೩-೮. ಪಿಣ್ಡೋಲಭಾರದ್ವಾಜತ್ಥೇರಅಪದಾನಂ

೬೧೩. ‘‘ಪದುಮುತ್ತರೋ ನಾಮ ಜಿನೋ, ಸಯಮ್ಭೂ ಅಗ್ಗಪುಗ್ಗಲೋ;

ಪುರತೋ ಹಿಮವನ್ತಸ್ಸ, ಚಿತ್ತಕೂಟೇ ವಸೀ ತದಾ.

೬೧೪. ‘‘ಅಭೀತರೂಪೋ ತತ್ಥಾಸಿಂ, ಮಿಗರಾಜಾ ಚತುಕ್ಕಮೋ;

ತಸ್ಸ ಸದ್ದಂ ಸುಣಿತ್ವಾನ, ವಿಕ್ಖಮ್ಭನ್ತಿ ಬಹುಜ್ಜನಾ.

೬೧೫. ‘‘ಸುಫುಲ್ಲಂ ಪದುಮಂ ಗಯ್ಹ, ಉಪಗಚ್ಛಿಂ ನರಾಸಭಂ;

ವುಟ್ಠಿತಸ್ಸ ಸಮಾಧಿಮ್ಹಾ, ಬುದ್ಧಸ್ಸ ಅಭಿರೋಪಯಿಂ.

೬೧೬. ‘‘ಚಾತುದ್ದಿಸಂ ನಮಸ್ಸಿತ್ವಾ, ಬುದ್ಧಸೇಟ್ಠಂ ನರುತ್ತಮಂ;

ಸಕಂ ಚಿತ್ತಂ ಪಸಾದೇತ್ವಾ, ಸೀಹನಾದಂ ನದಿಂ ಅಹಂ [ತದಾ (ಸ್ಯಾ.)].

೬೧೭. ‘‘ಪದುಮುತ್ತರೋ ಲೋಕವಿದೂ, ಆಹುತೀನಂ ಪಟಿಗ್ಗಹೋ;

ಸಕಾಸನೇ ನಿಸೀದಿತ್ವಾ, ಇಮಾ ಗಾಥಾ ಅಭಾಸಥ.

೬೧೮. ‘‘‘ಬುದ್ಧಸ್ಸ ಗಿರಮಞ್ಞಾಯ, ಸಬ್ಬೇ ದೇವಾ ಸಮಾಗತಾ;

ಆಗತೋ ವದತಂ ಸೇಟ್ಠೋ, ಧಮ್ಮಂ ಸೋಸ್ಸಾಮ ತಂ ಮಯಂ.

೬೧೯. ‘‘‘ತೇಸಂ ಹಾಸಪರೇತಾನಂ, ಪುರತೋ ಲೋಕನಾಯಕೋ;

ಮಮ ಸದ್ದಂ [ಕಮ್ಮಂ (?)] ಪಕಿತ್ತೇಸಿ, ದೀಘದಸ್ಸೀ ಮಹಾಮುನಿ’.

೬೨೦. ‘‘ಯೇನಿದಂ ಪದುಮಂ ದಿನ್ನಂ, ಸೀಹನಾದೋ ಚ ನಾದಿತೋ;

ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.

೬೨೧. ‘‘‘ಇತೋ ಅಟ್ಠಮಕೇ ಕಪ್ಪೇ, ಚಕ್ಕವತ್ತೀ ಭವಿಸ್ಸತಿ;

ಸತ್ತರತನಸಮ್ಪನ್ನೋ ಚತುದೀಪಮ್ಹಿ ಇಸ್ಸರೋ.

೬೨೨. ‘‘‘ಕಾರಯಿಸ್ಸತಿ ಇಸ್ಸರಿಯಂ [ಇಸ್ಸರಂ (ಸ್ಯಾ. ಕ.)], ಮಹಿಯಾ ಚತುಸಟ್ಠಿಯಾ;

ಪದುಮೋ ನಾಮ ನಾಮೇನ, ಚಕ್ಕವತ್ತೀ ಮಹಬ್ಬಲೋ.

೬೨೩. ‘‘ಕಪ್ಪಸತಸಹಸ್ಸಮ್ಹಿ, ಓಕ್ಕಾಕಕುಲಸಮ್ಭವೋ;

ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.

೬೨೪. ‘ಪಕಾಸಿತೇ ಪಾವಚನೇ, ಬ್ರಹ್ಮಬನ್ಧು ಭವಿಸ್ಸತಿ;

ಬ್ರಹ್ಮಞ್ಞಾ ಅಭಿನಿಕ್ಖಮ್ಮ, ಪಬ್ಬಜಿಸ್ಸತಿ ತಾವದೇ’.

೬೨೫. ‘‘ಪಧಾನಪಹಿತತ್ತೋ ಸೋ, ಉಪಸನ್ತೋ ನಿರೂಪಧಿ;

ಸಬ್ಬಾಸವೇ ಪರಿಞ್ಞಾಯ, ನಿಬ್ಬಾಯಿಸ್ಸತಿನಾಸವೋ.

೬೨೬. ‘‘ವಿಜನೇ ಪನ್ತಸೇಯ್ಯಮ್ಹಿ, ವಾಳಮಿಗಸಮಾಕುಲೇ;

ಸಬ್ಬಾಸವೇ ಪರಿಞ್ಞಾಯ, ನಿಬ್ಬಾಯಿಸ್ಸತಿನಾಸವೋ.

೬೨೭. ‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಪಿಣ್ಡೋಲಭಾರದ್ವಾಜೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಪಿಣ್ಡೋಲಭಾರದ್ವಾಜತ್ಥೇರಸ್ಸಾಪದಾನಂ ಅಟ್ಠಮಂ.