೬. ರುರುರಾಜಚರಿಯಾ

೪೮. ‘‘ಪುನಾಪರಂ ಯದಾ ಹೋಮಿ, ಸುತತ್ತಕನಕಸನ್ನಿಭೋ;

ಮಿಗರಾಜಾ ರುರುನಾಮ, ಪರಮಸೀಲಸಮಾಹಿತೋ.

೪೯. ‘‘ರಮ್ಮೇ ಪದೇಸೇ ರಮಣೀಯೇ, ವಿವಿತ್ತೇ ಅಮನುಸ್ಸಕೇ;

ತತ್ಥ ವಾಸಂ ಉಪಗಞ್ಛಿಂ, ಗಙ್ಗಾಕೂಲೇ ಮನೋರಮೇ.

೫೦. ‘‘ಅಥ ಉಪರಿ ಗಙ್ಗಾಯ, ಧನಿಕೇಹಿ ಪರಿಪೀಳಿತೋ;

ಪುರಿಸೋ ಗಙ್ಗಾಯ ಪಪತಿ, ‘ಜೀವಾಮಿ ವಾ ಮರಾಮಿ ವಾ’.

೫೧. ‘‘ರತ್ತಿನ್ದಿವಂ ಸೋ ಗಙ್ಗಾಯ, ವುಯ್ಹಮಾನೋ ಮಹೋದಕೇ;

ರವನ್ತೋ ಕರುಣಂ ರವಂ, ಮಜ್ಝೇ ಗಙ್ಗಾಯ ಗಚ್ಛತಿ.

೫೨. ‘‘ತಸ್ಸಾಹಂ ಸದ್ದಂ ಸುತ್ವಾನ, ಕರುಣಂ ಪರಿದೇವತೋ;

ಗಙ್ಗಾಯ ತೀರೇ ಠತ್ವಾನ, ಅಪುಚ್ಛಿಂ ‘ಕೋಸಿ ತ್ವಂ ನರೋ’.

೫೩. ‘‘ಸೋ ಮೇ ಪುಟ್ಠೋ ಚ ಬ್ಯಾಕಾಸಿ, ಅತ್ತನೋ ಕರಣಂ ತದಾ;

‘ಧನಿಕೇಹಿ ಭೀತೋ ತಸಿತೋ, ಪಕ್ಖನ್ದೋಹಂ ಮಹಾನದಿಂ’.

೫೪. ‘‘ತಸ್ಸ ಕತ್ವಾನ ಕಾರುಞ್ಞಂ, ಚಜಿತ್ವಾ ಮಮ ಜೀವಿತಂ;

ಪವಿಸಿತ್ವಾ ನೀಹರಿಂ ತಸ್ಸ, ಅನ್ಧಕಾರಮ್ಹಿ ರತ್ತಿಯಾ.

೫೫. ‘‘ಅಸ್ಸತ್ಥಕಾಲಮಞ್ಞಾಯ, ತಸ್ಸಾಹಂ ಇದಮಬ್ರವಿಂ;

‘ಏಕಂ ತಂ ವರಂ ಯಾಚಾಮಿ, ಮಾ ಮಂ ಕಸ್ಸಚಿ ಪಾವದ’.

೫೬. ‘‘ನಗರಂ ಗನ್ತ್ವಾನ ಆಚಿಕ್ಖಿ, ಪುಚ್ಛಿತೋ ಧನಹೇತುಕೋ;

ರಾಜಾನಂ ಸೋ ಗಹೇತ್ವಾನ, ಉಪಗಞ್ಛಿ ಮಮನ್ತಿಕಂ.

೫೭. ‘‘ಯಾವತಾ ಕರಣಂ ಸಬ್ಬಂ, ರಞ್ಞೋ ಆರೋಚಿತಂ ಮಯಾ;

ರಾಜಾ ಸುತ್ವಾನ ವಚನಂ, ಉಸುಂ ತಸ್ಸ ಪಕಪ್ಪಯಿ;

‘ಇಧೇವ ಘಾತಯಿಸ್ಸಾಮಿ, ಮಿತ್ತದುಬ್ಭಿಂ [ಮಿತ್ತದೂಭಿಂ (ಸೀ.)] ಅನಾರಿಯಂ’.

೫೮. ‘‘ತಮಹಂ ಅನುರಕ್ಖನ್ತೋ, ನಿಮ್ಮಿನಿಂ ಮಮ ಅತ್ತನಾ;

‘ತಿಟ್ಠತೇಸೋ ಮಹಾರಾಜ, ಕಾಮಕಾರೋ ಭವಾಮಿ ತೇ’.

೫೯. ‘‘ಅನುರಕ್ಖಿಂ ಮಮ ಸೀಲಂ, ನಾರಕ್ಖಿಂ ಮಮ ಜೀವಿತಂ;

ಸೀಲವಾ ಹಿ ತದಾ ಆಸಿಂ, ಬೋಧಿಯಾಯೇವ ಕಾರಣಾ’’ತಿ.

ರುರುರಾಜಚರಿಯಂ ಛಟ್ಠಂ.