೧೦. ಪದುಮಬುದ್ಧವಂಸೋ

೧. ಅನೋಮದಸ್ಸಿಸ್ಸ ಅಪರೇನ, ಸಮ್ಬುದ್ಧೋ ದ್ವಿಪದುತ್ತಮೋ;

ಪದುಮೋ ನಾಮ ನಾಮೇನ, ಅಸಮೋ ಅಪ್ಪಟಿಪುಗ್ಗಲೋ.

೨. ತಸ್ಸಾಪಿ ಅಸಮಂ ಸೀಲಂ, ಸಮಾಧಿಪಿ ಅನನ್ತಕೋ;

ಅಸಙ್ಖೇಯ್ಯಂ ಞಾಣವರಂ, ವಿಮುತ್ತಿಪಿ ಅನೂಪಮಾ.

೩. ತಸ್ಸಾಪಿ ಅತುಲತೇಜಸ್ಸ, ಧಮ್ಮಚಕ್ಕಪ್ಪವತ್ತನೇ;

ಅಭಿಸಮಯಾ ತಯೋ ಆಸುಂ, ಮಹಾತಮಪವಾಹನಾ.

೪. ಪಠಮಾಭಿಸಮಯೇ ಬುದ್ಧೋ, ಕೋಟಿಸತಮಬೋಧಯಿ;

ದುತಿಯಾಭಿಸಮಯೇ ಧೀರೋ, ನವುತಿಕೋಟಿಮಬೋಧಯಿ.

೫. ಯದಾ ಚ ಪದುಮೋ ಬುದ್ಧೋ, ಓವದೀ ಸಕಮತ್ರಜಂ;

ತದಾ ಅಸೀತಿಕೋಟೀನಂ, ತತಿಯಾಭಿಸಮಯೋ ಅಹು.

೬. ಸನ್ನಿಪಾತಾ ತಯೋ ಆಸುಂ, ಪದುಮಸ್ಸ ಮಹೇಸಿನೋ;

ಕೋಟಿಸತಸಹಸ್ಸಾನಂ, ಪಠಮೋ ಆಸಿ ಸಮಾಗಮೋ.

೭. ಕಥಿನತ್ಥಾರಸಮಯೇ, ಉಪ್ಪನ್ನೇ ಕಥಿನಚೀವರೇ;

ಧಮ್ಮಸೇನಾಪತಿತ್ಥಾಯ, ಭಿಕ್ಖೂ ಸಿಬ್ಬಿಂಸು [ಯಾಚಿಂಸು (ಕ.)] ಚೀವರಂ.

೮. ತದಾ ತೇ ವಿಮಲಾ ಭಿಕ್ಖೂ, ಛಳಭಿಞ್ಞಾ ಮಹಿದ್ಧಿಕಾ;

ತೀಣಿ ಸತಸಹಸ್ಸಾನಿ, ಸಮಿಂಸು ಅಪರಾಜಿತಾ.

೯. ಪುನಾಪರಂ ಸೋ ನರಾಸಭೋ [ನರವುಸಭೋ (ಸ್ಯಾ. ಕಂ.)], ಪವನೇ ವಾಸಂ ಉಪಾಗಮಿ;

ತದಾ ಸಮಾಗಮೋ ಆಸಿ, ದ್ವಿನ್ನಂ ಸತಸಹಸ್ಸಿನಂ.

೧೦. ಅಹಂ ತೇನ ಸಮಯೇನ, ಸೀಹೋ ಆಸಿಂ ಮಿಗಾಧಿಭೂ;

ವಿವೇಕಮನುಬ್ರೂಹನ್ತಂ, ಪವನೇ ಅದ್ದಸಂ ಜಿನಂ.

೧೧. ವನ್ದಿತ್ವಾ ಸಿರಸಾ ಪಾದೇ, ಕತ್ವಾನ ತಂ ಪದಕ್ಖಿಣಂ;

ತಿಕ್ಖತ್ತುಂ ಅಭಿನಾದಿತ್ವಾ, ಸತ್ತಾಹಂ ಜಿನಮುಪಟ್ಠಹಂ.

೧೨. ಸತ್ತಾಹಂ ವರಸಮಾಪತ್ತಿಯಾ, ವುಟ್ಠಹಿತ್ವಾ ತಥಾಗತೋ;

ಮನಸಾ ಚಿನ್ತಯಿತ್ವಾನ, ಕೋಟಿಭಿಕ್ಖೂ ಸಮಾನಯಿ.

೧೩. ತದಾಪಿ ಸೋ ಮಹಾವೀರೋ, ತೇಸಂ ಮಜ್ಝೇ ವಿಯಾಕರಿ;

‘‘ಅಪರಿಮೇಯ್ಯಿತೋ ಕಪ್ಪೇ, ಅಯಂ ಬುದ್ಧೋ ಭವಿಸ್ಸತಿ.

೧೪. ‘‘ಪಧಾನಂ ಪದಹಿತ್ವಾನ…ಪೇ… ಹೇಸ್ಸಾಮ ಸಮ್ಮುಖಾ ಇಮಂ’’.

೧೫. ತಸ್ಸಾಪಿ ವಚನಂ ಸುತ್ವಾ, ಭಿಯ್ಯೋ ಚಿತ್ತಂ ಪಸಾದಯಿಂ;

ಉತ್ತರಿಂ ವತಮಧಿಟ್ಠಾಸಿಂ, ದಸಪಾರಮಿಪೂರಿಯಾ.

೧೬. ಚಮ್ಪಕಂ ನಾಮ ನಗರಂ, ಅಸಮೋ ನಾಮ ಖತ್ತಿಯೋ;

ಅಸಮಾ ನಾಮ ಜನಿಕಾ, ಪದುಮಸ್ಸ ಮಹೇಸಿನೋ.

೧೭. ದಸವಸ್ಸಸಹಸ್ಸಾನಿ, ಅಗಾರಂ ಅಜ್ಝ ಸೋ ವಸಿ;

ನನ್ದಾವಸುಯಸುತ್ತರಾ, ತಯೋ ಪಾಸಾದಮುತ್ತಮಾ.

೧೮. ತೇತ್ತಿಂಸ ಚ ಸಹಸ್ಸಾನಿ, ನಾರಿಯೋ ಸಮಲಙ್ಕತಾ;

ಉತ್ತರಾ ನಾಮ ಸಾ ನಾರೀ, ರಮ್ಮೋ ನಾಮಾಸಿ ಅತ್ರಜೋ.

೧೯. ನಿಮಿತ್ತೇ ಚತುರೋ ದಿಸ್ವಾ, ರಥಯಾನೇನ ನಿಕ್ಖಮಿ;

ಅನೂನಅಟ್ಠಮಾಸಾನಿ, ಪಧಾನಂ ಪದಹೀ ಜಿನೋ.

೨೦. ಬ್ರಹ್ಮುನಾ ಯಾಚಿತೋ ಸನ್ತೋ, ಪದುಮೋ ಲೋಕನಾಯಕೋ;

ವತ್ತಿ ಚಕ್ಕಂ ಮಹಾವೀರೋ, ಧನಞ್ಚುಯ್ಯಾನಮುತ್ತಮೇ.

೨೧. ಸಾಲೋ ಚ ಉಪಸಾಲೋ ಚ, ಅಹೇಸುಂ ಅಗ್ಗಸಾವಕಾ;

ವರುಣೋ ನಾಮುಪಟ್ಠಾಕೋ, ಪದುಮಸ್ಸ ಮಹೇಸಿನೋ.

೨೨. ರಾಧಾ ಚೇವ ಸುರಾಧಾ ಚ, ಅಹೇಸುಂ ಅಗ್ಗಸಾವಿಕಾ;

ಬೋಧಿ ತಸ್ಸ ಭಗವತೋ, ಮಹಾಸೋಣೋತಿ ವುಚ್ಚತಿ.

೨೩. ಭಿಯ್ಯೋ ಚೇವ ಅಸಮೋ ಚ, ಅಹೇಸುಂ ಅಗ್ಗುಪಟ್ಠಕಾ;

ರುಚೀ ಚ ನನ್ದರಾಮಾ ಚ, ಅಹೇಸುಂ ಅಗ್ಗುಪಟ್ಠಿಕಾ.

೨೪. ಅಟ್ಠಪಣ್ಣಾಸರತನಂ, ಅಚ್ಚುಗ್ಗತೋ ಮಹಾಮುನಿ;

ಪಭಾ ನಿದ್ಧಾವತೀ ತಸ್ಸ, ಅಸಮಾ ಸಬ್ಬಸೋ ದಿಸಾ.

೨೫. ಚನ್ದಪ್ಪಭಾ ಸೂರಿಯಪ್ಪಭಾ, ರತನಗ್ಗಿಮಣಿಪ್ಪಭಾ;

ಸಬ್ಬಾಪಿ ತಾ ಹತಾ ಹೋನ್ತಿ, ಪತ್ವಾ ಜಿನಪಭುತ್ತಮಂ.

೨೬. ವಸ್ಸಸತಸಹಸ್ಸಾನಿ, ಆಯು ವಿಜ್ಜತಿ ತಾವದೇ;

ತಾವತಾ ತಿಟ್ಠಮಾನೋ ಸೋ, ತಾರೇಸಿ ಜನತಂ ಬಹುಂ.

೨೭. ಪರಿಪಕ್ಕಮಾನಸೇ ಸತ್ತೇ, ಬೋಧಯಿತ್ವಾ ಅಸೇಸತೋ;

ಸೇಸಕೇ ಅನುಸಾಸಿತ್ವಾ, ನಿಬ್ಬುತೋ ಸೋ ಸಸಾವಕೋ.

೨೮. ಉರಗೋವ ತಚಂ ಜಿಣ್ಣಂ, ವದ್ಧಪತ್ತಂವ ಪಾದಪೋ;

ಜಹಿತ್ವಾ ಸಬ್ಬಸಙ್ಖಾರೇ, ನಿಬ್ಬುತೋ ಸೋ ಯಥಾ ಸಿಖೀ.

೨೯. ಪದುಮೋ ಜಿನವರೋ ಸತ್ಥಾ, ಧಮ್ಮಾರಾಮಮ್ಹಿ ನಿಬ್ಬುತೋ;

ಧಾತುವಿತ್ಥಾರಿಕಂ ಆಸಿ, ತೇಸು ತೇಸು ಪದೇಸತೋತಿ.

ಪದುಮಸ್ಸ ಭಗವತೋ ವಂಸೋ ಅಟ್ಠಮೋ.