೧೮. ಸಿದ್ಧತ್ಥಬುದ್ಧವಂಸೋ

೧. ಧಮ್ಮದಸ್ಸಿಸ್ಸ ಅಪರೇನ, ಸಿದ್ಧತ್ಥೋ ನಾಮ ನಾಯಕೋ;

ನಿಹನಿತ್ವಾ ತಮಂ ಸಬ್ಬಂ, ಸೂರಿಯೋ ಅಬ್ಭುಗ್ಗತೋ ಯಥಾ.

೨. ಸೋಪಿ ಪತ್ವಾನ ಸಮ್ಬೋಧಿಂ, ಸನ್ತಾರೇನ್ತೋ ಸದೇವಕಂ;

ಅಭಿವಸ್ಸಿ ಧಮ್ಮಮೇಘೇನ, ನಿಬ್ಬಾಪೇನ್ತೋ ಸದೇವಕಂ.

೩. ತಸ್ಸಾಪಿ ಅತುಲತೇಜಸ್ಸ, ಅಹೇಸುಂ ಅಭಿಸಮಯಾ ತಯೋ;

ಕೋಟಿಸತಸಹಸ್ಸಾನಂ, ಪಠಮಾಭಿಸಮಯೋ ಅಹು.

೪. ಪುನಾಪರಂ ಭೀಮರಥೇ [ಹಿಮರಟ್ಠೇ (ಕ.)], ಯದಾ ಆಹನಿ ದುನ್ದುಭಿಂ;

ತದಾ ನವುತಿಕೋಟೀನಂ, ದುತಿಯಾಭಿಸಮಯೋ ಅಹು.

೫. ಯದಾ ಬುದ್ಧೋ ಧಮ್ಮಂ ದೇಸೇಸಿ, ವೇಭಾರೇ ಸೋ ಪುರುತ್ತಮೇ;

ತದಾ ನವುತಿಕೋಟೀನಂ, ತತಿಯಾಭಿಸಮಯೋ ಅಹು.

೬. ಸನ್ನಿಪಾತಾ ತಯೋ ಆಸುಂ, ತಸ್ಮಿಮ್ಪಿ ದ್ವಿಪದುತ್ತಮೇ;

ಖೀಣಾಸವಾನಂ ವಿಮಲಾನಂ, ಸನ್ತಚಿತ್ತಾನ ತಾದಿನಂ.

೭. ಕೋಟಿಸತಾನಂ ನವುತೀನಂ [ನವುತಿಯಾ (ಸ್ಯಾ. ಕಂ.)], ಅಸೀತಿಯಾಪಿ ಚ ಕೋಟಿನಂ;

ಏತೇ ಆಸುಂ ತಯೋ ಠಾನಾ, ವಿಮಲಾನಂ ಸಮಾಗಮೇ.

೮. ಅಹಂ ತೇನ ಸಮಯೇನ, ಮಙ್ಗಲೋ ನಾಮ ತಾಪಸೋ;

ಉಗ್ಗತೇಜೋ ದುಪ್ಪಸಹೋ, ಅಭಿಞ್ಞಾಬಲಸಮಾಹಿತೋ.

೯. ಜಮ್ಬುತೋ ಫಲಮಾನೇತ್ವಾ [ಫಲಮಾಹತ್ವಾ (ಸೀ. ಸ್ಯಾ.)] ಸಿದ್ಧತ್ಥಸ್ಸ ಅದಾಸಹಂ;

ಪಟಿಗ್ಗಹೇತ್ವಾ ಸಮ್ಬುದ್ಧೋ, ಇದಂ ವಚನಮಬ್ರವಿ.

೧೦. ‘‘ಪಸ್ಸಥ ಇಮಂ ತಾಪಸಂ, ಜಟಿಲಂ ಉಗ್ಗತಾಪನಂ;

ಚತುನ್ನವುತಿತೋ ಕಪ್ಪೇ, ಅಯಂ ಬುದ್ಧೋ ಭವಿಸ್ಸತಿ.

೧೧. ‘‘ಪಧಾನಂ ಪದಹಿತ್ವಾನ…ಪೇ… ಹೇಸ್ಸಾಮ ಸಮ್ಮುಖಾ ಇಮಂ’’.

೧೨. ತಸ್ಸಾಪಿ ವಚನಂ ಸುತ್ವಾ, ಭಿಯ್ಯೋ ಚಿತ್ತಂ ಪಸಾದಯಿಂ;

ಉತ್ತರಿಂ ವತಮಧಿಟ್ಠಾಸಿಂ, ದಸಪಾರಮಿಪೂರಿಯಾ.

೧೩. ವೇಭಾರಂ ನಾಮ ನಗರಂ, ಉದೇನೋ ನಾಮ ಖತ್ತಿಯೋ;

ಸುಫಸ್ಸಾ ನಾಮ ಜನಿಕಾ, ಸಿದ್ಧತ್ಥಸ್ಸ ಮಹೇಸಿನೋ.

೧೪. ದಸವಸ್ಸಸಹಸ್ಸಾನಿ, ಅಗಾರಂ ಅಜ್ಝ ಸೋ ವಸಿ;

ಕೋಕಾಸುಪ್ಪಲಕೋಕನದಾ, ತಯೋ ಪಾಸಾದಮುತ್ತಮಾ.

೧೫. ತಿಸೋಳಸಸಹಸ್ಸಾನಿ, ನಾರಿಯೋ ಸಮಲಙ್ಕತಾ;

ಸೋಮನಸ್ಸಾ ನಾಮ ಸಾ ನಾರೀ, ಅನುಪಮೋ ನಾಮ ಅತ್ರಜೋ.

೧೬. ನಿಮಿತ್ತೇ ಚತುರೋ ದಿಸ್ವಾ, ಸಿವಿಕಾಯಾಭಿನಿಕ್ಖಮಿ;

ಅನೂನದಸಮಾಸಾನಿ, ಪಧಾನಂ ಪದಹೀ ಜಿನೋ.

೧೭. ಬ್ರಹ್ಮುನಾ ಯಾಚಿತೋ ಸನ್ತೋ, ಸಿದ್ಧತ್ಥೋ ಲೋಕನಾಯಕೋ;

ವತ್ತಿ ಚಕ್ಕಂ ಮಹಾವೀರೋ, ಮಿಗದಾಯೇ ನರುತ್ತಮೋ.

೧೮. ಸಮ್ಬಲೋ ಚ ಸುಮಿತ್ತೋ ಚ, ಅಹೇಸುಂ ಅಗ್ಗಸಾವಕಾ;

ರೇವತೋ ನಾಮುಪಟ್ಠಾಕೋ, ಸಿದ್ಧತ್ಥಸ್ಸ ಮಹೇಸಿನೋ.

೧೯. ಸೀವಲಾ ಚ ಸುರಾಮಾ ಚ, ಅಹೇಸುಂ ಅಗ್ಗಸಾವಿಕಾ;

ಬೋಧಿ ತಸ್ಸ ಭಗವತೋ, ಕಣಿಕಾರೋತಿ ವುಚ್ಚತಿ.

೨೦. ಸುಪ್ಪಿಯೋ ಚ ಸಮುದ್ದೋ ಚ, ಅಹೇಸುಂ ಅಗ್ಗುಪಟ್ಠಕಾ;

ರಮ್ಮಾ ಚೇವ ಸುರಮ್ಮಾ ಚ, ಅಹೇಸುಂ ಅಗ್ಗುಪಟ್ಠಿಕಾ.

೨೧. ಸೋ ಬುದ್ಧೋ ಸಟ್ಠಿರತನಂ, ಅಹೋಸಿ ನಭಮುಗ್ಗತೋ;

ಕಞ್ಚನಗ್ಘಿಯಸಙ್ಕಾಸೋ, ದಸಸಹಸ್ಸೀ ವಿರೋಚತಿ.

೨೨. ಸೋಪಿ ಬುದ್ಧೋ ಅಸಮಸಮೋ, ಅತುಲೋ ಅಪ್ಪಟಿಪುಗ್ಗಲೋ;

ವಸ್ಸಸತಸಹಸ್ಸಾನಿ, ಲೋಕೇ ಅಟ್ಠಾಸಿ ಚಕ್ಖುಮಾ.

೨೩. ವಿಪುಲಂ ಪಭಂ ದಸ್ಸಯಿತ್ವಾ, ಪುಪ್ಫಾಪೇತ್ವಾನ ಸಾವಕೇ;

ವಿಲಾಸೇತ್ವಾ ಸಮಾಪತ್ಯಾ, ನಿಬ್ಬುತೋ ಸೋ ಸಸಾವಕೋ.

೨೪. ಸಿದ್ಧತ್ಥೋ ಮುನಿವರೋ ಬುದ್ಧೋ, ಅನೋಮಾರಾಮಮ್ಹಿ ನಿಬ್ಬುತೋ;

ತತ್ಥೇವಸ್ಸ ಥೂಪವರೋ, ಚತುಯೋಜನಮುಗ್ಗತೋತಿ.

ಸಿದ್ಧತ್ಥಸ್ಸ ಭಗವತೋ ವಂಸೋ ಸೋಳಸಮೋ.