೯. ಕುಟಿದಾಯಕತ್ಥೇರಅಪದಾನಂ

೩೩. ‘‘ವಿಪಿನಚಾರೀ ಸಮ್ಬುದ್ಧೋ, ರುಕ್ಖಮೂಲೇ ವಸೀ ತದಾ;

ಪಣ್ಣಸಾಲಂ ಕರಿತ್ವಾನ, ಅದಾಸಿಂ ಅಪರಾಜಿತೇ.

೩೪. ‘‘ಏಕನವುತಿತೋ ಕಪ್ಪೇ, ಯಂ ಪಣ್ಣಕುಟಿಕಂ ಅದಂ;

ದುಗ್ಗತಿಂ ನಾಭಿಜಾನಾಮಿ, ಕುಟಿದಾನಸ್ಸಿದಂ ಫಲಂ.

೩೫. ‘‘ಅಟ್ಠವೀಸೇ [ಅಟ್ಠತಿಂಸೇ (ಸ್ಯಾ.)] ಇತೋ ಕಪ್ಪೇ, ಸೋಳಸಾಸಿಂಸು ರಾಜಾನೋ;

ಸಬ್ಬತ್ಥ ಅಭಿವಸ್ಸೀತಿ, ವುಚ್ಚರೇ ಚಕ್ಕವತ್ತಿನೋ.

೩೬. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಕುಟಿದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಕುಟಿದಾಯಕತ್ಥೇರಸ್ಸಾಪದಾನಂ ನವಮಂ.