೧. ಥೋಮಕತ್ಥೇರಅಪದಾನಂ

೧. ‘‘ದೇವಲೋಕೇ ಠಿತೋ ಸನ್ತೋ, ವಿಪಸ್ಸಿಸ್ಸ ಮಹೇಸಿನೋ;

ಧಮ್ಮಂ ಸುಣಿತ್ವಾ ಮುದಿತೋ, ಇಮಂ ವಾಚಂ ಅಭಾಸಹಂ.

೨. ‘‘‘ನಮೋ ತೇ ಪುರಿಸಾಜಞ್ಞ, ನಮೋ ತೇ ಪುರಿಸುತ್ತಮ;

ಬಹುಜ್ಜನಂ [ಬಹುಂ ಜನಂ (ಸೀ.)] ತಾರಯಸಿ, ದೇಸೇನ್ತೋ ಅಮತಂ ಪದಂ’.

೩. ‘‘ಏಕನವುತಿತೋ ಕಪ್ಪೇ, ಯಂ ವಾಚಮಭಣಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಥೋಮನಾಯ ಇದಂ ಫಲಂ.

೪. ‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಥೋಮಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಥೋಮಕತ್ಥೇರಸ್ಸಾಪದಾನಂ ಪಠಮಂ.