೬. ಏಸುಕಾರೀಸುತ್ತವಣ್ಣನಾ

೪೩೭. ಏವಂ ಮೇ ಸುತನ್ತಿ ಏಸುಕಾರೀಸುತ್ತಂ. ತತ್ಥ ಬಿಲಂ ಓಲಗ್ಗೇಯ್ಯುನ್ತಿ ಕೋಟ್ಠಾಸಂ ಲಗ್ಗಾಪೇಯ್ಯುಂ, ಇಮಿನಾ ಸತ್ಥಧಮ್ಮಂ ನಾಮ ದಸ್ಸೇತಿ. ಸತ್ಥವಾಹೋ ಕಿರ ಮಹಾಕನ್ತಾರಪಟಿಪನ್ನೋ ಅನ್ತರಾಮಗ್ಗೇ ಗೋಣೇ ಮತೇ ಮಂಸಂ ಗಹೇತ್ವಾ ಸಬ್ಬೇಸಂ ಸತ್ಥಿಕಾನಂ ‘‘ಇದಂ ಖಾದಿತ್ವಾ ಏತ್ತಕಂ ಮೂಲಂ ದಾತಬ್ಬ’’ನ್ತಿ ಕೋಟ್ಠಾಸಂ ಓಲಗ್ಗೇತಿ, ಗೋಣಮಂಸಂ ನಾಮ ಖಾದನ್ತಾಪಿ ಅತ್ಥಿ ಅಖಾದನ್ತಾಪಿ, ಮೂಲಂ ದಾತುಂ ಸಕ್ಕೋನ್ತಾಪಿ ಅಸಕ್ಕೋನ್ತಾಪಿ. ಸತ್ಥವಾಹೋ ಯೇನ ಮೂಲೇನ ಗೋಣೋ ಗಹಿತೋ, ತಸ್ಸ ನಿಕ್ಖಮನತ್ಥಂ ಸಬ್ಬೇಸಂ ಬಲಕ್ಕಾರೇನ ಕೋಟ್ಠಾಸಂ ದತ್ವಾ ಮೂಲಂ ಗಣ್ಹಾತಿ, ಅಯಂ ಸತ್ಥಧಮ್ಮೋ. ಏವಮೇವಂ ಬ್ರಾಹ್ಮಣಾಪಿ ಲೋಕಸ್ಸ ಪಟಿಞ್ಞಂ ಅಗ್ಗಹೇತ್ವಾ ಅತ್ತನೋವ ಧಮ್ಮತಾಯ ಚತಸ್ಸೋ ಪಾರಿಚರಿಯಾ ಪಞ್ಞಪೇನ್ತೀತಿ ದಸ್ಸೇತುಂ ಏವಮೇವ ಖೋತಿಆದಿಮಾಹ. ಪಾಪಿಯೋ ಅಸ್ಸಾತಿ ಪಾಪಂ ಅಸ್ಸ. ಸೇಯ್ಯೋ ಅಸ್ಸಾತಿ ಹಿತಂ ಅಸ್ಸ. ಅಥ ವಾ ಪಾಪಿಯೋತಿ ಪಾಪಕೋ ಲಾಮಕೋ ಅತ್ತಭಾವೋ ಅಸ್ಸ. ಸೇಯ್ಯೋತಿ ಸೇಟ್ಠೋ ಉತ್ತಮೋ. ಸೇಯ್ಯಂಸೋತಿ ಸೇಯ್ಯೋ. ಉಚ್ಚಾಕುಲೀನತಾತಿ ಉಚ್ಚಾಕುಲೀನತ್ತೇನ ಸೇಯ್ಯೋ. ಪಾಪಿಯಂಸೋತಿ ಪಾಪಿಯೋ. ಉಚ್ಚಾಕುಲೀನತಾ ಚ ದ್ವೀಸು ಕುಲೇಸು ವಡ್ಢೇತಿ ಖತ್ತಿಯಕುಲೇ ಬ್ರಾಹ್ಮಣಕುಲೇ ಚ, ಉಳಾರವಣ್ಣತಾ ತೀಸು. ವೇಸ್ಸೋಪಿ ಹಿ ಉಳಾರವಣ್ಣೋ ಹೋತಿ. ಉಳಾರಭೋಗತಾ ಚತೂಸುಪಿ. ಸುದ್ದೋಪಿ ಹಿ ಅನ್ತಮಸೋ ಚಣ್ಡಾಲೋಪಿ ಉಳಾರಭೋಗೋ ಹೋತಿಯೇವ.

೪೪೦. ಭಿಕ್ಖಾಚರಿಯನ್ತಿ ಕೋಟಿಧನೇನಪಿ ಹಿ ಬ್ರಾಹ್ಮಣೇನ ಭಿಕ್ಖಾ ಚರಿತಬ್ಬಾವ, ಪೋರಾಣಕಬ್ರಾಹ್ಮಣಾ ಅಸೀತಿಕೋಟಿಧನಾಪಿ ಏಕವೇಲಂ ಭಿಕ್ಖಂ ಚರನ್ತಿ. ಕಸ್ಮಾ? ದುಗ್ಗತಕಾಲೇ ಚರನ್ತಾನಂ ಇದಾನಿ ಭಿಕ್ಖಂ ಚರಿತುಂ ಆರದ್ಧಾತಿ ಗರಹಾ ನ ಭವಿಸ್ಸತೀತಿ. ಅತಿಮಞ್ಞಮಾನೋತಿ ಯೋ ಭಿಕ್ಖಾಚರಿಯವಂಸಂ ಹರಿತ್ವಾ ಸತ್ತಜೀವಕಸಿಕಮ್ಮವಣಿಜ್ಜಾದೀಹಿ ಜೀವಿಕಂ ಕಪ್ಪೇತಿ, ಅಯಂ ಅತಿಮಞ್ಞತಿ ನಾಮ. ಗೋಪೋ ವಾತಿ ಯಥಾ ಗೋಪಕೋ ಅತ್ತನಾ ರಕ್ಖಿತಬ್ಬಂ ಭಣ್ಡಂ ಥೇನೇನ್ತೋ ಅಕಿಚ್ಚಕಾರೀ ಹೋತಿ, ಏವನ್ತಿ ಅತ್ಥೋ. ಇಮಿನಾ ನಯೇನ ಸಬ್ಬವಾರೇಸು ಅತ್ಥೋ ವೇದಿತಬ್ಬೋ. ಅಸಿತಬ್ಯಾಭಙ್ಗಿನ್ತಿ ತಿಣಲಾಯನಅಸಿತಞ್ಚೇವ ಕಾಜಞ್ಚ. ಅನುಸ್ಸರತೋತಿ ಯತ್ಥ ಜಾತೋ, ತಸ್ಮಿಂ ಪೋರಾಣೇ ಮಾತಾಪೇತ್ತಿಕೇ ಕುಲವಂಸೇ ಅನುಸ್ಸರಿಯಮಾನೇತಿ ಅತ್ಥೋ. ಸೇಸಂ ಸಬ್ಬತ್ಥ ಉತ್ತಾನಮೇವಾತಿ.

ಪಪಞ್ಚಸೂದನಿಯಾ ಮಜ್ಝಿಮನಿಕಾಯಟ್ಠಕಥಾಯ

ಏಸುಕಾರೀಸುತ್ತವಣ್ಣನಾ ನಿಟ್ಠಿತಾ.