೯. ಧಮ್ಮರುಚಿಯತ್ಥೇರಅಪದಾನಂ

೧೬೪. ‘‘ಯದಾ ದೀಪಙ್ಕರೋ ಬುದ್ಧೋ, ಸುಮೇಧಂ ಬ್ಯಾಕರೀ ಜಿನೋ;

‘ಅಪರಿಮೇಯ್ಯೇ ಇತೋ ಕಪ್ಪೇ, ಅಯಂ ಬುದ್ಧೋ ಭವಿಸ್ಸತಿ.

೧೬೫. ‘‘‘ಇಮಸ್ಸ ಜನಿಕಾ ಮಾತಾ, ಮಾಯಾ ನಾಮ ಭವಿಸ್ಸತಿ;

ಪಿತಾ ಸುದ್ಧೋದನೋ ನಾಮ, ಅಯಂ ಹೇಸ್ಸತಿ ಗೋತಮೋ.

೧೬೬. ‘‘‘ಪಧಾನಂ ಪದಹಿತ್ವಾನ, ಕತ್ವಾ ದುಕ್ಕರಕಾರಿಕಂ;

ಅಸ್ಸತ್ಥಮೂಲೇ ಸಮ್ಬುದ್ಧೋ, ಬುಜ್ಝಿಸ್ಸತಿ ಮಹಾಯಸೋ.

೧೬೭. ‘‘‘ಉಪತಿಸ್ಸೋ ಕೋಲಿತೋ ಚ, ಅಗ್ಗಾ ಹೇಸ್ಸನ್ತಿ ಸಾವಕಾ;

ಆನನ್ದೋ ನಾಮ ನಾಮೇನ [ಆನನ್ದೋ ನಾಮುಪಟ್ಠಾಕೋ (ಸ್ಯಾ.)], ಉಪಟ್ಠಿಸ್ಸತಿಮಂ ಜಿನಂ.

೧೬೮. ‘‘‘ಖೇಮಾ ಉಪ್ಪಲವಣ್ಣಾ ಚ, ಅಗ್ಗಾ ಹೇಸ್ಸನ್ತಿ ಸಾವಿಕಾ;

ಚಿತ್ತೋ ಆಳವಕೋ ಚೇವ, ಅಗ್ಗಾ ಹೇಸ್ಸನ್ತುಪಾಸಕಾ.

೧೬೯. ‘‘‘ಖುಜ್ಜುತ್ತರಾ ನನ್ದಮಾತಾ, ಅಗ್ಗಾ ಹೇಸ್ಸನ್ತುಪಾಸಿಕಾ;

ಬೋಧಿ ಇಮಸ್ಸ ವೀರಸ್ಸ, ಅಸ್ಸತ್ಥೋತಿ ಪವುಚ್ಚತಿ’.

೧೭೦. ‘‘ಇದಂ ಸುತ್ವಾನ ವಚನಂ, ಅಸಮಸ್ಸ ಮಹೇಸಿನೋ;

ಆಮೋದಿತಾ ನರಮರೂ, ನಮಸ್ಸನ್ತಿ ಕತಞ್ಜಲೀ.

೧೭೧. ‘‘ತದಾಹಂ ಮಾಣವೋ ಆಸಿಂ, ಮೇಘೋ ನಾಮ ಸುಸಿಕ್ಖಿತೋ;

ಸುತ್ವಾ ಬ್ಯಾಕರಣಂ ಸೇಟ್ಠಂ, ಸುಮೇಧಸ್ಸ ಮಹಾಮುನೇ.

೧೭೨. ‘‘ಸಂವಿಸಟ್ಠೋ ಭವಿತ್ವಾನ, ಸುಮೇಧೇ ಕರುಣಾಸಯೇ [ಕರುಣಾಲಯೇ (ಸ್ಯಾ.)];

ಪಬ್ಬಜನ್ತಞ್ಚ ತಂ ವೀರಂ, ಸಹಾವ ಅನುಪಬ್ಬಜಿಂ.

೧೭೩. ‘‘ಸಂವುತೋ ಪಾತಿಮೋಕ್ಖಸ್ಮಿಂ, ಇನ್ದ್ರಿಯೇಸು ಚ ಪಞ್ಚಸು;

ಸುದ್ಧಾಜೀವೋ ಸತೋ ವೀರೋ, ಜಿನಸಾಸನಕಾರಕೋ.

೧೭೪. ‘‘ಏವಂ ವಿಹರಮಾನೋಹಂ, ಪಾಪಮಿತ್ತೇನ ಕೇನಚಿ;

ನಿಯೋಜಿತೋ ಅನಾಚಾರೇ, ಸುಮಗ್ಗಾ ಪರಿಧಂಸಿತೋ.

೧೭೫. ‘‘ವಿತಕ್ಕವಸಿಕೋ ಹುತ್ವಾ, ಸಾಸನತೋ ಅಪಕ್ಕಮಿಂ;

ಪಚ್ಛಾ ತೇನ ಕುಮಿತ್ತೇನ, ಪಯುತ್ತೋ ಮಾತುಘಾತನಂ.

೧೭೬. ‘‘ಅಕರಿಂ ಆನನ್ತರಿಯಂ [ಅಕರಿಂ ನನ್ತರಿಯಞ್ಚ (ಸ್ಯಾ. ಕ.)], ಘಾತಯಿಂ ದುಟ್ಠಮಾನಸೋ;

ತತೋ ಚುತೋ ಮಹಾವೀಚಿಂ, ಉಪಪನ್ನೋ ಸುದಾರುಣಂ.

೧೭೭. ‘‘ವಿನಿಪಾತಗತೋ ಸನ್ತೋ, ಸಂಸರಿಂ ದುಕ್ಖಿತೋ ಚಿರಂ;

ನ ಪುನೋ ಅದ್ದಸಂ ವೀರಂ, ಸುಮೇಧಂ ನರಪುಙ್ಗವಂ.

೧೭೮. ‘‘ಅಸ್ಮಿಂ ಕಪ್ಪೇ ಸಮುದ್ದಮ್ಹಿ, ಮಚ್ಛೋ ಆಸಿಂ ತಿಮಿಙ್ಗಲೋ;

ದಿಸ್ವಾಹಂ ಸಾಗರೇ ನಾವಂ, ಗೋಚರತ್ಥಮುಪಾಗಮಿಂ.

೧೭೯. ‘‘ದಿಸ್ವಾ ಮಂ ವಾಣಿಜಾ ಭೀತಾ, ಬುದ್ಧಸೇಟ್ಠಮನುಸ್ಸರುಂ;

ಗೋತಮೋತಿ ಮಹಾಘೋಸಂ, ಸುತ್ವಾ ತೇಹಿ ಉದೀರಿತಂ.

೧೮೦. ‘‘ಪುಬ್ಬಸಞ್ಞಂ ಸರಿತ್ವಾನ, ತತೋ ಕಾಲಙ್ಕತೋ ಅಹಂ;

ಸಾವತ್ಥಿಯಂ ಕುಲೇ ಇದ್ಧೇ, ಜಾತೋ ಬ್ರಾಹ್ಮಣಜಾತಿಯಂ.

೧೮೧. ‘‘ಆಸಿಂ ಧಮ್ಮರುಚಿ ನಾಮ, ಸಬ್ಬಪಾಪಜಿಗುಚ್ಛಕೋ;

ದಿಸ್ವಾಹಂ ಲೋಕಪಜ್ಜೋತಂ, ಜಾತಿಯಾ ಸತ್ತವಸ್ಸಿಕೋ.

೧೮೨. ‘‘ಮಹಾಜೇತವನಂ ಗನ್ತ್ವಾ, ಪಬ್ಬಜಿಂ ಅನಗಾರಿಯಂ;

ಉಪೇಮಿ ಬುದ್ಧಂ ತಿಕ್ಖತ್ತುಂ, ರತ್ತಿಯಾ ದಿವಸಸ್ಸ ಚ.

೧೮೩. ‘‘ತದಾ ದಿಸ್ವಾ ಮುನಿ ಆಹ, ಚಿರಂ ಧಮ್ಮರುಚೀತಿ ಮಂ;

ತತೋಹಂ ಅವಚಂ ಬುದ್ಧಂ, ಪುಬ್ಬಕಮ್ಮಪಭಾವಿತಂ.

೧೮೪. ‘‘ಸುಚಿರಂ ಸತಪುಞ್ಞಲಕ್ಖಣಂ, ಪತಿಪುಬ್ಬೇನ ವಿಸುದ್ಧಪಚ್ಚಯಂ;

ಅಹಮಜ್ಜಸುಪೇಕ್ಖನಂ ವತ, ತವ ಪಸ್ಸಾಮಿ ನಿರುಪಮಂ ವಿಗ್ಗಹಂ [ನಿರೂಪಮಗ್ಗಹಂ (ಸೀ.)].

೧೮೫. ‘‘ಸುಚಿರಂ ವಿಹತತ್ತಮೋ ಮಯಾ, ಸುಚಿರಕ್ಖೇನ ನದೀ ವಿಸೋಸಿತಾ;

ಸುಚಿರಂ ಅಮಲಂ ವಿಸೋಧಿತಂ, ನಯನಂ ಞಾಣಮಯಂ ಮಹಾಮುನೇ.

೧೮೬. ‘‘ಚಿರಕಾಲಸಮಙ್ಗಿತೋ [ಚಿರಕಾಲಂ ಸಮಾಗತೋ (ಪೀ.)] ತಯಾ, ಅವಿನಟ್ಠೋ ಪುನರನ್ತರಂ ಚಿರಂ;

ಪುನರಜ್ಜಸಮಾಗತೋ ತಯಾ, ನ ಹಿ ನಸ್ಸನ್ತಿ ಕತಾನಿ ಗೋತಮ.

೧೮೭. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.

೧೮೮. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೧೮೯. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಧಮ್ಮರುಚಿಯೋ ಥೇರೋ ಇಮಾ ಗಾಥಾಯೋ

ಅಭಾಸಿತ್ಥಾತಿ.

ಧಮ್ಮರುಚಿಯತ್ಥೇರಸ್ಸಾಪದಾನಂ ನವಮಂ.