೭. ಪುಲಿನಪೂಜಕತ್ಥೇರಅಪದಾನಂ

೧೬೫. ‘‘ವಿಪಸ್ಸಿಸ್ಸ ಭಗವತೋ, ಬೋಧಿಯಾ ಪಾದಪುತ್ತಮೇ;

ಪುರಾಣಪುಲಿನಂ ಹಿತ್ವಾ [ಛಡ್ಡೇತ್ವಾ (ಸೀ. ಸ್ಯಾ.)], ಸುದ್ಧಪುಲಿನಮಾಕಿರಿಂ.

೧೬೬. ‘‘ಏಕನವುತಿತೋ ಕಪ್ಪೇ, ಯಂ ಪುಲಿನಮದಾಸಹಂ;

ದುಗ್ಗತಿಂ ನಾಭಿಜಾನಾಮಿ, ಪುಲಿನದಾನಸ್ಸಿದಂ ಫಲಂ.

೧೬೭. ‘‘ತಿಂಸತಿಮೇ [ತಿಪಞ್ಞಾಸೇ (ಸೀ. ಸ್ಯಾ.)] ಇತೋ ಕಪ್ಪೇ, ರಾಜಾ ಆಸಿಂ ಜನಾಧಿಭೂ;

ಮಹಾಪುಲಿನನಾಮೇನ, ಚಕ್ಕವತ್ತೀ ಮಹಬ್ಬಲೋ.

೧೬೮. ‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಪುಲಿನಪೂಜಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಪುಲಿನಪೂಜಕತ್ಥೇರಸ್ಸಾಪದಾನಂ ಸತ್ತಮಂ.