೨. ಏಕಸಙ್ಖಿಯತ್ಥೇರಅಪದಾನಂ

೧೩. ‘‘ವಿಪಸ್ಸಿನೋ ಭಗವತೋ, ಮಹಾಬೋಧಿಮಹೋ ಅಹು;

ಮಹಾಜನಾ ಸಮಾಗಮ್ಮ, ಪೂಜೇನ್ತಿ ಬೋಧಿಮುತ್ತಮಂ.

೧೪. ‘‘ನ ಹಿ ತಂ ಓರಕಂ ಮಞ್ಞೇ, ಬುದ್ಧಸೇಟ್ಠೋ ಭವಿಸ್ಸತಿ;

ಯಸ್ಸಾಯಂ ಈದಿಸಾ ಬೋಧಿ, ಪೂಜನೀಯಾ [ಈದಿಸೋ ಬೋಧಿ, ಪೂಜನೀಯೋ (ಸ್ಯಾ.)] ಚ ಸತ್ಥುನೋ.

೧೫. ‘‘ತತೋ ಸಙ್ಖಂ ಗಹೇತ್ವಾನ, ಬೋಧಿರುಕ್ಖಮುಪಟ್ಠಹಿಂ;

ಧಮನ್ತೋ ಸಬ್ಬದಿವಸಂ, ಅವನ್ದಿಂ ಬೋಧಿಮುತ್ತಮಂ.

೧೬. ‘‘ಆಸನ್ನಕೇ ಕತಂ ಕಮ್ಮಂ, ದೇವಲೋಕಂ ಅಪಾಪಯೀ;

ಕಳೇವರಂ ಮೇ ಪತಿತಂ, ದೇವಲೋಕೇ ರಮಾಮಹಂ.

೧೭. ‘‘ಸಟ್ಠಿತುರಿಯಸಹಸ್ಸಾನಿ, ತುಟ್ಠಹಟ್ಠಾ ಪಮೋದಿತಾ;

ಸದಾ ಮಯ್ಹಂ ಉಪಟ್ಠನ್ತಿ, ಬುದ್ಧಪೂಜಾಯಿದಂ ಫಲಂ.

೧೮. ‘‘ಏಕಸತ್ತತಿಮೇ ಕಪ್ಪೇ, ರಾಜಾ ಆಸಿಂ ಸುದಸ್ಸನೋ;

ಚಾತುರನ್ತೋ ವಿಜಿತಾವೀ, ಜಮ್ಬುಮಣ್ಡಸ್ಸ ಇಸ್ಸರೋ.

೧೯. ‘‘ತತೋ ಅಙ್ಗಸತಾ ತುರಿಯಾ [ತೂರಾ (ಸೀ. ಕ.)], ಪರಿವಾರೇನ್ತಿ ಮಂ ಸದಾ;

ಅನುಭೋಮಿ ಸಕಂ ಕಮ್ಮಂ, ಉಪಟ್ಠಾನಸ್ಸಿದಂ ಫಲಂ.

೨೦. ‘‘ಯಂ ಯಂ ಯೋನುಪಪಜ್ಜಾಮಿ, ದೇವತ್ತಂ ಅಥ ಮಾನುಸಂ;

ಮಾತುಕುಚ್ಛಿಗತಸ್ಸಾಪಿ, ವಜ್ಜರೇ ಭೇರಿಯೋ ಸದಾ.

೨೧. ‘‘ಉಪಟ್ಠಿತ್ವಾನ ಸಮ್ಬುದ್ಧಂ, ಅನುಭುತ್ವಾನ ಸಮ್ಪದಾ;

ಸಿವಂ ಸುಖೇಮಂ ಅಮತಂ, ಪತ್ತೋಮ್ಹಿ ಅಚಲಂ ಪದಂ.

೨೨. ‘‘ಏಕನವುತಿತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೨೩. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.

೨೪. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೨೫. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಏಕಸಙ್ಖಿಯೋ ಥೇರೋ ಇಮಾ ಗಾಥಾಯೋ

ಅಭಾಸಿತ್ಥಾತಿ.

ಏಕಸಙ್ಖಿಯತ್ಥೇರಸ್ಸಾಪದಾನಂ ದುತಿಯಂ.