೫. ಚಮ್ಮಕ್ಖನ್ಧಕಂ

ಸೋಣಕೋಳಿವಿಸವತ್ಥುಕಥಾ

೨೪೨. ಚಮ್ಮಕ್ಖನ್ಧಕೇ – ಇಸ್ಸರಿಯಾಧಿಪಚ್ಚನ್ತಿ ಇಸ್ಸರಭಾವೇನ ಚ ಅಧಿಪತಿಭಾವೇನ ಚ ಸಮನ್ನಾಗತಂ. ರಜ್ಜನ್ತಿ ರಾಜಭಾವಂ, ರಞ್ಞಾ ಕತ್ತಬ್ಬಕಿಚ್ಚಂ ವಾ. ಸೋಣೋ ನಾಮ ಕೋಳಿವಿಸೋತಿ ಏತ್ಥ ಸೋಣೋತಿ ತಸ್ಸ ನಾಮಂ; ಕೋಳಿವಿಸೋತಿ ಗೋತ್ತಂ. ಪಾದತಲೇಸು ಲೋಮಾನೀತಿ ರತ್ತೇಸು ಪಾದತಲೇಸು ಸುಖುಮಾನಿ ಅಞ್ಜನವಣ್ಣಾನಿ ಕಮ್ಮಚಿತ್ತೀಕತಾನಿ ಲೋಮಾನಿ ಜಾತಾನಿ ಹೋನ್ತಿ. ಸೋ ಕಿರ ಪುಬ್ಬೇ ಅಸೀತಿಸಹಸ್ಸಾನಂ ಪುರಿಸಾನಂ ಜೇಟ್ಠಪುರಿಸೋ ಹುತ್ವಾ ತೇಹಿ ಸದ್ಧಿಂ ಪಚ್ಚೇಕಬುದ್ಧಸ್ಸ ವಸನಟ್ಠಾನೇ ಪಣ್ಣಸಾಲಂ ಕತ್ವಾ ಅತ್ತನೋ ಸಸ್ಸಿರಿಕಂ ಉಣ್ಣಪಾವಾರಕಂ ಪಚ್ಚೇಕಬುದ್ಧಸ್ಸ ಪಾದೇಹಿ ಅಕ್ಕಮನಟ್ಠಾನೇ ಪಾದಪುಞ್ಛನಿಕಂ ಕತ್ವಾ ಠಪೇಸಿ. ತೇಮಾಸಂ ಪನ ಸಬ್ಬೇವ ಪಚ್ಚೇಕಬುದ್ಧಂ ಉಪಟ್ಠಹಿಂಸು. ಅಯಂ ತಸ್ಸ ಚ ತೇಸಞ್ಚ ಅಸೀತಿಯಾ ಗಾಮಿಕಸಹಸ್ಸಾನಂ ಪುಬ್ಬಯೋಗೋ.

ಅಸೀತಿಗಾಮಿಕಸಹಸ್ಸಾನೀತಿ ತೇಸು ಗಾಮೇಸು ವಸನ್ತಾನಂ ಕುಲಪುತ್ತಾನಂ ಅಸೀತಿಸಹಸ್ಸಾನಿ. ಕೇನಚಿದೇವ ಕರಣೀಯೇನಾತಿ ಕೇನಚಿ ಕರಣೀಯೇನ ವಿಯ; ನ ಪನಸ್ಸ ಕಿಞ್ಚಿ ಕರಣೀಯಂ ಅತ್ಥಿ ಅಞ್ಞತ್ರ ತಸ್ಸ ದಸ್ಸನಾ. ರಾಜಾ ಕಿರ ತಾನಿಪಿ ಅಸೀತಿಕುಲಪುತ್ತಸಹಸ್ಸಾನಿ ಸನ್ನಿಪಾತಾಪೇನ್ತೋ ‘‘ಏವಂ ಅಪರಿಸಙ್ಕನ್ತೋ ಸೋಣೋ ಆಗಮಿಸ್ಸತೀ’’ತಿ ಸನ್ನಿಪಾತಾಪೇಸಿ. ದಿಟ್ಠಧಮ್ಮಿಕೇ ಅತ್ಥೇತಿ ‘‘ಕಸಿವಣಿಜ್ಜಾದೀನಿ ಧಮ್ಮೇನ ಕತ್ತಬ್ಬಾನಿ, ಮಾತಾಪಿತರೋ ಧಮ್ಮೇನ ಪೋಸಿತಬ್ಬಾ’’ತಿ ಏವಮಾದಿನಾ ನಯೇನ ಇಧಲೋಕಹಿತೇ ಅತ್ಥೇ ಅನುಸಾಸಿತ್ವಾ. ಸೋ ನೋ ಭಗವಾತಿ ಸೋ ಅಮ್ಹಾಕಂ ಭಗವಾ ತುಮ್ಹೇ ಸಮ್ಪರಾಯಿಕೇ ಅತ್ಥೇ ಅನುಸಾಸಿಸ್ಸತೀತಿ ಅತ್ಥೋ.

ಭಗವನ್ತಂ ಪಟಿವೇದೇಮೀತಿ ಭಗವನ್ತಂ ಜಾನಾಪೇಮಿ. ಪಾಟಿಕಾಯ ನಿಮುಜ್ಜಿತ್ವಾತಿ ಸೋಪಾನಸ್ಸ ಹೇಟ್ಠಾ ಅಡ್ಢಚನ್ದಪಾಸಾಣೇ ನಿಮುಜ್ಜಿತ್ವಾ. ಯಸ್ಸ ದಾನಿ ಭನ್ತೇ ಭಗವಾ ಕಾಲಂ ಮಞ್ಞತೀತಿ ಯಸ್ಸ ತೇಸಂ ಹಿತಕಿರಿಯತ್ಥಸ್ಸ ಭಗವಾ ಕಾಲಂ ಜಾನಾತಿ. ವಿಹಾರಪಚ್ಛಾಯಾಯನ್ತಿ ವಿಹಾರಪಚ್ಚನ್ತೇ ಛಾಯಾಯಂ. ಸಮನ್ನಾಹರನ್ತೀತಿ ಪಸಾದವಸೇನ ಪುನಪ್ಪುನಂ ಮನಸಿ ಕರೋನ್ತಿ. ಭಿಯ್ಯೋಸೋಮತ್ತಾಯಾತಿ ಭಿಯ್ಯೋಸೋಮತ್ತಾಯ ಪುನ ವಿಸಿಟ್ಠತರಂ ದಸ್ಸೇಹೀತಿ ಅತ್ಥೋ. ಅನ್ತರಧಾಯತೀತಿ ಅದಸ್ಸನಂ ಹೋತಿ.

ಸೋಣಸ್ಸ ಪಬ್ಬಜ್ಜಾಕಥಾ

೨೪೩. ಲೋಹಿತೇನ ಫುಟೋ ಹೋತೀತಿ ಲೋಹಿತೇನ ಮಕ್ಖಿತೋ ಹೋತಿ. ಗವಾಘಾತನನ್ತಿ ಯತ್ಥ ಗಾವೋ ಹಞ್ಞನ್ತಿ, ತಾದಿಸೋತಿ ಅತ್ಥೋ. ಕುಸಲೋ ನಾಮ ವೀಣಾಯ ವಾದನಕುಸಲೋ. ವೀಣಾಯ ತನ್ತಿಸ್ಸರೇತಿ ವೀಣಾಯ ತನ್ತಿಯಾ ಸರೇ. ಅಚ್ಚಾಯತಾತಿ ಅತಿಆಯತಾ ಖರಮುಚ್ಛಿತಾ. ಸರವತೀತಿ ಸರಸಮ್ಪನ್ನಾ. ಕಮ್ಮಞ್ಞಾತಿ ಕಮ್ಮಕ್ಖಮಾ. ಅತಿಸಿಥಿಲಾತಿ ಮನ್ದಮುಚ್ಛನಾ. ಸಮೇ ಗುಣೇ ಪತಿಟ್ಠಿತಾತಿ ಮಜ್ಝಿಮೇ ಸರೇ ಠಪೇತ್ವಾ ಮುಚ್ಛಿತಾ. ವೀರಿಯಸಮತಂ ಅಧಿಟ್ಠಹಾತಿ ವೀರಿಯಸಮ್ಪಯುತ್ತಸಮತಂ ಅಧಿಟ್ಠಾಹಿ, ವೀರಿಯಂ ಸಮಥೇನ ಯೋಜೇಹೀತಿ ಅತ್ಥೋ. ಇನ್ದ್ರಿಯಾನಞ್ಚ ಸಮತಂ ಪಟಿವಿಜ್ಝಾತಿ ಸದ್ಧಾದೀನಂ ಇನ್ದ್ರಿಯಾನಂ ಸಮತಂ ಸಮಭಾವಂ. ತತ್ಥ ಸದ್ಧಂ ಪಞ್ಞಾಯ, ಪಞ್ಞಞ್ಚ ಸದ್ಧಾಯ, ವೀರಿಯಂ ಸಮಾಧಿನಾ, ಸಮಾಧಿಞ್ಚ ವೀರಿಯೇನ ಯೋಜಯಮಾನೋ ಇನ್ದ್ರಿಯಾನಂ ಸಮತಂ ಪಟಿವಿಜ್ಝ. ತತ್ಥ ಚ ನಿಮಿತ್ತಂ ಗಣ್ಹಾಹೀತಿ ತಸ್ಮಿಂ ಸಮಥೇ ಸತಿ, ಯೇನ ಆದಾಸೇ ಮುಖಬಿಮ್ಬೇನೇವ ನಿಮಿತ್ತೇನ ಉಪ್ಪಜ್ಜಿತಬ್ಬಂ, ತಂ ಸಮಥನಿಮಿತ್ತಂ ವಿಪಸ್ಸನಾನಿಮಿತ್ತಂ ಮಗ್ಗನಿಮಿತ್ತಂ ಫಲನಿಮಿತ್ತಞ್ಚ ಗಣ್ಹಾಹಿ, ನಿಬ್ಬತ್ತೇಹೀತಿ ಅತ್ಥೋ.

೨೪೪. ಅಞ್ಞಂ ಬ್ಯಾಕರೇಯ್ಯನ್ತಿ ಅರಹಾ ಅಹನ್ತಿ ಜಾನಾಪೇಯ್ಯಂ. ಛ ಠಾನಾನೀತಿ ಛ ಕಾರಣಾನಿ. ಅಧಿಮುತ್ತೋ ಹೋತೀತಿ ಪಟಿವಿಜ್ಝಿತ್ವಾ ಪಚ್ಚಕ್ಖಂ ಕತ್ವಾ ಠಿತೋ ಹೋತಿ. ನೇಕ್ಖಮ್ಮಾಧಿಮುತ್ತೋತಿಆದಿ ಸಬ್ಬಂ ಅರಹತ್ತವಸೇನ ವುತ್ತಂ. ಅರಹತ್ತಞ್ಹಿ ಸಬ್ಬಕಿಲೇಸೇಹಿ ನಿಕ್ಖನ್ತತ್ತಾ ನೇಕ್ಖಮ್ಮಂ, ತೇಹೇವ ಪವಿವಿತ್ತತ್ತಾ ಪವಿವೇಕೋ, ಬ್ಯಾಪಜ್ಜಾಭಾವತೋ ಅಬ್ಯಾಪಜ್ಜಂ, ಉಪಾದಾನಸ್ಸ ಖಯನ್ತೇ ಉಪ್ಪನ್ನತ್ತಾ ಉಪಾದಾನಕ್ಖಯೋ, ತಣ್ಹಾಕ್ಖಯನ್ತೇ ಉಪ್ಪನ್ನತ್ತಾ ತಣ್ಹಕ್ಖಯೋ, ಸಮ್ಮೋಹಾಭಾವತೋ ಅಸಮ್ಮೋಹೋತಿ ಚ ವುಚ್ಚತಿ.

ಕೇವಲಂ ಸದ್ಧಾಮತ್ತಕನ್ತಿ ಪಟಿವೇಧರಹಿತಂ ಕೇವಲಂ ಪಟಿವೇಧಪಞ್ಞಾಯ ಅಸಮ್ಮಿಸ್ಸಂ ಸದ್ಧಾಮತ್ತಕಂ. ಪಟಿಚಯನ್ತಿ ಪುನಪ್ಪುನಂ ಕರಣೇನ ವುಡ್ಢಿಂ. ವೀತರಾಗತ್ತಾತಿ ಮಗ್ಗಪ್ಪಟಿವೇಧೇನ ರಾಗಸ್ಸ ವಿಗತತ್ತಾಯೇವ ನೇಕ್ಖಮ್ಮಸಙ್ಖಾತಂ ಅರಹತ್ತಂ ಪಟಿವಿಜ್ಝಿತ್ವಾ ಠಿತೋ ಹೋತಿ. ಫಲಸಮಾಪತ್ತಿವಿಹಾರೇನೇವ ವಿಹರತಿ, ತನ್ನಿನ್ನಮಾನಸೋಯೇವ ಹೋತೀತಿ ಅತ್ಥೋ. ಸೇಸಪದೇಸುಪಿ ಏಸೇವ ನಯೋ.

ಲಾಭಸಕ್ಕಾರಸಿಲೋಕನ್ತಿ ಚತುಪಚ್ಚಯಲಾಭಞ್ಚ ತೇಸಂಯೇವ ಸುಕತಭಾವಞ್ಚ ವಣ್ಣಭಣನಞ್ಚ. ನಿಕಾಮಯಮಾನೋತಿ ಇಚ್ಛಮಾನೋ ಪತ್ಥಯಮಾನೋ. ಪವಿವೇಕಾಧಿಮುತ್ತೋತಿ ವಿವೇಕೇ ಅಧಿಮುತ್ತೋ ಅಹನ್ತಿ ಏವಂ ಅರಹತ್ತಂ ಬ್ಯಾಕರೋತೀತಿ ಅತ್ಥೋ.

ಸೀಲಬ್ಬತಪರಾಮಾಸನ್ತಿ ಸೀಲಞ್ಚ ವತಞ್ಚ ಪರಾಮಸಿತ್ವಾ ಗಹಿತಗಹಣಮತ್ತಂ. ಸಾರತೋ ಪಚ್ಚಾಗಚ್ಛನ್ತೋತಿ ಸಾರಭಾವೇನ ಜಾನನ್ತೋ. ಅಬ್ಯಾಪಜ್ಜಾಧಿಮುತ್ತೋತಿ ಅಬ್ಯಾಪಜ್ಜಂ ಅರಹತ್ತಂ ಬ್ಯಾಕರೋತೀತಿ ಅತ್ಥೋ. ಇಮಿನಾವ ನಯೇನ ಸಬ್ಬವಾರೇಸು ಅತ್ಥೋ ವೇದಿತಬ್ಬೋ.

ಭುಸಾತಿ ಬಲವನ್ತೋ. ನೇವಸ್ಸ ಚಿತ್ತಂ ಪರಿಯಾದಿಯನ್ತೀತಿ ಏತಸ್ಸ ಖೀಣಾಸವಸ್ಸ ಚಿತ್ತಂ ಗಹೇತ್ವಾ ಠಾತುಂ ನ ಸಕ್ಕೋನ್ತಿ. ಅಮಿಸ್ಸೀಕತನ್ತಿ ಅಮಿಸ್ಸಕತಂ. ಕಿಲೇಸಾಹಿ ಆರಮ್ಮಣೇನ ಸದ್ಧಿಂ ಚಿತ್ತಂ ಮಿಸ್ಸಂ ಕರೋನ್ತಿ, ತೇಸಂ ಅಭಾವಾ ಅಮಿಸ್ಸೀಕತಂ. ಠಿತನ್ತಿ ಪತಿಟ್ಠಿತಂ. ಆನೇಞ್ಜಪ್ಪತ್ತನ್ತಿ ಅಚಲನಪ್ಪತ್ತಂ. ವಯಞ್ಚಸ್ಸಾನುಪಸ್ಸತೀತಿ ತಸ್ಸ ಚಿತ್ತಸ್ಸ ಉಪ್ಪಾದಮ್ಪಿ ವಯಮ್ಪಿ ಪಸ್ಸತಿ.

ನೇಕ್ಖಮ್ಮಂ ಅಧಿಮುತ್ತಸ್ಸಾತಿ ಅರಹತ್ತಂ ಪಟಿವಿಜ್ಝಿತ್ವಾ ಠಿತಸ್ಸ. ಸೇಸಪದೇಹಿಪಿ ಅರಹತ್ತಮೇವ ಕಥಿತಂ. ಉಪಾದಾನಕ್ಖಯಸ್ಸಾತಿ ಉಪಯೋಗತ್ಥೇ ಸಾಮಿವಚನಂ. ಅಸಮ್ಮೋಹಞ್ಚ ಚೇತಸೋತಿ ಚಿತ್ತಸ್ಸ ಚ ಅಸಮ್ಮೋಹಂ ಅಧಿಮುತ್ತಸ್ಸ. ದಿಸ್ವಾ ಆಯತನುಪ್ಪಾದನ್ತಿ ಆಯತನಾನಂ ಉಪ್ಪಾದಞ್ಚ ವಯಞ್ಚ ದಿಸ್ವಾ. ಸಮ್ಮಾ ಚಿತ್ತಂ ವಿಮುಚ್ಚತೀತಿ ಸಮ್ಮಾ ಹೇತುನಾ ನಯೇನ ಇಮಾಯ ವಿಪಸ್ಸನಾಯ ಪಟಿಪತ್ತಿಯಾ ಫಲಸಮಾಪತ್ತಿವಸೇನ ಚಿತ್ತಂ ವಿಮುಚ್ಚತಿ, ನಿಬ್ಬಾನಾರಮ್ಮಣೇ ಅಧಿಮುಚ್ಚತಿ. ಸನ್ತಚಿತ್ತಸ್ಸಾತಿ ನಿಬ್ಬುತಚಿತ್ತಸ್ಸ. ತಾದಿನೋತಿ ಇಟ್ಠಾನಿಟ್ಠೇ ಅನುನಯಪಟಿಘೇಹಿ ಅಕಮ್ಪಿಯತ್ತಾ ತಾದೀ, ತಸ್ಸ ತಾದಿನೋ.

ದಿಗುಣಾದಿಉಪಾಹನಪಟಿಕ್ಖೇಪಕಥಾ

೨೪೫. ಅಞ್ಞಂ ಬ್ಯಾಕರೋನ್ತೀತಿ ಅರಹತ್ತಂ ಬ್ಯಾಕರೋನ್ತಿ. ಅತ್ಥೋ ಚ ವುತ್ತೋತಿ ಯೇನ ಅರಹಾತಿ ಞಾಯತಿ, ಸೋ ಅತ್ಥೋ ವುತ್ತೋ. ಸುತ್ತತ್ಥೋ ಪನ ಸುತ್ತವಣ್ಣನತೋಯೇವ ಗಹೇತಬ್ಬೋ. ಅತ್ತಾ ಚ ಅನುಪನೀತೋತಿ ಅಹಂ ಅರಹಾತಿ ಏವಂ ಬ್ಯಞ್ಜನವಸೇನ ಅತ್ತಾ ನ ಉಪನೀತೋ. ಅಥ ಚ ಪನಿಧೇಕಚ್ಚೇ ಮೋಘಪುರಿಸಾತಿ ಅಞ್ಞೇ ಪನ ತುಚ್ಛಪುರಿಸಾ ಹಸಮಾನಾ ವಿಯ ಅಸನ್ತಮೇವ ಅಞ್ಞಂ ವಚನಮತ್ತೇನ ಸನ್ತಂ ಕತ್ವಾ ಬ್ಯಾಕರೋನ್ತಿ. ಏಕಪಲಾಸಿಕನ್ತಿ ಏಕಪಟಲಂ. ಅಸೀತಿಸಕಟವಾಹೇತಿ ಏತ್ಥ ದ್ವೇ ಸಕಟಭಾರಾ ಏಕೋ ವಾಹೋತಿ ವೇದಿತಬ್ಬೋ. ಸತ್ತಹತ್ಥಿಕಞ್ಚ ಅನೀಕನ್ತಿ ಏತ್ಥ ಛ ಹತ್ಥಿನಿಯೋ ಏಕೋ ಚ ಹತ್ಥೀತಿ ಇದಮೇಕಂ ಅನೀಕಂ. ಈದಿಸಾನಿ ಸತ್ತ ಅನೀಕಾನಿ ಸತ್ತಹತ್ಥಿಕಂ ಅನೀಕಂ ನಾಮ. ದಿಗುಣಾತಿ ದ್ವಿಪಟಲಾ. ತಿಗುಣಾತಿ ತಿಪಟಲಾ. ಗಣಙ್ಗುಣೂಪಾಹನಾತಿ ಚತುಪಟಲತೋ ಪಟ್ಠಾಯ ವುಚ್ಚತಿ.

ಸಬ್ಬನೀಲಿಕಾದಿಪಟಿಕ್ಖೇಪಕಥಾ

೨೪೬. ಸಬ್ಬನೀಲಿಕಾತಿ ಸಬ್ಬಾವ ನೀಲಿಕಾ. ಏಸ ನಯೋ ಸಬ್ಬಪೀತಿಕಾದೀಸುಪಿ. ತತ್ಥ ಚ ನೀಲಿಕಾ ಉಮಾಪುಪ್ಫವಣ್ಣಾ ಹೋತಿ, ಪೀತಿಕಾ ಕಣಿಕಾರಪುಪ್ಫವಣ್ಣಾ, ಲೋಹಿತಿಕಾ ಜಯಸುಮನಪುಪ್ಫವಣ್ಣಾ, ಮಞ್ಜಿಟ್ಠಿಕಾ ಮಞ್ಜಿಟ್ಠವಣ್ಣಾ ಏವ, ಕಣ್ಹಾ ಅದ್ದಾರಿಟ್ಠಕವಣ್ಣಾ, ಮಹಾರಙ್ಗರತ್ತಾ ಸತಪದಿಪಿಟ್ಠಿವಣ್ಣಾ, ಮಹಾನಾಮರತ್ತಾ ಸಮ್ಭಿನ್ನವಣ್ಣಾ ಹೋತಿ ಪಣ್ಡುಪಲಾಸವಣ್ಣಾ. ಕುರುನ್ದಿಯಂ ಪನ ‘‘ಪದುಮಪುಪ್ಫವಣ್ಣಾ’’ತಿ ವುತ್ತಾ. ಏತಾಸು ಯಂಕಿಞ್ಚಿ ಲಭಿತ್ವಾ ರಜನಂ ಚೋಳಕೇನ ಪುಞ್ಛಿತ್ವಾ ವಣ್ಣಂ ಭಿನ್ದಿತ್ವಾ ಧಾರೇತುಂ ವಟ್ಟತಿ. ಅಪ್ಪಮತ್ತಕೇಪಿ ಭಿನ್ನೇ ವಟ್ಟತಿಯೇವ.

ನೀಲಕವದ್ಧಿಕಾತಿ ಯಾಸಂ ವದ್ಧಾಯೇವ ನೀಲಾ. ಏಸೇವ ನಯೋ ಸಬ್ಬತ್ಥ. ಏತಾಪಿ ವಣ್ಣಭೇದಂ ಕತ್ವಾ ಧಾರೇತಬ್ಬಾ. ಖಲ್ಲಕಬದ್ಧಾತಿ ಪಣ್ಹಿಪಿಧಾನತ್ಥಂ ತಲೇ ಖಲ್ಲಕಂ ಬನ್ಧಿತ್ವಾ ಕತಾ. ಪುಟಬದ್ಧಾತಿ ಯೋನಕಉಪಾಹನಾ ವುಚ್ಚತಿ, ಯಾ ಯಾವಜಙ್ಘತೋ ಸಬ್ಬಪಾದಂ ಪಟಿಚ್ಛಾದೇತಿ. ಪಾಲಿಗುಣ್ಠಿಮಾತಿ ಪಲಿಗುಣ್ಠಿತ್ವಾ ಕತಾ; ಯಾ ಉಪರಿ ಪಾದಮತ್ತಮೇವ ಪಟಿಚ್ಛಾದೇತಿ, ನ ಜಙ್ಘಂ. ತೂಲಪುಣ್ಣಿಕಾತಿ ತೂಲಪಿಚುನಾ ಪೂರೇತ್ವಾ ಕತಾ. ತಿತ್ತಿರಪತ್ತಿಕಾತಿ ತಿತ್ತಿರಪತ್ತಸದಿಸಾ ವಿಚಿತ್ತಬದ್ಧಾ. ಮೇಣ್ಡವಿಸಾಣವದ್ಧಿಕಾತಿ ಕಣ್ಣಿಕಟ್ಠಾನೇ ಮೇಣ್ಡಕಸಿಙ್ಗಸಣ್ಠಾನೇ ವದ್ಧೇ ಯೋಜೇತ್ವಾ ಕತಾ. ಅಜವಿಸಾಣವದ್ಧಿಕಾದೀಸುಪಿ ಏಸೇವ ನಯೋ. ವಿಚ್ಛಿಕಾಳಿಕಾಪಿ ತತ್ಥೇವ ವಿಚ್ಛಿಕನಙ್ಗುಟ್ಠಸಣ್ಠಾನೇ ವದ್ಧೇ ಯೋಜೇತ್ವಾ ಕತಾ. ಮೋರಪಿಞ್ಛಪರಿಸಿಬ್ಬಿತಾತಿ ತಲೇಸು ವಾ ವದ್ಧೇಸು ವಾ ಮೋರಪಿಞ್ಛೇಹಿ ಸುತ್ತಕಸದಿಸೇಹಿ ಪರಿಸಿಬ್ಬಿತಾ. ಚಿತ್ರಾತಿ ವಿಚಿತ್ರಾ; ಏತಾಸು ಯಂಕಿಞ್ಚಿ ಲಭಿತ್ವಾ, ಸಚೇ ತಾನಿ ಖಲ್ಲಕಾದೀನಿ ಅಪನೇತ್ವಾ ಸಕ್ಕಾ ಹೋನ್ತಿ ವಳಞ್ಜಿತುಂ, ವಳಞ್ಜೇತಬ್ಬಾ. ತೇಸು ಪನ ಸತಿ ವಳಞ್ಜನ್ತಸ್ಸ ದುಕ್ಕಟಂ. ಸೀಹಚಮ್ಮಪರಿಕ್ಖಟಾ ನಾಮ ಪರಿಯನ್ತೇಸು ಚೀವರೇ ಅನುವಾತಂ ವಿಯ ಸೀಹಚಮ್ಮಂ ಯೋಜೇತ್ವಾ ಕತಾ. ಲೂವಕಚಮ್ಮಪರಿಕ್ಖಟಾತಿ ಪಕ್ಖಿಬಿಳಾಲಚಮ್ಮಪರಿಕ್ಖಟಾ. ಏತಾಸುಪಿ ಯಾ ಕಾಚಿ ಲಭಿತ್ವಾ ತಂ ಚಮ್ಮಂ ಅಪನೇತ್ವಾ ಧಾರೇತಬ್ಬಾ.

೨೪೭. ಓಮುಕ್ಕನ್ತಿ ಪಟಿಮುಞ್ಚಿತ್ವಾ ಅಪನೀತಂ. ನವಾತಿ ಅಪರಿಭುತ್ತಾ.

ಅಜ್ಝಾರಾಮೇಉಪಾಹನಪಟಿಕ್ಖೇಪಕಥಾ

೨೪೮. ಅಭಿಜೀವನಿಕಸ್ಸಾತಿ ಯೇನ ಸಿಪ್ಪೇನ ಅಭಿಜೀವನ್ತಿ, ಜೀವಿಕಂ ಕಪ್ಪೇನ್ತಿ, ತಸ್ಸ ಕಾರಣಾತಿ ಅತ್ಥೋ. ಇಧ ಖೋ ತಂ ಭಿಕ್ಖವೇತಿ ಏತ್ಥ ತನ್ತಿ ನಿಪಾತಮತ್ತಂ, ಇಧ ಖೋ ಭಿಕ್ಖವೇ ಸೋಭೇಯ್ಯಾಥಾತಿ ಅತ್ಥೋ. ಯಂ ತುಮ್ಹೇತಿ ಯೇ ತುಮ್ಹೇ. ಅಥ ವಾ ಯದಿ ತುಮ್ಹೇತಿ ವುತ್ತಂ ಹೋತಿ. ಯದಿಸದ್ದಸ್ಸ ಹಿ ಅತ್ಥೇ ಅಯಂ ನಿಪಾತೋ. ಆಚರಿಯೇಸೂತಿಆದಿಮ್ಹಿ ಪಬ್ಬಜ್ಜಾಚರಿಯೋ, ಉಪಸಮ್ಪದಾಚರಿಯೋ, ನಿಸ್ಸಯಾಚಾರಿಯೋ, ಉದ್ದೇಸಾಚರಿಯೋತಿ ಇಮೇ ಚತ್ತಾರೋಪಿ ಇಧ ಆಚರಿಯಾ ಏವ. ಅವಸ್ಸಿಕಸ್ಸ ಛಬ್ಬಸ್ಸೋ ಆಚರಿಯಮತ್ತೋ. ಸೋ ಹಿ ಚತುವಸ್ಸಕಾಲೇ ತಂ ನಿಸ್ಸಾಯ ವಚ್ಛತಿ; ಏವಂ ಏಕವಸ್ಸಸ್ಸ ಸತ್ತವಸ್ಸೋ, ದುವಸ್ಸಸ್ಸ ಅಟ್ಠವಸ್ಸೋ, ತಿವಸ್ಸಸ್ಸ ನವವಸ್ಸೋ, ಚತುವಸ್ಸಸ್ಸ ದಸವಸ್ಸೋ. ಇಮೇಪಿ ಆಚರಿಯಮತ್ತಾ ಏವ. ಉಪಜ್ಝಾಯಸ್ಸ ಸನ್ದಿಟ್ಠಸಮ್ಭತ್ತಾ ಪನ ಸಹಾಯಭಿಕ್ಖೂ, ಯೇ ವಾ ಪನ ಕೇಚಿ ದಸಹಿ ವಸ್ಸೇಹಿ ಮಹನ್ತತರಾ ತೇ ಸಬ್ಬೇಪಿ ಉಪಜ್ಝಾಯಮತ್ತಾ ನಾಮ. ಏತ್ತಕೇಸು ಭಿಕ್ಖೂಸು ಅನುಪಾಹನೇಸು ಚಙ್ಕಮನ್ತೇಸು ಸಉಪಾಹನಸ್ಸ ಚಙ್ಕಮತೋ ಆಪತ್ತಿ.

೨೪೯. ಪಾದಖೀಲಾಬಾಧೋ ನಾಮ ಪಾದತೋ ಖೀಲಸದಿಸಂ ಮಂಸಂ ನಿಕ್ಖನ್ತಂ ಹೋತಿ.

೨೫೧. ತಿಣಪಾದುಕಾತಿ ಯೇನ ಕೇನಚಿ ತಿಣೇನ ಕತಪಾದುಕಾ. ಹಿನ್ತಾಲಪಾದುಕಾತಿ ಖಜ್ಜೂರೀಪತ್ತೇಹಿ ಕತಪಾದುಕಾ; ಹಿನ್ತಾಲಪತ್ತೇಹಿಪಿ ನ ವಟ್ಟತಿಯೇವ. ಕಮಲಪಾದುಕಾತಿ ಕಮಲತಿಣಂ ನಾಮ ಅತ್ಥಿ, ತೇನ ಕತಪಾದುಕಾ; ಉಸೀರಪಾದುಕಾತಿಪಿ ವದನ್ತಿ. ಕಮ್ಬಲಪಾದುಕಾತಿ ಉಣ್ಣಾಹಿ ಕತಪಾದುಕಾ. ಅಸಙ್ಕಮನೀಯಾತಿ ಭೂಮಿಯಂ ಸುಪ್ಪತಿಟ್ಠಿತಾ ನಿಚ್ಚಲಾ ಅಸಂಹಾರಿಯಾ.

೨೫೨. ಅಙ್ಗಜಾತಂ ಛುಪನ್ತೀತಿ ಅಙ್ಗಜಾತೇನೇವ ಅಙ್ಗಜಾತಂ ಛುಪನ್ತಿ. ಓಗಾಹೇತ್ವಾ ಮಾರೇನ್ತೀತಿ ಅನ್ತೋ ಉದಕೇ ದಳ್ಹಂ ಗಹೇತ್ವಾ ಮಾರೇನ್ತಿ.

ಯಾನಾದಿಪಟಿಕ್ಖೇಪಕಥಾ

೨೫೩. ಇತ್ಥಿಯುತ್ತೇನಾತಿ ಧೇನುಯುತ್ತೇನ. ಪುರಿಸನ್ತರೇನಾತಿ ಪುರಿಸಸಾರಥಿನಾ. ಪುರಿಸಯುತ್ತೇನಾತಿ ಗೋಣಯುತ್ತೇನ. ಇತ್ಥನ್ತರೇನಾತಿ ಇತ್ಥಿಸಾರಥಿನಾ. ಗಙ್ಗಾಮಹಿಯಾಯಾತಿ ಗಙ್ಗಾಮಹಕೀಳಿಕಾಯ. ಪುರಿಸಯುತ್ತಂ ಹತ್ಥವಟ್ಟಕನ್ತಿ ಏತ್ಥ ಪುರಿಸಯುತ್ತಂ ಇತ್ಥಿಸಾರಥಿ ವಾ ಹೋತು, ಪುರಿಸಸಾರಥಿ ವಾ ವಟ್ಟತಿ. ಹತ್ಥವಟ್ಟಕಂ ಪನ ಇತ್ಥಿಯೋ ವಾ ವಟ್ಟೇನ್ತು ಪುರಿಸಾ ವಾ, ವಟ್ಟತಿಯೇವ. ಯಾನುಗ್ಘಾತೇನಾತಿ ಯಾನಂ ಅಭಿರುಹನ್ತಸ್ಸ ಸಬ್ಬೋ ಕಾಯೋ ಚಲತಿ ತಪ್ಪಚ್ಚಯಾ. ಸಿವಿಕನ್ತಿ ಪೀಠಕಸಿವಿಕಂ. ಪಾಟಙ್ಕಿನ್ತಿ ವಂಸೇ ಲಗ್ಗೇತ್ವಾ ಕತಂ ಪಟಪೋತಲಿಕಂ.

೨೫೪. ಉಚ್ಚಾಸಯನಮಹಾಸಯನನಾನೀತಿ ಏತ್ಥ ಉಚ್ಚಾಸಯನನ್ತಿ ಪಮಾಣಾತಿಕ್ಕನ್ತಂ ಮಞ್ಚಂ. ಮಹಾಸಯನನ್ತಿ ಅಕಪ್ಪಿಯತ್ಥರಣಂ, ಆಸನ್ದೀಆದೀಸು ಆಸನ್ದೀತಿ ಪಮಾಣಾತಿಕ್ಕನ್ತಾಸನಂ. ಪಲ್ಲಙ್ಕೋತಿ ಪಾದೇಸು ವಾಳರೂಪಾನಿ ಠಪೇತ್ವಾ ಕತೋ. ಗೋನಕೋತಿ ದೀಘಲೋಮಕೋ ಮಹಾಕೋಜವೋ; ಚತುರಙ್ಗುಲಾಧಿಕಾನಿ ಕಿರ ತಸ್ಸ ಲೋಮಾನಿ. ಚಿತ್ತಕಾತಿ ವಾನಚಿತ್ರೋ ಉಣ್ಣಾಮಯತ್ಥರಣೋ. ಪಟಿಕಾತಿ ಉಣ್ಣಾಮಯೋ ಸೇತತ್ಥರಣೋ. ಪಟಲಿಕಾತಿ ಘನಪುಪ್ಫಕೋ ಉಣ್ಣಾಮಯಲೋಹಿತತ್ಥರಣೋ; ಯೋ ಆಮಲಕಪಟ್ಟೋತಿಪಿ ವುಚ್ಚತಿ. ತೂಲಿಕಾತಿ ಪಕತಿತೂಲಿಕಾಯೇವ. ವಿಕತಿಕಾತಿ ಸೀಹಬ್ಯಗ್ಘಾದಿರೂಪವಿಚಿತ್ರೋ ಉಣ್ಣಾಮಯತ್ಥರಣೋ. ಉದ್ದಲೋಮೀತಿ ಏಕತೋ ಉಗ್ಗತಲೋಮಂ ಉಣ್ಣಾಮಯತ್ಥರಣಂ; ‘‘ಉದ್ಧಲೋಮೀ’’ತಿಪಿ ಪಾಠೋ. ಏಕನ್ತಲೋಮೀತಿ ಉಭತೋ ಉಗ್ಗತಲೋಮಂ ಉಣ್ಣಾಮಯತ್ಥರಣಂ. ಕಟ್ಟಿಸ್ಸನ್ತಿ ರತನಪರಿಸಿಬ್ಬಿತಂ ಕೋಸೇಯ್ಯಕಟ್ಟಿಸ್ಸಮಯಂ ಪಚ್ಚತ್ಥರಣಂ. ಕೋಸೇಯ್ಯನ್ತಿ ರತನಪರಿಸಿಬ್ಬಿತಂ ಕೋಸಿಯಸುತ್ತಮಯಂ ಪಚ್ಚತ್ಥರಣಂ; ಸುದ್ಧಕೋಸೇಯ್ಯಂ ಪನ ವಟ್ಟತಿ.

ಕುತ್ತಕನ್ತಿ ಸೋಳಸನ್ನಂ ನಾಟಕಿತ್ಥೀನಂ ಠತ್ವಾ ನಚ್ಚನಯೋಗ್ಗಂ ಉಣ್ಣಾಮಯಅತ್ಥರಣಂ. ಹತ್ಥತ್ಥರಅಸ್ಸತ್ಥರಾತಿ ಹತ್ಥಿಅಸ್ಸಪಿಟ್ಠೀಸು ಅತ್ಥರಣಕಅತ್ಥರಣಾ ಏವ. ರಥತ್ಥರೇಪಿ ಏಸೇವ ನಯೋ. ಅಜಿನಪ್ಪವೇಣೀತಿ ಅಜಿನಚಮ್ಮೇಹಿ ಮಞ್ಚಪ್ಪಮಾಣೇನ ಸಿಬ್ಬಿತ್ವಾ ಕತಾ ಪವೇಣೀ. ಕದಲೀಮಿಗಪವರಪಚ್ಚತ್ಥರಣನ್ತಿ ಕದಲೀಮಿಗಚಮ್ಮಂ ನಾಮ ಅತ್ಥಿ, ತೇನ ಕತಂ ಪವರಪಚ್ಚತ್ಥರಣಂ, ಉತ್ತಮಪಚ್ಚತ್ಥರಣನ್ತಿ ಅತ್ಥೋ. ತಂ ಕಿರ ಸೇತವತ್ಥಸ್ಸ ಉಪರಿ ಕದಲೀಮಿಗಚಮ್ಮಂ ಪತ್ಥರಿತ್ವಾ ಸಿಬ್ಬಿತ್ವಾ ಕರೋನ್ತಿ. ಸಉತ್ತರಚ್ಛದನ್ತಿ ಸಹ ಉತ್ತರಚ್ಛದನೇನ; ಉಪರಿಬದ್ಧೇನ ರತ್ತವಿತಾನೇನ ಸದ್ಧಿನ್ತಿ ಅತ್ಥೋ. ಸೇತವಿತಾನಮ್ಪಿ ಹೇಟ್ಠಾ ಅಕಪ್ಪಿಯಪಚ್ಚತ್ಥರಣೇ ಸತಿ ನ ವಟ್ಟತಿ, ಅಸತಿ ಪನ ವಟ್ಟತಿ. ಉಭತೋಲೋಹಿತಕೂಪಧಾನನ್ತಿ ಸೀಸೂಪಧಾನಞ್ಚ ಪಾದೂಪಧಾನಞ್ಚಾತಿ ಮಞ್ಚಸ್ಸ ಉಭತೋಲೋಹಿತಕೂಪಧಾನಂ, ಏತಂ ನ ಕಪ್ಪತಿ. ಯಂ ಪನ ಏಕಮೇವ ಉಪಧಾನಂ ಉಭೋಸು ಪಸ್ಸೇಸು ರತ್ತಂ ವಾ ಹೋತಿ, ಪದುಮವಣ್ಣಂ ವಾ ಚಿತ್ರಂ ವಾ, ಸಚೇ ಪಮಾಣಯುತ್ತಂ, ವಟ್ಟತಿ. ಮಹಾಉಪಧಾನಂ ಪನ ಪಟಿಕ್ಖಿತ್ತಂ.

ಸಬ್ಬಚಮ್ಮಪಟಿಕ್ಖೇಪಾದಿಕಥಾ

೨೫೫. ದೀಪಿಚ್ಛಾಪೋತಿ ದೀಪಿಪೋತಕೋ. ಓಗುಮ್ಫಿಯನ್ತೀತಿ ಭಿತ್ತಿದಣ್ಡಕಾದೀಸು ವೇಠೇತ್ವಾ ಬನ್ಧನ್ತಿ.

೨೫೬. ಅಭಿನಿಸೀದಿತುನ್ತಿ ಅಭಿನಿಸ್ಸಾಯ ನಿಸೀದಿತುಂ; ಅಪಸ್ಸಯಂ ಕತ್ವಾ ನಿಸೀದಿತುನ್ತಿ ಅತ್ಥೋ. ಗಿಲಾನೇನ ಭಿಕ್ಖುನಾ ಸಉಪಾಹನೇನಾತಿ ಏತ್ಥ ಗಿಲಾನೋ ನಾಮ ಯೋ ನ ಸಕ್ಕೋತಿ ಅನುಪಾಹನೋ ಗಾಮಂ ಪವಿಸಿತುಂ.

೨೫೭. ಕುರರಘರೇತಿ ಏವಂನಾಮಕೇ ನಗರೇ; ಏತೇನಸ್ಸ ಗೋಚರಗಾಮೋ ವುತ್ತೋ. ಪಪತಕೇ ಪಬ್ಬತೇತಿ ಪಪತನಾಮಕೇ ಪಬ್ಬತೇ; ಏತೇನಸ್ಸ ನಿವಾಸನಟ್ಠಾನಂ ವುತ್ತಂ. ಸೋಣೋತಿ ತಸ್ಸ ನಾಮಂ. ಕೋಟಿಅಗ್ಘನಕಂ ಪನ ಕಣ್ಣಪಿಳನ್ಧನಕಂ ಧಾರೇತಿ, ತಸ್ಮಾ ‘‘ಕುಟಿಕಣ್ಣೋ’’ತಿ ವುಚ್ಚತಿ; ಕೋಟಿಕಣ್ಣೋತಿ ಅತ್ಥೋ. ಪಾಸಾದಿಕನ್ತಿ ಪಸಾದಜನಕಂ. ಪಸಾದನೀಯನ್ತಿ ಇದಂ ತಸ್ಸೇವ ಅತ್ಥವೇವಚನಂ. ಉತ್ತಮದಮಥಸಮಥನ್ತಿ ಉತ್ತಮಂ ದಮಥಞ್ಚ ಸಮಥಞ್ಚ ಪಞ್ಞಞ್ಚ ಸಮಾಧಿಞ್ಚ ಕಾಯೂಪಸಮಞ್ಚ ಚಿತ್ತೂಪಸಮಞ್ಚಾತಿಪಿ ಅತ್ಥೋ. ದನ್ತನ್ತಿ ಸಬ್ಬೇಸಂ ವಿಸೂಕಾಯಿಕವಿಪ್ಫನ್ದಿತಾನಂ ಉಪಚ್ಛಿನ್ನತ್ತಾ ದನ್ತಂ; ಖೀಣಕಿಲೇಸನ್ತಿ ಅತ್ಥೋ. ಗುತ್ತನ್ತಿ ಸಂವರಗುತ್ತಿಯಾ ಗುತ್ತಂ. ಸನ್ತಿನ್ದ್ರಿಯನ್ತಿ ಯತಿನ್ದ್ರಿಯಂ. ನಾಗನ್ತಿ ಆಗುವಿರಹಿತಂ. ತಿಣ್ಣಂ ಮೇ ವಸ್ಸಾನಂ ಅಚ್ಚಯೇನಾತಿ ಮಮ ಪಬ್ಬಜ್ಜಾದಿವಸತೋ ಪಟ್ಠಾಯ ತಿಣ್ಣಂ ವಸ್ಸಾನಂ ಅಚ್ಚಯೇನ. ಉಪಸಮ್ಪದಂ ಅಲತ್ಥನ್ತಿ ಅಹಂ ಉಪಸಮ್ಪದಂ ಅಲಭಿಂ. ಕಣ್ಹುತ್ತರಾತಿ ಕಣ್ಹಮತ್ತಿಕುತ್ತರಾ; ಉಪರಿ ವಡ್ಢಿತಕಣ್ಹಮತ್ತಿಕಾತಿ ಅತ್ಥೋ. ಗೋಕಣ್ಟಕಹತಾತಿ ಗುನ್ನಂ ಖುರೇಹಿ ಅಕ್ಕನ್ತಭೂಮಿತೋ ಸಮುಟ್ಠಿತೇಹಿ ಗೋಕಣ್ಟಕೇಹಿ ಉಪಹತಾ. ತೇ ಕಿರ ಗೋಕಣ್ಟಕೇ ಏಕಪಟಲಿಕಾ ಉಪಾಹನಾ ರಕ್ಖಿತುಂ ನ ಸಕ್ಕೋನ್ತಿ; ಏವಂ ಖರಾ ಹೋನ್ತಿ. ಏರಗೂ, ಮೋರಗೂ, ಮಜ್ಜಾರೂ, ಜನ್ತೂತಿ ಇಮಾ ಚತಸ್ಸೋಪಿ ತಿಣಜಾತಿಯೋ; ಏತೇಹಿ ಕಟಸಾರಕೇ ಚ ತಟ್ಟಿಕಾಯೋ ಚ ಕರೋನ್ತಿ. ಏತ್ಥ ಏರಗೂತಿ ಏರಕತಿಣಂ; ತಂ ಓಳಾರಿಕಂ. ಮೋರಗೂತಿಣಂ ತಮ್ಬಸೀಸಂ ಮುದುಕಂ ಸುಖಸಮ್ಫಸ್ಸಂ, ತೇನ ಕತತಟ್ಟಿಕಾ ನಿಪಜ್ಜಿತ್ವಾ ವುಟ್ಠಿತಮತ್ತೇ ಪುನ ಉದ್ಧುಮಾತಾ ಹುತ್ವಾ ತಿಟ್ಠತಿ. ಮಜ್ಜಾರುನಾ ಸಾಟಕೇಪಿ ಕರೋನ್ತಿ. ಜನ್ತುಸ್ಸ ಮಣಿಸದಿಸೋ ವಣ್ಣೋ ಹೋತಿ. ಸೇನಾಸನಂ ಪಞ್ಞಪೇಸೀತಿ ಭಿಸಿಂ ವಾ ಕಟಸಾರಕಂ ವಾ ಪಞ್ಞಪೇಸಿ; ಪಞ್ಞಪೇತ್ವಾ ಚ ಪನ ಸೋಣಸ್ಸ ಆರೋಚೇತಿ – ‘‘ಆವುಸೋ ಸತ್ಥಾ ತಯಾ ಸದ್ಧಿಂ ಏಕಾವಾಸೇ ವಸಿತುಕಾಮೋ, ಗನ್ಧಕುಟಿಯಂಯೇವ ತೇ ಸೇನಾಸನಂ ಪಞ್ಞತ್ತ’’ನ್ತಿ.

೨೫೮. ಅಯಂ ಖ್ವಸ್ಸ ಕಾಲೋತಿ ಅಯಂ ಖೋ ಕಾಲೋ ಭವೇಯ್ಯ. ಪರಿದಸ್ಸೀತಿ ಪರಿದಸ್ಸೇಸಿ. ‘‘ಇದಞ್ಚಿದಞ್ಚ ವದೇಯ್ಯಾಸೀತಿ ಯಂ ಮೇ ಉಪಜ್ಝಾಯೋ ಜಾನಾಪೇಸಿ, ತಸ್ಸ ಅಯಂ ಕಾಲೋ ಭವೇಯ್ಯ, ಹನ್ದ ದಾನಿ ಆರೋಚೇಮಿ ತಂ ಸಾಸನ’’ನ್ತಿ ಅಯಮೇತ್ಥ ಅಧಿಪ್ಪಾಯೋ.

೨೫೯. ವಿನಯಧರಪಞ್ಚಮೇನಾತಿ ಅನುಸ್ಸಾವನಾಚರಿಯಪಞ್ಚಮೇನ. ಅನುಜಾನಾಮಿ ಭಿಕ್ಖವೇ ಸಬ್ಬಪಚ್ಚನ್ತಿಮೇಸು ಜನಪದೇಸು ಗುಣಙ್ಗುಣೂಪಾಹನನ್ತಿ ಏತ್ಥ ಮನುಸ್ಸಚಮ್ಮಂ ಠಪೇತ್ವಾ ಯೇನ ಕೇನಚಿ ಚಮ್ಮೇನ ಉಪಾಹನಾ ವಟ್ಟತಿ. ಉಪಾಹನಕೋಸಕಸತ್ಥಕೋಸಕಕುಞ್ಚಿಕಕೋಸಕೇಸುಪಿ ಏಸೇವ ನಯೋ. ಚಮ್ಮಾನಿ ಅತ್ಥರಣಾನೀತಿ ಏತ್ಥ ಪನ ಯಂಕಿಞ್ಚಿ ಏಳಕಚಮ್ಮಂ ಅಜಚಮ್ಮಞ್ಚ ಅತ್ಥರಿತ್ವಾ ನಿಪಜ್ಜಿತುಂ ವಾ ನಿಸೀದಿತುಂ ವಾ ವಟ್ಟತಿ. ಮಿಗಚಮ್ಮೇ ಏಣೀಮಿಗೋ ವಾತಮಿಗೋ ಪಸದಮಿಗೋ ಕುರಙ್ಗಮಿಗೋ ಮಿಗಮಾತುಕೋ ರೋಹಿತಮಿಗೋತಿ ಏತೇಸಂಯೇವ ಚಮ್ಮಾನಿ ವಟ್ಟನ್ತಿ. ಅಞ್ಞೇಸಂ ಪನ –

ಮಕ್ಕಟೋ ಕಾಳಸೀಹೋ ಚ, ಸರಭೋ ಕದಲೀಮಿಗೋ;

ಯೇ ಚ ವಾಳಮಿಗಾ ಕೇಚಿ, ತೇಸಂ ಚಮ್ಮಂ ನ ವಟ್ಟತಿ.

ತತ್ಥ ವಾಳಮಿಗಾತಿ ಸೀಹಬ್ಯಗ್ಘಅಚ್ಛತರಚ್ಛಾ; ನ ಕೇವಲಞ್ಚ ಏತೇಸಂಯೇವ, ಯೇಸಂ ಪನ ಚಮ್ಮಂ ವಟ್ಟತೀತಿ ವುತ್ತಂ, ತೇ ಠಪೇತ್ವಾ ಅವಸೇಸಾ ಅನ್ತಮಸೋ ಗೋಮಹಿಂಸಸಸಬಿಳಾರಾದಯೋಪಿ ಸಬ್ಬೇ ಇಮಸ್ಮಿಂ ಅತ್ಥೇ ವಾಳಮಿಗಾತ್ವೇವ ವೇದಿತಬ್ಬಾ. ಏತೇಸಞ್ಹಿ ಸಬ್ಬೇಸಂ ಚಮ್ಮಂ ನ ವಟ್ಟತಿ. ನ ತಾವ ತಂ ಗಣನೂಪಗಂ ಯಾವ ನ ಹತ್ಥಂ ಗಚ್ಛತೀತಿ ಯಾವ ಆಹರಿತ್ವಾ ವಾ ನ ದಿನ್ನಂ, ತುಮ್ಹಾಕಂ ಭನ್ತೇ ಚೀವರಂ ಉಪ್ಪನ್ನನ್ತಿ ಪಹಿಣಿತ್ವಾ ವಾ ನಾರೋಚಿತಂ, ತಾವ ಗಣನಂ ನ ಉಪೇತಿ. ಸಚೇ ಅನಧಿಟ್ಠಿತಂ, ವಟ್ಟತಿ; ಅಧಿಟ್ಠಿತಞ್ಚ ಗಣನಂ ನ ಉಪೇತೀತಿ ಅತ್ಥೋ. ಯದಾ ಪನ ಆನೇತ್ವಾ ವಾ ದಿನ್ನಂ ಹೋತಿ, ಉಪ್ಪನ್ನನ್ತಿ ವಾ ಸುತಂ, ತತೋ ಪಟ್ಠಾಯ ದಸಾಹಮೇವ ಪರಿಹಾರಂ ಲಭತೀತಿ.

ಚಮ್ಮಕ್ಖನ್ಧಕವಣ್ಣನಾ ನಿಟ್ಠಿತಾ.