೮. ವತ್ತಕ್ಖನ್ಧಕಂ

ಆಗನ್ತುಕವತ್ತಕಥಾ

೩೫೭. ವತ್ತಕ್ಖನ್ಧಕೇ ಇದಾನಿ ಆರಾಮಂ ಪವಿಸಿಸ್ಸಾಮೀತಿ ಇಮಿನಾ ಉಪಚಾರಸೀಮಸಮೀಪಂ ದಸ್ಸೇತಿ; ತಸ್ಮಾ ಉಪಚಾರಸೀಮಂ ಪತ್ವಾ ಉಪಾಹನಾಓಮುಞ್ಚನಾದಿ ಸಬ್ಬಂ ಕಾತಬ್ಬಂ. ಗಹೇತ್ವಾತಿ ಉಪಾಹನದಣ್ಡಕೇನ ಗಹೇತ್ವಾ. ಪಟಿಕ್ಕಮನ್ತೀತಿ ಸನ್ನಿಪತನ್ತಿ. ವಿಸ್ಸಜ್ಜೇತಬ್ಬನ್ತಿ ಪತ್ಥರಿತಬ್ಬಂ. ಗೋಚರೋ ಪುಚ್ಛಿತಬ್ಬೋತಿ ‘‘ಗೋಚರಗಾಮೋ ಆಸನ್ನೇ ಉದಾಹು ದೂರೇ, ಕಾಲಸ್ಸೇವ ಪಿಣ್ಡಾಯ ಚರಿತಬ್ಬಂ ಉದಾಹು ದಿವಾ’’ತಿ ಏವಂ ಭಿಕ್ಖಾಚಾರೋ ಪುಚ್ಛಿತಬ್ಬೋ. ಅಗೋಚರೋ ನಾಮ ಮಿಚ್ಛಾದಿಟ್ಠಿಕಾನಂ ವಾ ಗಾಮೋ ಪರಿಚ್ಛಿನ್ನಭಿಕ್ಖೋ ವಾ ಗಾಮೋ; ಯತ್ಥ ಏಕಸ್ಸ ವಾ ದ್ವಿನ್ನಂ ವಾ ಭಿಕ್ಖಾ ದಿಯ್ಯತಿ, ಸೋಪಿ ಪುಚ್ಛಿತಬ್ಬೋ. ಪಾನೀಯಂ ಪುಚ್ಛಿತಬ್ಬನ್ತಿ ‘‘ಕಿಂ ಇಮಿಸ್ಸಾ ಪೋಕ್ಖರಣಿಯಾ ಪಾನೀಯಂಯೇವ ಪಿವನ್ತಿ, ನಹಾನಾದಿಪರಿಭೋಗಮ್ಪಿ ಕರೋನ್ತೀ’’ತಿ ಏವಂ ಪಾನೀಯಞ್ಚೇವ ಪರಿಭೋಜನೀಯಞ್ಚ ಪುಚ್ಛಿತಬ್ಬಂ. ಕೇಸುಚಿ ಠಾನೇಸು ವಾಳಮಿಗಾ ವಾ ಅಮನುಸ್ಸಾ ವಾ ಹೋನ್ತಿ, ತಸ್ಮಾ ‘‘ಕಂ ಕಾಲಂ ಪವಿಸಿತಬ್ಬಂ, ಕಂ ಕಾಲಂ ನಿಕ್ಖಮಿತಬ್ಬ’’ನ್ತಿ ಪುಚ್ಛಿತಬ್ಬಂ.

ಬಹಿ ಠಿತೇನಾತಿ ಬಹಿ ನಿಕ್ಖಮನ್ತಸ್ಸ ಅಹಿನೋ ವಾ ಅಮನುಸ್ಸಸ್ಸ ವಾ ಮಗ್ಗಂ ದತ್ವಾ ಠಿತೇನ ನಿಲ್ಲೋಕೇತಬ್ಬೋ. ಸಚೇ ಉಸ್ಸಹತಿ ಸೋಧೇತಬ್ಬೋತಿ ಯದಿ ಸಕ್ಕೋತಿ, ಸಬ್ಬೋ ವಿಹಾರೋ ಸೋಧೇತಬ್ಬೋ. ಅಸಕ್ಕೋನ್ತೇನ ಅತ್ತನೋ ವಸನೋಕಾಸೋ ಜಗ್ಗಿತಬ್ಬೋ. ಸಬ್ಬಂ ಸೋಧೇತುಂ ಸಕ್ಕೋನ್ತಸ್ಸ ಪನ ದಸ್ಸಿತೇ ವಿಹಾರಸೋಧನವತ್ತೇ ವಿನಿಚ್ಛಯೋ ಮಹಾಖನ್ಧಕೇ ವುತ್ತನಯೇನೇವ ವೇದಿತಬ್ಬೋ.

ಆಗನ್ತುಕವತ್ತಕಥಾ ನಿಟ್ಠಿತಾ.

ಆವಾಸಿಕವತ್ತಕಥಾ

೩೫೯. ಆವಾಸಿಕವತ್ತೇ – ಆಸನಂ ಪಞ್ಞಪೇತಬ್ಬನ್ತಿ ಏವಮಾದಿ ಸಬ್ಬಂ ವುಡ್ಢತರೇ ಆಗತೇ ಚೀವರಕಮ್ಮಂ ವಾ ನವಕಮ್ಮಂ ವಾ ಠಪೇತ್ವಾಪಿ ಕಾತಬ್ಬಂ. ಚೇತಿಯಙ್ಗಣಂ ಸಮ್ಮಜ್ಜನ್ತೇನ ಸಮ್ಮಜ್ಜನಿಂ ನಿಕ್ಖಿಪಿತ್ವಾ ತಸ್ಸ ವತ್ತಂ ಕಾತುಂ ಆರಭಿತಬ್ಬಂ. ಪಣ್ಡಿತೋ ಹಿ ಆಗನ್ತುಕೋ ‘‘ಸಮ್ಮಜ್ಜಾಹಿ ತಾವ ಚೇತಿಯಙ್ಗಣ’’ನ್ತಿ ವಕ್ಖತಿ. ಗಿಲಾನಭೇಸಜ್ಜಂ ಕರೋನ್ತೇನ ಪನ ಸಚೇ ನಾತಿಆತುರೋ ಗಿಲಾನೋ ಹೋತಿ, ಭೇಸಜ್ಜಂ ಅಕತ್ವಾ ವತ್ತಮೇವ ಕಾತಬ್ಬಂ. ಮಹಾಗಿಲಾನಸ್ಸ ಪನ ಭೇಸಜ್ಜಮೇವ ಕಾತಬ್ಬಂ. ಪಣ್ಡಿತೋ ಹಿ ಆಗನ್ತುಕೋ ‘‘ಕರೋಹಿ ತಾವ ಭೇಸಜ್ಜ’’ನ್ತಿ ವಕ್ಖತಿ. ಪಾನೀಯೇನ ಪುಚ್ಛನ್ತೇನ ಸಚೇ ಸಕಿಂ ಆನೀತಂ ಪಾನೀಯಂ ಸಬ್ಬಂ ಪಿವತಿ, ‘‘ಪುನ ಆನೇಮೀ’’ತಿ ಪುಚ್ಛಿತಬ್ಬೋಯೇವ. ಅಪಿಚ ಬೀಜನೇನಪಿ ಬೀಜಿತಬ್ಬೋ, ಬೀಜನ್ತೇನ ಸಕಿಂ ಪಾದಪಿಟ್ಠಿಯಂ ಬೀಜಿತ್ವಾ ಸಕಿಂ ಮಜ್ಝೇ ಸಕಿಂ ಸೀಸೇ ಬೀಜಿತಬ್ಬಂ, ‘‘ಅಲಂ ಹೋತೂ’’ತಿ ವುತ್ತೇನ ತತೋ ಮನ್ದತರಂ ಬೀಜಿತಬ್ಬಂ. ಪುನ ‘‘ಅಲ’’ನ್ತಿ ವುತ್ತೇನ ತತೋ ಮನ್ದತರಂ ಬೀಜಿತಬ್ಬಂ. ತತಿಯವಾರಂ ವುತ್ತೇನ ಬೀಜನೀ ಠಪೇತಬ್ಬಾ. ಪಾದಾಪಿಸ್ಸ ಧೋವಿತಬ್ಬಾ, ಧೋವಿತ್ವಾ ಸಚೇ ಅತ್ತನೋ ತೇಲಂ ಅತ್ಥಿ, ತೇನ ಮಕ್ಖೇತಬ್ಬಾ. ನೋ ಚೇ ಅತ್ಥಿ, ತಸ್ಸ ಸನ್ತಕೇನ ಮಕ್ಖೇತಬ್ಬಾ. ಉಪಾಹನಾಪುಞ್ಛನಂ ಪನ ಅತ್ತನೋ ರುಚಿವಸೇನ ಕಾತಬ್ಬಂ. ತೇನೇವ ಹೇತ್ಥ ‘‘ಸಚೇ ಉಸ್ಸಹತೀ’’ತಿ ವುತ್ತಂ. ತಸ್ಮಾ ಉಪಾಹನಾ ಅಪುಞ್ಛನ್ತಸ್ಸಾಪಿ ಅನಾಪತ್ತಿ. ‘‘ಕತ್ಥ ಮಯ್ಹಂ ಸೇನಾಸನಂ ಪಾಪುಣಾತೀ’’ತಿ ಪುಚ್ಛಿತೇನ ಸೇನಾಸನಂ ಪಞ್ಞಪೇತಬ್ಬಂ, ‘‘ಏತಂ ತುಮ್ಹಾಕಂ ಸೇನಾಸನಂ ಪಾಪುಣಾತೀ’’ತಿ ಏವಂ ಆಚಿಕ್ಖಿತಬ್ಬನ್ತಿ ಅತ್ಥೋ. ಪಪ್ಫೋಟೇತ್ವಾ ಹಿ ಪತ್ಥರಿತುಂ ಪನ ವಟ್ಟತಿಯೇವ.

ನವಕಸ್ಸ ವತ್ತೇ – ಪಾನೀಯಂ ಆಚಿಕ್ಖಿತಬ್ಬನ್ತಿ ‘‘ಏತಂ ಪಾನೀಯಂ ಗಹೇತ್ವಾ ಪಿವಾಹೀ’’ತಿ ಆಚಿಕ್ಖಿತಬ್ಬಂ. ಪರಿಭೋಜನೀಯೇಪಿ ಏಸೇವ ನಯೋ. ಸೇಸಂ ಪುರಿಮಸದಿಸಮೇವ. ಮಹಾಆವಾಸೇಪಿ ಅತ್ತನೋ ಸನ್ತಿಕಂ ಸಮ್ಪತ್ತಸ್ಸ ಆಗನ್ತುಕಸ್ಸ ವತ್ತಂ ಅಕಾತುಂ ನ ಲಭತಿ.

ಆವಾಸಿಕವತ್ತಕಥಾ ನಿಟ್ಠಿತಾ.

ಗಮಿಕವತ್ತಕಥಾ

೩೬೦. ಗಮಿಕವತ್ತೇಸು ದಾರುಭಣ್ಡನ್ತಿ ಸೇನಾಸನಕ್ಖನ್ಧಕೇ ವುತ್ತಂ ಮಞ್ಚಪೀಠಾದಿ. ಮತ್ತಿಕಾಭಣ್ಡಮ್ಪಿ ರಜನಭಾಜನಾದಿ ಸಬ್ಬಂ ತತ್ಥ ವುತ್ತಪ್ಪಭೇದಮೇವ. ತಂ ಸಬ್ಬಂ ಅಗ್ಗಿಸಾಲಾಯ ವಾ ಅಞ್ಞತರಸ್ಮಿಂ ವಾ ಗುತ್ತಟ್ಠಾನೇ ಪಟಿಸಾಮೇತ್ವಾ ಗನ್ತಬ್ಬಂ. ಅನೋವಸ್ಸಕೇ ಪಬ್ಭಾರೇಪಿ ಠಪೇತುಂ ವಟ್ಟತಿ. ಸೇನಾಸನಂ ಆಪುಚ್ಛಿತಬ್ಬನ್ತಿ ಏತ್ಥ ಯಂ ಪಾಸಾಣಪಿಟ್ಠಿಯಂ ವಾ ಪಾಸಾಣತ್ಥಮ್ಭೇಸು ವಾ ಕತಸೇನಾಸನಂ, ಯತ್ಥ ಉಪಚಿಕಾ ನಾರೋಹನ್ತಿ, ತಂ ಅನಾಪುಚ್ಛನ್ತಸ್ಸಾಪಿ ಅನಾಪತ್ತಿ. ಚತೂಸು ಪಾಸಾಣಕೇಸೂತಿಆದಿ ಉಪಚಿಕಾನಂ ಉಪ್ಪತ್ತಿಟ್ಠಾನೇ ಪಣ್ಣಸಾಲಾದಿಸೇನಾಸನೇ ಕತ್ತಬ್ಬಾಕಾರದಸ್ಸನತ್ಥಂ ವುತ್ತಂ. ಅಪ್ಪೇವ ನಾಮ ಅಙ್ಗಾನಿಪಿ ಸೇಸೇಯ್ಯುನ್ತಿ ಅಯಂ ಅಜ್ಝೋಕಾಸೇ ಠಪಿತಮ್ಹಿ ಆನಿಸಂಸೋ. ಓವಸ್ಸಕಗೇಹೇ ಪನ ತಿಣೇಸು ಚ ಮತ್ತಿಕಾಪಿಣ್ಡೇಸು ಚ ಉಪರಿ ಪತನ್ತೇಸು ಮಞ್ಚಪೀಠಾನಂ ಅಙ್ಗಾನಿಪಿ ವಿನಸ್ಸನ್ತಿ.

ಗಮಿಕವತ್ತಕಥಾ ನಿಟ್ಠಿತಾ.

ಅನುಮೋದನವತ್ತಕಥಾ

೩೬೨. ಅನುಮೋದನವತ್ಥುಸ್ಮಿಂ ಇದ್ಧಂ ಅಹೋಸೀತಿ ಸಮ್ಪನ್ನಂ ಅಹೋಸಿ. ಚತೂಹಿ ಪಞ್ಚಹೀತಿ ಸಙ್ಘತ್ಥೇರೇನ ಅನುಮೋದನತ್ಥಾಯ ನಿಸಿನ್ನೇ ಹೇಟ್ಠಾ ಪಟಿಪಾಟಿಯಾ ಚತೂಹಿ ನಿಸೀದಿತಬ್ಬಂ. ಅನುಥೇರೇ ನಿಸಿನ್ನೇ ಮಹಾಥೇರೇನ ಚ ಹೇಟ್ಠಾ ಚ ತೀಹಿ ನಿಸೀದಿತಬ್ಬಂ. ಪಞ್ಚಮೇ ನಿಸಿನ್ನೇ ಉಪರಿ ಚತೂಹಿ ನಿಸೀದಿತಬ್ಬಂ. ಸಙ್ಘತ್ಥೇರೇನ ಹೇಟ್ಠಾ ದಹರಭಿಕ್ಖುಸ್ಮಿಂ ಅಜ್ಝಿಟ್ಠೇಪಿ ಸಙ್ಘತ್ಥೇರತೋ ಪಟ್ಠಾಯ ಚತೂಹಿ ನಿಸೀದಿತಬ್ಬಮೇವ. ಸಚೇ ಪನ ಅನುಮೋದಕೋ ಭಿಕ್ಖು ‘‘ಗಚ್ಛಥ ಭನ್ತೇ, ಆಗಮೇತಬ್ಬಕಿಚ್ಚಂ ನತ್ಥೀ’’ತಿ ವದತಿ, ಗನ್ತುಂ ವಟ್ಟತಿ. ಮಹಾಥೇರೇನ ‘‘ಗಚ್ಛಾಮ ಆವುಸೋ’’ತಿ ವುತ್ತೇ ‘‘ಗಚ್ಛಥಾ’’ತಿ ವದತಿ, ಏವಮ್ಪಿ ವಟ್ಟತಿ. ‘‘ಬಹಿಗಾಮೇ ಆಗಮೇಸ್ಸಾಮಾ’’ತಿ ಆಭೋಗಂ ಕತ್ವಾಪಿ ಬಹಿಗಾಮಂ ಗನ್ತ್ವಾ ಅತ್ತನೋ ನಿಸ್ಸಿತಕೇ ‘‘ತುಮ್ಹೇ ತಸ್ಸ ಆಗಮನಂ ಆಗಮೇಥಾ’’ತಿ ವತ್ವಾಪಿ ಗನ್ತುಂ ವಟ್ಟತಿಯೇವ. ಸಚೇ ಪನ ಮನುಸ್ಸಾ ಅತ್ತನೋ ರುಚಿಕೇನ ಏಕೇನ ಅನುಮೋದನಂ ಕಾರೇನ್ತಿ, ನೇವ ತಸ್ಸ ಅನುಮೋದತೋ ಆಪತ್ತಿ, ನ ಮಹಾಥೇರಸ್ಸ ಭಾರೋ ಹೋತಿ. ಉಪನಿಸಿನ್ನಕಥಾಯಮೇವ ಹಿ ಮನುಸ್ಸೇಸು ಕಥಾಪೇನ್ತೇಸು ಮಹಾಥೇರೋ ಆಪುಚ್ಛಿತಬ್ಬೋ, ಮಹಾಥೇರೇನ ಚ ಅನುಮೋದನಾಯ ಅಜ್ಝಿಟ್ಠೋವ ಆಗಮೇತಬ್ಬೋತಿ ಇದಮೇತ್ಥ ಲಕ್ಖಣಂ. ವಚ್ಚಿತೋತಿ ಸಞ್ಜಾತವಚ್ಚೋ; ವಚ್ಚಪೀಳಿತೋತಿ ಅಧಿಪ್ಪಾಯೋ.

ಅನುಮೋದನವತ್ತಕಥಾ ನಿಟ್ಠಿತಾ.

ಭತ್ತಗ್ಗವತ್ತಕಥಾ

೩೬೪. ಭತ್ತಗ್ಗವತ್ತೇ ‘‘ಅನ್ತೋಗಾಮೋ ವಾ ಹೋತು ವಿಹಾರೋ ವಾ, ಮನುಸ್ಸಾನಂ ಪರಿವೇಸನಟ್ಠಾನಂ ಗಚ್ಛನ್ತೇನ ಚೀವರಂ ಪಾರುಪಿತ್ವಾ ಕಾಯಬನ್ಧನಂ ಬನ್ಧನಮೇವ ವಟ್ಟತೀ’’ತಿ ಅಟ್ಠಕಥಾಸು ವುತ್ತಂ. ನ ಥೇರೇ ಭಿಕ್ಖೂ ಅನುಪಖಜ್ಜಾತಿ ಥೇರೇ ಭಿಕ್ಖೂ ಅತಿಅಲ್ಲೀಯಿತ್ವಾ ನ ನಿಸೀದಿತಬ್ಬಂ. ಸಚೇ ಮಹಾಥೇರಸ್ಸ ನಿಸಿನ್ನಾಸನೇನ ಸಮಕಂ ಆಸನಂ ಹೋತಿ, ಬಹೂಸು ಆಸನೇಸು ಸತಿ ಏಕಂ ದ್ವೇ ಆಸನಾನಿ ಠಪೇತ್ವಾ ನಿಸೀದಿತಬ್ಬಂ. ಭಿಕ್ಖೂ ಗಣೇತ್ವಾ ಪಞ್ಞತ್ತಾಸನೇಸು ಅನಿಸೀದಿತ್ವಾ ಮಹಾಥೇರೇನ ನಿಸೀದಾತಿ ವುತ್ತೇನ ನಿಸೀದಿತಬ್ಬಂ. ನೋ ಚೇ ಮಹಾಥೇರೋ ವದತಿ, ‘‘ಇದಂ, ಭನ್ತೇ, ಆಸನಂ ಉಚ್ಚ’’ನ್ತಿ ವತ್ತಬ್ಬಂ. ‘‘ನಿಸೀದಾ’’ತಿ ವುತ್ತೇ ನಿಸೀದಿತಬ್ಬಂ. ಸಚೇ ಪನ ಏವಂ ಆಪುಚ್ಛಿತೇಪಿ ನ ವದತಿ, ನಿಸೀದನ್ತಸ್ಸ ಅನಾಪತ್ತಿ; ಮಹಾಥೇರಸ್ಸೇವ ಆಪತ್ತಿ. ನವಕೋ ಹಿ ಏವರೂಪೇ ಆಸನೇ ಅನಾಪುಚ್ಛಾ ನಿಸೀದನ್ತೋ ಆಪಜ್ಜತಿ, ಥೇರೋ ಆಪುಚ್ಛಿತೇ ಅನನುಜಾನನ್ತೋ. ನ ಸಙ್ಘಾಟಿಂ ಓತ್ಥರಿತ್ವಾತಿ ನ ಸಙ್ಘಾಟಿಂ ಅವತ್ಥರಿತ್ವಾ ನಿಸೀದಿತಬ್ಬಂ.

ಉಭೋಹಿ ಹತ್ಥೇಹೀತಿ ಪತ್ತಧೋವನಉದಕಂ ಸನ್ಧಾಯ ವುತ್ತಂ. ದಕ್ಖಿಣೋದಕಂ ಪನ ಪುರತೋ ಆಧಾರಕೇ ಪತ್ತಂ ಠಪೇತ್ವಾ ಗಹೇತಬ್ಬಂ. ಸಾಧುಕನ್ತಿ ಉದಕಸದ್ದಂ ಅಕರೋನ್ತೇನ.

ಸೂಪಸ್ಸ ಓಕಾಸೋತಿ ಯಥಾ ಸೂಪಸ್ಸ ಓಕಾಸೋ ಹೋತಿ; ಏವಂ ಮತ್ತಾಯ ಓದನೋ ಗಣ್ಹಿತಬ್ಬೋತಿ ಅತ್ಥೋ. ಸಮಕಂ ಸಮ್ಪಾದೇಹೀತಿ ಇದಂ ನ ಕೇವಲಂ ಸಪ್ಪಿಆದೀಸುಯೇವ ಓದನೇಪಿ ವತ್ತಬ್ಬಂ. ಸಪ್ಪಿಆದೀಸು ಪನ ಯಂ ಅಪ್ಪಂ ಹೋತಿ ಏಕಸ್ಸ ವಾ ದ್ವಿನ್ನಂ ವಾ ಅನುರೂಪಕಂ, ತಂ ಸಬ್ಬೇಸಂ ಸಮಕಂ ಸಮ್ಪಾದೇಹೀತಿ ವುತ್ತೇ ಮನುಸ್ಸಾನಂ ವಿಹಸಾ ಹೋತಿ, ತಸ್ಮಾ ತಾದಿಸಂ ಸಕಿಂ ವಾ ದ್ವಿಕ್ಖತ್ತುಂ ವಾ ಗಹೇತ್ವಾ ಸೇಸಂ ನ ಗಹೇತಬ್ಬಂ.

ನ ತಾವ ಥೇರೇನ ಭುಞ್ಜಿತಬ್ಬನ್ತಿ ಇದಂ ಯಂ ಪರಿಚ್ಛಿನ್ನಭಿಕ್ಖುಕಂ ಭತ್ತಗ್ಗಂ, ಯತ್ಥ ಮನುಸ್ಸಾ ಸಬ್ಬೇಸಂ ಪಾಪೇತ್ವಾ ದಾತುಕಾಮಾ ಹೋನ್ತಿ, ತಂ ಸನ್ಧಾಯ ವುತ್ತಂ. ಯಂ ಪನ ಮಹಾಭತ್ತಗ್ಗಂ ಹೋತಿ, ಯತ್ಥ ಏಕಸ್ಮಿಂ ಪದೇಸೇ ಭುಞ್ಜನ್ತಿ, ಏಕಸ್ಮಿಂ ಪದೇಸೇ ಉದಕಂ ದಿಯ್ಯತಿ, ತತ್ಥ ಯಥಾಸುಖಂ ಭುಞ್ಜಿತಬ್ಬಂ.

ನ ತಾವ ಉದಕನ್ತಿ ಇದಂ ಹತ್ಥಧೋವನಉದಕಂ ಸನ್ಧಾಯ ವುತ್ತಂ. ಅನ್ತರಾ ಪಿಪಾಸಿತೇನ ಪನ ಗಲೇ ವಿಲಗ್ಗಾಮಿಸೇನ ವಾ ಪಾನೀಯಂ ಪಿವಿತ್ವಾ ಹತ್ಥಾ ನ ಧೋವಿತಬ್ಬಾ. ಸಚೇ ಮನುಸ್ಸಾ ‘‘ಧೋವಥ ಭನ್ತೇ ಪತ್ತಞ್ಚ ಹತ್ಥೇ ಚಾ’’ತಿ ವದನ್ತಿ, ಭಿಕ್ಖೂ ವಾ ‘‘ತುಮ್ಹೇ ಉದಕಂ ಗಣ್ಹಥಾ’’ತಿ ವದನ್ತಿ, ವಟ್ಟತಿ.

ನಿವತ್ತನ್ತೇನಾತಿ ಭತ್ತಗ್ಗತೋ ಉಟ್ಠಾಯ ನಿವತ್ತನ್ತೇನ ಸಙ್ಘೇನ ಏವಂ ನಿವತ್ತಿತಬ್ಬನ್ತಿ ದಸ್ಸೇತಿ. ಕಥಂ? ‘‘ನವಕೇಹೀ’’ತಿ ಸಬ್ಬಂ ದಟ್ಠಬ್ಬಂ. ಸಮ್ಬಾಧೇಸು ಹಿ ಘರೇಸು ಮಹಾಥೇರಾನಂ ನಿಕ್ಖಮನೋಕಾಸೋ ನ ಹೋತಿ, ತಸ್ಮಾ ಏವಂ ವುತ್ತಂ. ಏವಂ ನಿವತ್ತನ್ತೇಹಿ ಪನ ನವಕೇಹಿ ಗೇಹದ್ವಾರೇ ಠತ್ವಾ ಥೇರೇಸು ನಿಕ್ಖನ್ತೇಸು ಪಟಿಪಾಟಿಯಾ ಗನ್ತಬ್ಬಂ. ಸಚೇ ಪನ ಮಹಾಥೇರಾ ಧುರೇ ನಿಸಿನ್ನಾ ಹೋನ್ತಿ, ನವಕಾ ಅನ್ತೋಗೇಹೇ, ಥೇರಾಸನತೋ ಪಟ್ಠಾಯ ಪಟಿಪಾಟಿಯಾ ಏವ ನಿಕ್ಖಮಿತಬ್ಬಂ. ಕಾಯೇನ ಕಾಯಂ ಅಘಟ್ಟೇನ್ತೇನ ಯಥಾ ಅನ್ತರೇನ ಮನುಸ್ಸಾ ಗನ್ತುಂ ಸಕ್ಕೋನ್ತಿ, ಏವಂ ವಿರಳಾಯ ಪಟಿಪಾಟಿಯಾ ಗನ್ತಬ್ಬಂ.

ಭತ್ತಗ್ಗವತ್ತಕಥಾ ನಿಟ್ಠಿತಾ.

ಪಿಣ್ಡಚಾರಿಕವತ್ತಕಥಾ

೩೬೬. ಪಿಣ್ಡಚಾರಿಕವತ್ತೇ – ಕಮ್ಮಂ ವಾ ನಿಕ್ಖಿಪತೀತಿ ಕಪ್ಪಾಸಂ ವಾ ಸುಪ್ಪಂ ವಾ ಮುಸಲಂ ವಾ ಯಂ ಗಹೇತ್ವಾ ಕಮ್ಮಂ ಕರೋನ್ತಿ, ಠಿತಾ ವಾ ನಿಸಿನ್ನಾ ವಾ ಹೋನ್ತಿ, ತಂ ನಿಕ್ಖಿಪತಿ. ನ ಚ ಭಿಕ್ಖಾದಾಯಿಕಾಯಾತಿ ಇತ್ಥೀ ವಾ ಹೋತು ಪುರಿಸೋ ವಾ, ಭಿಕ್ಖಾದಾನಸಮಯೇ ಮುಖಂ ನ ಉಲ್ಲೋಕೇತಬ್ಬಂ.

ಪಿಣ್ಡಚಾರಿಕವತ್ತಕಥಾ ನಿಟ್ಠಿತಾ.

ಆರಞ್ಞಿಕವತ್ತಕಥಾ

೩೬೮. ಆರಞ್ಞಿಕವತ್ತೇ – ಸೇನಾಸನಾ ಓತರಿತಬ್ಬನ್ತಿ ವಸನಟ್ಠಾನತೋ ನಿಕ್ಖಮಿತಬ್ಬಂ.

ಪತ್ತಂ ಥವಿಕಾಯ ಪಕ್ಖಿಪಿತ್ವಾತಿ ಏತ್ಥ ಸಚೇ ಬಹಿಗಾಮೇ ಉದಕಂ ನತ್ಥಿ, ಅನ್ತೋಗಾಮೇಯೇವ ಭತ್ತಕಿಚ್ಚಂ ಕತ್ವಾ ಅಥ ಬಹಿಗಾಮೇ ಅತ್ಥಿ, ಬಹಿಗಾಮೇ ಭತ್ತಕಿಚ್ಚಂ ಕತ್ವಾ ಪತ್ತೋ ಧೋವಿತ್ವಾ ವೋದಕೋ ಕತ್ವಾ ಥವಿಕಾಯ ಪಕ್ಖಿಪಿತಬ್ಬೋ.

ಪರಿಭೋಜನೀಯಂ ಉಪಟ್ಠಾಪೇತಬ್ಬನ್ತಿ ಸಚೇ ಭಾಜನಾನಿ ನಪ್ಪಹೋನ್ತಿ, ಪಾನೀಯಮೇವ ಪರಿಭೋಜನೀಯಮ್ಪಿ ಕತ್ವಾ ಉಪಟ್ಠಾಪೇತಬ್ಬಂ. ಭಾಜನಂ ಅಲಭನ್ತೇನ ವೇಳುನಾಳಿಕಾಯಪಿ ಉಪಟ್ಠಾಪೇತಬ್ಬಂ. ತಮ್ಪಿ ಅಲಭನ್ತಸ್ಸ ಯಥಾ ಸಮೀಪೇ ಉದಕಆವಾಟೋ ಹೋತಿ, ಏವಂ ಕಾತಬ್ಬಂ. ಅರಣಿಸಹಿತೇ ಸತಿ ಅಗ್ಗಿಂ ಅಕಾತುಮ್ಪಿ ವಟ್ಟತಿ. ಯಥಾ ಚ ಆರಞ್ಞಿಕಸ್ಸ, ಏವಂ ಕನ್ತಾರಪ್ಪಟಿಪನ್ನಸ್ಸಾಪಿ ಅರಣಿಸಹಿತಂ ಇಚ್ಛಿತಬ್ಬಂ. ಗಣವಾಸಿನೋ ಪನ ತೇನ ವಿನಾಪಿ ವಟ್ಟತಿ. ನಕ್ಖತ್ತಾನೇವ ನಕ್ಖತ್ತಪದಾನಿ.

ಆರಞ್ಞಿಕವತ್ತಕಥಾ ನಿಟ್ಠಿತಾ.

ಸೇನಾಸನವತ್ತಕಥಾ

೩೬೯. ಸೇನಾಸನವತ್ತೇ – ದ್ವಾರಂ ನಾಮ ಯಸ್ಮಾ ಮಹಾವಳಞ್ಜಂ, ತಸ್ಮಾ ತತ್ಥ ಆಪುಚ್ಛನಕಿಚ್ಚಂ ನತ್ಥಿ, ಸೇಸಾನಿ ಪನ ಉದ್ದೇಸದಾನಾದೀನಿ ಆಪುಚ್ಛಿತ್ವಾವ ಕಾತಬ್ಬಾನಿ. ದೇವಸಿಕಮ್ಪಿ ಆಪುಚ್ಛಿತುಂ ವಟ್ಟತಿ. ಅಥಾಪಿ ‘‘ಭನ್ತೇ ಆಪುಚ್ಛಿತಮೇವ ಹೋತೂ’’ತಿ ವುತ್ತೇ ವುಡ್ಢತರೋ ‘‘ಸಾಧೂ’’ತಿ ಸಮ್ಪಟಿಚ್ಛತಿ, ಸಯಮೇವ ವಾ ‘‘ತ್ವಂ ಯಥಾಸುಖಂ ವಿಹರಾಹೀ’’ತಿ ವದತಿ; ಏವಮ್ಪಿ ವಟ್ಟತಿ. ಸಭಾಗಸ್ಸ ವಿಸ್ಸಾಸೇನಾಪಿ ವಟ್ಟತಿಯೇವ. ಯೇನ ವುಡ್ಢೋ ತೇನ ಪರಿವತ್ತಿತಬ್ಬನ್ತಿ ವುಡ್ಢಾಭಿಮುಖೇನ ಪರಿವತ್ತಿತಬ್ಬಂ. ಭೋಜನಸಾಲಾದೀಸುಪಿ ಏವಮೇವ ಪಟಿಪಜ್ಜಿತಬ್ಬಂ.

ಸೇನಾಸನವತ್ತಕಥಾ ನಿಟ್ಠಿತಾ.

ಜನ್ತಾಘರವತ್ತಾದಿಕಥಾ

೩೭೧. ಜನ್ತಾಘರವತ್ತೇ – ಪರಿಭಣ್ಡನ್ತಿ ಬಹಿಜಗತಿ.

೩೭೩. ಆಚಮನವತ್ಥುಸ್ಮಿಂ – ಸತಿ ಉದಕೇತಿ ಏತ್ಥ ಸಚೇ ಉದಕಂ ಅತ್ಥಿ, ಪಟಿಚ್ಛನ್ನಟ್ಠಾನಂ ಪನ ನತ್ಥಿ, ಭಾಜನೇನ ನೀಹರಿತ್ವಾ ಆಚಮಿತಬ್ಬಂ. ಭಾಜನೇ ಅಸತಿ ಪತ್ತೇನ ನೀಹರಿತಬ್ಬಂ. ಪತ್ತೇಪಿ ಅಸತಿ ಅಸನ್ತಂ ನಾಮ ಹೋತಿ. ‘‘ಇದಂ ಅತಿವಿವಟಂ ಪುರತೋ ಅಞ್ಞಂ ಉದಕಂ ಭವಿಸ್ಸತೀ’’ತಿ ಗತಸ್ಸ ಉದಕಂ ಅಲಭನ್ತಸ್ಸೇವ ಭಿಕ್ಖಾಚಾರವೇಲಾ ಹೋತಿ, ಕಟ್ಠೇನ ವಾ ಕೇನಚಿ ವಾ ಪುಞ್ಛಿತ್ವಾ ಗನ್ತಬ್ಬಂ, ಭುಞ್ಜಿತುಮ್ಪಿ ಅನುಮೋದನಮ್ಪಿ ಕಾತುಂ ವಟ್ಟತಿ. ಆಗತಪಟಿಪಾಟಿಯಾತಿ ವಚ್ಚಕುಟಿಯಂ ಪಸ್ಸಾವಟ್ಠಾನೇ ನ್ಹಾನತಿತ್ಥೇತಿ ತೀಸುಪಿ ಆಗತಪಟಿಪಾಟಿಯೇವ ಪಮಾಣಂ.

೩೭೪. ವಚ್ಚಕುಟಿವತ್ತೇ – ನ ದನ್ತಕಟ್ಠಂ ಖಾದನ್ತೇನಾತಿ ಅಯಂ ವಚ್ಚಕುಟಿಯಾಪಿ ಅವಚ್ಚಕುಟಿಯಾಪಿ ಸಬ್ಬತ್ಥೇವ ಪಟಿಕ್ಖೇಪೋ. ನ ಫರುಸೇನ ಕಟ್ಠೇನಾತಿ ಫಾಲಿತಕಟ್ಠೇನ ವಾ ಖರೇನ ವಾ ಗಣ್ಠಿಕೇನ ವಾ ಕಣ್ಟಕೇನ ವಾ ಸುಸಿರೇನ ವಾ ಪೂತಿನಾ ವಾ ನ ಅವಲೇಖಿತಬ್ಬಂ. ಅವಲೇಖನಕಟ್ಠಂ ಪನ ಅಗ್ಗಹೇತ್ವಾ ಪವಿಟ್ಠಸ್ಸ ಆಪತ್ತಿ ನತ್ಥಿ.

ನ ಆಚಮನಸರಾವಕೇತಿ ಸಬ್ಬಸಾಧಾರಣಟ್ಠಾನಂ ಸನ್ಧಾಯೇತಂ ವುತ್ತಂ. ತತ್ರ ಹಿ ಅಞ್ಞೇ ಅಞ್ಞೇ ಆಗಚ್ಛನ್ತಿ, ತಸ್ಮಾ ಉದಕಂ ನ ಸೇಸೇತಬ್ಬಂ. ಯಂ ಪನ ಸಙ್ಘಿಕೇಪಿ ವಿಹಾರೇ ಏಕದೇಸೇ ನಿಬದ್ಧಗಮನತ್ಥಾಯ ಕತಂ ಠಾನಂ ಹೋತಿ ಪುಗ್ಗಲಿಕಟ್ಠಾನಂ ವಾ, ತಸ್ಮಿಂ ವಟ್ಟತಿ. ವಿರೇಚನಂ ಪಿವಿತ್ವಾ ಪುನಪ್ಪುನಂ ಪವಿಸನ್ತಸ್ಸಾಪಿ ವಟ್ಟತಿಯೇವ.

ಊಹತಾತಿ ಊಹದಿತಾ; ಬಹಿ ವಚ್ಚಮಕ್ಖಿತಾತಿ ಅತ್ಥೋ. ಧೋವಿತಬ್ಬಾತಿ ಉದಕಂ ಆಹರಿತ್ವಾ ಧೋವಿತಬ್ಬಾ. ಉದಕಂ ಅತ್ಥಿ, ಭಾಜನಂ ನತ್ಥಿ, ಅಸನ್ತಂ ನಾಮ ಹೋತಿ. ಭಾಜನಂ ಅತ್ಥಿ, ಉದಕಂ ನತ್ಥಿ, ಏತಮ್ಪಿ ಅಸನ್ತಂ. ಉಭಯೇ ಪನ ಅಸತಿ ಅಸನ್ತಮೇವ, ಕಟ್ಠೇನ ವಾ ಕೇನಚಿ ವಾ ಪುಞ್ಛಿತ್ವಾ ಗನ್ತಬ್ಬಂ. ಸೇಸಂ ಸಬ್ಬತ್ಥ ಉತ್ತಾನಮೇವಾತಿ.

ಜನ್ತಾಘರವತ್ತಾದಿಕಥಾ ನಿಟ್ಠಿತಾ.

ವತ್ತಕ್ಖನ್ಧಕವಣ್ಣನಾ ನಿಟ್ಠಿತಾ.