೧. ಬೋಧಿವನ್ದಕತ್ಥೇರಅಪದಾನಂ

೧. ‘‘ಪಾಟಲಿಂ ಹರಿತಂ ದಿಸ್ವಾ, ಪಾದಪಂ ಧರಣೀರುಹಂ;

ಏಕಂಸಂ ಅಞ್ಜಲಿಂ ಕತ್ವಾ, ಅವನ್ದಿಂ ಪಾಟಲಿಂ ಅಹಂ.

೨. ‘‘ಅಞ್ಜಲಿಂ ಪಗ್ಗಹೇತ್ವಾನ, ಗರುಂ ಕತ್ವಾನ ಮಾನಸಂ;

ಅನ್ತೋಸುದ್ಧಂ ಬಹಿಸುದ್ಧಂ, ಸುವಿಮುತ್ತಮನಾಸವಂ.

೩. ‘‘ವಿಪಸ್ಸಿಂ ಲೋಕಮಹಿತಂ, ಕರುಣಾಞಾಣಸಾಗರಂ;

ಸಮ್ಮುಖಾ ವಿಯ ಸಮ್ಬುದ್ಧಂ, ಅವನ್ದಿಂ ಪಾಟಲಿಂ ಅಹಂ.

೪. ‘‘ಏಕನವುತಿತೋ ಕಪ್ಪೇ, ಯಂ ಬೋಧಿಮಭಿವನ್ದಹಂ;

ದುಗ್ಗತಿಂ ನಾಭಿಜಾನಾಮಿ, ವನ್ದನಾಯ ಇದಂ ಫಲಂ.

೫. ‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಬೋಧಿವನ್ದಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಬೋಧಿವನ್ದಕತ್ಥೇರಸ್ಸಾಪದಾನಂ ಪಠಮಂ.