೧. ಭಿಕ್ಖದಾಯಕತ್ಥೇರಅಪದಾನಂ

೧. ‘‘ಸುವಣ್ಣವಣ್ಣಂ ಸಮ್ಬುದ್ಧಂ, ಆಹುತೀನಂ ಪಟಿಗ್ಗಹಂ;

ಪವರಾ [ಪವನಾ (ಸ್ಯಾ.)] ಅಭಿನಿಕ್ಖನ್ತಂ, ವನಾ ನಿಬ್ಬನಮಾಗತಂ [ವಾನಾ ನಿಬ್ಬಾನಮಾಗತಂ (ಸ್ಯಾ.)].

೨. ‘‘ಕಟಚ್ಛುಭಿಕ್ಖಂ ಪಾದಾಸಿಂ, ಸಿದ್ಧತ್ಥಸ್ಸ ಮಹೇಸಿನೋ;

ಪಞ್ಞಾಯ ಉಪಸನ್ತಸ್ಸ, ಮಹಾವೀರಸ್ಸ ತಾದಿನೋ.

೩. ‘‘ಪದೇನಾನುಪದಾಯನ್ತಂ [ಪದೇನಾನುಪದಾಯನ್ತೋ (ಸೀ. ಸ್ಯಾ.)], ನಿಬ್ಬಾಪೇನ್ತೇ ಮಹಾಜನಂ;

ಉಳಾರಾ ವಿತ್ತಿ ಮೇ ಜಾತಾ, ಬುದ್ಧೇ ಆದಿಚ್ಚಬನ್ಧುನೇ [ವಿತ್ತಿ ಮೇ ಪಾಹುನಾ ತಾವ, ಬುದ್ಧಸ್ಸಾದಿಚ್ಚಬನ್ಧುನೋ (ಸ್ಯಾ.)].

೪. ‘‘ಚತುನ್ನವುತಿತೋ ಕಪ್ಪೇ, ಯಂ ದಾನಮದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಭಿಕ್ಖಾದಾನಸ್ಸಿದಂ ಫಲಂ.

೫. ‘‘ಸತ್ತಾಸೀತಿಮ್ಹಿತೋ ಕಪ್ಪೇ, ಮಹಾರೇಣು ಸನಾಮಕಾ;

ಸತ್ತರತನಸಮ್ಪನ್ನಾ, ಸತ್ತೇತೇ ಚಕ್ಕವತ್ತಿನೋ.

೬. ‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಭಿಕ್ಖದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಭಿಕ್ಖದಾಯಕತ್ಥೇರಸ್ಸಾಪದಾನಂ ಪಠಮಂ.