೧೦. ಉಪವಾನತ್ಥೇರಅಪದಾನಂ

೧೨೨. ‘‘ಪದುಮುತ್ತರೋ ನಾಮ ಜಿನೋ, ಸಬ್ಬಧಮ್ಮಾನ ಪಾರಗೂ;

ಜಲಿತ್ವಾ ಅಗ್ಗಿಕ್ಖನ್ಧೋವ, ಸಮ್ಬುದ್ಧೋ ಪರಿನಿಬ್ಬುತೋ.

೧೨೩. ‘‘ಮಹಾಜನಾ ಸಮಾಗಮ್ಮ, ಪೂಜಯಿತ್ವಾ ತಥಾಗತಂ;

ಚಿತಂ ಕತ್ವಾನ ಸುಗತಂ, ಸರೀರಂ ಅಭಿರೋಪಯುಂ.

೧೨೪. ‘‘ಸರೀರಕಿಚ್ಚಂ ಕತ್ವಾನ, ಧಾತುಂ ತತ್ಥ ಸಮಾನಯುಂ;

ಸದೇವಮನುಸ್ಸಾ ಸಬ್ಬೇ, ಬುದ್ಧಥೂಪಂ ಅಕಂಸು ತೇ.

೧೨೫. ‘‘ಪಠಮಾ ಕಞ್ಚನಮಯಾ, ದುತಿಯಾ ಚ ಮಣಿಮಯಾ;

ತತಿಯಾ ರೂಪಿಯಮಯಾ, ಚತುತ್ಥೀ ಫಲಿಕಾಮಯಾ.

೧೨೬. ‘‘ತತ್ಥ ಪಞ್ಚಮಿಕಾ ಚೇವ [ತತ್ಥ ಪಞ್ಚಮಿಕಾ ಚೇತಿ (ಸೀ.)], ಲೋಹಿತಙ್ಕಮಯಾ ಅಹು;

ಛಟ್ಠಾ ಮಸಾರಗಲ್ಲಸ್ಸ, ಸಬ್ಬಂ ರತನಮಯೂಪರಿ.

೧೨೭. ‘‘ಜಙ್ಘಾ ಮಣಿಮಯಾ ಆಸಿ, ವೇದಿಕಾ ರತನಾಮಯಾ;

ಸಬ್ಬಸೋಣ್ಣಮಯೋ ಥೂಪೋ, ಉದ್ಧಂ ಯೋಜನಮುಗ್ಗತೋ.

೧೨೮. ‘‘ದೇವಾ ತತ್ಥ ಸಮಾಗನ್ತ್ವಾ, ಏಕತೋ ಮನ್ತಯುಂ ತದಾ;

‘ಮಯಮ್ಪಿ ಥೂಪಂ ಕಸ್ಸಾಮ, ಲೋಕನಾಥಸ್ಸ ತಾದಿನೋ.

೧೨೯. ‘‘‘ಧಾತು ಆವೇಣಿಕಾ ನತ್ಥಿ, ಸರೀರಂ ಏಕಪಿಣ್ಡಿತಂ;

ಇಮಮ್ಹಿ ಬುದ್ಧಥೂಪಮ್ಹಿ, ಕಸ್ಸಾಮ ಕಞ್ಚುಕಂ ಮಯಂ’.

೧೩೦. ‘‘ದೇವಾ ಸತ್ತಹಿ ರತ್ನೇಹಿ, ಅಞ್ಞಂ ವಡ್ಢೇಸುಂ ಯೋಜನಂ;

ಥೂಪೋ ದ್ವಿಯೋಜನುಬ್ಬೇಧೋ, ತಿಮಿರಂ ಬ್ಯಪಹನ್ತಿ ಸೋ.

೧೩೧. ‘‘ನಾಗಾ ತತ್ಥ ಸಮಾಗನ್ತ್ವಾ, ಏಕತೋ ಮನ್ತಯುಂ ತದಾ;

‘ಮನುಸ್ಸಾ ಚೇವ ದೇವಾ ಚ, ಬುದ್ಧಥೂಪಂ ಅಕಂಸು ತೇ.

೧೩೨. ‘‘‘ಮಾ ನೋ ಪಮತ್ತಾ ಅಸ್ಸುಮ್ಹ, ಅಪ್ಪಮತ್ತಾ ಸದೇವಕಾ;

ಮಯಮ್ಪಿ ಥೂಪಂ ಕಸ್ಸಾಮ, ಲೋಕನಾಥಸ್ಸ ತಾದಿನೋ’.

೧೩೩. ‘‘ಇನ್ದನೀಲಂ ಮಹಾನೀಲಂ, ಅಥೋ ಜೋತಿರಸಂ ಮಣಿಂ;

ಏಕತೋ ಸನ್ನಿಪಾತೇತ್ವಾ, ಬುದ್ಧಥೂಪಂ ಅಛಾದಯುಂ.

೧೩೪. ‘‘ಸಬ್ಬಂ ಮಣಿಮಯಂ ಆಸಿ, ಯಾವತಾ [ತಾವತಾ (ಕ.)] ಬುದ್ಧಚೇತಿಯಂ;

ತಿಯೋಜನಸಮುಬ್ಬೇಧಂ, ಆಲೋಕಕರಣಂ ತದಾ.

೧೩೫. ‘‘ಗರುಳಾ ಚ ಸಮಾಗನ್ತ್ವಾ, ಏಕತೋ ಮನ್ತಯುಂ ತದಾ;

‘ಮನುಸ್ಸಾ ದೇವನಾಗಾ ಚ, ಬುದ್ಧಪೂಜಂ ಅಕಂಸು ತೇ.

೧೩೬. ‘‘‘ಮಾ ನೋ ಪಮತ್ತಾ ಅಸ್ಸುಮ್ಹ, ಅಪ್ಪಮತ್ತಾ ಸದೇವಕಾ;

ಮಯಮ್ಪಿ ಥೂಪಂ ಕಸ್ಸಾಮ, ಲೋಕನಾಥಸ್ಸ ತಾದಿನೋ’.

೧೩೭. ‘‘ಸಬ್ಬಂ ಮಣಿಮಯಂ ಥೂಪಂ, ಅಕರುಂ ತೇ ಚ ಕಞ್ಚುಕಂ;

ಯೋಜನಂ ತೇಪಿ ವಡ್ಢೇಸುಂ, ಆಯತಂ ಬುದ್ಧಚೇತಿಯಂ.

೧೩೮. ‘‘ಚತುಯೋಜನಮುಬ್ಬೇಧೋ, ಬುದ್ಧಥೂಪೋ ವಿರೋಚತಿ;

ಓಭಾಸೇತಿ ದಿಸಾ ಸಬ್ಬಾ, ಸತರಂಸೀವ ಉಗ್ಗತೋ.

೧೩೯. ‘‘ಕುಮ್ಭಣ್ಡಾ ಚ ಸಮಾಗನ್ತ್ವಾ, ಏಕತೋ ಮನ್ತಯುಂ ತದಾ;

‘ಮನುಸ್ಸಾ ಚೇವ ದೇವಾ ಚ, ನಾಗಾ ಚ ಗರುಳಾ ತಥಾ.

೧೪೦. ‘‘‘ಪಚ್ಚೇಕಂ ಬುದ್ಧಸೇಟ್ಠಸ್ಸ, ಅಕಂಸು ಥೂಪಮುತ್ತಮಂ;

ಮಾ ನೋ ಪಮತ್ತಾ ಅಸ್ಸುಮ್ಹ, ಅಪ್ಪಮತ್ತಾ ಸದೇವಕಾ.

೧೪೧. ‘‘‘ಮಯಮ್ಪಿ ಥೂಪಂ ಕಸ್ಸಾಮ, ಲೋಕನಾಥಸ್ಸ ತಾದಿನೋ;

ರತನೇಹಿ ಛಾದೇಸ್ಸಾಮ, ಆಯತಂ ಬುದ್ಧಚೇತಿಯಂ’.

೧೪೨. ‘‘ಯೋಜನಂ ತೇಪಿ ವಡ್ಢೇಸುಂ, ಆಯತಂ ಬುದ್ಧಚೇತಿಯಂ;

ಪಞ್ಚಯೋಜನಮುಬ್ಬೇಧೋ, ಥೂಪೋ ಓಭಾಸತೇ ತದಾ.

೧೪೩. ‘‘ಯಕ್ಖಾ ತತ್ಥ ಸಮಾಗನ್ತ್ವಾ, ಏಕತೋ ಮನ್ತಯುಂ ತದಾ;

‘ಮನುಸ್ಸಾ ದೇವನಾಗಾ ಚ, ಗರುಳಾ ಚ ಕುಮ್ಭಣ್ಡಕಾ.

೧೪೪. ‘‘‘ಪಚ್ಚೇಕಂ ಬುದ್ಧಸೇಟ್ಠಸ್ಸ, ಅಕಂಸು ಥೂಪಮುತ್ತಮಂ;

ಮಾ ನೋ ಪಮತ್ತಾ ಅಸ್ಸುಮ್ಹ, ಅಪ್ಪಮತ್ತಾ ಸದೇವಕಾ.

೧೪೫. ‘‘‘ಮಯಮ್ಪಿ ಥೂಪಂ ಕಸ್ಸಾಮ, ಲೋಕನಾಥಸ್ಸ ತಾದಿನೋ;

ಫಲಿಕಾ ಛಾದಯಿಸ್ಸಾಮ, ಆಯತಂ ಬುದ್ಧಚೇತಿಯಂ’.

೧೪೬. ‘‘ಯೋಜನಂ ತೇಪಿ ವಡ್ಢೇಸುಂ, ಆಯತಂ ಬುದ್ಧಚೇತಿಯಂ;

ಛಯೋಜನಿಕಮುಬ್ಬೇಧೋ, ಥೂಪೋ ಓಭಾಸತೇ ತದಾ.

೧೪೭. ‘‘ಗನ್ಧಬ್ಬಾ ಚ ಸಮಾಗನ್ತ್ವಾ, ಏಕತೋ ಮನ್ತಯುಂ ತದಾ;

‘ಮನುಜಾ ದೇವತಾ ನಾಗಾ, ಕುಮ್ಭಣ್ಡಾ ಗರುಳಾ ತಥಾ [ಕುಮ್ಭಣ್ಡಾ ಚ ಯಕ್ಖಾ ತಥಾ (ಸೀ.)].

೧೪೮. ‘‘‘ಸಬ್ಬೇ ಅಕಂಸು ಬುದ್ಧಥೂಪಂ, ಮಯಮೇತ್ಥ ಅಕಾರಕಾ;

ಮಯಮ್ಪಿ ಥೂಪಂ ಕಸ್ಸಾಮ, ಲೋಕನಾಥಸ್ಸ ತಾದಿನೋ’.

೧೪೯. ‘‘ವೇದಿಯೋ ಸತ್ತ ಕತ್ವಾನ, ಧಜಂ ಛತ್ತಂ ಅಕಂಸು ತೇ;

ಸಬ್ಬಸೋಣ್ಣಮಯಂ ಥೂಪಂ, ಗನ್ಧಬ್ಬಾ ಕಾರಯುಂ ತದಾ.

೧೫೦. ‘‘ಸತ್ತಯೋಜನಮುಬ್ಬೇಧೋ, ಥೂಪೋ ಓಭಾಸತೇ ತದಾ;

ರತ್ತಿನ್ದಿವಾ ನ ಞಾಯನ್ತಿ, ಆಲೋಕೋ ಹೋತಿ ಸಬ್ಬದಾ.

೧೫೧. ‘‘ಅಭಿಭೋನ್ತಿ ನ ತಸ್ಸಾಭಾ, ಚನ್ದಸೂರಾ ಸತಾರಕಾ;

ಸಮನ್ತಾ ಯೋಜನಸತೇ, ಪದೀಪೋಪಿ ನ ಪಜ್ಜಲಿ.

೧೫೨. ‘‘ತೇನ ಕಾಲೇನ ಯೇ ಕೇಚಿ, ಥೂಪಂ ಪೂಜೇನ್ತಿ ಮಾನುಸಾ;

ನ ತೇ ಥೂಪಂ ಆರುಹನ್ತಿ, ಅಮ್ಬರೇ ಉಕ್ಖಿಪನ್ತಿ ತೇ.

೧೫೩. ‘‘ದೇವೇಹಿ ಠಪಿತೋ ಯಕ್ಖೋ, ಅಭಿಸಮ್ಮತನಾಮಕೋ;

ಧಜಂ ವಾ ಪುಪ್ಫದಾಮಂ ವಾ, ಅಭಿರೋಪೇತಿ ಉತ್ತರಿಂ.

೧೫೪. ‘‘ನ ತೇ ಪಸ್ಸನ್ತಿ ತಂ ಯಕ್ಖಂ, ದಾಮಂ ಪಸ್ಸನ್ತಿ ಗಚ್ಛತೋ;

ಏವಂ ಪಸ್ಸಿತ್ವಾ ಗಚ್ಛನ್ತಾ, ಸಬ್ಬೇ ಗಚ್ಛನ್ತಿ ಸುಗ್ಗತಿಂ.

೧೫೫. ‘‘ವಿರುದ್ಧಾ ಯೇ ಪಾವಚನೇ, ಪಸನ್ನಾ ಯೇ ಚ ಸಾಸನೇ;

ಪಾಟಿಹೀರಂ ದಟ್ಠುಕಾಮಾ, ಥೂಪಂ ಪೂಜೇನ್ತಿ ಮಾನುಸಾ.

೧೫೬. ‘‘ನಗರೇ ಹಂಸವತಿಯಾ, ಅಹೋಸಿಂ ಭತಕೋ ತದಾ;

ಆಮೋದಿತಂ ಜನಂ ದಿಸ್ವಾ, ಏವಂ ಚಿನ್ತೇಸಹಂ ತದಾ.

೧೫೭. ‘‘‘ಉಳಾರೋ ಭಗವಾ ನೇಸೋ, ಯಸ್ಸ ಧಾತುಘರೇ ದಿಸಂ;

ಇಮಾ ಚ ಜನತಾ ತುಟ್ಠಾ, ಕಾರಂ ಕುಬ್ಬಂ ನ ತಪ್ಪರೇ.

೧೫೮. ‘‘‘ಅಹಮ್ಪಿ ಕಾರಂ ಕಸ್ಸಾಮಿ, ಲೋಕನಾಥಸ್ಸ ತಾದಿನೋ;

ತಸ್ಸ ಧಮ್ಮೇಸು ದಾಯಾದೋ, ಭವಿಸ್ಸಾಮಿ ಅನಾಗತೇ’.

೧೫೯. ‘‘ಸುಧೋತಂ ರಜಕೇನಾಹಂ, ಉತ್ತರೇಯ್ಯಂ ಪಟಂ ಮಮ;

ವೇಳಗ್ಗೇ ಆಲಗ್ಗೇತ್ವಾನ, ಧಜಂ ಉಕ್ಖಿಪಿಮಮ್ಬರೇ.

೧೬೦. ‘‘ಅಭಿಸಮ್ಮತಕೋ ಗಯ್ಹ, ಅಮ್ಬರೇ ಹಾಸಿ ಮೇ ಧಜಂ;

ವಾತೇರಿತಂ ಧಜಂ ದಿಸ್ವಾ, ಭಿಯ್ಯೋ ಹಾಸಂ ಜನೇಸಹಂ.

೧೬೧. ‘‘ತತ್ಥ ಚಿತ್ತಂ ಪಸಾದೇತ್ವಾ, ಸಮಣಂ ಉಪಸಙ್ಕಮಿಂ;

ತಂ ಭಿಕ್ಖುಂ ಅಭಿವಾದೇತ್ವಾ, ವಿಪಾಕಂ ಪುಚ್ಛಹಂ ಧಜೇ.

೧೬೨. ‘‘ಸೋ ಮೇ ಕಥೇಸಿ ಆನನ್ದೀ, ಪೀತಿಸಞ್ಜನನಂ ಮಮ;

‘ತಸ್ಸ ಧಜಸ್ಸ ವಿಪಾಕಂ, ಅನುಭೋಸ್ಸಸಿ ಸಬ್ಬದಾ.

೧೬೩. ‘‘‘ಹತ್ಥಿಅಸ್ಸರಥಾಪತ್ತೀ, ಸೇನಾ ಚ ಚತುರಙ್ಗಿನೀ;

ಪರಿವಾರೇಸ್ಸನ್ತಿ ತಂ ನಿಚ್ಚಂ, ಧಜದಾನಸ್ಸಿದಂ ಫಲಂ.

೧೬೪. ‘‘‘ಸಟ್ಠಿತುರಿಯಸಹಸ್ಸಾನಿ, ಭೇರಿಯೋ ಸಮಲಙ್ಕತಾ;

ಪರಿವಾರೇಸ್ಸನ್ತಿ ತಂ ನಿಚ್ಚಂ, ಧಜದಾನಸ್ಸಿದಂ ಫಲಂ.

೧೬೫. ‘‘‘ಛಳಸೀತಿಸಹಸ್ಸಾನಿ, ನಾರಿಯೋ ಸಮಲಙ್ಕತಾ;

ವಿಚಿತ್ತವತ್ಥಾಭರಣಾ, ಆಮುಕ್ಕಮಣಿಕುಣ್ಡಲಾ.

೧೬೬. ‘‘‘ಆಳಾರಪಮ್ಹಾ ಹಸುಲಾ, ಸುಸಞ್ಞಾ [ಸುತ್ಥನಾ (ಸೀ.) ಅಪ. ಥೇರ ೨.೪೮.೧೯ ಮಣಿಪೂಜಕತ್ಥೇರಾಪದಾನೇಪಿ] ತನುಮಜ್ಝಿಮಾ;

ಪರಿವಾರೇಸ್ಸನ್ತಿ ತಂ ನಿಚ್ಚಂ, ಧಜದಾನಸ್ಸಿದಂ ಫಲಂ.

೧೬೭. ‘‘‘ತಿಂಸಕಪ್ಪಸಹಸ್ಸಾನಿ, ದೇವಲೋಕೇ ರಮಿಸ್ಸಸಿ;

ಅಸೀತಿಕ್ಖತ್ತುಂ ದೇವಿನ್ದೋ, ದೇವರಜ್ಜಂ ಕರಿಸ್ಸಸಿ.

೧೬೮. ‘‘‘ಸಹಸ್ಸಕ್ಖತ್ತುಂ ರಾಜಾ ಚ, ಚಕ್ಕವತ್ತೀ ಭವಿಸ್ಸತಿ;

ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ.

೧೬೯. ‘‘‘ಕಪ್ಪಸತಸಹಸ್ಸಮ್ಹಿ, ಓಕ್ಕಾಕಕುಲಸಮ್ಭವೋ;

ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.

೧೭೦. ‘‘‘ದೇವಲೋಕಾ ಚವಿತ್ವಾನ, ಸುಕ್ಕಮೂಲೇನ ಚೋದಿತೋ;

ಪುಞ್ಞಕಮ್ಮೇನ ಸಞ್ಞುತ್ತೋ, ಬ್ರಹ್ಮಬನ್ಧು ಭವಿಸ್ಸಸಿ.

೧೭೧. ‘‘‘ಅಸೀತಿಕೋಟಿಂ ಛಡ್ಡೇತ್ವಾ, ದಾಸೇ ಕಮ್ಮಕರೇ ಬಹೂ;

ಗೋತಮಸ್ಸ ಭಗವತೋ, ಸಾಸನೇ ಪಬ್ಬಜಿಸ್ಸಸಿ.

೧೭೨. ‘‘‘ಆರಾಧಯಿತ್ವಾ ಸಮ್ಬುದ್ಧಂ, ಗೋತಮಂ ಸಕ್ಯಪುಙ್ಗವಂ;

ಉಪವಾನೋತಿ ನಾಮೇನ, ಹೇಸ್ಸಸಿ ಸತ್ಥು ಸಾವಕೋ’.

೧೭೩. ‘‘ಸತಸಹಸ್ಸೇ ಕತಂ ಕಮ್ಮಂ, ಫಲಂ ದಸ್ಸೇಸಿ ಮೇ ಇಧ;

ಸುಮುತ್ತೋ ಸರವೇಗೋವ, ಕಿಲೇಸೇ ಝಾಪಯಿಂ [ಕಿಲೇಸಾ ಝಾಪಿತಾ (ಸೀ.)] ಮಮ.

೧೭೪. ‘‘ಚಕ್ಕವತ್ತಿಸ್ಸ ಸನ್ತಸ್ಸ, ಚಾತುದ್ದೀಪಿಸ್ಸರಸ್ಸ ಮೇ;

ತೀಣಿ ಯೋಜನಾನಿ ಸಾಮನ್ತಾ, ಉಸ್ಸೀಯನ್ತಿ ಧಜಾ ಸದಾ.

೧೭೫. ‘‘ಸತಸಹಸ್ಸಿತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಧಜದಾನಸ್ಸಿದಂ ಫಲಂ.

೧೭೬. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.

೧೭೭. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೧೭೮. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಉಪವಾನತ್ಥೇರೋ ಇಮಾ ಗಾಥಾಯೋ

ಅಭಾಸಿತ್ಥಾತಿ.

ಉಪವಾನತ್ಥೇರಸ್ಸಾಪದಾನಂ ದಸಮಂ.