೨೫. ತುವರದಾಯಕವಗ್ಗೋ

೧. ತುವರದಾಯಕತ್ಥೇರಅಪದಾನಂ

೧. ‘‘ಮಿಗಲುದ್ದೋ ಪುರೇ ಆಸಿಂ, ಅರಞ್ಞೇ ಕಾನನೇ ಅಹಂ;

ಭರಿತ್ವಾ ತುವರಮಾದಾಯ [ಭರಿತ್ವಾ ತುರವಮಾದಾಯ (ಕ.), ಭಜ್ಜಿತಂ ತುವರಮಾದಾಯ (?) ಏತ್ಥ ತುವರನ್ತಿ ಮುಗ್ಗಕಲಾಯಸದಿಸಂ ತುವರಟ್ಠಿನ್ತಿ ತದಟ್ಠಕಥಾ; ತುವರೋ ಧಞ್ಞಭೇದೇತಿ ಸಕ್ಕತಾಭಿಧಾನೇ], ಸಙ್ಘಸ್ಸ ಅದದಿಂ ಅಹಂ.

೨. ‘‘ಏಕನವುತಿತೋ ಕಪ್ಪೇ, ಯಂ ದಾನಮದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ತುವರಸ್ಸ ಇದಂ ಫಲಂ.

೩. ‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ತುವರದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ತುವರದಾಯಕತ್ಥೇರಸ್ಸಾಪದಾನಂ ಪಠಮಂ.

೨. ನಾಗಕೇಸರಿಯತ್ಥೇರಅಪದಾನಂ

೪. ‘‘ಧನುಂ ಅದ್ವೇಜ್ಝಂ ಕತ್ವಾನ, ವನಮಜ್ಝೋಗಹಿಂ ಅಹಂ;

ಕೇಸರಂ ಓಗತಂ [ಓಸರಂ (ಸ್ಯಾ.), ಓಸಟಂ (ಸೀ.)] ದಿಸ್ವಾ, ಪತಪತ್ತಂ ಸಮುಟ್ಠಿತಂ.

೫. ‘‘ಉಭೋ ಹತ್ಥೇಹಿ ಪಗ್ಗಯ್ಹ, ಸಿರೇ ಕತ್ವಾನ ಅಞ್ಜಲಿಂ;

ಬುದ್ಧಸ್ಸ ಅಭಿರೋಪೇಸಿಂ, ತಿಸ್ಸಸ್ಸ ಲೋಕಬನ್ಧುನೋ.

೬. ‘‘ದ್ವೇನವುತೇ ಇತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೭. ‘‘ತೇಸತ್ತತಿಮ್ಹಿ ಕಪ್ಪಮ್ಹಿ [ಸತ್ತಸತ್ತತಿಮೇ ಕಪ್ಪೇ (ಸ್ಯಾ.)], ಸತ್ತ ಕೇಸರನಾಮಕಾ;

ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.

೮. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ನಾಗಕೇಸರಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ನಾಗಕೇಸರಿಯತ್ಥೇರಸ್ಸಾಪದಾನಂ ದುತಿಯಂ.

೩. ನಳಿನಕೇಸರಿಯತ್ಥೇರಅಪದಾನಂ

೯. ‘‘ಜಾತಸ್ಸರಸ್ಸ ವೇಮಜ್ಝೇ, ವಸಾಮಿ ಜಲಕುಕ್ಕುಟೋ;

ಅದ್ದಸಾಹಂ [ಅಥದ್ದಸಂ (ಸೀ. ಸ್ಯಾ.)] ದೇವದೇವಂ, ಗಚ್ಛನ್ತಂ ಅನಿಲಞ್ಜಸೇ.

೧೦. ‘‘ತುಣ್ಡೇನ ಕೇಸರಿಂ [ಕೇಸರಂ (ಸ್ಯಾ.)] ಗಯ್ಹ, ವಿಪ್ಪಸನ್ನೇನ ಚೇತಸಾ;

ಬುದ್ಧಸ್ಸ ಅಭಿರೋಪೇಸಿಂ, ತಿಸ್ಸಸ್ಸ ಲೋಕಬನ್ಧುನೋ.

೧೧. ‘‘ದ್ವೇನವುತೇ ಇತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೧೨. ‘‘ತೇಸತ್ತತಿಮ್ಹಿ ಕಪ್ಪಮ್ಹಿ, ಸತ್ತ ಕೇಸರನಾಮಕಾ [ಸತಪತ್ತಸನಾಮಕೋ (ಸೀ. ಸ್ಯಾ.)];

ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.

೧೩. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ನಳಿನಕೇಸರಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ನಳಿನಕೇಸರಿಯತ್ಥೇರಸ್ಸಾಪದಾನಂ ತತಿಯಂ.

೪. ವಿರವಪುಪ್ಫಿಯತ್ಥೇರಅಪದಾನಂ

೧೪. ‘‘ಖೀಣಾಸವಸಹಸ್ಸೇಹಿ, ನಿಯ್ಯಾತಿ ಲೋಕನಾಯಕೋ;

ವಿರವಪುಪ್ಫಮಾದಾಯ [ವಿರವಿಪುಪ್ಫಂ ಪಗ್ಗಯ್ಹ (ಸೀ.)], ಬುದ್ಧಸ್ಸ ಅಭಿರೋಪಯಿಂ.

೧೫. ‘‘ಏಕನವುತಿತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೧೬. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ವಿರವಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ವಿರವಪುಪ್ಫಿಯತ್ಥೇರಸ್ಸಾಪದಾನಂ ಚತುತ್ಥಂ.

೫. ಕುಟಿಧೂಪಕತ್ಥೇರಅಪದಾನಂ

೧೭. ‘‘ಸಿದ್ಧತ್ಥಸ್ಸ ಭಗವತೋ, ಅಹೋಸಿಂ ಕುಟಿಗೋಪಕೋ;

ಕಾಲೇನ ಕಾಲಂ ಧೂಪೇಸಿಂ, ಪಸನ್ನೋ ಸೇಹಿ ಪಾಣಿಭಿ.

೧೮. ‘‘ಚತುನ್ನವುತಿತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಧೂಪದಾನಸ್ಸಿದಂ [ಬುದ್ಧಪೂಜಾಯಿದಂ (ಸೀ.)] ಫಲಂ.

೧೯. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಕುಟಿಧೂಪಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಕುಟಿಧೂಪಕತ್ಥೇರಸ್ಸಾಪದಾನಂ ಪಞ್ಚಮಂ.

೬. ಪತ್ತದಾಯಕತ್ಥೇರಅಪದಾನಂ

೨೦. ‘‘ಪರಮೇನ ದಮಥೇನ, ಸಿದ್ಧತ್ಥಸ್ಸ ಮಹೇಸಿನೋ;

ಪತ್ತದಾನಂ ಮಯಾ ದಿನ್ನಂ, ಉಜುಭೂತಸ್ಸ ತಾದಿನೋ.

೨೧. ‘‘ಚತುನ್ನವುತಿತೋ ಕಪ್ಪೇ, ಯಂ ದಾನಮದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಪತ್ತದಾನಸ್ಸಿದಂ ಫಲಂ.

೨೨. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಪತ್ತದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಪತ್ತದಾಯಕತ್ಥೇರಸ್ಸಾಪದಾನಂ ಛಟ್ಠಂ.

೭. ಧಾತುಪೂಜಕತ್ಥೇರಅಪದಾನಂ

೨೩. ‘‘ನಿಬ್ಬುತೇ ಲೋಕನಾಥಮ್ಹಿ, ಸಿದ್ಧತ್ಥಮ್ಹಿ ನರುತ್ತಮೇ;

ಏಕಾ ಧಾತು ಮಯಾ ಲದ್ಧಾ, ದ್ವಿಪದಿನ್ದಸ್ಸ ತಾದಿನೋ.

೨೪. ‘‘ತಾಹಂ ಧಾತುಂ ಗಹೇತ್ವಾನ, ಬುದ್ಧಸ್ಸಾದಿಚ್ಚಬನ್ಧುನೋ;

ಪಞ್ಚವಸ್ಸೇ ಪರಿಚರಿಂ, ತಿಟ್ಠನ್ತಂವ ನರುತ್ತಮಂ.

೨೫. ‘‘ಚತುನ್ನವುತಿತೋ ಕಪ್ಪೇ, ಯಂ ಧಾತುಂ ಪೂಜಯಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಧಾತುಪಟ್ಠಹನೇ ಫಲಂ.

೨೬. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಧಾತುಪೂಜಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಧಾತುಪೂಜಕತ್ಥೇರಸ್ಸಾಪದಾನಂ ಸತ್ತಮಂ.

೮. ಸತ್ತಲಿಪುಪ್ಫಪೂಜಕತ್ಥೇರಅಪದಾನಂ

೨೭. ‘‘ಸತ್ತ ಸತ್ತಲಿಪುಪ್ಫಾನಿ, ಸೀಸೇ ಕತ್ವಾನಹಂ ತದಾ;

ಬುದ್ಧಸ್ಸ ಅಭಿರೋಪೇಸಿಂ, ವೇಸ್ಸಭುಮ್ಹಿ ನರುತ್ತಮೇ [ವಿಭತ್ತಿವಿಪಲ್ಲಾಸೋ ಚಿನ್ತೇತಬ್ಬೋ].

೨೮. ‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೨೯. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಸತ್ತಲಿಪುಪ್ಫಪೂಜಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಸತ್ತಲಿಪುಪ್ಫಪೂಜಕತ್ಥೇರಸ್ಸಾಪದಾನಂ ಅಟ್ಠಮಂ.

೯. ಬಿಮ್ಬಿಜಾಲಿಯತ್ಥೇರಅಪದಾನಂ

೩೦. ‘‘ಪದುಮುತ್ತರೋ ನಾಮ ಜಿನೋ, ಸಯಮ್ಭೂ ಅಗ್ಗಪುಗ್ಗಲೋ;

ಚತುಸಚ್ಚಂ ಪಕಾಸೇತಿ, ದೀಪೇತಿ ಅಮತಂ ಪದಂ.

೩೧. ‘‘ಬಿಮ್ಬಿಜಾಲಕಪುಪ್ಫಾನಿ [ಬಿಮ್ಬಜಾಲಕಪುಪ್ಫಾನಿ (ಕ.)], ಪುಥು ಕತ್ವಾನಹಂ ತದಾ;

ಬುದ್ಧಸ್ಸ ಅಭಿರೋಪೇಸಿಂ, ದ್ವಿಪದಿನ್ದಸ್ಸ ತಾದಿನೋ.

೩೨. ‘‘ಅಟ್ಠಸಟ್ಠಿಮ್ಹಿತೋ ಕಪ್ಪೇ, ಚತುರೋ ಕಿಞ್ಜಕೇಸರಾ;

ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.

೩೩. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಬಿಮ್ಬಿಜಾಲಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಬಿಮ್ಬಿಜಾಲಿಯತ್ಥೇರಸ್ಸಾಪದಾನಂ ನವಮಂ.

೧೦. ಉದ್ದಾಲಕದಾಯಕತ್ಥೇರಅಪದಾನಂ

೩೪. ‘‘ಕಕುಧೋ ನಾಮ ನಾಮೇನ, ಸಯಮ್ಭೂ ಅಪರಾಜಿತೋ;

ಪವನಾ ನಿಕ್ಖಮಿತ್ವಾನ, ಅನುಪ್ಪತ್ತೋ ಮಹಾನದಿಂ.

೩೫. ‘‘ಉದ್ದಾಲಕಂ ಗಹೇತ್ವಾನ, ಸಯಮ್ಭುಸ್ಸ ಅದಾಸಹಂ;

ಸಂಯತಸ್ಸುಜುಭೂತಸ್ಸ, ಪಸನ್ನಮಾನಸೋ ಅಹಂ.

೩೬. ‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;

ದುಗ್ಗತಿಂ ನಾಭಿಜಾನಾಮಿ, ಪುಪ್ಫದಾನಸ್ಸಿದಂ ಫಲಂ.

೩೭. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಉದ್ದಾಲಕದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಉದ್ದಾಲಕದಾಯಕತ್ಥೇರಸ್ಸಾಪದಾನಂ ದಸಮಂ.

ತುವರದಾಯಕವಗ್ಗೋ ಪಞ್ಚವೀಸತಿಮೋ.