯. ‘‘‘ಅತ್ಥಿ ಲೋಕೇ ಸೀಲಗುಣೋ, ಸಚ್ಚಂ ಸೋಚೇಯ್ಯನುದ್ದಯಾ;

ತೇನ ಸಚ್ಚೇನ ಕಾಹಾಮಿ, ಸಚ್ಚಕಿರಿಯಮುತ್ತಮಂ.

೮೦. ‘‘‘ಆವೇಜ್ಜೇತ್ವಾ ಧಮ್ಮಬಲಂ, ಸರಿತ್ವಾ ಪುಬ್ಬಕೇ ಜಿನೇ;

ಸಚ್ಚಬಲಮವಸ್ಸಾಯ, ಸಚ್ಚಕಿರಿಯಮಕಾಸಹಂ.

೮೧. ‘‘‘ಸನ್ತಿ ಪಕ್ಖಾ ಅಪತನಾ, ಸನ್ತಿ ಪಾದಾ ಅವಞ್ಚನಾ;

ಮಾತಾಪಿತಾ ಚ ನಿಕ್ಖನ್ತಾ, ಜಾತವೇದ ಪಟಿಕ್ಕಮ’.

೮೨. ‘‘ಸಹಸಚ್ಚೇ ಕತೇ ಮಯ್ಹಂ, ಮಹಾಪಜ್ಜಲಿತೋ ಸಿಖೀ;

ವಜ್ಜೇಸಿ ಸೋಳಸಕರೀಸಾನಿ, ಉದಕಂ ಪತ್ವಾ ಯಥಾ ಸಿಖೀ;

ಸಚ್ಚೇನ ಮೇ ಸಮೋ ನತ್ಥಿ, ಏಸಾ ಮೇ ಸಚ್ಚಪಾರಮೀ’’ತಿ.

ವಟ್ಟಪೋತಕಚರಿಯಂ ನವಮಂ.