೫. ಮೋಘರಾಜತ್ಥೇರಅಪದಾನಂ

೬೪. ‘‘ಅತ್ಥದಸ್ಸೀ ತು ಭಗವಾ, ಸಯಮ್ಭೂ ಅಪರಾಜಿತೋ;

ಭಿಕ್ಖುಸಙ್ಘಪರಿಬ್ಯೂಳ್ಹೋ, ರಥಿಯಂ ಪಟಿಪಜ್ಜಥ.

೬೫. ‘‘ಸಿಸ್ಸೇಹಿ ಸಮ್ಪರಿವುತೋ, ಘರಮ್ಹಾ ಅಭಿನಿಕ್ಖಮಿಂ;

ನಿಕ್ಖಮಿತ್ವಾನಹಂ ತತ್ಥ, ಅದ್ದಸಂ ಲೋಕನಾಯಕಂ.

೬೬. ‘‘ಅಭಿವಾದಿಯ ಸಮ್ಬುದ್ಧಂ, ಸಿರೇ ಕತ್ವಾನ ಅಞ್ಜಲಿಂ;

ಸಕಂ ಚಿತ್ತಂ ಪಸಾದೇತ್ವಾ, ಸನ್ಥವಿಂ ಲೋಕನಾಯಕಂ.

೬೭. ‘‘ಯಾವತಾ ರೂಪಿನೋ ಸತ್ತಾ, ಅರೂಪೀ ವಾ ಅಸಞ್ಞಿನೋ;

ಸಬ್ಬೇ ತೇ ತವ ಞಾಣಮ್ಹಿ, ಅನ್ತೋ ಹೋನ್ತಿ ಸಮೋಗಧಾ.

೬೮. ‘‘ಸುಖುಮಚ್ಛಿಕಜಾಲೇನ, ಉದಕಂ ಯೋ ಪರಿಕ್ಖಿಪೇ;

ಯೇ ಕೇಚಿ ಉದಕೇ ಪಾಣಾ, ಅನ್ತೋಜಾಲೇ ಭವನ್ತಿ ತೇ.

೬೯. ‘‘ಯೇಸಞ್ಚ ಚೇತನಾ ಅತ್ಥಿ, ರೂಪಿನೋ ಚ ಅರೂಪಿನೋ;

ಸಬ್ಬೇ ತೇ ತವ ಞಾಣಮ್ಹಿ, ಅನ್ತೋ ಹೋನ್ತಿ ಸಮೋಗಧಾ.

೭೦. ‘‘ಸಮುದ್ಧರಸಿಮಂ ಲೋಕಂ, ಅನ್ಧಕಾರಸಮಾಕುಲಂ;

ತವ ಧಮ್ಮಂ ಸುಣಿತ್ವಾನ, ಕಙ್ಖಾಸೋತಂ ತರನ್ತಿ ತೇ.

೭೧. ‘‘ಅವಿಜ್ಜಾನಿವುತೇ ಲೋಕೇ, ಅನ್ಧಕಾರೇನ ಓತ್ಥಟೇ;

ತವ ಞಾಣಮ್ಹಿ ಜೋತನ್ತೇ, ಅನ್ಧಕಾರಾ ಪಧಂಸಿತಾ.

೭೨. ‘‘ತುವಂ ಚಕ್ಖೂಸಿ ಸಬ್ಬೇಸಂ, ಮಹಾತಮಪನೂದನೋ;

ತವ ಧಮ್ಮಂ ಸುಣಿತ್ವಾನ, ನಿಬ್ಬಾಯತಿ ಬಹುಜ್ಜನೋ.

೭೩. ‘‘ಪುಟಕಂ ಪೂರಯಿತ್ವಾನ [ಪೀಠರಂ (ಸೀ.), ಪುತರಂ (ಸ್ಯಾ.)], ಮಧುಖುದ್ದಮನೇಳಕಂ;

ಉಭೋ ಹತ್ಥೇಹಿ ಪಗ್ಗಯ್ಹ, ಉಪನೇಸಿಂ ಮಹೇಸಿನೋ.

೭೪. ‘‘ಪಟಿಗ್ಗಣ್ಹಿ ಮಹಾವೀರೋ, ಸಹತ್ಥೇನ ಮಹಾ ಇಸೀ;

ಭುಞ್ಜಿತ್ವಾ ತಞ್ಚ ಸಬ್ಬಞ್ಞೂ, ವೇಹಾಸಂ ನಭಮುಗ್ಗಮಿ.

೭೫. ‘‘ಅನ್ತಲಿಕ್ಖೇ ಠಿತೋ ಸತ್ಥಾ, ಅತ್ಥದಸ್ಸೀ ನರಾಸಭೋ;

ಮಮ ಚಿತ್ತಂ ಪಸಾದೇನ್ತೋ, ಇಮಾ ಗಾಥಾ ಅಭಾಸಥ.

೭೬. ‘‘‘ಯೇನಿದಂ ಥವಿತಂ ಞಾಣಂ, ಬುದ್ಧಸೇಟ್ಠೋ ಚ ಥೋಮಿತೋ;

ತೇನ ಚಿತ್ತಪ್ಪಸಾದೇನ, ದುಗ್ಗತಿಂ ಸೋ ನ ಗಚ್ಛತಿ.

೭೭. ‘‘‘ಚತುದ್ದಸಞ್ಚಕ್ಖತ್ತುಂ [ಚತುಸಟ್ಠಿಞ್ಚ (ಸ್ಯಾ.)] ಸೋ, ದೇವರಜ್ಜಂ ಕರಿಸ್ಸತಿ;

ಪಥಬ್ಯಾ ರಜ್ಜಂ ಅಟ್ಠಸತಂ, ವಸುಧಂ ಆವಸಿಸ್ಸತಿ.

೭೮. ‘‘‘ಪಞ್ಚೇವ ಸತಕ್ಖತ್ತುಞ್ಚ [ಅಥ ಪಞ್ಚಸತಕ್ಖತ್ತುಂ (ಸೀ.)], ಚಕ್ಕವತ್ತೀ ಭವಿಸ್ಸತಿ;

ಪದೇಸರಜ್ಜಂ ಅಸಙ್ಖೇಯ್ಯಂ, ಮಹಿಯಾ ಕಾರಯಿಸ್ಸತಿ.

೭೯. ‘‘‘ಅಜ್ಝಾಯಕೋ ಮನ್ತಧರೋ, ತಿಣ್ಣಂ ವೇದಾನ ಪಾರಗೂ;

ಗೋತಮಸ್ಸ ಭಗವತೋ, ಸಾಸನೇ ಪಬ್ಬಜಿಸ್ಸತಿ.

೮೦. ‘‘‘ಗಮ್ಭೀರಂ ನಿಪುಣಂ ಅತ್ಥಂ, ಞಾಣೇನ ವಿಚಿನಿಸ್ಸತಿ;

ಮೋಘರಾಜಾತಿ ನಾಮೇನ, ಹೇಸ್ಸತಿ ಸತ್ಥು ಸಾವಕೋ.

೮೧. ‘‘‘ತೀಹಿ ವಿಜ್ಜಾಹಿ ಸಮ್ಪನ್ನಂ, ಕತಕಿಚ್ಚಮನಾಸವಂ;

ಗೋತಮೋ ಸತ್ಥವಾಹಗ್ಗೋ, ಏತದಗ್ಗೇ ಠಪೇಸ್ಸತಿ’.

೮೨. ‘‘ಹಿತ್ವಾ ಮಾನುಸಕಂ ಯೋಗಂ, ಛೇತ್ವಾನ ಭವಬನ್ಧನಂ;

ಸಬ್ಬಾಸವೇ ಪರಿಞ್ಞಾಯ, ವಿಹರಾಮಿ ಅನಾಸವೋ.

೮೩. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಮೋಘರಾಜೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ;

ಮೋಘರಾಜತ್ಥೇರಸ್ಸಾಪದಾನಂ ಪಞ್ಚಮಂ.