೪. ಪಞ್ಚಸೀಲಸಮಾದಾನಿಯತ್ಥೇರಅಪದಾನಂ

೧೩೪. ‘‘ನಗರೇ ಚನ್ದವತಿಯಾ, ಭತಕೋ ಆಸಹಂ ತದಾ;

ಪರಕಮ್ಮಾಯನೇ ಯುತ್ತೋ, ಪಬ್ಬಜ್ಜಂ ನ ಲಭಾಮಹಂ.

೧೩೫. ‘‘ಮಹನ್ಧಕಾರಪಿಹಿತಾ, ತಿವಿಧಗ್ಗೀಹಿ ಡಯ್ಹರೇ;

ಕೇನ ನು ಖೋ ಉಪಾಯೇನ, ವಿಸಂಯುತ್ತೋ ಭವೇ ಅಹಂ.

೧೩೬. ‘‘ದೇಯ್ಯಧಮ್ಮೋ ಚ ಮೇ ನತ್ಥಿ, ವರಾಕೋ ಭತಕೋ ಅಹಂ;

ಯಂನೂನಾಹಂ ಪಞ್ಚಸೀಲಂ, ರಕ್ಖೇಯ್ಯಂ ಪರಿಪೂರಯಂ.

೧೩೭. ‘‘ಅನೋಮದಸ್ಸಿಸ್ಸ ಮುನಿನೋ, ನಿಸಭೋ ನಾಮ ಸಾವಕೋ;

ತಮಹಂ ಉಪಸಙ್ಕಮ್ಮ, ಪಞ್ಚಸಿಕ್ಖಾಪದಗ್ಗಹಿಂ.

೧೩೮. ‘‘ವಸ್ಸಸತಸಹಸ್ಸಾನಿ, ಆಯು ವಿಜ್ಜತಿ ತಾವದೇ;

ತಾವತಾ ಪಞ್ಚಸೀಲಾನಿ, ಪರಿಪುಣ್ಣಾನಿ ಗೋಪಯಿಂ.

೧೩೯. ‘‘ಮಚ್ಚುಕಾಲೇ ಚ ಸಮ್ಪತ್ತೇ, ದೇವಾ ಅಸ್ಸಾಸಯನ್ತಿ ಮಂ;

‘ರಥೋ ಸಹಸ್ಸಯುತ್ತೋ ತೇ, ಮಾರಿಸಾಯಂ [ಮಾರಿಸಸ್ಸ (ಕ.)] ಉಪಟ್ಠಿತೋ’.

೧೪೦. ‘‘ವತ್ತನ್ತೇ ಚರಿಮೇ ಚಿತ್ತೇ, ಮಮ ಸೀಲಂ ಅನುಸ್ಸರಿಂ;

ತೇನ ಕಮ್ಮೇನ ಸುಕತೇನ, ತಾವತಿಂಸಂ ಅಗಚ್ಛಹಂ.

೧೪೧. ‘‘ತಿಂಸಕ್ಖತ್ತುಞ್ಚ ದೇವಿನ್ದೋ, ದೇವರಜ್ಜಮಕಾರಯಿಂ;

ದಿಬ್ಬಸುಖಂ [ದಿಬ್ಬಂ ಸುಖಂ (ಸೀ.)] ಅನುಭವಿಂ, ಅಚ್ಛರಾಹಿ ಪುರಕ್ಖತೋ.

೧೪೨. ‘‘ಪಞ್ಚಸತ್ತತಿಕ್ಖತ್ತುಞ್ಚ, ಚಕ್ಕವತ್ತೀ ಅಹೋಸಹಂ;

ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ.

೧೪೩. ‘‘ದೇವಲೋಕಾ ಚವಿತ್ವಾನ, ಸುಕ್ಕಮೂಲೇನ ಚೋದಿತೋ;

ಪುರೇ ವೇಸಾಲಿಯಂ ಜಾತೋ, ಮಹಾಸಾಲೇ ಸುಅಡ್ಢಕೇ.

೧೪೪. ‘‘ವಸ್ಸೂಪನಾಯಿಕೇ ಕಾಲೇ, ದಿಪ್ಪನ್ತೇ [ದಿಬ್ಬನ್ತಿ (ಕ.)] ಜಿನಸಾಸನೇ;

ಮಾತಾ ಚ ಮೇ ಪಿತಾ ಚೇವ, ಪಞ್ಚಸಿಕ್ಖಾಪದಗ್ಗಹುಂ.

೧೪೫. ‘‘ಸಹ ಸುತ್ವಾನಹಂ ಸೀಲಂ, ಮಮ ಸೀಲಂ ಅನುಸ್ಸರಿಂ;

ಏಕಾಸನೇ ನಿಸೀದಿತ್ವಾ, ಅರಹತ್ತಮಪಾಪುಣಿಂ.

೧೪೬. ‘‘ಜಾತಿಯಾ ಪಞ್ಚವಸ್ಸೇನ, ಅರಹತ್ತಮಪಾಪುಣಿಂ;

ಉಪಸಮ್ಪಾದಯಿ ಬುದ್ಧೋ, ಗುಣಮಞ್ಞಾಯ ಚಕ್ಖುಮಾ.

೧೪೭. ‘‘ಪರಿಪುಣ್ಣಾನಿ ಗೋಪೇತ್ವಾ, ಪಞ್ಚಸಿಕ್ಖಾಪದಾನಹಂ;

ಅಪರಿಮೇಯ್ಯೇ ಇತೋ ಕಪ್ಪೇ, ವಿನಿಪಾತಂ ನ ಗಚ್ಛಹಂ.

೧೪೮. ‘‘ಸ್ವಾಹಂ ಯಸಮನುಭವಿಂ, ತೇಸಂ ಸೀಲಾನ ವಾಹಸಾ;

ಕಪ್ಪಕೋಟಿಮ್ಪಿ ಕಿತ್ತೇನ್ತೋ, ಕಿತ್ತಯೇ ಏಕದೇಸಕಂ.

೧೪೯. ‘‘ಪಞ್ಚಸೀಲಾನಿ ಗೋಪೇತ್ವಾ, ತಯೋ ಹೇತೂ ಲಭಾಮಹಂ;

ದೀಘಾಯುಕೋ ಮಹಾಭೋಗೋ, ತಿಕ್ಖಪಞ್ಞೋ ಭವಾಮಹಂ.

೧೫೦. ‘‘ಸಂಕಿತ್ತೇನ್ತೋ ಚ [ಪಕಿತ್ತೇನ್ತೋವ (ಸೀ.), ಪಕಿತ್ತೇನ್ತೇ ಚ (ಸ್ಯಾ.)] ಸಬ್ಬೇಸಂ, ಅಭಿಮತ್ತಞ್ಚ ಪೋರಿಸಂ;

ಭವಾಭವೇ ಸಂಸರಿತ್ವಾ, ಏತೇ ಠಾನೇ ಲಭಾಮಹಂ.

೧೫೧. ‘‘ಅಪರಿಮೇಯ್ಯಸೀಲೇಸು, ವತ್ತನ್ತಾ ಜಿನಸಾವಕಾ;

ಭವೇಸು ಯದಿ ರಜ್ಜೇಯ್ಯುಂ, ವಿಪಾಕೋ ಕೀದಿಸೋ ಭವೇ.

೧೫೨. ‘‘ಸುಚಿಣ್ಣಂ ಮೇ ಪಞ್ಚಸೀಲಂ, ಭತಕೇನ ತಪಸ್ಸಿನಾ [ವಿಪಸ್ಸಿನಾ (ಸೀ.)];

ತೇನ ಸೀಲೇನಹಂ ಅಜ್ಜ, ಮೋಚಯಿಂ ಸಬ್ಬಬನ್ಧನಾ.

೧೫೩. ‘‘ಅಪರಿಮೇಯ್ಯೇ ಇತೋ ಕಪ್ಪೇ, ಪಞ್ಚಸೀಲಾನಿ ಗೋಪಯಿಂ;

ದುಗ್ಗತಿಂ ನಾಭಿಜಾನಾಮಿ, ಪಞ್ಚಸೀಲಾನಿದಂ ಫಲಂ.

೧೫೪. ‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಪಞ್ಚಸೀಲಸಮಾದಾನಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಪಞ್ಚಸೀಲಸಮಾದಾನಿಯತ್ಥೇರಸ್ಸಾಪದಾನಂ ಚತುತ್ಥಂ.