೪. ಘೋಟಮುಖಸುತ್ತವಣ್ಣನಾ

೪೧೨. ಏವಂ ಮೇ ಸುತನ್ತಿ ಘೋಟಮುಖಸುತ್ತಂ. ತತ್ಥ ಖೇಮಿಯಮ್ಬವನೇತಿ ಏವಂನಾಮಕೇ ಅಮ್ಬವನೇ. ಧಮ್ಮಿಕೋ ಪರಿಬ್ಬಜೋತಿ ಧಮ್ಮಿಕಾ ಪಬ್ಬಜ್ಜಾ. ಅದಸ್ಸನಾತಿ ತುಮ್ಹಾದಿಸಾನಂ ವಾ ಪಣ್ಡಿತಾನಂ ಅದಸ್ಸನೇನ. ಯೋ ವಾ ಪನೇತ್ಥ ಧಮ್ಮೋತಿ ಯೋ ವಾ ಪನ ಏತ್ಥ ಧಮ್ಮೋ ಸಭಾವೋ, ತಸ್ಸೇವ ವಾ ಅದಸ್ಸನೇನ. ಇಮಿನಾ ‘‘ಅಮ್ಹಾಕಂ ಕಥಾ ಅಪ್ಪಮಾಣಂ, ಧಮ್ಮೋವ ಪಮಾಣ’’ನ್ತಿ ದಸ್ಸೇತಿ. ತತೋ ಥೇರೋ ‘‘ನವಉಪೋಸಥಾಗಾರೇ ವಿಯ ಬಹುನಾ ಕಮ್ಮೇನ ಇಧ ಭವಿತಬ್ಬ’’ನ್ತಿ ಚಿನ್ತೇತ್ವಾ ಚಙ್ಕಮಾ ಓರುಯ್ಹ ಪಣ್ಣಸಾಲಂ ಪವಿಸಿತ್ವಾ ನಿಸೀದಿ. ತಂ ದಸ್ಸೇತುಂ ಏವಂ ವುತ್ತೇತಿಆದಿ ವುತ್ತಂ.

೪೧೩. ಚತ್ತಾರೋಮೇ ಬ್ರಾಹ್ಮಣಾತಿ ಥೇರಸ್ಸ ಕಿರ ಏತದಹೋಸಿ – ‘‘ಅಯಂ ಬ್ರಾಹ್ಮಣೋ ‘ಧಮ್ಮಿಕಂ ಪಬ್ಬಜ್ಜಂ ಉಪಗತೋ ಸಮಣೋ ವಾ ಬ್ರಾಹ್ಮಣೋ ವಾ ನತ್ಥೀ’ತಿ ವದತಿ. ಇಮಸ್ಸ ಚತ್ತಾರೋ ಪುಗ್ಗಲೇ ದ್ವೇ ಚ ಪರಿಸಾ ದಸ್ಸೇತ್ವಾ ‘ಚತುತ್ಥಂ ಪುಗ್ಗಲಂ ಕತರಾಯ ಪರಿಸಾಯ ಬಹುಲಂ ಪಸ್ಸಸೀ’ತಿ ಪುಚ್ಛಿಸ್ಸಾಮಿ, ಜಾನಮಾನೋ ‘ಅನಾಗಾರಿಯಪರಿಸಾಯ’ನ್ತಿ ವಕ್ಖತಿ. ಏವಮೇತಂ ಸಕಮುಖೇನೇವ ‘ಧಮ್ಮಿಕೋ ಪರಿಬ್ಬಜೋ ಅತ್ಥೀ’ತಿ ವದಾಪೇಸ್ಸಾಮೀ’’ತಿ ಇಮಂ ದೇಸನಂ ಆರಭಿ.

೪೧೪. ತತ್ಥ ಸಾರತ್ತರತ್ತಾತಿ ಸುಟ್ಠು ರತ್ತರತ್ತಾ. ಸಾನುಗ್ಗಹಾ ವಾಚಾ ಭಾಸಿತಾ ಸಕಾರಣಾ ವಾಚಾ ಭಾಸಿತಾ. ವುತ್ತಞ್ಹೇತಂ ಮಯಾ ‘‘ಅಮ್ಹಾಕಂ ಕಥಾ ಅಪ್ಪಮಾಣಂ, ಧಮ್ಮೋವ ಪಮಾಣ’’ನ್ತಿ.

೪೨೧. ಕಿಂ ಪನ ತೇತಿ ಗಿಹಿ ನಾಮ ಕಪ್ಪಿಯಮ್ಪಿ ಅಕಪ್ಪಿಯಮ್ಪಿ ವದೇಯ್ಯಾತಿ ವಿವೇಚನತ್ಥಂ ಪುಚ್ಛಿ. ಕಾರಾಪೇಸೀತಿ ಮಾಪೇಸಿ. ಕಾರಾಪೇತ್ವಾ ಚ ಪನ ಕಾಲಂ ಕತ್ವಾ ಸಗ್ಗೇ ನಿಬ್ಬತ್ತೋ. ಏತಸ್ಸ ಕಿರ ಜಾನನಸಿಪ್ಪೇ ಮಾತರಮ್ಪಿ ಪಿತರಮ್ಪಿ ಘಾತೇತ್ವಾ ಅತ್ತಾವ ಘಾತೇತಬ್ಬೋತಿ ಆಗಚ್ಛತಿ. ಏತಂ ಸಿಪ್ಪಂ ಜಾನನ್ತೋ ಠಪೇತ್ವಾ ಏತಂ ಅಞ್ಞೋ ಸಗ್ಗೇ ನಿಬ್ಬತ್ತೋ ನಾಮ ನತ್ಥಿ, ಏಸ ಪನ ಥೇರಂ ಉಪನಿಸ್ಸಾಯ ಪುಞ್ಞಂ ಕತ್ವಾ ತತ್ಥ ನಿಬ್ಬತ್ತಿತ್ವಾ ಚ ಪನ ‘‘ಕೇನಾಹಂ ಕಮ್ಮೇನ ಇಧ ನಿಬ್ಬತ್ತೋ’’ತಿ ಆವಜ್ಜೇತ್ವಾ ಯಥಾಭೂತಂ ಞತ್ವಾ ಏಕದಿವಸಂ ಜಿಣ್ಣಾಯ ಭೋಜನಸಾಲಾಯ ಪಟಿಸಙ್ಖರಣತ್ಥಂ ಸಙ್ಘೇ ಸನ್ನಿಪತಿತೇ ಮನುಸ್ಸವೇಸೇನ ಆಗನ್ತ್ವಾ ಪುಚ್ಛಿ – ‘‘ಕಿಮತ್ಥಂ, ಭನ್ತೇ, ಸಙ್ಘೋ ಸನ್ನಿಪತಿತೋ’’ತಿ? ಭೋಜನಸಾಲಾಯ ಪಟಿಸಙ್ಖರಣತ್ಥನ್ತಿ. ಕೇನೇಸಾ ಕಾರಿತಾತಿ? ಘೋಟಮುಖೇನಾತಿ. ಇದಾನಿ ಸೋ ಕುಹಿನ್ತಿ? ಕಾಲಙ್ಕತೋತಿ. ಅತ್ಥಿ ಪನಸ್ಸ ಕೋಚಿ ಞಾತಕೋತಿ? ಅತ್ಥಿ ಏಕಾ ಭಗಿನೀತಿ. ಪಕ್ಕೋಸಾಪೇಥ ನನ್ತಿ. ಭಿಕ್ಖೂ ಪಕ್ಕೋಸಾಪೇಸುಂ. ಸೋ ತಂ ಉಪಸಙ್ಕಮಿತ್ವಾ – ‘‘ಅಹಂ, ತವ ಭಾತಾ, ಘೋಟಮುಖೋ ನಾಮ ಇಮಂ ಸಾಲಂ ಕಾರೇತ್ವಾ ಸಗ್ಗೇ ನಿಬ್ಬತ್ತೋ, ಅಸುಕೇ ಚ ಅಸುಕೇ ಚ ಠಾನೇ ಮಯಾ ಠಪಿತಂ ಧನಂ ಅತ್ಥಿ, ತಂ ಗಹೇತ್ವಾ ಇಮಞ್ಚ ಭೋಜನಸಾಲಂ ಕಾರೇಹಿ, ದಾರಕೇ ಚ ಪೋಸೇಹೀ’’ತಿ ವತ್ವಾ ಭಿಕ್ಖುಸಙ್ಘಂ ವನ್ದಿತ್ವಾ ವೇಹಾಸಂ ಉಪ್ಪತಿತ್ವಾ ದೇವಲೋಕಮೇವ ಅಗಮಾಸಿ. ಸೇಸಂ ಸಬ್ಬತ್ಥ ಉತ್ತಾನಮೇವಾತಿ.

ಪಪಞ್ಚಸೂದನಿಯಾ ಮಜ್ಝಿಮನಿಕಾಯಟ್ಠಕಥಾಯ

ಘೋಟಮುಖಸುತ್ತವಣ್ಣನಾ ನಿಟ್ಠಿತಾ.