೨೨. ಸಿಖೀಬುದ್ಧವಂಸೋ

೧. ವಿಪಸ್ಸಿಸ್ಸ ಅಪರೇನ, ಸಮ್ಬುದ್ಧೋ ದ್ವಿಪದುತ್ತಮೋ;

ಸಿಖಿವ್ಹಯೋ ಆಸಿ ಜಿನೋ, ಅಸಮೋ ಅಪ್ಪಟಿಪುಗ್ಗಲೋ.

೨. ಮಾರಸೇನಂ ಪಮದ್ದಿತ್ವಾ, ಪತ್ತೋ ಸಮ್ಬೋಧಿಮುತ್ತಮಂ;

ಧಮ್ಮಚಕ್ಕಂ ಪವತ್ತೇಸಿ, ಅನುಕಮ್ಪಾಯ ಪಾಣಿನಂ.

೩. ಧಮ್ಮಚಕ್ಕಂ ಪವತ್ತೇನ್ತೇ, ಸಿಖಿಮ್ಹಿ ಜಿನಪುಙ್ಗವೇ [ಮುನಿಪುಙ್ಗವೇ (ಸೀ.)];

ಕೋಟಿಸತಸಹಸ್ಸಾನಂ, ಪಠಮಾಭಿಸಮಯೋ ಅಹು.

೪. ಅಪರಮ್ಪಿ ಧಮ್ಮಂ ದೇಸೇನ್ತೇ, ಗಣಸೇಟ್ಠೇ ನರುತ್ತಮೇ;

ನವುತಿಕೋಟಿಸಹಸ್ಸಾನಂ, ದುತಿಯಾಭಿಸಮಯೋ ಅಹು.

೫. ಯಮಕಪಾಟಿಹಾರಿಯಞ್ಚ [ಯಮಕಂ ಪಾಟಿಹೀರಞ್ಚ (ಸೀ.)], ದಸ್ಸಯನ್ತೇ ಸದೇವಕೇ;

ಅಸೀತಿಕೋಟಿಸಹಸ್ಸಾನಂ, ತತಿಯಾಭಿಸಮಯೋ ಅಹು.

೬. ಸನ್ನಿಪಾತಾ ತಯೋ ಆಸುಂ, ಸಿಖಿಸ್ಸಾಪಿ ಮಹೇಸಿನೋ;

ಖೀಣಾಸವಾನಂ ವಿಮಲಾನಂ, ಸನ್ತಚಿತ್ತಾನ ತಾದಿನಂ.

೭. ಭಿಕ್ಖುಸತಸಹಸ್ಸಾನಂ, ಪಠಮೋ ಆಸಿ ಸಮಾಗಮೋ;

ಅಸೀತಿಭಿಕ್ಖುಸಹಸ್ಸಾನಂ, ದುತಿಯೋ ಆಸಿ ಸಮಾಗಮೋ.

೮. ಸತ್ತತಿಭಿಕ್ಖುಸಹಸ್ಸಾನಂ, ತತಿಯೋ ಆಸಿ ಸಮಾಗಮೋ;

ಅನುಪಲಿತ್ತೋ ಪದುಮಂವ, ತೋಯಮ್ಹಿ ಸಮ್ಪವಡ್ಢಿತಂ.

೯. ಅಹಂ ತೇನ ಸಮಯೇನ, ಅರಿನ್ದಮೋ ನಾಮ ಖತ್ತಿಯೋ;

ಸಮ್ಬುದ್ಧಪ್ಪಮುಖಂ ಸಙ್ಘಂ, ಅನ್ನಪಾನೇನ ತಪ್ಪಯಿಂ.

೧೦. ಬಹುಂ ದುಸ್ಸವರಂ ದತ್ವಾ, ದುಸ್ಸಕೋಟಿಂ ಅನಪ್ಪಕಂ;

ಅಲಙ್ಕತಂ ಹತ್ಥಿಯಾನಂ, ಸಮ್ಬುದ್ಧಸ್ಸ ಅದಾಸಹಂ.

೧೧. ಹತ್ಥಿಯಾನಂ ನಿಮ್ಮಿನಿತ್ವಾ, ಕಪ್ಪಿಯಂ ಉಪನಾಮಯಿಂ;

ಪೂರಯಿಂ ಮಾನಸಂ ಮಯ್ಹಂ, ನಿಚ್ಚಂ ದಳ್ಹಮುಪಟ್ಠಿತಂ.

೧೨. ಸೋಪಿ ಮಂ ಬುದ್ಧೋ ಬ್ಯಾಕಾಸಿ, ಸಿಖೀ ಲೋಕಗ್ಗನಾಯಕೋ;

‘‘ಏಕತಿಂಸೇ ಇತೋ ಕಪ್ಪೇ, ಅಯಂ ಬುದ್ಧೋ ಭವಿಸ್ಸತಿ.

೧೩. ‘‘ಅಹು ಕಪಿಲವ್ಹಯಾ ರಮ್ಮಾ…ಪೇ… ಹೇಸ್ಸಾಮ ಸಮ್ಮುಖಾ ಇಮಂ’’.

೧೪. ತಸ್ಸಾಹಂ ವಚನಂ ಸುತ್ವಾ, ಭಿಯ್ಯೋ ಚಿತ್ತಂ ಪಸಾದಯಿಂ;

ಉತ್ತರಿಂ ವತಮಧಿಟ್ಠಾಸಿಂ, ದಸಪಾರಮಿಪೂರಿಯಾ.

೧೫. ನಗರಂ ಅರುಣವತೀ ನಾಮ, ಅರುಣೋ ನಾಮ ಖತ್ತಿಯೋ;

ಪಭಾವತೀ ನಾಮ ಜನಿಕಾ, ಸಿಖಿಸ್ಸಾಪಿ ಮಹೇಸಿನೋ.

೧೬. ಸತ್ತವಸ್ಸಸಹಸ್ಸಾನಿ, ಅಗಾರಂ ಅಜ್ಝ ಸೋ ವಸಿ;

ಸುಚನ್ದಕೋ ಗಿರಿ ವಸಭೋ [ಸುಚನ್ದೋ ಗಿರಿವಹನೋ (ಸೀ.)], ತಯೋ ಪಾಸಾದಮುತ್ತಮಾ.

೧೭. ಚತುವೀಸಸಹಸ್ಸಾನಿ, ನಾರಿಯೋ ಸಮಲಙ್ಕತಾ;

ಸಬ್ಬಕಾಮಾ ನಾಮ ನಾರೀ, ಅತುಲೋ ನಾಮ ಅತ್ರಜೋ.

೧೮. ನಿಮಿತ್ತೇ ಚತುರೋ ದಿಸ್ವಾ, ಹತ್ಥಿಯಾನೇನ ನಿಕ್ಖಮಿ;

ಅಟ್ಠಮಾಸಂ ಪಧಾನಚಾರಂ, ಅಚರೀ ಪುರಿಸುತ್ತಮೋ.

೧೯. ಬ್ರಹ್ಮುನಾ ಯಾಚಿತೋ ಸನ್ತೋ, ಸಿಖೀ ಲೋಕಗ್ಗನಾಯಕೋ;

ವತ್ತಿ ಚಕ್ಕಂ ಮಹಾವೀರೋ, ಮಿಗದಾಯೇ ನರುತ್ತಮೋ.

೨೦. ಅಭಿಭೂ ಸಮ್ಭವೋ ಚೇವ, ಅಹೇಸುಂ ಅಗ್ಗಸಾವಕಾ;

ಖೇಮಙ್ಕರೋ ನಾಮುಪಟ್ಠಾಕೋ, ಸಿಖಿಸ್ಸಾಪಿ ಮಹೇಸಿನೋ.

೨೧. ಸಖಿಲಾ ಚ ಪದುಮಾ ಚ, ಅಹೇಸುಂ ಅಗ್ಗಸಾವಿಕಾ;

ಬೋಧಿ ತಸ್ಸ ಭಗವತೋ, ಪುಣ್ಡರೀಕೋತಿ ವುಚ್ಚತಿ.

೨೨. ಸಿರಿವಡ್ಢೋ ಚ ನನ್ದೋ ಚ, ಅಹೇಸುಂ ಅಗ್ಗುಪಟ್ಠಕಾ;

ಚಿತ್ತಾ ಚೇವ ಸುಗುತ್ತಾ ಚ, ಅಹೇಸುಂ ಅಗ್ಗುಪಟ್ಠಿಕಾ.

೨೩. ಉಚ್ಚತ್ತನೇನ ಸೋ ಬುದ್ಧೋ, ಸತ್ತತಿಹತ್ಥಮುಗ್ಗತೋ;

ಕಞ್ಚನಗ್ಘಿಯಸಙ್ಕಾಸೋ, ದ್ವತ್ತಿಂಸವರಲಕ್ಖಣೋ.

೨೪. ತಸ್ಸಾಪಿ ಬ್ಯಾಮಪ್ಪಭಾ ಕಾಯಾ, ದಿವಾರತ್ತಿಂ ನಿರನ್ತರಂ;

ದಿಸೋದಿಸಂ ನಿಚ್ಛರನ್ತಿ, ತೀಣಿಯೋಜನಸೋ ಪಭಾ.

೨೫. ಸತ್ತತಿವಸ್ಸಸಹಸ್ಸಾನಿ, ಆಯು ತಸ್ಸ ಮಹೇಸಿನೋ;

ತಾವತಾ ತಿಟ್ಠಮಾನೋ ಸೋ, ತಾರೇಸಿ ಜನತಂ ಬಹುಂ.

೨೬. ಧಮ್ಮಮೇಘಂ ಪವಸ್ಸೇತ್ವಾ, ತೇಮಯಿತ್ವಾ ಸದೇವಕೇ;

ಖೇಮನ್ತಂ ಪಾಪಯಿತ್ವಾನ, ನಿಬ್ಬುತೋ ಸೋ ಸಸಾವಕೋ.

೨೭. ಅನುಬ್ಯಞ್ಜನಸಮ್ಪನ್ನಂ, ದ್ವತ್ತಿಂಸವರಲಕ್ಖಣಂ;

ಸಬ್ಬಂ ತಮನ್ತರಹಿತಂ, ನನು ರಿತ್ತಾ ಸಬ್ಬಸಙ್ಖಾರಾ.

೨೮. ಸಿಖೀ ಮುನಿವರೋ ಬುದ್ಧೋ, ಅಸ್ಸಾರಾಮಮ್ಹಿ ನಿಬ್ಬುತೋ;

ತತ್ಥೇವಸ್ಸ ಥೂಪವರೋ, ತೀಣಿಯೋಜನಮುಗ್ಗತೋತಿ.

ಸಿಖಿಸ್ಸ ಭಗವತೋ ವಂಸೋ ವೀಸತಿಮೋ.