೮. ಞಾಣಸಞ್ಞಿಕತ್ಥೇರಅಪದಾನಂ

೮೪. ‘‘ಪಬ್ಬತೇ ಹಿಮವನ್ತಮ್ಹಿ, ವಸಾಮಿ ಪಬ್ಬತನ್ತರೇ;

ಪುಲಿನಂ ಸೋಭನಂ ದಿಸ್ವಾ, ಬುದ್ಧಸೇಟ್ಠಂ ಅನುಸ್ಸರಿಂ.

೮೫. ‘‘ಞಾಣೇ ಉಪನಿಧಾ ನತ್ಥಿ, ಸಙ್ಖಾರಂ [ಸಙ್ಗಾಮಂ (ಸೀ. ಸ್ಯಾ.), ಸಙ್ಖಾತಂ (ಥೇರಗಾಥಾ ಅಟ್ಠ.)] ನತ್ಥಿ ಸತ್ಥುನೋ;

ಸಬ್ಬಧಮ್ಮಂ ಅಭಿಞ್ಞಾಯ, ಞಾಣೇನ ಅಧಿಮುಚ್ಚತಿ.

೮೬. ‘‘ನಮೋ ತೇ ಪುರಿಸಾಜಞ್ಞ, ನಮೋ ತೇ ಪುರಿಸುತ್ತಮ;

ಞಾಣೇನ ತೇ ಸಮೋ ನತ್ಥಿ, ಯಾವತಾ ಞಾಣಮುತ್ತಮಂ.

೮೭. ‘‘ಞಾಣೇ ಚಿತ್ತಂ ಪಸಾದೇತ್ವಾ, ಕಪ್ಪಂ ಸಗ್ಗಮ್ಹಿ ಮೋದಹಂ;

ಅವಸೇಸೇಸು ಕಪ್ಪೇಸು, ಕುಸಲಂ ಚರಿತಂ [ಕರಿತಂ (ಸೀ. ಸ್ಯಾ.), ಕಿರಿಯಂ (ಕ.)] ಮಯಾ.

೮೮. ‘‘ಏಕನವುತಿತೋ ಕಪ್ಪೇ, ಯಂ ಸಞ್ಞಮಲಭಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಞಾಣಸಞ್ಞಾಯಿದಂ ಫಲಂ.

೮೯. ‘‘ಇತೋ ಸತ್ತತಿಕಪ್ಪಮ್ಹಿ [ತೇಸತ್ತತಿಕಪ್ಪೇ (ಸೀ. ಸ್ಯಾ.)], ಏಕೋ ಪುಲಿನಪುಪ್ಫಿಯೋ;

ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.

೯೦. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಞಾಣಸಞ್ಞಿಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಞಾಣಸಞ್ಞಿಕತ್ಥೇರಸ್ಸಾಪದಾನಂ ಅಟ್ಠಮಂ.