೩. ಭಿಸದಾಯಕತ್ಥೇರಅಪದಾನಂ

೨೭. ‘‘ಓಗಯ್ಹ ಯಂ [ಓಗಯ್ಹಾಹಂ (ಸೀ. ಸ್ಯಾ. ಪೀ.)] ಪೋಕ್ಖರಣಿಂ, ನಾನಾಕುಞ್ಜರಸೇವಿತಂ;

ಉದ್ಧರಾಮಿ ಭಿಸಂ ತತ್ಥ, ಘಾಸಹೇತು [ಅಸನಹೇತು (ಸ್ಯಾ.)] ಅಹಂ ತದಾ.

೨೮. ‘‘ಭಗವಾ ತಮ್ಹಿ ಸಮಯೇ, ಪದುಮುತ್ತರಸವ್ಹಯೋ;

ರತ್ತಮ್ಬರಧರೋ [ರತ್ತಕಮ್ಬಲಧರೋ (ಸ್ಯಾ.)] ಬುದ್ಧೋ, ಗಚ್ಛತಿ ಅನಿಲಞ್ಜಸೇ.

೨೯. ‘‘ಧುನನ್ತೋ ಪಂಸುಕೂಲಾನಿ, ಸದ್ದಮಸ್ಸೋಸಹಂ ತದಾ;

ಉದ್ಧಂ ನಿಜ್ಝಾಯಮಾನೋಹಂ, ಅದ್ದಸಂ ಲೋಕನಾಯಕಂ.

೩೦. ‘‘ತತ್ಥೇವ ಠಿತಕೋ ಸನ್ತೋ, ಆಯಾಚಿಂ ಲೋಕನಾಯಕಂ;

ಮಧುಂ ಭಿಸೇಹಿ ಸವತಿ, ಖೀರಂ ಸಪ್ಪಿಂ ಮುಳಾಲಿಭಿ.

೩೧. ‘‘ಪಟಿಗ್ಗಣ್ಹಾತು ಮೇ ಬುದ್ಧೋ, ಅನುಕಮ್ಪಾಯ ಚಕ್ಖುಮಾ;

ತತೋ ಕಾರುಣಿಕೋ ಸತ್ಥಾ, ಓರುಹಿತ್ವಾ ಮಹಾಯಸೋ.

೩೨. ‘‘ಪಟಿಗ್ಗಣ್ಹಿ ಮಮಂ ಭಿಕ್ಖಂ, ಅನುಕಮ್ಪಾಯ ಚಕ್ಖುಮಾ;

ಪಟಿಗ್ಗಹೇತ್ವಾ ಸಮ್ಬುದ್ಧೋ, ಅಕಾ ಮೇ ಅನುಮೋದನಂ.

೩೩. ‘‘‘ಸುಖೀ ಹೋತು [ಹೋಹಿ (ಸೀ. ಸ್ಯಾ. ಪೀ. ಕ.)] ಮಹಾಪುಞ್ಞ, ಗತಿ ತುಯ್ಹಂ ಸಮಿಜ್ಝತು;

ಇಮಿನಾ ಭಿಸದಾನೇನ, ಲಭಸ್ಸು ವಿಪುಲಂ ಸುಖಂ’.

೩೪. ‘‘ಇದಂ ವತ್ವಾನ ಸಮ್ಬುದ್ಧೋ, ಜಲಜುತ್ತಮನಾಮಕೋ;

ಭಿಕ್ಖಮಾದಾಯ ಸಮ್ಬುದ್ಧೋ, ಅಮ್ಬರೇನಾಗಮಾ ಜಿನೋ.

೩೫. ‘‘ತತೋ ಭಿಸಂ ಗಹೇತ್ವಾನ, ಆಗಚ್ಛಿಂ ಮಮ ಅಸ್ಸಮಂ;

ಭಿಸಂ ರುಕ್ಖೇ ಲಗೇತ್ವಾನ [ಲಗ್ಗಿತ್ವಾನ (ಸ್ಯಾ. ಕ.)], ಮಮ ದಾನಮನುಸ್ಸರಿಂ.

೩೬. ‘‘ಮಹಾವಾತೋ ವುಟ್ಠಹಿತ್ವಾ, ಸಞ್ಚಾಲೇಸಿ ವನಂ ತದಾ;

ಆಕಾಸೋ ಅಭಿನಾದಿತ್ಥ, ಅಸನಿಯಾ ಫಲನ್ತಿಯಾ.

೩೭. ‘‘ತತೋ ಮೇ ಅಸನಿಪಾತೋ, ಮತ್ಥಕೇ ನಿಪತೀ ತದಾ;

ಸೋಹಂ ನಿಸಿನ್ನಕೋ ಸನ್ತೋ, ತತ್ಥ ಕಾಲಙ್ಕತೋ ಅಹುಂ.

೩೮. ‘‘ಪುಞ್ಞಕಮ್ಮೇನ ಸಂಯುತ್ತೋ, ತುಸಿತಂ ಉಪಪಜ್ಜಹಂ;

ಕಳೇವರಂ ಮೇ ಪತಿತಂ, ದೇವಲೋಕೇ ರಮಿಂ ಅಹಂ.

೩೯. ‘‘ಛಳಸೀತಿಸಹಸ್ಸಾನಿ, ನಾರಿಯೋ ಸಮಲಙ್ಕತಾ;

ಸಾಯಪಾತಂ [ಸಾಯಂ ಪಾತಂ (ಸ್ಯಾ. ಕ.)] ಉಪಟ್ಠನ್ತಿ, ಭಿಸದಾನಸ್ಸಿದಂ ಫಲಂ.

೪೦. ‘‘ಮನುಸ್ಸಯೋನಿಮಾಗನ್ತ್ವಾ, ಸುಖಿತೋ ಹೋಮಹಂ ಸದಾ;

ಭೋಗೇ ಮೇ ಊನತಾ ನತ್ಥಿ, ಭಿಸದಾನಸ್ಸಿದಂ ಫಲಂ.

೪೧. ‘‘ಅನುಕಮ್ಪಿತಕೋ ತೇನ, ದೇವದೇವೇನ ತಾದಿನಾ;

ಸಬ್ಬಾಸವಾ ಪರಿಕ್ಖೀಣಾ, ನತ್ಥಿ ದಾನಿ ಪುನಬ್ಭವೋ.

೪೨. ‘‘ಸತಸಹಸ್ಸಿತೋ ಕಪ್ಪೇ, ಯಂ ಭಿಸಂ [ಭಿಕ್ಖಂ (ಸಬ್ಬತ್ಥ)] ಅದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಭಿಸದಾನಸ್ಸಿದಂ ಫಲಂ.

೪೩. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.

೪೪. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೪೫. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಭಿಸದಾಯಕೋ ಥೇರೋ ಇಮಾ ಗಾಥಾಯೋ

ಅಭಾಸಿತ್ಥಾತಿ.

ಭಿಸದಾಯಕತ್ಥೇರಸ್ಸಾಪದಾನಂ ತತಿಯಂ.