೧೪. ಸುಜಾತಬುದ್ಧವಂಸೋ

೧. ತತ್ಥೇವ ಮಣ್ಡಕಪ್ಪಮ್ಹಿ, ಸುಜಾತೋ ನಾಮ ನಾಯಕೋ;

ಸೀಹಹನುಸಭಕ್ಖನ್ಧೋ, ಅಪ್ಪಮೇಯ್ಯೋ ದುರಾಸದೋ.

೨. ಚನ್ದೋವ ವಿಮಲೋ ಸುದ್ಧೋ, ಸತರಂಸೀವ ಪತಾಪವಾ;

ಏವಂ ಸೋಭತಿ ಸಮ್ಬುದ್ಧೋ, ಜಲನ್ತೋ ಸಿರಿಯಾ ಸದಾ.

೩. ಪಾಪುಣಿತ್ವಾನ ಸಮ್ಬುದ್ಧೋ, ಕೇವಲಂ ಬೋಧಿಮುತ್ತಮಂ;

ಸುಮಙ್ಗಲಮ್ಹಿ ನಗರೇ, ಧಮ್ಮಚಕ್ಕಂ ಪವತ್ತಯಿ.

೪. ದೇಸೇನ್ತೇ [ದೇಸೇನ್ತೋ (ಸ್ಯಾ. ಕಂ.)] ಪವರಂ ಧಮ್ಮಂ, ಸುಜಾತೇ ಲೋಕನಾಯಕೇ [ಸುಜಾತೋ ಲೋಕನಾಯಕೋ (ಸ್ಯಾ. ಕಂ.)];

ಅಸೀತಿಕೋಟೀ ಅಭಿಸಮಿಂಸು, ಪಠಮೇ ಧಮ್ಮದೇಸನೇ.

೫. ಯದಾ ಸುಜಾತೋ ಅಮಿತಯಸೋ, ದೇವೇ ವಸ್ಸಂ ಉಪಾಗಮಿ;

ಸತ್ತತಿಂಸಸತಸಹಸ್ಸಾನಂ, ದುತಿಯಾಭಿಸಮಯೋ ಅಹು.

೬. ಯದಾ ಸುಜಾತೋ ಅಸಮಸಮೋ, ಉಪಗಚ್ಛಿ ಪಿತುಸನ್ತಿಕಂ;

ಸಟ್ಠಿಸತಸಹಸ್ಸಾನಂ [ಸತ್ತತಿಂಸಸಹಸ್ಸಾನಂ (ಸೀ.)], ತತಿಯಾಭಿಸಮಯೋ ಅಹು.

೭. ಸನ್ನಿಪಾತಾ ತಯೋ ಆಸುಂ, ಸುಜಾತಸ್ಸ ಮಹೇಸಿನೋ;

ಖೀಣಾಸವಾನಂ ವಿಮಲಾನಂ, ಸನ್ತಚಿತ್ತಾನ ತಾದಿನಂ.

೮. ಅಭಿಞ್ಞಾಬಲಪ್ಪತ್ತಾನಂ, ಅಪ್ಪತ್ತಾನಂ ಭವಾಭವೇ;

ಸಟ್ಠಿಸತಸಹಸ್ಸಾನಿ, ಪಠಮಂ ಸನ್ನಿಪತಿಂಸು ತೇ.

೯. ಪುನಾಪರಂ ಸನ್ನಿಪಾತೇ, ತಿದಿವೋರೋಹಣೇ ಜಿನೇ;

ಪಞ್ಞಾಸಸತಸಹಸ್ಸಾನಂ, ದುತಿಯೋ ಆಸಿ ಸಮಾಗಮೋ.

೧೦. ಉಪಸಙ್ಕಮನ್ತೋ ನರಾಸಭಂ, ತಸ್ಸ ಯೋ ಅಗ್ಗಸಾವಕೋ;

ಚತೂಹಿ ಸತಸಹಸ್ಸೇಹಿ, ಸಮ್ಬುದ್ಧಂ ಉಪಸಙ್ಕಮಿ.

೧೧. ಅಹಂ ತೇನ ಸಮಯೇನ, ಚತುದೀಪಮ್ಹಿ ಇಸ್ಸರೋ;

ಅನ್ತಲಿಕ್ಖಚರೋ ಆಸಿಂ, ಚಕ್ಕವತ್ತೀ ಮಹಬ್ಬಲೋ.

೧೨. ಲೋಕೇ ಅಚ್ಛರಿಯಂ ದಿಸ್ವಾ, ಅಬ್ಭುತಂ ಲೋಮಹಂಸನಂ;

ಉಪಗನ್ತ್ವಾನ ವನ್ದಿಂ ಸೋ, ಸುಜಾತಂ ಲೋಕನಾಯಕಂ.

೧೩. ಚತುದೀಪೇ ಮಹಾರಜ್ಜಂ, ರತನೇ ಸತ್ತ ಉತ್ತಮೇ;

ಬುದ್ಧೇ ನಿಯ್ಯಾದಯಿತ್ವಾನ, ಪಬ್ಬಜಿಂ ತಸ್ಸ ಸನ್ತಿಕೇ.

೧೪. ಆರಾಮಿಕಾ ಜನಪದೇ, ಉಟ್ಠಾನಂ ಪಟಿಪಿಣ್ಡಿಯ;

ಉಪನೇನ್ತಿ ಭಿಕ್ಖುಸಙ್ಘಸ್ಸ, ಪಚ್ಚಯಂ ಸಯನಾಸನಂ.

೧೫. ಸೋಪಿ ಮಂ ಬುದ್ಧೋ [ತದಾ (ಸ್ಯಾ. ಕಂ.)] ಬ್ಯಾಕಾಸಿ, ದಸಸಹಸ್ಸಿಮ್ಹಿ ಇಸ್ಸರೋ;

‘‘ತಿಂಸಕಪ್ಪಸಹಸ್ಸಮ್ಹಿ, ಅಯಂ ಬುದ್ಧೋ ಭವಿಸ್ಸತಿ.

೧೬. ‘‘ಪಧಾನಂ ಪದಹಿತ್ವಾನ…ಪೇ… ಹೇಸ್ಸಾಮ ಸಮ್ಮುಖಾ ಇಮಂ’’.

೧೭. ತಸ್ಸಾಪಿ ವಚನಂ ಸುತ್ವಾ, ಭಿಯ್ಯೋ ಹಾಸಂ ಜನೇಸಹಂ;

ಅಧಿಟ್ಠಹಿಂ ವತಂ ಉಗ್ಗಂ, ದಸಪಾರಮಿಪೂರಿಯಾ.

೧೮. ಸುತ್ತನ್ತಂ ವಿನಯಞ್ಚಾಪಿ, ನವಙ್ಗಂ ಸತ್ಥುಸಾಸನಂ;

ಸಬ್ಬಂ ಪರಿಯಾಪುಣಿತ್ವಾನ, ಸೋಭಯಿಂ ಜಿನಸಾಸನಂ.

೧೯. ತತ್ಥಪ್ಪಮತ್ತೋ ವಿಹರನ್ತೋ, ಬ್ರಹ್ಮಂ ಭಾವೇತ್ವ ಭಾವನಂ;

ಅಭಿಞ್ಞಾಪಾರಮಿಂ ಗನ್ತ್ವಾ, ಬ್ರಹ್ಮಲೋಕಮಗಞ್ಛಹಂ.

೨೦. ಸುಮಙ್ಗಲಂ ನಾಮ ನಗರಂ, ಉಗ್ಗತೋ ನಾಮ ಖತ್ತಿಯೋ;

ಮಾತಾ ಪಭಾವತೀ ನಾಮ, ಸುಜಾತಸ್ಸ ಮಹೇಸಿನೋ.

೨೧. ನವವಸ್ಸಸಹಸ್ಸಾನಿ, ಅಗಾರಂ ಅಜ್ಝ ಸೋ ವಸಿ;

ಸಿರೀ ಉಪಸಿರೀ ನನ್ದೋ, ತಯೋ ಪಾಸಾದಮುತ್ತಮಾ.

೨೨. ತೇವೀಸತಿಸಹಸ್ಸಾನಿ, ನಾರಿಯೋ ಸಮಲಙ್ಕತಾ;

ಸಿರಿನನ್ದಾ ನಾಮ ನಾರೀ, ಉಪಸೇನೋ ನಾಮ ಅತ್ರಜೋ.

೨೩. ನಿಮಿತ್ತೇ ಚತುರೋ ದಿಸ್ವಾ, ಅಸ್ಸಯಾನೇನ ನಿಕ್ಖಮಿ;

ಅನೂನನವಮಾಸಾನಿ, ಪಧಾನಂ ಪದಹೀ ಜಿನೋ.

೨೪. ಬ್ರಹ್ಮುನಾ ಯಾಚಿತೋ ಸನ್ತೋ, ಸುಜಾತೋ ಲೋಕನಾಯಕೋ;

ವತ್ತಿ ಚಕ್ಕಂ ಮಹಾವೀರೋ, ಸುಮಙ್ಗಲುಯ್ಯಾನಮುತ್ತಮೇ.

೨೫. ಸುದಸ್ಸನೋ ಸುದೇವೋ ಚ, ಅಹೇಸುಂ ಅಗ್ಗಸಾವಕಾ;

ನಾರದೋ ನಾಮುಪಟ್ಠಾಕೋ, ಸುಜಾತಸ್ಸ ಮಹೇಸಿನೋ.

೨೬. ನಾಗಾ ಚ ನಾಗಸಮಾಲಾ ಚ, ಅಹೇಸುಂ ಅಗ್ಗಸಾವಿಕಾ;

ಬೋಧಿ ತಸ್ಸ ಭಗವತೋ, ಮಹಾವೇಳೂತಿ ವುಚ್ಚತಿ.

೨೭. ಸೋ ಚ ರುಕ್ಖೋ ಘನಕ್ಖನ್ಧೋ [ಘನರುಚಿರೋ (ಸೀ. ಕ.)], ಅಚ್ಛಿದ್ದೋ ಹೋತಿ ಪತ್ತಿಕೋ;

ಉಜು ವಂಸೋ ಬ್ರಹಾ ಹೋತಿ, ದಸ್ಸನೀಯೋ ಮನೋರಮೋ.

೨೮. ಏಕಕ್ಖನ್ಧೋ ಪವಡ್ಢಿತ್ವಾ, ತತೋ ಸಾಖಾ ಪಭಿಜ್ಜತಿ;

ಯಥಾ ಸುಬದ್ಧೋ ಮೋರಹತ್ಥೋ, ಏವಂ ಸೋಭತಿ ಸೋ ದುಮೋ.

೨೯. ನ ತಸ್ಸ ಕಣ್ಟಕಾ ಹೋನ್ತಿ, ನಾಪಿ ಛಿದ್ದಂ ಮಹಾ ಅಹು;

ವಿತ್ಥಿಣ್ಣಸಾಖೋ ಅವಿರಲೋ, ಸನ್ದಚ್ಛಾಯೋ ಮನೋರಮೋ.

೩೦. ಸುದತ್ತೋ ಚೇವ ಚಿತ್ತೋ ಚ, ಅಹೇಸುಂ ಅಗ್ಗುಪಟ್ಠಕಾ;

ಸುಭದ್ದಾ ಚ ಪದುಮಾ ಚ, ಅಹೇಸುಂ ಅಗ್ಗುಪಟ್ಠಿಕಾ.

೩೧. ಪಞ್ಞಾಸರತನೋ ಆಸಿ, ಉಚ್ಚತ್ತನೇನ ಸೋ ಜಿನೋ;

ಸಬ್ಬಾಕಾರವರೂಪೇತೋ, ಸಬ್ಬಗುಣಮುಪಾಗತೋ.

೩೨. ತಸ್ಸ ಪಭಾ ಅಸಮಸಮಾ, ನಿದ್ಧಾವತಿ ಸಮನ್ತತೋ;

ಅಪ್ಪಮಾಣೋ ಅತುಲಿಯೋ, ಓಪಮ್ಮೇಹಿ ಅನೂಪಮೋ.

೩೩. ನವುತಿವಸ್ಸಸಹಸ್ಸಾನಿ, ಆಯು ವಿಜ್ಜತಿ ತಾವದೇ;

ತಾವತಾ ತಿಟ್ಠಮಾನೋ ಸೋ, ತಾರೇಸಿ ಜನತಂ ಬಹುಂ.

೩೪. ಯಥಾಪಿ ಸಾಗರೇ ಊಮೀ, ಗಗನೇ ತಾರಕಾ ಯಥಾ;

ಏವಂ ತದಾ ಪಾವಚನಂ, ಅರಹನ್ತೇಹಿ ಚಿತ್ತಿತಂ [ಚಿತ್ತಕಂ (ಸ್ಯಾ. ಕಂ.)].

೩೫. ಸೋ ಚ ಬುದ್ಧೋ ಅಸಮಸಮೋ, ಗುಣಾನಿ ಚ ತಾನಿ ಅತುಲಿಯಾನಿ;

ಸಬ್ಬಂ ತಮನ್ತರಹಿತಂ, ನನು ರಿತ್ತಾ ಸಬ್ಬಸಙ್ಖಾರಾ.

೩೬. ಸುಜಾತೋ ಜಿನವರೋ ಬುದ್ಧೋ, ಸಿಲಾರಾಮಮ್ಹಿ ನಿಬ್ಬುತೋ;

ತತ್ಥೇವ ತಸ್ಸ ಚೇತಿಯೋ [ತತ್ಥೇವ ಚೇತಿಯೋ ಸತ್ಥು (ಸ್ಯಾ. ಕಂ.)], ತೀಣಿಗಾವುತಮುಗ್ಗತೋತಿ.

ಸುಜಾತಸ್ಸ ಭಗವತೋ ವಂಸೋ ದ್ವಾದಸಮೋ.