೩. ತತಿಯಪಾಟಿದೇಸನೀಯಸಿಕ್ಖಾಪದವಣ್ಣನಾ

೫೬೨. ತತಿಯೇ – ಉಭತೋಪಸನ್ನನ್ತಿ ದ್ವೀಹಿ ಪಸನ್ನಂ ಉಪಾಸಕೇನಪಿ ಉಪಾಸಿಕಾಯಪಿ. ತಸ್ಮಿಂ ಕಿರ ಕುಲೇ ಉಭೋಪಿ ತೇ ಸೋತಾಪನ್ನಾಯೇವ. ಭೋಗೇನ ಹಾಯತೀತಿ ಏದಿಸಞ್ಹಿ ಕುಲಂ ಸಚೇಪಿ ಅಸೀತಿಕೋಟಿಧನಂ ಹೋತಿ, ಭೋಗೇಹಿ ಹಾಯತಿಯೇವ. ಕಸ್ಮಾ? ಯಸ್ಮಾ ತತ್ಥ ನೇವ ಉಪಾಸಿಕಾ ನ ಉಪಾಸಕೋ ಭೋಗೇ ರಕ್ಖತಿ.

೫೬೯. ಘರತೋ ನೀಹರಿತ್ವಾ ದೇನ್ತೀತಿ ಆಸನಸಾಲಂ ವಾ ವಿಹಾರಂ ವಾ ಆನೇತ್ವಾ ದೇನ್ತಿ. ಸಚೇಪಿ ಅನಾಗತೇ ಭಿಕ್ಖುಮ್ಹಿ ಪಠಮಂಯೇವ ನೀಹರಿತ್ವಾ ದ್ವಾರೇ ಠಪೇತ್ವಾ ಪಚ್ಛಾ ಸಮ್ಪತ್ತಸ್ಸ ದೇನ್ತಿ, ವಟ್ಟತಿ. ಭಿಕ್ಖುಂ ಪನ ದಿಸ್ವಾ ಅನ್ತೋಗೇಹತೋ ನೀಹರಿತ್ವಾ ದಿಯ್ಯಮಾನಂ ನ ವಟ್ಟತೀತಿ ಮಹಾಪಚ್ಚರಿಯಂ ವುತ್ತಂ. ಸೇಸಮೇತ್ಥ ಉತ್ತಾನಮೇವ. ಏಳಕಲೋಮಸಮುಟ್ಠಾನಂ – ಕಿರಿಯಂ, ನೋಸಞ್ಞಾವಿಮೋಕ್ಖಂ, ಅಚಿತ್ತಕಂ, ಪಣ್ಣತ್ತಿವಜ್ಜಂ, ಕಾಯಕಮ್ಮಂ, ವಚೀಕಮ್ಮಂ ತಿಚಿತ್ತಂ, ತಿವೇದನನ್ತಿ.

ತತಿಯಪಾಟಿದೇಸನೀಯಂ.