೪. ಞಾಣತ್ಥವಿಕತ್ಥೇರಅಪದಾನಂ

೩೫. ‘‘ಕಣಿಕಾರಂವ ಜಲಿತಂ, ದೀಪರುಕ್ಖಂವ ಜೋತಿತಂ;

ಕಞ್ಚನಂವ ವಿರೋಚನ್ತಂ, ಅದ್ದಸಂ ದ್ವಿಪದುತ್ತಮಂ.

೩೬. ‘‘ಕಮಣ್ಡಲುಂ ಠಪೇತ್ವಾನ, ವಾಕಚೀರಞ್ಚ ಕುಣ್ಡಿಕಂ;

ಏಕಂಸಂ ಅಜಿನಂ ಕತ್ವಾ, ಬುದ್ಧಸೇಟ್ಠಂ ಥವಿಂ ಅಹಂ.

೩೭. ‘‘‘ತಮನ್ಧಕಾರಂ ವಿಧಮಂ, ಮೋಹಜಾಲಸಮಾಕುಲಂ;

ಞಾಣಾಲೋಕಂ ದಸ್ಸೇತ್ವಾನ, ನಿತ್ತಿಣ್ಣೋಸಿ ಮಹಾಮುನಿ.

೩೮. ‘‘‘ಸಮುದ್ಧರಸಿಮಂ ಲೋಕಂ, ಸಬ್ಬಾವನ್ತಮನುತ್ತರಂ;

ಞಾಣೇ ತೇ ಉಪಮಾ ನತ್ಥಿ, ಯಾವತಾಜಗತೋಗತಿ [ಯಾವತಾ ಚ ಗತೋಗತಿ (ಪೀ. ಕ.)].

೩೯. ‘‘‘ತೇನ ಞಾಣೇನ ಸಬ್ಬಞ್ಞೂ, ಇತಿ ಬುದ್ಧೋ ಪವುಚ್ಚತಿ;

ವನ್ದಾಮಿ ತಂ ಮಹಾವೀರಂ, ಸಬ್ಬಞ್ಞುತಮನಾವರಂ’.

೪೦. ‘‘ಸತಸಹಸ್ಸಿತೋ ಕಪ್ಪೇ, ಬುದ್ಧಸೇಟ್ಠಂ ಥವಿಂ ಅಹಂ;

ದುಗ್ಗತಿಂ ನಾಭಿಜಾನಾಮಿ, ಞಾಣತ್ಥವಾಯಿದಂ ಫಲಂ;

೪೧. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ;

೪೨. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೪೩. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಞಾಣತ್ಥವಿಕೋ ಥೇರೋ ಇಮಾ ಗಾಥಾಯೋ

ಅಭಾಸಿತ್ಥಾತಿ.

ಞಾಣತ್ಥವಿಕತ್ಥೇರಸ್ಸಾಪದಾನಂ ಚತುತ್ಥಂ.