೧. ಪಣ್ಣದಾಯಕತ್ಥೇರಅಪದಾನಂ

೧. ‘‘ಪಣ್ಣಸಾಲೇ ನಿಸಿನ್ನೋಮ್ಹಿ, ಪಣ್ಣಭೋಜನಭೋಜನೋ;

ಉಪವಿಟ್ಠಞ್ಚ ಮಂ ಸನ್ತಂ, ಉಪಾಗಚ್ಛಿ ಮಹಾಇಸಿ [ಮಹಾಮುನಿ (ಸೀ.)].

೨. ‘‘ಸಿದ್ಧತ್ಥೋ ಲೋಕಪಜ್ಜೋತೋ, ಸಬ್ಬಲೋಕತಿಕಿಚ್ಛಕೋ;

ತಸ್ಸ ಪಣ್ಣಂ ಮಯಾ ದಿನ್ನಂ, ನಿಸಿನ್ನಂ [ನಿಸಿನ್ನಸ್ಸ (ಸ್ಯಾ. ಅಟ್ಠ.)] ಪಣ್ಣಸನ್ಥರೇ.

೩. ‘‘ಚತುನ್ನವುತಿತೋ ಕಪ್ಪೇ, ಯಂ ಪಣ್ಣಮದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಪಣ್ಣದಾನಸ್ಸಿದಂ ಫಲಂ.

೪. ‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಪಣ್ಣದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಪಣ್ಣದಾಯಕತ್ಥೇರಸ್ಸಾಪದಾನಂ ಪಠಮಂ.