೨. ಸಾಗತತ್ಥೇರಅಪದಾನಂ

೧೭. ‘‘ಸೋಭಿತೋ ನಾಮ ನಾಮೇನ, ಅಹೋಸಿಂ ಬ್ರಾಹ್ಮಣೋ ತದಾ;

ಪುರಕ್ಖತೋ ಸಸಿಸ್ಸೇಹಿ, ಆರಾಮಂ ಅಗಮಾಸಹಂ.

೧೮. ‘‘ಭಗವಾ ತಮ್ಹಿ ಸಮಯೇ, ಭಿಕ್ಖುಸಙ್ಘಪುರಕ್ಖತೋ;

ಆರಾಮದ್ವಾರಾ ನಿಕ್ಖಮ್ಮ, ಅಟ್ಠಾಸಿ ಪುರಿಸುತ್ತಮೋ.

೧೯. ‘‘ತಮದ್ದಸಾಸಿಂ ಸಮ್ಬುದ್ಧಂ, ದನ್ತಂ ದನ್ತಪುರಕ್ಖತಂ;

ಸಕಂ ಚಿತ್ತಂ ಪಸಾದೇತ್ವಾ, ಸನ್ಥವಿಂ ಲೋಕನಾಯಕಂ.

೨೦. ‘‘ಯೇ ಕೇಚಿ ಪಾದಪಾ ಸಬ್ಬೇ, ಮಹಿಯಾ ತೇ ವಿರೂಹರೇ;

ಬುದ್ಧಿಮನ್ತೋ ತಥಾ ಸತ್ತಾ, ರುಹನ್ತಿ ಜಿನಸಾಸನೇ.

೨೧. ‘‘ಸತ್ಥವಾಹೋಸಿ ಸಪ್ಪಞ್ಞೋ, ಮಹೇಸಿ ಬಹುಕೇ ಜನೇ;

ವಿಪಥಾ ಉದ್ಧರಿತ್ವಾನ, ಪಥಂ ಆಚಿಕ್ಖಸೇ ತುವಂ.

೨೨. ‘‘ದನ್ತೋ ದನ್ತಪರಿಕಿಣ್ಣೋ [ಪುರಕ್ಖತೋ (ಸ್ಯಾ.)], ಝಾಯೀ ಝಾನರತೇಹಿ ಚ;

ಆತಾಪೀ ಪಹಿತತ್ತೇಹಿ, ಉಪಸನ್ತೇಹಿ ತಾದಿಭಿ.

೨೩. ‘‘ಅಲಙ್ಕತೋ ಪರಿಸಾಹಿ, ಪುಞ್ಞಞಾಣೇಹಿ ಸೋಭತಿ;

ಪಭಾ ನಿದ್ಧಾವತೇ ತುಯ್ಹಂ, ಸೂರಿಯೋದಯನೇ ಯಥಾ.

೨೪. ‘‘ಪಸನ್ನಚಿತ್ತಂ ದಿಸ್ವಾನ, ಮಹೇಸೀ ಪದುಮುತ್ತರೋ;

ಭಿಕ್ಖುಸಙ್ಘೇ ಠಿತೋ ಸತ್ಥಾ, ಇಮಾ ಗಾಥಾ ಅಭಾಸಥ.

೨೫. ‘‘‘ಯೋ ಸೋ ಹಾಸಂ ಜನೇತ್ವಾನ, ಮಮಂ ಕಿತ್ತೇಸಿ ಬ್ರಾಹ್ಮಣೋ;

ಕಪ್ಪಾನಂ ಸತಸಹಸ್ಸಂ, ದೇವಲೋಕೇ ರಮಿಸ್ಸತಿ.

೨೬. ‘‘‘ತುಸಿತಾ ಹಿ ಚವಿತ್ವಾನ, ಸುಕ್ಕಮೂಲೇನ ಚೋದಿತೋ;

ಗೋತಮಸ್ಸ ಭಗವತೋ, ಸಾಸನೇ ಪಬ್ಬಜಿಸ್ಸತಿ.

೨೭. ‘‘‘ತೇನ ಕಮ್ಮೇನ ಸುಕತೇನ, ಅರಹತ್ತಂ [ತುಟ್ಠಹಟ್ಠಂ (ಸ್ಯಾ. ಕ.)] ಲಭಿಸ್ಸತಿ;

ಸಾಗತೋ ನಾಮ ನಾಮೇನ, ಹೇಸ್ಸತಿ ಸತ್ಥು ಸಾವಕೋ’.

೨೮. ‘‘ಪಬ್ಬಜಿತ್ವಾನ ಕಾಯೇನ, ಪಾಪಕಮ್ಮಂ ವಿವಜ್ಜಯಿಂ;

ವಚೀದುಚ್ಚರಿತಂ ಹಿತ್ವಾ, ಆಜೀವಂ ಪರಿಸೋಧಯಿಂ.

೨೯. ‘‘ಏವಂ ವಿಹರಮಾನೋಹಂ, ತೇಜೋಧಾತೂಸು ಕೋವಿದೋ;

ಸಬ್ಬಾಸವೇ ಪರಿಞ್ಞಾಯ, ವಿಹರಾಮಿ ಅನಾಸವೋ.

೩೦. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಸಾಗತೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಸಾಗತತ್ಥೇರಸ್ಸಾಪದಾನಂ ದುತಿಯಂ.