೧೦. ನಿಮಿತ್ತಬ್ಯಾಕರಣಿಯತ್ಥೇರಅಪದಾನಂ

೫೯. ‘‘ಅಜ್ಝೋಗಾಹೇತ್ವಾ ಹಿಮವಂ, ಮನ್ತೇ ವಾಚೇ ಮಹಂ ತದಾ;

ಚತುಪಞ್ಞಾಸಸಹಸ್ಸಾನಿ, ಸಿಸ್ಸಾ ಮಯ್ಹಂ ಉಪಟ್ಠಹುಂ.

೬೦. ‘‘ಅಧಿತಾ ವೇದಗೂ ಸಬ್ಬೇ, ಛಳಙ್ಗೇ ಪಾರಮಿಂ ಗತಾ;

ಸಕವಿಜ್ಜಾಹುಪತ್ಥದ್ಧಾ, ಹಿಮವನ್ತೇ ವಸನ್ತಿ ತೇ.

೬೧. ‘‘ಚವಿತ್ವಾ ತುಸಿತಾ ಕಾಯಾ, ದೇವಪುತ್ತೋ ಮಹಾಯಸೋ;

ಉಪ್ಪಜ್ಜಿ ಮಾತುಕುಚ್ಛಿಸ್ಮಿಂ, ಸಮ್ಪಜಾನೋ ಪತಿಸ್ಸತೋ.

೬೨. ‘‘ಸಮ್ಬುದ್ಧೇ ಉಪಪಜ್ಜನ್ತೇ, ದಸಸಹಸ್ಸಿ ಕಮ್ಪಥ;

ಅನ್ಧಾ ಚಕ್ಖುಂ ಅಲಭಿಂಸು, ಉಪ್ಪಜ್ಜನ್ತಮ್ಹಿ ನಾಯಕೇ.

೬೩. ‘‘ಸಬ್ಬಾಕಾರಂ ಪಕಮ್ಪಿತ್ಥ, ಕೇವಲಾ ವಸುಧಾ ಅಯಂ;

ನಿಗ್ಘೋಸಸದ್ದಂ ಸುತ್ವಾನ, ಉಬ್ಬಿಜ್ಜಿಂಸು [ವಿಮ್ಹಯಿಂಸು (ಸ್ಯಾ. ಕ.)] ಮಹಾಜನಾ.

೬೪. ‘‘ಸಬ್ಬೇ ಜನಾ ಸಮಾಗಮ್ಮ, ಆಗಚ್ಛುಂ ಮಮ ಸನ್ತಿಕಂ;

ವಸುಧಾಯಂ ಪಕಮ್ಪಿತ್ಥ, ಕಿಂ ವಿಪಾಕೋ ಭವಿಸ್ಸತಿ.

೬೫. ‘‘ಅವಚಾಸಿಂ [ವಿದಸ್ಸಾಮಿ (ಸ್ಯಾ.)] ತದಾ ತೇಸಂ, ಮಾ ಭೇಥ [ಮಾ ರೋದ (ಕ.), ಮಾಭಾಯಿತ್ಥ (ಸ್ಯಾ.)] ನತ್ಥಿ ವೋ ಭಯಂ;

ವಿಸಟ್ಠಾ ಹೋಥ ಸಬ್ಬೇಪಿ, ಉಪ್ಪಾದೋಯಂ ಸುವತ್ಥಿಕೋ [ಸುಖತ್ಥಿಕೋ (ಸ್ಯಾ.)].

೬೬. ‘‘ಅಟ್ಠಹೇತೂಹಿ ಸಮ್ಫುಸ್ಸ [ಅಟ್ಠಹೇತೂಹಿ ಸಮ್ಫಸ್ಸ (ಸ್ಯಾ. ಪೀ.), ಅತ್ಥಹೇತು ನಿಸಂಸಯಂ (ಕ.)], ವಸುಧಾಯಂ ಪಕಮ್ಪತಿ;

ತಥಾ ನಿಮಿತ್ತಾ ದಿಸ್ಸನ್ತಿ, ಓಭಾಸೋ ವಿಪುಲೋ ಮಹಾ.

೬೭. ‘‘ಅಸಂಸಯಂ ಬುದ್ಧಸೇಟ್ಠೋ, ಉಪ್ಪಜ್ಜಿಸ್ಸತಿ ಚಕ್ಖುಮಾ;

ಸಞ್ಞಾಪೇತ್ವಾನ ಜನತಂ, ಪಞ್ಚಸೀಲೇ ಕಥೇಸಹಂ.

೬೮. ‘‘ಸುತ್ವಾನ ಪಞ್ಚ ಸೀಲಾನಿ, ಬುದ್ಧುಪ್ಪಾದಞ್ಚ ದುಲ್ಲಭಂ;

ಉಬ್ಬೇಗಜಾತಾ ಸುಮನಾ, ತುಟ್ಠಹಟ್ಠಾ ಅಹಂಸು ತೇ.

೬೯. ‘‘ದ್ವೇನವುತೇ ಇತೋ ಕಪ್ಪೇ, ಯಂ ನಿಮಿತ್ತಂ ವಿಯಾಕರಿಂ;

ದುಗ್ಗತಿಂ ನಾಭಿಜಾನಾಮಿ, ಬ್ಯಾಕರಣಸ್ಸಿದಂ ಫಲಂ.

೭೦. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.

೭೧. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೭೨. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ನಿಮಿತ್ತಬ್ಯಾಕರಣಿಯೋ ಥೇರೋ ಇಮಾ

ಗಾಥಾಯೋ ಅಭಾಸಿತ್ಥಾತಿ.

ನಿಮಿತ್ತಬ್ಯಾಕರಣಿಯತ್ಥೇರಸ್ಸಾಪದಾನಂ ದಸಮಂ.

ಸಾಲಕುಸುಮಿಯವಗ್ಗೋ ಸತ್ತಚತ್ತಾಲೀಸಮೋ.