೨೯. ಧಾತುಭಾಜನೀಯಕಥಾ

೧. ಮಹಾಗೋತಮೋ ಜಿನವರೋ, ಕುಸಿನಾರಮ್ಹಿ ನಿಬ್ಬುತೋ;

ಧಾತುವಿತ್ಥಾರಿಕಂ ಆಸಿ, ತೇಸು ತೇಸು ಪದೇಸತೋ.

೨. ಏಕೋ ಅಜಾತಸತ್ತುಸ್ಸ, ಏಕೋ ವೇಸಾಲಿಯಾ ಪುರೇ;

ಏಕೋ ಕಪಿಲವತ್ಥುಸ್ಮಿಂ, ಏಕೋ ಚ ಅಲ್ಲಕಪ್ಪಕೇ.

೩. ಏಕೋ ಚ ರಾಮಗಾಮಮ್ಹಿ, ಏಕೋ ಚ ವೇಠದೀಪಕೇ;

ಏಕೋ ಪಾವೇಯ್ಯಕೇ ಮಲ್ಲೇ, ಏಕೋ ಚ ಕೋಸಿನಾರಕೇ.

೪. ಕುಮ್ಭಸ್ಸ ಥೂಪಂ ಕಾರೇಸಿ, ಬ್ರಾಹ್ಮಣೋ ದೋಣಸವ್ಹಯೋ;

ಅಙ್ಗಾರಥೂಪಂ ಕಾರೇಸುಂ, ಮೋರಿಯಾ ತುಟ್ಠಮಾನಸಾ.

೫. ಅಟ್ಠ ಸಾರೀರಿಕಾ ಥೂಪಾ, ನವಮೋ ಕುಮ್ಭಚೇತಿಯೋ;

ಅಙ್ಗಾರಥೂಪೋ ದಸಮೋ, ತದಾಯೇವ ಪತಿಟ್ಠಿತೋ.

೬. ಉಣ್ಹೀಸಂ ಚತಸ್ಸೋ ದಾಠಾ, ಅಕ್ಖಕಾ ದ್ವೇ ಚ ಧಾತುಯೋ;

ಅಸಮ್ಭಿನ್ನಾ ಇಮಾ ಸತ್ತ, ಸೇಸಾ ಭಿನ್ನಾವ ಧಾತುಯೋ.

೭. ಮಹನ್ತಾ ಮುಗ್ಗಮತ್ತಾ ಚ [ಮುಗ್ಗಮಾಸಾವ (ಕ.)], ಮಜ್ಝಿಮಾ ಭಿನ್ನತಣ್ಡುಲಾ;

ಖುದ್ದಕಾ ಸಾಸಪಮತ್ತಾ ಚ, ನಾನಾವಣ್ಣಾ ಚ ಧಾತುಯೋ.

೮. ಮಹನ್ತಾ ಸುವಣ್ಣವಣ್ಣಾ ಚ, ಮುತ್ತವಣ್ಣಾ ಚ ಮಜ್ಝಿಮಾ;

ಖುದ್ದಕಾ ಮಕುಲವಣ್ಣಾ ಚ, ಸೋಳಸದೋಣಮತ್ತಿಕಾ.

೯. ಮಹನ್ತಾ ಪಞ್ಚ ನಾಳಿಯೋ, ನಾಳಿಯೋ ಪಞ್ಚ ಮಜ್ಝಿಮಾ;

ಖುದ್ದಕಾ ಛ ನಾಳೀ ಚೇವ, ಏತಾ ಸಬ್ಬಾಪಿ ಧಾತುಯೋ.

೧೦. ಉಣ್ಹೀಸಂ ಸೀಹಳೇ ದೀಪೇ, ಬ್ರಹ್ಮಲೋಕೇ ಚ ವಾಮಕಂ;

ಸೀಹಳೇ ದಕ್ಖಿಣಕ್ಖಞ್ಚ, ಸಬ್ಬಾಪೇತಾ ಪತಿಟ್ಠಿತಾ.

೧೧. ಏಕಾ ದಾಠಾ ತಿದಸಪುರೇ, ಏಕಾ ನಾಗಪುರೇ ಅಹು;

ಏಕಾ ಗನ್ಧಾರವಿಸಯೇ, ಏಕಾ ಕಲಿಙ್ಗರಾಜಿನೋ.

೧೨. ಚತ್ತಾಲೀಸಸಮಾ ದನ್ತಾ, ಕೇಸಾ ಲೋಮಾ ಚ ಸಬ್ಬಸೋ;

ದೇವಾ ಹರಿಂಸು ಏಕೇಕಂ, ಚಕ್ಕವಾಳಪರಮ್ಪರಾ.

೧೩. ವಜಿರಾಯಂ ಭಗವತೋ, ಪತ್ತೋ ದಣ್ಡಞ್ಚ ಚೀವರಂ;

ನಿವಾಸನಂ ಕುಲಘರೇ, ಪಚ್ಚತ್ಥರಣಂ ಕಪಿಲವ್ಹಯೇ [ಸಿಲವ್ಹಯೇ (ಸ್ಯಾ.)].

೧೪. ಪಾಟಲಿಪುತ್ತಪುರಮ್ಹಿ, ಕರಣಂ ಕಾಯಬನ್ಧನಂ;

ಚಮ್ಪಾಯುದಕಸಾಟಿಯಂ, ಉಣ್ಣಲೋಮಞ್ಚ ಕೋಸಲೇ.

೧೫. ಕಾಸಾವಂ ಬ್ರಹ್ಮಲೋಕೇ ಚ, ವೇಠನಂ ತಿದಸೇ ಪುರೇ;

ನಿಸೀದನಂ ಅವನ್ತೀಸು, ರಟ್ಠೇ [ದೇವರಟ್ಠೇ (ಸ್ಯಾ.)] ಅತ್ಥರಣಂ ತದಾ.

೧೬. ಅರಣೀ ಚ ಮಿಥಿಲಾಯಂ, ವಿದೇಹೇ ಪರಿಸಾವನಂ;

ವಾಸಿ ಸೂಚಿಘರಞ್ಚಾಪಿ, ಇನ್ದಪತ್ಥಪುರೇ ತದಾ.

೧೭. ಪರಿಕ್ಖಾರಾ ಅವಸೇಸಾ, ಜನಪದೇ ಅಪರನ್ತಕೇ;

ಪರಿಭುತ್ತಾನಿ ಮುನಿನಾ, ಅಕಂಸು ಮನುಜಾ ತದಾ.

೧೮. ಧಾತುವಿತ್ಥಾರಿಕಂ ಆಸಿ, ಗೋತಮಸ್ಸ ಮಹೇಸಿನೋ;

ಪಾಣೀನಂ ಅನುಕಮ್ಪಾಯ, ಅಹು ಪೋರಾಣಿಕಂ ತದಾತಿ.

ಧಾತುಭಾಜನೀಯಕಥಾ ನಿಟ್ಠಿತಾ.