೧೦. ಭಿಕ್ಖುನಿಕ್ಖನ್ಧಕಂ

ಮಹಾಪಜಾಪತಿಗೋತಮೀವತ್ಥುಕಥಾ

೪೦೨. ಭಿಕ್ಖುನಿಕ್ಖನ್ಧಕೇ – ಅಲಂ ಗೋತಮಿ ಮಾ ತೇ ರುಚ್ಚೀತಿ ಕಸ್ಮಾ ಪಟಿಕ್ಖಿಪತಿ, ನನು ಸಬ್ಬೇಸಮ್ಪಿ ಬುದ್ಧಾನಂ ಚತಸ್ಸೋ ಪರಿಸಾ ಹೋನ್ತೀತಿ? ಕಾಮಂ ಹೋನ್ತಿ, ಕಿಲಮೇತ್ವಾ ಪನ ಅನೇಕಕ್ಖತ್ತುಂ ಯಾಚಿತೇನ ಅನುಞ್ಞಾತಂ ಪಬ್ಬಜ್ಜಂ ‘‘ದುಕ್ಖೇನ ಲದ್ಧಾ ಅಯಂ ಅಮ್ಹೇಹೀ’’ತಿ ಸಮ್ಮಾ ಪರಿಪಾಲೇಸ್ಸನ್ತೀತಿ ಭದ್ದಕಂ ಕತ್ವಾ ಅನುಜಾನಿತುಕಾಮೋ ಪಟಿಕ್ಖಿಪತಿ. ಅಟ್ಠಗರುಧಮ್ಮಕಥಾ ಮಹಾವಿಭಙ್ಗೇಯೇವ ಕಥಿತಾ.

೪೦೩. ಕುಮ್ಭಥೇನಕೇಹೀತಿ ಕುಮ್ಭೇ ದೀಪಂ ಜಾಲೇತ್ವಾ ತೇನ ಆಲೋಕೇನ ಪರಘರೇ ಭಣ್ಡಂ ವಿಚಿನಿತ್ವಾ ಥೇನಕಚೋರೇಹಿ.

ಸೇತಟ್ಠಿಕಾ ನಾಮ ರೋಗಜಾತೀತಿ ಏಕೋ ಪಾಣಕೋ ನಾಳಿಮಜ್ಝಗತಂ ಕಣ್ಡಂ ವಿಜ್ಝತಿ, ಯೇನ ವಿದ್ಧತ್ತಾ ನಿಕ್ಖನ್ತಮ್ಪಿ ಸಾಲಿಸೀಸಂ ಖೀರಂ ಗಹೇತುಂ ನ ಸಕ್ಕೋತಿ.

ಮಞ್ಜಿಟ್ಠಿಕಾ ನಾಮ ರೋಗಜಾತೀತಿ ಉಚ್ಛೂನಂ ಅನ್ತೋರತ್ತಭಾವೋ. ಮಹತೋ ತಳಾಕಸ್ಸ ಪಟಿಕಚ್ಚೇವ ಆಳಿನ್ತಿ ಇಮಿನಾ ಪನ ಏತಮತ್ಥಂ ದಸ್ಸೇತಿ – ಯಥಾ ಮಹತೋ ತಳಾಕಸ್ಸ ಆಳಿಯಾ ಅಬದ್ಧಾಯಪಿ ಕಿಞ್ಚಿ ಉದಕಂ ತಿಟ್ಠೇಯ್ಯ, ಪಠಮಮೇವ ಬದ್ಧಾಯ ಪನ ಯಂ ಅಬದ್ಧಪಚ್ಚಯಾ ನ ತಿಟ್ಠೇಯ್ಯ, ತಮ್ಪಿ ತಿಟ್ಠೇಯ್ಯ; ಏವಮೇವ ಯೇ ಇಮೇ ಅನುಪ್ಪನ್ನೇ ವತ್ಥುಸ್ಮಿಂ ಪಟಿಕಚ್ಚೇವ ಅವೀತಿಕ್ಕಮನತ್ಥಾಯ ಗರುಧಮ್ಮಾ ಪಞ್ಞತ್ತಾ. ತೇಸು ಅಪಞ್ಞತ್ತೇಸುಪಿ ಮಾತುಗಾಮಸ್ಸ ಪಬ್ಬಜಿತತ್ತಾ ಪಞ್ಚೇವ ವಸ್ಸಸತಾನಿ ಸದ್ಧಮ್ಮೋ ತಿಟ್ಠೇಯ್ಯ. ಪಟಿಕಚ್ಚೇವ ಪಞ್ಞತ್ತತ್ತಾ ಪನ ಅಪರಾನಿಪಿ ಪಞ್ಚವಸ್ಸಸತಾನಿ ಠಸ್ಸತೀತಿ ಏವಂ ಪಠಮಂ ವುತ್ತಂ ವಸ್ಸಸಹಸ್ಸಮೇವ ಠಸ್ಸತೀತಿ. ವಸ್ಸಸಹಸ್ಸನ್ತಿ ಚೇತಂ ಪಟಿಸಮ್ಭಿದಾಪಭೇದಪ್ಪತ್ತಖೀಣಾಸವವಸೇನೇವ ವುತ್ತಂ. ತತೋ ಪನ ಉತ್ತರಿಮ್ಪಿ ಸುಕ್ಖವಿಪಸ್ಸಕಖೀಣಾಸವವಸೇನ ವಸ್ಸಸಹಸ್ಸಂ, ಅನಾಗಾಮಿವಸೇನ ವಸ್ಸಸಹಸ್ಸಂ, ಸಕದಾಗಾಮಿವಸೇನ ವಸ್ಸಸಹಸ್ಸಂ, ಸೋತಾಪನ್ನವಸೇನ ವಸ್ಸಸಹಸ್ಸನ್ತಿ ಏವಂ ಪಞ್ಚವಸ್ಸಸಹಸ್ಸಾನಿ ಪಟಿವೇಧಸದ್ಧಮ್ಮೋ ಠಸ್ಸತಿ. ಪರಿಯತ್ತಿಧಮ್ಮೋಪಿ ತಾನಿಯೇವ. ನ ಹಿ ಪರಿಯತ್ತಿಯಾ ಅಸತಿ ಪಟಿವೇಧೋ ಅತ್ಥಿ, ನಾಪಿ ಪರಿಯತ್ತಿಯಾ ಸತಿ ಪಟಿವೇಧೋ ನ ಹೋತಿ; ಲಿಙ್ಗಂ ಪನ ಪರಿಯತ್ತಿಯಾ ಅನ್ತರಹಿತಾಯಪಿ ಚಿರಂ ಪವತ್ತಿಸ್ಸತೀತಿ.

ಮಹಾಪಜಾಪತಿಗೋತಮೀವತ್ಥುಕಥಾ ನಿಟ್ಠಿತಾ.

ಭಿಕ್ಖುನೀಉಪಸಮ್ಪದಾನುಜಾನನಕಥಾ

೪೦೪. ಅನುಜಾನಾಮಿ ಭಿಕ್ಖವೇ ಭಿಕ್ಖೂಹಿ ಭಿಕ್ಖುನಿಯೋ ಉಪಸಮ್ಪಾದೇತುನ್ತಿ ಇಮಾಯ ಅನುಪಞ್ಞತ್ತಿಯಾ ಭಿಕ್ಖೂ ಪಞ್ಚಸತಾ ಸಾಕಿಯಾನಿಯೋ ಮಹಾಪಜಾಪತಿಯಾ ಸದ್ಧಿವಿಹಾರಿನಿಯೋ ಕತ್ವಾ ಉಪಸಮ್ಪಾದೇಸುಂ. ಇತಿ ತಾ ಸಬ್ಬಾಪಿ ಏಕತೋಉಪಸಮ್ಪನ್ನಾ ನಾಮ ಅಹೇಸುಂ. ಯೇ ಖೋ ತ್ವಂ ಗೋತಮೀತಿ ಇಮಿನಾ ಓವಾದೇನ ಗೋತಮೀ ಅರಹತ್ತಂ ಪತ್ತಾ.

೪೦೯. ಕಮ್ಮಂ ನ ಕರೀಯತೀತಿ ತಜ್ಜನೀಯಾದಿ ಸತ್ತವಿಧಮ್ಪಿ ಕಮ್ಮಂ ನ ಕರೀಯತಿ. ಖಮಾಪೇನ್ತೀತಿ ನ ಪುನ ಏವಂ ಕರಿಸ್ಸಾಮೀತಿ ಖಮಾಪೇನ್ತಿ.

೪೧೦. ಅನುಜಾನಾಮಿ, ಭಿಕ್ಖವೇ, ಭಿಕ್ಖೂಹಿ ಭಿಕ್ಖುನೀನಂ ಕಮ್ಮಂ ರೋಪೇತ್ವಾ ನಿಯ್ಯಾದೇತುನ್ತಿ ಏತ್ಥ ತಜ್ಜನೀಯಾದೀಸು ‘‘ಇದಂ ನಾಮ ಕಮ್ಮಂ ಏತಿಸ್ಸಾ ಕಾತಬ್ಬ’’ನ್ತಿ ಏವಂ ರೋಪೇತ್ವಾ ‘‘ತಂ ದಾನಿ ತುಮ್ಹೇವ ಕರೋಥಾ’’ತಿ ನಿಯ್ಯಾದೇತಬ್ಬಂ. ಸಚೇ ಪನ ಅಞ್ಞಸ್ಮಿಂ ರೋಪಿತೇ ಅಞ್ಞಂ ಕರೋನ್ತಿ, ‘‘ತಜ್ಜನೀಯಕಮ್ಮಾರಹಸ್ಸ ನಿಯಸ್ಸಕಮ್ಮಂ ಕರೋತೀ’’ತಿ ಏತ್ಥ ವುತ್ತನಯೇನ ಕಾರೇತಬ್ಬತಂ ಆಪಜ್ಜನ್ತಿ.

೪೧೧. ಕದ್ದಮೋದಕೇನಾತಿ ಏತ್ಥ ನ ಕೇವಲಂ ಕದ್ದಮೋದಕೇನ, ವಿಪ್ಪಸನ್ನಉದಕರಜನಕದ್ದಮಾದೀಸುಪಿ ಯೇನ ಕೇನಚಿ ಓಸಿಞ್ಚನ್ತಸ್ಸ ದುಕ್ಕಟಮೇವ. ಅವನ್ದಿಯೋ ಸೋ ಭಿಕ್ಖವೇ ಭಿಕ್ಖು ಭಿಕ್ಖುನಿಸಙ್ಘೇನ ಕಾತಬ್ಬೋತಿ ಭಿಕ್ಖುನುಪಸ್ಸಯೇ ಸನ್ನಿಪತಿತ್ವಾ ‘‘ಅಸುಕೋ ನಾಮ ಅಯ್ಯೋ ಭಿಕ್ಖುನೀನಂ ಅಪಸಾದನೀಯಂ ದಸ್ಸೇತಿ, ಏತಸ್ಸ ಅಯ್ಯಸ್ಸ ಅವನ್ದಿಯಕರಣಂ ರುಚ್ಚತೀ’’ತಿ ಏವಂ ತಿಕ್ಖತ್ತುಂ ಸಾವೇತಬ್ಬಂ. ಏತ್ತಾವತಾ ಅವನ್ದಿಯೋ ಕತೋ ಹೋತಿ. ತತೋ ಪಟ್ಠಾಯ ಯಥಾ ಸಾಮಣೇರೇ ದಿಸ್ವಾ ನ ವನ್ದನ್ತಿ; ಏವಮೇವ ದಿಸ್ವಾಪಿ ನ ವನ್ದಿತಬ್ಬೋ. ತೇನ ಭಿಕ್ಖುನಾ ಸಮ್ಮಾ ವತ್ತನ್ತೇನ ಭಿಕ್ಖುನುಪಸ್ಸಯಂ ಆಗನ್ತ್ವಾ ವಿಹಾರೇಯೇವ ಸಙ್ಘಂ ವಾ ಗಣಂ ವಾ ಏಕಪುಗ್ಗಲಂ ವಾ ಉಪಸಙ್ಕಮಿತ್ವಾ ಉಕ್ಕುಟಿಕಂ ನಿಸೀದಿತ್ವಾ ಅಞ್ಜಲಿಂ ಪಗ್ಗಹೇತ್ವಾ ‘‘ಭಿಕ್ಖುನಿಸಙ್ಘೋ ಮಯ್ಹಂ ಖಮತೂ’’ತಿ ಖಮಾಪೇತಬ್ಬಂ. ತೇನ ಭಿಕ್ಖುನಾ ಭಿಕ್ಖುನೀನಂ ಸನ್ತಿಕಂ ಆಗನ್ತ್ವಾ ‘‘ಏಸೋ ಭಿಕ್ಖು ತುಮ್ಹೇ ಖಮಾಪೇತೀ’’ತಿ ವತ್ತಬ್ಬಂ. ತತೋ ಪಟ್ಠಾಯ ಸೋ ವನ್ದಿತಬ್ಬೋ. ಅಯಮೇತ್ಥ ಸಙ್ಖೇಪೋ, ವಿತ್ಥಾರಂ ಪನ ಕಮ್ಮವಿಭಙ್ಗೇ ವಕ್ಖಾಮ.

ಓಭಾಸೇನ್ತೀತಿ ಅಸದ್ಧಮ್ಮೇನ ಓಭಾಸೇನ್ತಿ. ಭಿಕ್ಖುನೀಹಿ ಸದ್ಧಿಂ ಸಮ್ಪಯೋಜೇನ್ತೀತಿ ಭಿಕ್ಖುನೀಹಿ ಸದ್ಧಿಂ ಪುರಿಸೇ ಅಸದ್ಧಮ್ಮೇನ ಸಮ್ಪಯೋಜೇನ್ತಿ. ಅವನ್ದಿಯಕರಣಂ ವುತ್ತನಯಮೇವ. ಆವರಣನ್ತಿ ವಿಹಾರಪ್ಪವೇಸನೇ ನಿವಾರಣಂ. ಓವಾದಂ ಠಪೇತುನ್ತಿ ಏತ್ಥ ನ ಭಿಕ್ಖುನುಪಸ್ಸಯಂ ಗನ್ತ್ವಾ ಠಪೇತಬ್ಬೋ. ಓವಾದತ್ಥಾಯ ಪನ ಆಗತಾ ಭಿಕ್ಖುನಿಯೋ ವತ್ತಬ್ಬಾ ‘‘ಅಸುಕಾ ನಾಮ ಭಿಕ್ಖುನೀ ಸಾಪತ್ತಿಕಾ, ತಸ್ಸಾ ಓವಾದಂ ಠಪೇಮಿ, ಮಾ ತಾಯ ಸದ್ಧಿಂ ಉಪೋಸಥಂ ಕರಿತ್ಥಾ’’ತಿ. ಕಾಯವಿವರಣಾದೀಸುಪಿ ದಣ್ಡಕಮ್ಮಂ ವುತ್ತನಯಮೇವ.

೪೧೩. ನ ಭಿಕ್ಖವೇ ಭಿಕ್ಖುನಿಯಾ ಓವಾದೋ ನ ಗನ್ತಬ್ಬೋತಿಆದಿ ಭಿಕ್ಖುನಿವಿಭಙ್ಗವಣ್ಣನಾಯಂ ವುತ್ತಮೇವ.

೪೧೬. ಫಾಸುಕಾ ನಮೇನ್ತೀತಿ ಗಿಹಿದಾರಿಕಾಯೋ ವಿಯ ಘನಪಟ್ಟಕೇನ ಕಾಯಬನ್ಧನೇನ ಫಾಸುಕಾ ನಮನತ್ಥಾಯ ಬನ್ಧನ್ತಿ. ಏಕಪರಿಯಾಕತನ್ತಿ ಏಕವಾರಂ ಪರಿಕ್ಖಿಪನಕಂ.

ವಿಲೀವೇನ ಪಟ್ಟೇನಾತಿ ಸಣ್ಹೇಹಿ ವೇಳುವಿಲೀವೇಹಿ ಕತಪಟ್ಟೇನ. ದುಸ್ಸಪಟ್ಟೇನಾತಿ ಸೇತವತ್ಥಪಟ್ಟೇನ. ದುಸ್ಸವೇಣಿಯಾತಿ ದುಸ್ಸೇನ ಕತವೇಣಿಯಾ. ದುಸ್ಸವಟ್ಟಿಯಾತಿ ದುಸ್ಸೇನ ಕತವಟ್ಟಿಯಾ. ಚೋಳಪಟ್ಟಾದೀಸು ಚೋಳಕಾಸಾವಂ ಚೋಳನ್ತಿ ವೇದಿತಬ್ಬಂ.

ಅಟ್ಠಿಲ್ಲೇನಾತಿ ಗೋಜಙ್ಘಟ್ಠಿಕೇನ. ಜಘನನ್ತಿ ಕಟಿಪ್ಪದೇಸೋ ವುಚ್ಚತಿ. ಹತ್ಥಂ ಕೋಟ್ಟಾಪೇನ್ತೀತಿ ಅಗ್ಗಬಾಹಂ ಕೋಟ್ಟಾಪೇತ್ವಾ ಮೋರಪತ್ತಾದೀಹಿ ಚಿತ್ತಾಲಙ್ಕಾರಂ ಕರೋನ್ತಿ. ಹತ್ಥಕೋಚ್ಛನ್ತಿ ಪಿಟ್ಠಿಹತ್ಥಂ. ಪಾದನ್ತಿ ಜಙ್ಘಂ. ಪಾದಕೋಚ್ಛನ್ತಿ ಪಿಟ್ಠಿಪಾದಂ.

೪೧೭. ಮುಖಲಿಮ್ಪನಾದೀನಿ ವುತ್ತನಯಾನೇವ. ಅವಙ್ಗಂ ಕರೋನ್ತೀತಿ ಅಕ್ಖೀ ಅಞ್ಜನ್ತಿಯೋ ಅವಙ್ಗದೇಸೇ ಅಧೋಮುಖಂ ಲೇಖಂ ಕರೋನ್ತಿ. ವಿಸೇಸಕನ್ತಿ ಗಣ್ಡಪ್ಪದೇಸೇ ವಿಚಿತ್ರಸಣ್ಠಾನಂ ವಿಸೇಸಕಂ ಕರೋನ್ತಿ. ಓಲೋಕೇನ್ತೀತಿ ವಾತಪಾನಂ ವಿವರಿತ್ವಾ ವೀಥಿಂ ಓಲೋಕೇನ್ತಿ. ಸಾಲೋಕೇ ತಿಟ್ಠನ್ತೀತಿ ದ್ವಾರಂ ವಿವರಿತ್ವಾ ಉಪಡ್ಢಕಾಯಂ ದಸ್ಸೇನ್ತಿಯೋ ತಿಟ್ಠನ್ತಿ. ನಚ್ಚನ್ತಿ ನಟಸಮಜ್ಜಂ ಕಾರೇನ್ತಿ. ವೇಸಿಂ ವುಟ್ಠಾಪೇನ್ತೀತಿ ಗಣಿಕಂ ವುಟ್ಠಾಪೇನ್ತಿ. ಪಾನಾಗಾರಂ ಠಪೇನ್ತೀತಿ ಸುರಂ ವಿಕ್ಕಿಣನ್ತಿ. ಸೂನಂ ಠಪೇನ್ತೀತಿ ಮಂಸಂ ವಿಕ್ಕಿಣನ್ತಿ. ಆಪಣನ್ತಿ ನಾನಾಭಣ್ಡಾನಂ ಅನೇಕವಿಧಂ ಆಪಣಂ ಪಸಾರೇನ್ತಿ. ದಾಸಂ ಉಪಟ್ಠಾಪೇನ್ತೀತಿ ದಾಸಂ ಗಹೇತ್ವಾ ತೇನ ಅತ್ತನೋ ವೇಯ್ಯಾವಚ್ಚಂ ಕಾರೇನ್ತಿ. ದಾಸೀಆದೀಸುಪಿ ಏಸೇವ ನಯೋ. ಹರಿತಕಪಕ್ಕಿಕಂ ಪಕಿಣನ್ತೀತಿ ಹರಿತಕಞ್ಚೇವ ಪಕ್ಕಞ್ಚ ಪಕಿಣನ್ತಿ; ಪಕಿಣ್ಣಕಾಪಣಂ ಪಸಾರೇನ್ತೀತಿ ವುತ್ತಂ ಹೋತಿ.

೪೧೮. ಸಬ್ಬನೀಲಕಾದಿಕಥಾ ಕಥಿತಾಯೇವ.

೪೧೯. ಭಿಕ್ಖುನೀ ಚೇ, ಭಿಕ್ಖವೇ, ಕಾಲಂ ಕರೋನ್ತೀತಿಆದೀಸು ಅಯಂ ಪಾಳಿಮುತ್ತಕವಿನಿಚ್ಛಯೋ – ಸಚೇ ಹಿ ಪಞ್ಚಸು ಸಹಧಮ್ಮಿಕೇಸು ಯೋ ಕೋಚಿ ಕಾಲಂ ಕರೋನ್ತೋ ‘‘ಮಮಚ್ಚಯೇನ ಮಯ್ಹಂ ಪರಿಕ್ಖಾರೋ ಉಪಜ್ಝಾಯಸ್ಸ ಹೋತು, ಆಚರಿಯಸ್ಸ ಹೋತು, ಸದ್ಧಿವಿಹಾರಿಕಸ್ಸ ಹೋತು, ಅನ್ತೇವಾಸಿಕಸ್ಸ ಹೋತು, ಮಾತು ಹೋತು, ಪಿತು ಹೋತು, ಅಞ್ಞಸ್ಸ ವಾ ಯಸ್ಸ ಕಸ್ಸಚಿ ಹೋತೂ’’ತಿ ವದತಿ ತೇಸಂ ನ ಹೋತಿ, ಸಙ್ಘಸ್ಸೇವ ಹೋತಿ. ನ ಹಿ ಪಞ್ಚನ್ನಂ ಸಹಧಮ್ಮಿಕಾನಂ ಅಚ್ಚಯದಾನಂ ರುಹತಿ, ಗಿಹೀನಂ ಪನ ರುಹತಿ. ಭಿಕ್ಖು ಹಿ ಭಿಕ್ಖುನಿವಿಹಾರೇ ಕಾಲಂ ಕರೋತಿ, ತಸ್ಸ ಪರಿಕ್ಖಾರೋ ಭಿಕ್ಖೂನಂಯೇವ ಹೋತಿ. ಭಿಕ್ಖುನೀ ಭಿಕ್ಖುವಿಹಾರೇ ಕಾಲಂ ಕರೋತಿ, ತಸ್ಸಾ ಪರಿಕ್ಖಾರೋ ಭಿಕ್ಖುನೀನಂಯೇವ ಹೋತಿ.

೪೨೦. ಪುರಾಣಮಲ್ಲೀತಿ ಪುರಾಣೇ ಗಿಹಿಕಾಲೇ ಮಲ್ಲಕಸ್ಸ ಭರಿಯಾ. ಪುರಿಸಬ್ಯಞ್ಜನನ್ತಿ ಪುರಿಸನಿಮಿತ್ತಂ, ಛಿನ್ನಂ ವಾ ಹೋತು ಅಚ್ಛಿನ್ನಂ ವಾ, ಪಟಿಚ್ಛನ್ನಂ ವಾ ಅಪ್ಪಟಿಚ್ಛನ್ನಂ ವಾ. ಸಚೇ ಏತಸ್ಮಿಂ ಠಾನೇ ಪುರಿಸಬ್ಯಞ್ಜನನ್ತಿ ಚಿತ್ತಂ ಉಪ್ಪಾದೇತ್ವಾ ಉಪನಿಜ್ಝಾಯತಿ, ದುಕ್ಕಟಂ.

೪೨೧. ಅತ್ತನೋ ಪರಿಭೋಗತ್ಥಾಯ ದಿನ್ನಂ ನಾಮ ಯಂ ‘‘ತುಮ್ಹೇಯೇವ ಪರಿಭುಞ್ಜಥಾ’’ತಿ ವತ್ವಾ ದಿನ್ನಂ, ತಂ ಅಞ್ಞಸ್ಸ ದದತೋ ದುಕ್ಕಟಂ. ಅಗ್ಗಂ ಗಹೇತ್ವಾ ಪನ ದಾತುಂ ವಟ್ಟತಿ. ಸಚೇ ಅಸಪ್ಪಾಯಂ, ಸಬ್ಬಂ ಅಪನೇತುಂ ವಟ್ಟತಿ. ಚೀವರಂ ಏಕಾಹಂ ವಾ ದ್ವೀಹಂ ವಾ ಪರಿಭುಞ್ಜಿತ್ವಾ ದಾತುಂ ವಟ್ಟತಿ. ಪತ್ತಾದೀಸುಪಿ ಏಸೇವ ನಯೋ.

ಭಿಕ್ಖೂನಂ ಸನ್ನಿಧಿಂ ಭಿಕ್ಖುನೀಹಿ ಪಟಿಗ್ಗಾಹಾಪೇತ್ವಾತಿ ಹಿಯ್ಯೋ ಪಟಿಗ್ಗಹೇತ್ವಾ ಠಪಿತಮಂಸಂ ಅಜ್ಜ ಅಞ್ಞಸ್ಮಿಂ ಅನುಪಸಮ್ಪನ್ನೇ ಅಸತಿ ಭಿಕ್ಖೂಹಿ ಪಟಿಗ್ಗಾಹಾಪೇತ್ವಾ ಭಿಕ್ಖುನೀಹಿ ಪರಿಭುಞ್ಜಿತಬ್ಬಂ. ಭಿಕ್ಖೂಹಿ ಪಟಿಗ್ಗಹಿತಞ್ಹಿ ಭಿಕ್ಖುನೀನಂ ಅಪ್ಪಟಿಗ್ಗಹಿತಕಟ್ಠಾನೇ ತಿಟ್ಠತಿ, ಭಿಕ್ಖುನೀನಂ ಪಟಿಗ್ಗಹಿತಮ್ಪಿ ಭಿಕ್ಖೂಸು ಏಸೇವ ನಯೋ.

೪೨೬. ಆಸನಂ ಸಂಕಸಾಯನ್ತಿಯೋ ಕಾಲಂ ವೀತಿನಾಮೇಸುನ್ತಿ ಅಞ್ಞಂ ವುಟ್ಠಾಪೇತ್ವಾ ಅಞ್ಞಂ ನಿಸೀದಾಪೇನ್ತಿಯೋ ಭೋಜನಕಾಲಂ ಅತಿಕ್ಕಾಮೇಸುಂ.

ಅಟ್ಠನ್ನಂ ಭಿಕ್ಖುನೀನಂ ಯಥಾವುಡ್ಢನ್ತಿ ಏತ್ಥ ಸಚೇ ಪುರೇ ಅಟ್ಠಸು ನಿಸಿನ್ನಾಸು ತಾಸಂ ಅಬ್ಭನ್ತರಿಮಾ ಅಞ್ಞಾ ಆಗಚ್ಛತಿ, ಸಾ ಅತ್ತನೋ ನವಕಂ ಉಟ್ಠಾಪೇತ್ವಾ ನಿಸೀದಿತುಂ ಲಭತಿ. ಯಾ ಪನ ಅಟ್ಠಹಿಪಿ ನವಕತರಾ, ಸಾ ಸಚೇಪಿ ಸಟ್ಠಿವಸ್ಸಾ ಹೋತಿ, ಆಗತಪಟಿಪಾಟಿಯಾವ ನಿಸೀದಿತುಂ ಲಭತಿ. ಅಞ್ಞತ್ಥ ಸಬ್ಬತ್ಥ ಯಥಾವುಡ್ಢಂ ನ ಪಟಿಬಾಹಿತಬ್ಬನ್ತಿ ಠಪೇತ್ವಾ ಭತ್ತಗ್ಗಂ ಅಞ್ಞಸ್ಮಿಂ ಚತುಪಚ್ಚಯಭಾಜನೀಯಟ್ಠಾನೇ ‘‘ಅಹಂ ಪುಬ್ಬೇ ಆಗತಾ’’ತಿ ವುಡ್ಢಂ ಪಟಿಬಾಹಿತ್ವಾ ಕಿಞ್ಚಿ ನ ಗಹೇತಬ್ಬಂ; ಯಥಾವುಡ್ಢಮೇವ ವಟ್ಟತಿ. ಪವಾರಣಾಕಥಾ ಕಥಿತಾಯೇವ.

೪೨೯. ಇತ್ಥಿಯುತ್ತನ್ತಿಆದೀಹಿ ಸಬ್ಬಯಾನಾನಿ ಅನುಞ್ಞಾತಾನಿ. ಪಾಟಙ್ಕಿನ್ತಿ ಪಟಪೋಟ್ಟಲಿಕಂ.

೪೩೦. ದೂತೇನ ಉಪಸಮ್ಪದಾ ದಸನ್ನಂ ಅನ್ತರಾಯಾನಂ ಯೇನ ಕೇನಚಿ ವಟ್ಟತಿ. ಕಮ್ಮವಾಚಾಪರಿಯೋಸಾನೇ ಸಾ ಭಿಕ್ಖುನೀ ಭಿಕ್ಖುನುಪಸ್ಸಯೇ ಠಿತಾ ವಾ ಹೋತು ನಿಪನ್ನಾ ವಾ ಜಾಗರಾ ವಾ ನಿದ್ದಂ ಓಕ್ಕನ್ತಾ ವಾ, ಉಪಸಮ್ಪನ್ನಾವ ಹೋತಿ. ತಾವದೇವ ಛಾಯಾದೀನಿ ಆಗತಾಯ ದೂತಭಿಕ್ಖುನಿಯಾ ಆಚಿಕ್ಖಿತಬ್ಬಾನಿ.

೪೩೧. ಉದೋಸಿತೋತಿ ಭಣ್ಡಸಾಲಾ. ನ ಸಮ್ಮತೀತಿ ನಪ್ಪಹೋತಿ. ಉಪಸ್ಸಯನ್ತಿ ಘರಂ. ನವಕಮ್ಮನ್ತಿ ಸಙ್ಘಸ್ಸತ್ಥಾಯ ಭಿಕ್ಖುನಿಯಾ ನವಕಮ್ಮಮ್ಪಿ ಕಾತುಂ ಅನುಜಾನಾಮೀತಿ ಅತ್ಥೋ.

೪೩೨. ತಸ್ಸಾ ಪಬ್ಬಜಿತಾಯಾತಿ ತಸ್ಸಾ ಪಬ್ಬಜಿತಕಾಲೇ. ಯಾವ ಸೋ ದಾರಕೋ ವಿಞ್ಞುತಂ ಪಾಪುಣಾತೀತಿ ಯಾವ ಖಾದಿತುಂ ಭುಞ್ಜಿತುಂ ನಹಾಯಿತುಞ್ಚ ಮಣ್ಡಿತುಞ್ಚ ಅತ್ತನೋ ಧಮ್ಮತಾಯ ಸಕ್ಕೋತೀತಿ ಅತ್ಥೋ.

ಠಪೇತ್ವಾ ಸಾಗಾರನ್ತಿ ಸಹಗಾರಸೇಯ್ಯಮತ್ತಂ ಠಪೇತ್ವಾ. ಯಥಾ ಅಞ್ಞಸ್ಮಿಂ ಪುರಿಸೇ; ಏವಂ ದುತಿಯಿಕಾಯ ಭಿಕ್ಖುನಿಯಾ ತಸ್ಮಿಂ ದಾರಕೇ ಪಟಿಪಜ್ಜಿತಬ್ಬನ್ತಿ ದಸ್ಸೇತಿ. ಮಾತಾ ಪನ ನಹಾಪೇತುಂ ಪಾಯೇತುಂ ಭೋಜೇತುಂ ಮಣ್ಡೇತುಂ ಉರೇ ಕತ್ವಾ ಸಯಿತುಞ್ಚ ಲಭತಿ.

೪೩೪. ಯದೇವ ಸಾ ವಿಬ್ಭನ್ತಾತಿ ಯಸ್ಮಾ ಸಾ ವಿಬ್ಭನ್ತಾ ಅತ್ತನೋ ರುಚಿಯಾ ಖನ್ತಿಯಾ ಓದಾತಾನಿ ವತ್ಥಾನಿ ನಿವತ್ಥಾ, ತಸ್ಮಾಯೇವ ಸಾ ಅಭಿಕ್ಖುನೀ, ನ ಸಿಕ್ಖಾಪಚ್ಚಕ್ಖಾನೇನಾತಿ ದಸ್ಸೇತಿ. ಸಾ ಪುನ ಉಪಸಮ್ಪದಂ ನ ಲಭತಿ.

ಸಾ ಆಗತಾ ನ ಉಪಸಮ್ಪಾದೇತಬ್ಬಾತಿ ನ ಕೇವಲಂ ನ ಉಪಸಮ್ಪಾದೇತಬ್ಬಾ, ಪಬ್ಬಜ್ಜಮ್ಪಿ ನ ಲಭತಿ. ಓದಾತಾನಿ ಗಹೇತ್ವಾ ವಿಬ್ಭನ್ತಾ ಪನ ಪಬ್ಬಜ್ಜಾಮತ್ತಂ ಲಭತಿ.

ಅಭಿವಾದನನ್ತಿಆದೀಸು ಪುರಿಸಾ ಪಾದೇ ಸಮ್ಬಾಹನ್ತಾ ವನ್ದನ್ತಿ, ಕೇಸೇ ಛಿನ್ದನ್ತಿ, ನಖೇ ಛಿನ್ದನ್ತಿ, ವಣಪಟಿಕಮ್ಮಂ ಕರೋನ್ತಿ, ತಂ ಸಬ್ಬಂ ಕುಕ್ಕುಚ್ಚಾಯನ್ತಾ ನ ಸಾದಿಯನ್ತೀತಿ ಅತ್ಥೋ. ತತ್ರೇಕೇ ಆಚರಿಯಾ ‘‘ಸಚೇ ಏಕತೋ ವಾ ಉಭತೋ ವಾ ಅವಸ್ಸುತಾ ಹೋನ್ತಿ ಸಾರತ್ತಾ, ಯಥಾವತ್ಥುಕಮೇವ’’. ಏಕೇ ಆಚರಿಯಾ ‘‘ನತ್ಥಿ ಏತ್ಥ ಆಪತ್ತೀ’’ತಿ ವದನ್ತಿ. ಏವಂ ಆಚರಿಯವಾದಂ ದಸ್ಸೇತ್ವಾ ಇದಂ ಓದಿಸ್ಸ ಅನುಞ್ಞಾತಂ ವಟ್ಟತೀತಿ ಅಟ್ಠಕಥಾಸು ವುತ್ತಂ. ತಂ ಪಮಾಣಂ. ‘‘ಅನುಜಾನಾಮಿ ಭಿಕ್ಖವೇ ಸಾದಿತು’’ನ್ತಿ ಹಿ ವಚನೇನೇವ ತಂ ಕಪ್ಪಿಯಂ.

೪೩೫. ಪಲ್ಲಙ್ಕೇನ ನಿಸೀದನ್ತೀತಿ ಪಲ್ಲಙ್ಕಂ ಆಭುಜಿತ್ವಾ ನಿಸೀದನ್ತಿ. ಅಡ್ಢಪಲ್ಲಙ್ಕನ್ತಿ ಏಕಂ ಪಾದಂ ಆಭುಜಿತ್ವಾ ಕತಪಲ್ಲಙ್ಕಂ. ಹೇಟ್ಠಾ ವಿವಟೇ ಉಪರಿ ಪಟಿಚ್ಛನ್ನೇತಿ ಏತ್ಥ ಸಚೇ ಕೂಪೋ ಖತೋ ಹೋತಿ, ಉಪರಿ ಪನ ಪದರಮತ್ತಮೇವ ಸಬ್ಬದಿಸಾಸು ಪಞ್ಞಾಯತಿ, ಏವರೂಪೇಪಿ ವಟ್ಟತಿ.

೪೩೬. ಕುಕ್ಕುಸಂ ಮತ್ತಿಕನ್ತಿ ಕುಣ್ಡಕಞ್ಚೇವ ಮತ್ತಿಕಞ್ಚ. ಸೇಸಮೇತ್ಥ ಉತ್ತಾನಮೇವಾತಿ.

ಭಿಕ್ಖುನೀಉಪಸಮ್ಪದಾನುಜಾನನಕಥಾ ನಿಟ್ಠಿತಾ.

ಭಿಕ್ಖುನಿಕ್ಖನ್ಧಕವಣ್ಣನಾ ನಿಟ್ಠಿತಾ.