೬. ತಿಣಸನ್ಥರದಾಯಕತ್ಥೇರಅಪದಾನಂ

೨೨. ‘‘ಹಿಮವನ್ತಸ್ಸಾವಿದೂರೇ, ಮಹಾಜಾತಸ್ಸರೋ ಅಹು;

ಸತಪತ್ತೇಹಿ ಸಞ್ಛನ್ನೋ, ನಾನಾಸಕುಣಮಾಲಯೋ.

೨೩. ‘‘ತಮ್ಹಿ ನ್ಹತ್ವಾ ಚ ಪಿತ್ವಾ [ಪೀತ್ವಾ (ಸೀ. ಸ್ಯಾ.)] ಚ, ಅವಿದೂರೇ ವಸಾಮಹಂ;

ಅದ್ದಸಂ ಸಮಣಾನಗ್ಗಂ, ಗಚ್ಛನ್ತಂ ಅನಿಲಞ್ಜಸೇ.

೨೪. ‘‘ಮಮ ಸಙ್ಕಪ್ಪಮಞ್ಞಾಯ, ಸತ್ಥಾ ಲೋಕೇ ಅನುತ್ತರೋ;

ಅಬ್ಭತೋ ಓರುಹಿತ್ವಾನ, ಭೂಮಿಯಂಠಾಸಿ ತಾವದೇ.

೨೫. ‘‘ವಿಸಾಣೇನ [ಲಾಯನೇನ (ಸ್ಯಾ.)] ತಿಣಂ ಗಯ್ಹ, ನಿಸೀದನಮದಾಸಹಂ;

ನಿಸೀದಿ ಭಗವಾ ತತ್ಥ, ತಿಸ್ಸೋ ಲೋಕಗ್ಗನಾಯಕೋ.

೨೬. ‘‘ಸಕಂ ಚಿತ್ತಂ ಪಸಾದೇತ್ವಾ, ಅವನ್ದಿ ಲೋಕನಾಯಕಂ;

ಪಟಿಕುಟಿಕೋ [ಉಕ್ಕುಟಿಕೋ (ಸ್ಯಾ. ಕ.)] ಅಪಸಕ್ಕಿಂ, ನಿಜ್ಝಾಯನ್ತೋ ಮಹಾಮುನಿಂ.

೨೭. ‘‘ತೇನ ಚಿತ್ತಪ್ಪಸಾದೇನ, ನಿಮ್ಮಾನಂ ಉಪಪಜ್ಜಹಂ;

ದುಗ್ಗತಿಂ ನಾಭಿಜಾನಾಮಿ, ಸನ್ಥರಸ್ಸ ಇದಂ ಫಲಂ.

೨೮. ‘‘ಇತೋ ದುತಿಯಕೇ ಕಪ್ಪೇ, ಮಿಗ [ಮಿತ್ತ (ಸ್ಯಾ.)] ಸಮ್ಮತಖತ್ತಿಯೋ;

ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.

೨೯. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ತಿಣಸನ್ಥರದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ತಿಣಸನ್ಥರದಾಯಕತ್ಥೇರಸ್ಸಾಪದಾನಂ ಛಟ್ಠಂ.