೧೧. ಕಣ್ಹದೀಪಾಯನಚರಿಯಾ

೯೨. ‘‘ಪುನಾಪರಂ ಯದಾ ಹೋಮಿ, ಕಣ್ಹದೀಪಾಯನೋ ಇಸಿ;

ಪರೋಪಞ್ಞಾಸವಸ್ಸಾನಿ, ಅನಭಿರತೋಚರಿಂ ಅಹಂ.

೯೩. ‘‘ನ ಕೋಚಿ ಏತಂ ಜಾನಾತಿ, ಅನಭಿರತಿಮನಂ ಮಮ;

ಅಹಞ್ಹಿ ಕಸ್ಸಚಿ ನಾಚಿಕ್ಖಿಂ, ಅರತಿ ಮೇ ಚರತಿ ಮಾನಸೇ.

೯೪. ‘‘ಸಬ್ರಹ್ಮಚಾರೀ ಮಣ್ಡಬ್ಯೋ, ಸಹಾಯೋ ಮೇ ಮಹಾಇಸಿ;

ಪುಬ್ಬಕಮ್ಮಸಮಾಯುತ್ತೋ, ಸೂಲಮಾರೋಪನಂ ಲಭಿ.

೯೫. ‘‘ತಮಹಂ ಉಪಟ್ಠಹಿತ್ವಾನ, ಆರೋಗ್ಯಮನುಪಾಪಯಿಂ;

ಆಪುಚ್ಛಿತ್ವಾನ ಆಗಞ್ಛಿಂ, ಯಂ ಮಯ್ಹಂ ಸಕಮಸ್ಸಮಂ.

೯೬. ‘‘ಸಹಾಯೋ ಬ್ರಾಹ್ಮಣೋ ಮಯ್ಹಂ, ಭರಿಯಂ ಆದಾಯ ಪುತ್ತಕಂ;

ತಯೋ ಜನಾ ಸಮಾಗನ್ತ್ವಾ, ಆಗಞ್ಛುಂ ಪಾಹುನಾಗತಂ.

೯೭. ‘‘ಸಮ್ಮೋದಮಾನೋ ತೇಹಿ ಸಹ, ನಿಸಿನ್ನೋ ಸಕಮಸ್ಸಮೇ;

ದಾರಕೋ ವಟ್ಟಮನುಕ್ಖಿಪಂ, ಆಸೀವಿಸಮಕೋಪಯಿ.

೯೮. ‘‘ತತೋ ಸೋ ವಟ್ಟಗತಂ ಮಗ್ಗಂ, ಅನ್ವೇಸನ್ತೋ ಕುಮಾರಕೋ;

ಆಸೀವಿಸಸ್ಸ ಹತ್ಥೇನ, ಉತ್ತಮಙ್ಗಂ ಪರಾಮಸಿ.

೯೯. ‘‘ತಸ್ಸ ಆಮಸನೇ ಕುದ್ಧೋ, ಸಪ್ಪೋ ವಿಸಬಲಸ್ಸಿತೋ;

ಕುಪಿತೋ ಪರಮಕೋಪೇನ, ಅಡಂಸಿ ದಾರಕಂ ಖಣೇ.

೧೦೦. ‘‘ಸಹದಟ್ಠೋ ಆಸೀವಿಸೇನ [ಅತಿವಿಸೇನ (ಪೀ. ಕ.)], ದಾರಕೋ ಪಪತಿ [ಪತತಿ (ಕ.)] ಭೂಮಿಯಂ;

ತೇನಾಹಂ ದುಕ್ಖಿತೋ ಆಸಿಂ, ಮಮ ವಾಹಸಿ ತಂ ದುಕ್ಖಂ.

೧೦೧. ‘‘ತ್ಯಾಹಂ ಅಸ್ಸಾಸಯಿತ್ವಾನ, ದುಕ್ಖಿತೇ ಸೋಕಸಲ್ಲಿತೇ;

ಪಠಮಂ ಅಕಾಸಿಂ ಕಿರಿಯಂ, ಅಗ್ಗಂ ಸಚ್ಚಂ ವರುತ್ತಮಂ.

೧೦೨. ‘‘‘ಸತ್ತಾಹಮೇವಾಹಂ ಪಸನ್ನಚಿತ್ತೋ, ಪುಞ್ಞತ್ಥಿಕೋ ಅಚರಿಂ ಬ್ರಹ್ಮಚರಿಯಂ;

ಅಥಾಪರಂ ಯಂ ಚರಿತಂ ಮಮೇದಂ, ವಸ್ಸಾನಿ ಪಞ್ಞಾಸಸಮಾಧಿಕಾನಿ.

೧೦೩. ‘‘‘ಅಕಾಮಕೋ ವಾಹಿ ಅಹಂ ಚರಾಮಿ, ಏತೇನ ಸಚ್ಚೇನ ಸುವತ್ಥಿ ಹೋತು;

ಹತಂ ವಿಸಂ ಜೀವತು ಯಞ್ಞದತ್ತೋ’.

೧೦೪. ‘‘ಸಹ ಸಚ್ಚೇ ಕತೇ ಮಯ್ಹಂ, ವಿಸವೇಗೇನ ವೇಧಿತೋ;

ಅಬುಜ್ಝಿತ್ವಾನ ವುಟ್ಠಾಸಿ, ಅರೋಗೋ ಚಾಸಿ ಮಾಣವೋ;

ಸಚ್ಚೇನ ಮೇ ಸಮೋ ನತ್ಥಿ, ಏಸಾ ಮೇ ಸಚ್ಚಪಾರಮೀ’’ತಿ.

ಕಣ್ಹದೀಪಾಯನಚರಿಯಂ ಏಕಾದಸಮಂ.