೩-೬. ಉಪಾಲಿತ್ಥೇರಅಪದಾನಂ

೪೪೧. ‘‘ನಗರೇ ಹಂಸವತಿಯಾ, ಸುಜಾತೋ ನಾಮ ಬ್ರಾಹ್ಮಣೋ;

ಅಸೀತಿಕೋಟಿನಿಚಯೋ, ಪಹೂತಧನಧಞ್ಞವಾ.

೪೪೨. ‘‘ಅಜ್ಝಾಯಕೋ ಮನ್ತಧರೋ, ತಿಣ್ಣಂ ವೇದಾನ ಪಾರಗೂ;

ಲಕ್ಖಣೇ ಇತಿಹಾಸೇ ಚ, ಸಧಮ್ಮೇ ಪಾರಮಿಂ ಗತೋ.

೪೪೩. ‘‘ಪರಿಬ್ಬಾಜಾ ಏಕಸಿಖಾ [ಏಕಭಿಕ್ಖಾ (ಕ.)], ಗೋತಮಾ

ಬುದ್ಧಸಾವಕಾ [ಸಬ್ಬತ್ಥಪಿ ಏವಮೇವ ದಿಸ್ಸತಿ].

ಚರಕಾ ತಾಪಸಾ ಚೇವ, ಚರನ್ತಿ ಮಹಿಯಾ ತದಾ.

೪೪೪. ‘‘ತೇಪಿ ಮಂ ಪರಿವಾರೇನ್ತಿ, ಬ್ರಾಹ್ಮಣೋ ವಿಸ್ಸುತೋ ಇತಿ;

ಬಹುಜ್ಜನೋ ಮಂ ಪೂಜೇತಿ, ನಾಹಂ ಪೂಜೇಮಿ ಕಿಞ್ಚನಂ.

೪೪೫. ‘‘ಪೂಜಾರಹಂ ನ ಪಸ್ಸಾಮಿ, ಮಾನತ್ಥದ್ಧೋ ಅಹಂ ತದಾ;

ಬುದ್ಧೋತಿ ವಚನಂ ನತ್ಥಿ, ತಾವ ನುಪ್ಪಜ್ಜತೇ ಜಿನೋ.

೪೪೬. ‘‘ಅಚ್ಚಯೇನ ಅಹೋರತ್ತಂ, ಪದುಮುತ್ತರನಾಮಕೋ [ನಾಯಕೋ (ಸೀ. ಸ್ಯಾ.)];

ಸಬ್ಬಂ ತಮಂ ವಿನೋದೇತ್ವಾ, ಲೋಕೇ ಉಪ್ಪಜ್ಜಿ ಚಕ್ಖುಮಾ.

೪೪೭. ‘‘ವಿತ್ಥಾರಿಕೇ ಬಾಹುಜಞ್ಞೇ, ಪುಥುಭೂತೇ ಚ ಸಾಸನೇ;

ಉಪಾಗಮಿ ತದಾ ಬುದ್ಧೋ, ನಗರಂ ಹಂಸಸವ್ಹಯಂ.

೪೪೮. ‘‘ಪಿತು ಅತ್ಥಾಯ ಸೋ ಬುದ್ಧೋ, ಧಮ್ಮಂ ದೇಸೇಸಿ ಚಕ್ಖುಮಾ;

ತೇನ ಕಾಲೇನ ಪರಿಸಾ, ಸಮನ್ತಾ ಯೋಜನಂ ತದಾ.

೪೪೯. ‘‘ಸಮ್ಮತೋ ಮನುಜಾನಂ ಸೋ, ಸುನನ್ದೋ ನಾಮ ತಾಪಸೋ;

ಯಾವತಾ ಬುದ್ಧಪರಿಸಾ, ಪುಪ್ಫೇಹಚ್ಛಾದಯೀ ತದಾ.

೪೫೦. ‘‘ಚತುಸಚ್ಚಂ ಪಕಾಸೇನ್ತೇ, ಸೇಟ್ಠೇ ಚ [ಹೇಟ್ಠಾ ಚ (ಕ.)] ಪುಪ್ಫಮಣ್ಡಪೇ;

ಕೋಟಿಸತಸಹಸ್ಸಾನಂ, ಧಮ್ಮಾಭಿಸಮಯೋ ಅಹು.

೪೫೧. ‘‘ಸತ್ತರತ್ತಿನ್ದಿವಂ ಬುದ್ಧೋ, ವಸ್ಸೇತ್ವಾ ಧಮ್ಮವುಟ್ಠಿಯೋ;

ಅಟ್ಠಮೇ ದಿವಸೇ ಪತ್ತೇ, ಸುನನ್ದಂ ಕಿತ್ತಯೀ ಜಿನೋ.

೪೫೨. ‘‘ದೇವಲೋಕೇ ಮನುಸ್ಸೇ ವಾ, ಸಂಸರನ್ತೋ ಅಯಂ ಭವೇ;

ಸಬ್ಬೇಸಂ ಪವರೋ ಹುತ್ವಾ, ಭವೇಸು ಸಂಸರಿಸ್ಸತಿ.

೪೫೩. ‘‘ಕಪ್ಪಸತಸಹಸ್ಸಮ್ಹಿ, ಓಕ್ಕಾಕಕುಲಸಮ್ಭವೋ;

ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.

೪೫೪. ‘‘ತಸ್ಸ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;

ಮನ್ತಾಣಿಪುತ್ತೋ ಪುಣ್ಣೋತಿ, ಹೇಸ್ಸತಿ ಸತ್ಥು ಸಾವಕೋ.

೪೫೫. ‘‘ಏವಂ ಕಿತ್ತಯಿ ಸಮ್ಬುದ್ಧೋ, ಸುನನ್ದಂ ತಾಪಸಂ ತದಾ;

ಹಾಸಯನ್ತೋ ಜನಂ ಸಬ್ಬಂ, ದಸ್ಸಯನ್ತೋ ಸಕಂ ಬಲಂ.

೪೫೬. ‘‘ಕತಞ್ಜಲೀ ನಮಸ್ಸನ್ತಿ, ಸುನನ್ದಂ ತಾಪಸಂ ಜನಾ;

ಬುದ್ಧೇ ಕಾರಂ ಕರಿತ್ವಾನ, ಸೋಧೇಸಿ ಗತಿಮತ್ತನೋ.

೪೫೭. ‘‘ತತ್ಥ ಮೇ ಅಹು ಸಙ್ಕಪ್ಪೋ, ಸುತ್ವಾನ ಮುನಿನೋ ವಚಂ;

ಅಹಮ್ಪಿ ಕಾರಂ ಕಸ್ಸಾಮಿ, ಯಥಾ ಪಸ್ಸಾಮಿ ಗೋತಮಂ.

೪೫೮. ‘‘ಏವಾಹಂ ಚಿನ್ತಯಿತ್ವಾನ, ಕಿರಿಯಂ ಚಿನ್ತಯಿಂ ಮಮ;

ಕ್ಯಾಹಂ ಕಮ್ಮಂ ಆಚರಾಮಿ, ಪುಞ್ಞಕ್ಖೇತ್ತೇ ಅನುತ್ತರೇ.

೪೫೯. ‘‘ಅಯಞ್ಚ ಪಾಠಿಕೋ ಭಿಕ್ಖು, ಸಬ್ಬಪಾಠಿಸ್ಸ ಸಾಸನೇ;

ವಿನಯೇ ಅಗ್ಗನಿಕ್ಖಿತ್ತೋ, ತಂ ಠಾನಂ ಪತ್ಥಯೇ ಅಹಂ.

೪೬೦. ‘‘ಇದಂ ಮೇ ಅಮಿತಂ ಭೋಗಂ, ಅಕ್ಖೋಭಂ ಸಾಗರೂಪಮಂ;

ತೇನ ಭೋಗೇನ ಬುದ್ಧಸ್ಸ, ಆರಾಮಂ ಮಾಪಯೇ ಅಹಂ.

೪೬೧. ‘‘ಸೋಭನಂ ನಾಮ ಆರಾಮಂ, ನಗರಸ್ಸ ಪುರತ್ಥತೋ;

ಕಿಣಿತ್ವಾ [ಕೀತ್ವಾ (ಸೀ.), ಕಿತ್ವಾ (ಕ.)] ಸತಸಹಸ್ಸೇನ, ಸಙ್ಘಾರಾಮಂ ಅಮಾಪಯಿಂ.

೪೬೨. ‘‘ಕೂಟಾಗಾರೇ ಚ ಪಾಸಾದೇ, ಮಣ್ಡಪೇ ಹಮ್ಮಿಯೇ ಗುಹಾ;

ಚಙ್ಕಮೇ ಸುಕತೇ ಕತ್ವಾ, ಸಙ್ಘಾರಾಮಂ ಅಮಾಪಯಿಂ.

೪೬೩. ‘‘ಜನ್ತಾಘರಂ ಅಗ್ಗಿಸಾಲಂ, ಅಥೋ ಉದಕಮಾಳಕಂ;

ನ್ಹಾನಘರಂ ಮಾಪಯಿತ್ವಾ, ಭಿಕ್ಖುಸಙ್ಘಸ್ಸದಾಸಹಂ.

೪೬೪. ‘‘ಆಸನ್ದಿಯೋ ಪೀಠಕೇ ಚ, ಪರಿಭೋಗೇ ಚ ಭಾಜನೇ;

ಆರಾಮಿಕಞ್ಚ ಭೇಸಜ್ಜಂ, ಸಬ್ಬಮೇತಂ ಅದಾಸಹಂ.

೪೬೫. ‘‘ಆರಕ್ಖಂ ಪಟ್ಠಪೇತ್ವಾನ, ಪಾಕಾರಂ ಕಾರಯಿಂ ದಳ್ಹಂ;

ಮಾ ನಂ ಕೋಚಿ ವಿಹೇಠೇಸಿ, ಸನ್ತಚಿತ್ತಾನ ತಾದಿನಂ.

೪೬೬. ‘‘ಸತಸಹಸ್ಸೇನಾವಾಸಂ [ಆವಾಸಂ ಸತಸಹಸ್ಸೇನ (ಸೀ.), ಆವಾಸೇ ಸತಸಹಸ್ಸೇ (ಸ್ಯಾ.)], ಸಙ್ಘಾರಾಮೇ ಅಮಾಪಯಿಂ;

ವೇಪುಲ್ಲಂ ತಂ ಮಾಪಯಿತ್ವಾ [ವೇಪುಲ್ಲತಂ ಪಾಪಯಿತ್ವಾ (ಸೀ.)], ಸಮ್ಬುದ್ಧಂ ಉಪನಾಮಯಿಂ.

೪೬೭. ‘‘ನಿಟ್ಠಾಪಿತೋ ಮಯಾರಾಮೋ, ಸಮ್ಪಟಿಚ್ಛ ತುವಂ ಮುನಿ;

ನಿಯ್ಯಾದೇಸ್ಸಾಮಿ ತಂ ವೀರ [ತೇ ವೀರ (ಸೀ.), ತಂ ಧೀರ (ಸ್ಯಾ.)], ಅಧಿವಾಸೇಹಿ ಚಕ್ಖುಮ.

೪೬೮. ‘‘ಪದುಮುತ್ತರೋ ಲೋಕವಿದೂ, ಆಹುತೀನಂ ಪಟಿಗ್ಗಹೋ;

ಮಮ ಸಙ್ಕಪ್ಪಮಞ್ಞಾಯ, ಅಧಿವಾಸೇಸಿ ನಾಯಕೋ.

೪೬೯. ‘‘ಅಧಿವಾಸನಮಞ್ಞಾಯ, ಸಬ್ಬಞ್ಞುಸ್ಸ ಮಹೇಸಿನೋ;

ಭೋಜನಂ ಪಟಿಯಾದೇತ್ವಾ, ಕಾಲಮಾರೋಚಯಿಂ ಅಹಂ.

೪೭೦. ‘‘ಆರೋಚಿತಮ್ಹಿ ಕಾಲಮ್ಹಿ, ಪದುಮುತ್ತರನಾಯಕೋ;

ಖೀಣಾಸವಸಹಸ್ಸೇಹಿ, ಆರಾಮಂ ಮೇ ಉಪಾಗಮಿ.

೪೭೧. ‘‘ನಿಸಿನ್ನಂ ಕಾಲಮಞ್ಞಾಯ, ಅನ್ನಪಾನೇನ ತಪ್ಪಯಿಂ;

ಭುತ್ತಾವಿಂ ಕಾಲಮಞ್ಞಾಯ, ಇದಂ ವಚನಮಬ್ರವಿಂ.

೪೭೨. ‘‘ಕೀತೋ ಸತಸಹಸ್ಸೇನ, ತತ್ತಕೇನೇವ ಕಾರಿತೋ;

ಸೋಭನೋ ನಾಮ ಆರಾಮೋ, ಸಮ್ಪಟಿಚ್ಛ ತುವಂ ಮುನಿ.

೪೭೩. ‘‘ಇಮಿನಾರಾಮದಾನೇನ, ಚೇತನಾಪಣಿಧೀಹಿ ಚ;

ಭವೇ ನಿಬ್ಬತ್ತಮಾನೋಹಂ, ಲಭಾಮಿ ಮಮ ಪತ್ಥಿತಂ.

೪೭೪. ‘‘ಪಟಿಗ್ಗಹೇತ್ವಾ ಸಮ್ಬುದ್ಧೋ, ಸಙ್ಘಾರಾಮಂ ಸುಮಾಪಿತಂ;

ಭಿಕ್ಖುಸಙ್ಘೇ ನಿಸೀದಿತ್ವಾ, ಇದಂ ವಚನಮಬ್ರವಿ.

೪೭೫. ‘‘ಯೋ ಸೋ ಬುದ್ಧಸ್ಸ ಪಾದಾಸಿ, ಸಙ್ಘಾರಾಮಂ ಸುಮಾಪಿತಂ;

ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.

೪೭೬. ‘‘ಹತ್ಥೀ ಅಸ್ಸಾ ರಥಾ ಪತ್ತೀ, ಸೇನಾ ಚ ಚತುರಙ್ಗಿನೀ;

ಪರಿವಾರೇಸ್ಸನ್ತಿಮಂ ನಿಚ್ಚಂ, ಸಙ್ಘಾರಾಮಸ್ಸಿದಂ ಫಲಂ.

೪೭೭. ‘‘ಸಟ್ಠಿ ತೂರಸಹಸ್ಸಾನಿ [ತುರಿಯಸಹಸ್ಸಾನಿ (ಸೀ. ಸ್ಯಾ.)], ಭೇರಿಯೋ ಸಮಲಙ್ಕತಾ;

ಪರಿವಾರೇಸ್ಸನ್ತಿಮಂ ನಿಚ್ಚಂ, ಸಙ್ಘಾರಾಮಸ್ಸಿದಂ ಫಲಂ.

೪೭೮. ‘‘ಛಳಸೀತಿಸಹಸ್ಸಾನಿ, ನಾರಿಯೋ ಸಮಲಙ್ಕತಾ;

ವಿಚಿತ್ತವತ್ಥಾಭರಣಾ, ಆಮುತ್ತಮಣಿಕುಣ್ಡಲಾ.

೪೭೯. ‘‘ಅಳಾರಪಮ್ಹಾ ಹಸುಲಾ, ಸುಸಞ್ಞಾ ತನುಮಜ್ಝಿಮಾ;

ಪರಿವಾರೇಸ್ಸನ್ತಿಮಂ ನಿಚ್ಚಂ, ಸಙ್ಘಾರಾಮಸ್ಸಿದಂ ಫಲಂ.

೪೮೦. ‘‘ತಿಂಸಕಪ್ಪಸಹಸ್ಸಾನಿ, ದೇವಲೋಕೇ ರಮಿಸ್ಸತಿ;

ಸಹಸ್ಸಕ್ಖತ್ತುಂ ದೇವಿನ್ದೋ, ದೇವರಜ್ಜಂ ಕರಿಸ್ಸತಿ.

೪೮೧. ‘‘ದೇವರಾಜೇನ ಪತ್ತಬ್ಬಂ, ಸಬ್ಬಂ ಪಟಿಲಭಿಸ್ಸತಿ;

ಅನೂನಭೋಗೋ ಹುತ್ವಾನ, ದೇವರಜ್ಜಂ ಕರಿಸ್ಸತಿ.

೪೮೨. ‘‘ಸಹಸ್ಸಕ್ಖತ್ತುಂ ಚಕ್ಕವತ್ತೀ, ರಾಜಾ ರಟ್ಠೇ ಭವಿಸ್ಸತಿ;

ಪಥಬ್ಯಾ ರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ.

೪೮೩. ‘‘ಕಪ್ಪಸತಸಹಸ್ಸಮ್ಹಿ, ಓಕ್ಕಾಕಕುಲಸಮ್ಭವೋ;

ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.

೪೮೪. ‘‘ತಸ್ಸ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;

ಉಪಾಲಿ ನಾಮ ನಾಮೇನ, ಹೇಸ್ಸತಿ ಸತ್ಥು ಸಾವಕೋ.

೪೮೫. ‘‘ವಿನಯೇ ಪಾರಮಿಂ ಪತ್ವಾ, ಠಾನಾಠಾನೇ ಚ ಕೋವಿದೋ;

ಜಿನಸಾಸನಂ ಧಾರೇನ್ತೋ, ವಿಹರಿಸ್ಸತಿನಾಸವೋ.

೪೮೬. ‘‘ಸಬ್ಬಮೇತಂ ಅಭಿಞ್ಞಾಯ, ಗೋತಮೋ ಸಕ್ಯಪುಙ್ಗವೋ;

ಭಿಕ್ಖುಸಙ್ಘೇ ನಿಸೀದಿತ್ವಾ, ಏತದಗ್ಗೇ ಠಪೇಸ್ಸತಿ.

೪೮೭. ‘‘ಅಪರಿಮೇಯ್ಯುಪಾದಾಯ, ಪತ್ಥೇಮಿ ತವ ಸಾಸನಂ;

ಸೋ ಮೇ ಅತ್ಥೋ ಅನುಪ್ಪತ್ತೋ, ಸಬ್ಬಸಂಯೋಜನಕ್ಖಯೋ.

೪೮೮. ‘‘ಯಥಾ ಸೂಲಾವುತೋ ಪೋಸೋ, ರಾಜದಣ್ಡೇನ ತಜ್ಜಿತೋ;

ಸೂಲೇ ಸಾತಂ ಅವಿನ್ದನ್ತೋ, ಪರಿಮುತ್ತಿಂವ ಇಚ್ಛತಿ.

೪೮೯. ‘‘ತಥೇವಾಹಂ ಮಹಾವೀರ, ಭವದಣ್ಡೇನ ತಜ್ಜಿತೋ;

ಕಮ್ಮಸೂಲಾವುತೋ ಸನ್ತೋ, ಪಿಪಾಸಾವೇದನಟ್ಟಿತೋ.

೪೯೦. ‘‘ಭವೇ ಸಾತಂ ನ ವಿನ್ದಾಮಿ, ಡಯ್ಹನ್ತೋ ತೀಹಿ ಅಗ್ಗಿಭಿ;

ಪರಿಮುತ್ತಿಂ ಗವೇಸಾಮಿ, ಯಥಾಪಿ ರಾಜದಣ್ಡಿತೋ.

೪೯೧. ‘‘ಯಥಾ ವಿಸಾದೋ ಪುರಿಸೋ, ವಿಸೇನ ಪರಿಪೀಳಿತೋ;

ಅಗದಂ ಸೋ ಗವೇಸೇಯ್ಯ, ವಿಸಘಾತಾಯುಪಾಲನಂ [ವಿಸಘಾತಾಯುಪಾಯನಂ (ಸ್ಯಾ. ಕ.)].

೪೯೨. ‘‘ಗವೇಸಮಾನೋ ಪಸ್ಸೇಯ್ಯ, ಅಗದಂ ವಿಸಘಾತಕಂ;

ತಂ ಪಿವಿತ್ವಾ ಸುಖೀ ಅಸ್ಸ, ವಿಸಮ್ಹಾ ಪರಿಮುತ್ತಿಯಾ.

೪೯೩. ‘‘ತಥೇವಾಹಂ ಮಹಾವೀರ, ಯಥಾ ವಿಸಹತೋ ನರೋ;

ಸಮ್ಪೀಳಿತೋ ಅವಿಜ್ಜಾಯ, ಸದ್ಧಮ್ಮಾಗದಮೇಸಹಂ.

೪೯೪. ‘‘ಧಮ್ಮಾಗದಂ ಗವೇಸನ್ತೋ, ಅದ್ದಕ್ಖಿಂ ಸಕ್ಯಸಾಸನಂ;

ಅಗ್ಗಂ ಸಬ್ಬೋಸಧಾನಂ ತಂ, ಸಬ್ಬಸಲ್ಲವಿನೋದನಂ.

೪೯೫. ‘‘ಧಮ್ಮೋಸಧಂ ಪಿವಿತ್ವಾನ, ವಿಸಂ ಸಬ್ಬಂ ಸಮೂಹನಿಂ;

ಅಜರಾಮರಂ ಸೀತಿಭಾವಂ, ನಿಬ್ಬಾನಂ ಫಸ್ಸಯಿಂ ಅಹಂ.

೪೯೬. ‘‘ಯಥಾ ಭೂತಟ್ಟಿತೋ ಪೋಸೋ, ಭೂತಗ್ಗಾಹೇನ ಪೀಳಿತೋ;

ಭೂತವೇಜ್ಜಂ ಗವೇಸೇಯ್ಯ, ಭೂತಸ್ಮಾ ಪರಿಮುತ್ತಿಯಾ.

೪೯೭. ‘‘ಗವೇಸಮಾನೋ ಪಸ್ಸೇಯ್ಯ, ಭೂತವಿಜ್ಜಾಸು ಕೋವಿದಂ;

ತಸ್ಸ ಸೋ ವಿಹನೇ ಭೂತಂ, ಸಮೂಲಞ್ಚ ವಿನಾಸಯೇ.

೪೯೮. ‘‘ತಥೇವಾಹಂ ಮಹಾವೀರ, ತಮಗ್ಗಾಹೇನ ಪೀಳಿತೋ;

ಞಾಣಾಲೋಕಂ ಗವೇಸಾಮಿ, ತಮತೋ ಪರಿಮುತ್ತಿಯಾ.

೪೯೯. ‘‘ಅಥದ್ದಸಂ ಸಕ್ಯಮುನಿಂ, ಕಿಲೇಸತಮಸೋಧನಂ;

ಸೋ ಮೇ ತಮಂ ವಿನೋದೇಸಿ, ಭೂತವೇಜ್ಜೋವ ಭೂತಕಂ.

೫೦೦. ‘‘ಸಂಸಾರಸೋತಂ ಸಞ್ಛಿನ್ದಿಂ, ತಣ್ಹಾಸೋತಂ ನಿವಾರಯಿಂ;

ಭವಂ ಉಗ್ಘಾಟಯಿಂ ಸಬ್ಬಂ, ಭೂತವೇಜ್ಜೋವ ಮೂಲತೋ.

೫೦೧. ‘‘ಗರುಳೋ ಯಥಾ ಓಪತತಿ, ಪನ್ನಗಂ ಭಕ್ಖಮತ್ತನೋ;

ಸಮನ್ತಾ ಯೋಜನಸತಂ, ವಿಕ್ಖೋಭೇತಿ ಮಹಾಸರಂ.

೫೦೨. ‘‘ಪನ್ನಗಂ ಸೋ ಗಹೇತ್ವಾನ, ಅಧೋಸೀಸಂ ವಿಹೇಠಯಂ;

ಆದಾಯ ಸೋ ಪಕ್ಕಮತಿ, ಯೇನಕಾಮಂ ವಿಹಙ್ಗಮೋ.

೫೦೩. ‘‘ತಥೇವಾಹಂ ಮಹಾವೀರ, ಯಥಾಪಿ ಗರುಳೋ ಬಲೀ;

ಅಸಙ್ಖತಂ ಗವೇಸನ್ತೋ, ದೋಸೇ ವಿಕ್ಖಾಲಯಿಂ ಅಹಂ.

೫೦೪. ‘‘ದಿಟ್ಠೋ ಅಹಂ ಧಮ್ಮವರಂ, ಸನ್ತಿಪದಮನುತ್ತರಂ;

ಆದಾಯ ವಿಹರಾಮೇತಂ, ಗರುಳೋ ಪನ್ನಗಂ ಯಥಾ.

೫೦೫. ‘‘ಆಸಾವತೀ ನಾಮ ಲತಾ, ಜಾತಾ ಚಿತ್ತಲತಾವನೇ;

ತಸ್ಸಾ ವಸ್ಸಸಹಸ್ಸೇನ, ಏಕಂ ನಿಬ್ಬತ್ತತೇ ಫಲಂ.

೫೦೬. ‘‘ತಂ ದೇವಾ ಪಯಿರುಪಾಸನ್ತಿ, ತಾವದೂರಫಲೇ ಸತಿ;

ದೇವಾನಂ ಸಾ ಪಿಯಾ ಏವಂ, ಆಸಾವತೀ ಲತುತ್ತಮಾ.

೫೦೭. ‘‘ಸತಸಹಸ್ಸುಪಾದಾಯ, ತಾಹಂ ಪರಿಚರೇ ಮುನಿ;

ಸಾಯಂ ಪಾತಂ ನಮಸ್ಸಾಮಿ, ದೇವಾ ಆಸಾವತಿಂ ಯಥಾ.

೫೦೮. ‘‘ಅವಞ್ಝಾ ಪಾರಿಚರಿಯಾ, ಅಮೋಘಾ ಚ ನಮಸ್ಸನಾ;

ದೂರಾಗತಮ್ಪಿ ಮಂ ಸನ್ತಂ, ಖಣೋಯಂ ನ ವಿರಾಧಯಿ.

೫೦೯. ‘‘ಪಟಿಸನ್ಧಿಂ ನ ಪಸ್ಸಾಮಿ, ವಿಚಿನನ್ತೋ ಭವೇ ಅಹಂ;

ನಿರೂಪಧಿ ವಿಪ್ಪಮುತ್ತೋ [ವಿಪ್ಪಯುತ್ತೋ (ಕ.)], ಉಪಸನ್ತೋ ಚರಾಮಹಂ.

೫೧೦. ‘‘ಯಥಾಪಿ ಪದುಮಂ ನಾಮ, ಸೂರಿಯರಂಸೇನ ಪುಪ್ಫತಿ;

ತಥೇವಾಹಂ ಮಹಾವೀರ, ಬುದ್ಧರಂಸೇನ ಪುಪ್ಫಿತೋ.

೫೧೧. ‘‘ಯಥಾ ಬಲಾಕಯೋನಿಮ್ಹಿ, ನ ವಿಜ್ಜತಿ ಪುಮೋ [ಪುಮಾ (ಸೀ. ಸ್ಯಾ.)] ಸದಾ;

ಮೇಘೇಸು ಗಜ್ಜಮಾನೇಸು, ಗಬ್ಭಂ ಗಣ್ಹನ್ತಿ ತಾ ಸದಾ.

೫೧೨. ‘‘ಚಿರಮ್ಪಿ ಗಬ್ಭಂ ಧಾರೇನ್ತಿ, ಯಾವ ಮೇಘೋ ನ ಗಜ್ಜತಿ;

ಭಾರತೋ ಪರಿಮುಚ್ಚನ್ತಿ, ಯದಾ ಮೇಘೋ ಪವಸ್ಸತಿ.

೫೧೩. ‘‘ಪದುಮುತ್ತರಬುದ್ಧಸ್ಸ, ಧಮ್ಮಮೇಘೇನ ಗಜ್ಜತೋ;

ಸದ್ದೇನ ಧಮ್ಮಮೇಘಸ್ಸ, ಧಮ್ಮಗಬ್ಭಂ ಅಗಣ್ಹಹಂ.

೫೧೪. ಸತಸಹಸ್ಸುಪಾದಾಯ, ಪುಞ್ಞಗಬ್ಭಂ ಧರೇಮಹಂ;

ನಪ್ಪಮುಚ್ಚಾಮಿ ಭಾರತೋ, ಧಮ್ಮಮೇಘೋ ನ ಗಜ್ಜತಿ.