೫. ಚುನ್ದಸುತ್ತವಣ್ಣನಾ

೭೫. ಪಞ್ಚಮೇ ಮಲ್ಲೇಸೂತಿ ಏವಂನಾಮಕೇ ಜನಪದೇ. ಮಹತಾ ಭಿಕ್ಖುಸಙ್ಘೇನಾತಿ ಗುಣಮಹತ್ತಸಙ್ಖ್ಯಾಮಹತ್ತೇಹಿ ಮಹತಾ. ಸೋ ಹಿ ಭಿಕ್ಖುಸಙ್ಘೋ ಸೀಲಾದಿಗುಣವಿಸೇಸಯೋಗೇನಪಿ ಮಹಾ ತತ್ಥ ಸಬ್ಬಪಚ್ಛಿಮಕಸ್ಸ ಸೋತಾಪನ್ನಭಾವತೋ, ಸಙ್ಖ್ಯಾಮಹತ್ತೇನಪಿ ಮಹಾ ಅಪರಿಚ್ಛಿನ್ನಗಣನತ್ತಾ. ಆಯುಸಙ್ಖಾರೋಸ್ಸಜ್ಜನತೋ ಪಟ್ಠಾಯ ಹಿ ಆಗತಾಗತಾ ಭಿಕ್ಖೂ ನ ಪಕ್ಕಮಿಂಸು. ಚುನ್ದಸ್ಸಾತಿ ಏವಂನಾಮಕಸ್ಸ. ಕಮ್ಮಾರಪುತ್ತಸ್ಸಾತಿ ಸುವಣ್ಣಕಾರಪುತ್ತಸ್ಸ. ಸೋ ಕಿರ ಅಡ್ಢೋ ಮಹಾಕುಟುಮ್ಬಿಕೋ ಭಗವತೋ ಪಠಮದಸ್ಸನೇನೇವ ಸೋತಾಪನ್ನೋ ಹುತ್ವಾ ಅತ್ತನೋ ಅಮ್ಬವನೇ ಸತ್ಥುವಸನಾನುಚ್ಛವಿಕಂ ಗನ್ಧಕುಟಿಂ, ಭಿಕ್ಖುಸಙ್ಘಸ್ಸ ಚ ರತ್ತಿಟ್ಠಾನದಿವಾಟ್ಠಾನಉಪಟ್ಠಾನಸಾಲಾಕುಟಿಮಣ್ಡಪಚಙ್ಕಮನಾದಿಕೇ ಚ ಸಮ್ಪಾದೇತ್ವಾ ಪಾಕಾರಪರಿಕ್ಖಿತ್ತಂ ದ್ವಾರಕೋಟ್ಠಕಯುತ್ತಂ ವಿಹಾರಂ ಕತ್ವಾ ಬುದ್ಧಪ್ಪಮುಖಸ್ಸ ಸಙ್ಘಸ್ಸ ನಿಯ್ಯಾದೇಸಿ. ತಂ ಸನ್ಧಾಯ ವುತ್ತಂ – ‘‘ತತ್ರ ಸುದಂ ಭಗವಾ ಪಾವಾಯಂ ವಿಹರತಿ ಚುನ್ದಸ್ಸ ಕಮ್ಮಾರಪುತ್ತಸ್ಸ ಅಮ್ಬವನೇ’’ತಿ.

ಪಟಿಯಾದಾಪೇತ್ವಾತಿ ಸಮ್ಪಾದೇತ್ವಾ. ‘‘ಸೂಕರಮದ್ದವನ್ತಿ ಸೂಕರಸ್ಸ ಮುದುಸಿನಿದ್ಧಂ ಪವತ್ತಮಂಸ’’ನ್ತಿ ಮಹಾಅಟ್ಠಕಥಾಯಂ ವುತ್ತಂ. ಕೇಚಿ ಪನ ‘‘ಸೂಕರಮದ್ದವನ್ತಿ ನ ಸೂಕರಮಂಸಂ, ಸೂಕರೇಹಿ ಮದ್ದಿತವಂಸಕಳೀರೋ’’ತಿ ವದನ್ತಿ. ಅಞ್ಞೇ ‘‘ಸೂಕರೇಹಿ ಮದ್ದಿತಪ್ಪದೇಸೇ ಜಾತಂ ಅಹಿಛತ್ತಕ’’ನ್ತಿ. ಅಪರೇ ಪನ ‘‘ಸೂಕರಮದ್ದವಂ ನಾಮ ಏಕಂ ರಸಾಯನ’’ನ್ತಿ ಭಣಿಂಸು. ತಞ್ಹಿ ಚುನ್ದೋ ಕಮ್ಮಾರಪುತ್ತೋ ‘‘ಅಜ್ಜ ಭಗವಾ ಪರಿನಿಬ್ಬಾಯಿಸ್ಸತೀ’’ತಿ ಸುತ್ವಾ ‘‘ಅಪ್ಪೇವ ನಾಮ ನಂ ಪರಿಭುಞ್ಜಿತ್ವಾ ಚಿರತರಂ ತಿಟ್ಠೇಯ್ಯಾ’’ತಿ ಸತ್ಥು ಚಿರಜೀವಿತುಕಮ್ಯತಾಯ ಅದಾಸೀತಿ ವದನ್ತಿ.

ತೇನ ಮಂ ಪರಿವಿಸಾತಿ ತೇನ ಮಮಂ ಭೋಜೇಹಿ. ಕಸ್ಮಾ ಭಗವಾ ಏವಮಾಹ? ಪರಾನುದ್ದಯತಾಯ. ತಞ್ಚ ಕಾರಣಂ ಪಾಳಿಯಂ ವುತ್ತಮೇವ. ತೇನ ಅಭಿಹಟಭಿಕ್ಖಾಯ ಪರೇಸಂ ಅಪರಿಭೋಗಾರಹತೋ ಚ ತಥಾ ವತ್ತುಂ ವಟ್ಟತೀತಿ ದಸ್ಸಿತಂ ಹೋತಿ. ತಸ್ಮಿಂ ಕಿರ ಸೂಕರಮದ್ದವೇ ದ್ವಿಸಹಸ್ಸದೀಪಪರಿವಾರೇಸು ಚತೂಸು ಮಹಾದೀಪೇಸು ದೇವತಾ ಓಜಂ ಪಕ್ಖಿಪಿಂಸು. ತಸ್ಮಾ ತಂ ಅಞ್ಞೋ ಕೋಚಿ ಸಮ್ಮಾ ಜೀರಾಪೇತುಂ ನ ಸಕ್ಕೋತಿ, ತಮತ್ಥಂ ಪಕಾಸೇನ್ತೋ ಸತ್ಥಾ ಪರೂಪವಾದಮೋಚನತ್ಥಂ ‘‘ನಾಹಂ ತಂ, ಚುನ್ದ, ಪಸ್ಸಾಮೀ’’ತಿಆದಿನಾ ಸೀಹನಾದಂ ನದಿ. ಯೇ ಹಿ ಪರೇ ಉಪವದೇಯ್ಯುಂ ‘‘ಅತ್ತನಾ ಪರಿಭುತ್ತಾವಸೇಸಂ ನೇವ ಭಿಕ್ಖೂನಂ, ನ ಅಞ್ಞೇಸಂ ಮನುಸ್ಸಾನಂ ಅದಾಸಿ, ಆವಾಟೇ ನಿಖಣಾಪೇತ್ವಾ ವಿನಾಸೇಸೀ’’ತಿ, ‘‘ತೇಸಂ ವಚನೋಕಾಸೋ ಮಾ ಹೋತೂ’’ತಿ ಪರೂಪವಾದಮೋಚನತ್ಥಂ ಸೀಹನಾದಂ ನದಿ.

ತತ್ಥ ಸದೇವಕೇತಿಆದೀಸು ಸಹ ದೇವೇಹೀತಿ ಸದೇವಕೋ, ಸಹ ಮಾರೇನಾತಿ ಸಮಾರಕೋ, ಸಹ ಬ್ರಹ್ಮುನಾತಿ ಸಬ್ರಹ್ಮಕೋ, ಸಹ ಸಮಣಬ್ರಾಹ್ಮಣೇಹೀತಿ ಸಸ್ಸಮಣಬ್ರಾಹ್ಮಣೀ, ಪಜಾತತ್ತಾ ಪಜಾ, ಸಹ ದೇವಮನುಸ್ಸೇಹೀತಿ ಸದೇವಮನುಸ್ಸಾ. ತಸ್ಮಿಂ ಸದೇವಕೇ ಲೋಕೇ…ಪೇ… ಸದೇವಮನುಸ್ಸಾಯ. ತತ್ಥ ಸದೇವಕವಚನೇನ ಪಞ್ಚಕಾಮಾವಚರದೇವಗ್ಗಹಣಂ, ಸಮಾರಕವಚನೇನ ಛಟ್ಠಕಾಮಾವಚರದೇವಗ್ಗಹಣಂ, ಸಬ್ರಹ್ಮಕವಚನೇನ ಬ್ರಹ್ಮಕಾಯಿಕಾದಿಬ್ರಹ್ಮಗ್ಗಹಣಂ, ಸಸ್ಸಮಣಬ್ರಾಹ್ಮಣೀವಚನೇನ ಸಾಸನಸ್ಸ ಪಚ್ಚತ್ಥಿಕಪಚ್ಚಾಮಿತ್ತಸಮಣಬ್ರಾಹ್ಮಣಗ್ಗಹಣಂ ಸಮಿತಪಾಪಬಾಹಿತಪಾಪಸಮಣಬ್ರಾಹ್ಮಣಗ್ಗಹಣಞ್ಚ, ಪಜಾವಚನೇನ ಸತ್ತಲೋಕಗ್ಗಹಣಂ, ಸದೇವಮನುಸ್ಸವಚನೇನ ಸಮ್ಮುತಿದೇವಅವಸೇಸಮನುಸ್ಸಗ್ಗಹಣಂ. ಏವಮೇತ್ಥ ತೀಹಿ ಪದೇಹಿ ಓಕಾಸಲೋಕವಸೇನ, ದ್ವೀಹಿ ಪಜಾವಸೇನ ಸತ್ತಲೋಕೋ ಗಹಿತೋತಿ ವೇದಿತಬ್ಬೋ. ಅಪರೋ ನಯೋ – ಸದೇವಕವಚನೇನ ಅರೂಪಾವಚರಲೋಕೋ ಗಹಿತೋ, ಸಮಾರಕವಚನೇನ ಛಕಾಮಾವಚರದೇವಲೋಕೋ, ಸಬ್ರಹ್ಮಕವಚನೇನ ರೂಪೀ ಬ್ರಹ್ಮಲೋಕೋ, ಸಸ್ಸಮಣಬ್ರಾಹ್ಮಣವಚನೇನ ಚತುಪರಿಸವಸೇನ ಸಮ್ಮುತಿದೇವೇಹಿ ಸಹ ಮನುಸ್ಸಲೋಕೋ, ಅವಸೇಸಸತ್ತಲೋಕೋ ವಾ ಗಹಿತೋತಿ ವೇದಿತಬ್ಬೋ.

ಭುತ್ತಾವಿಸ್ಸಾತಿ ಭುತ್ತವತೋ. ಖರೋತಿ ಫರುಸೋ. ಆಬಾಧೋತಿ ವಿಸಭಾಗರೋಗೋ. ಪಬಾಳ್ಹಾತಿ ಬಲವತಿಯೋ. ಮಾರಣನ್ತಿಕಾತಿ ಮರಣನ್ತಾ ಮರಣಸಮೀಪಪಾಪನಸಮತ್ಥಾ. ಸತೋ ಸಮ್ಪಜಾನೋ ಅಧಿವಾಸೇಸೀತಿ ಸತಿಂ ಉಪಟ್ಠಿತಂ ಕತ್ವಾ ಞಾಣೇನ ಪರಿಚ್ಛಿನ್ದಿತ್ವಾ ಅಧಿವಾಸೇಸಿ. ಅವಿಹಞ್ಞಮಾನೋತಿ ವೇದನಾನುವತ್ತನವಸೇನ ಅಸಲ್ಲಕ್ಖಿತಧಮ್ಮೋ ವಿಯ ಅಪರಾಪರಂ ಪರಿವತ್ತನಂ ಅಕರೋನ್ತೋ ಅಪೀಳಿಯಮಾನೋ ಅದುಕ್ಖಿಯಮಾನೋ ವಿಯ ಅಧಿವಾಸೇಸಿ. ಭಗವತೋ ಹಿ ವೇಳುವಗಾಮಕೇಯೇವ ತಾ ವೇದನಾ ಉಪ್ಪನ್ನಾ, ಸಮಾಪತ್ತಿಬಲೇನ ಪನ ವಿಕ್ಖಮ್ಭಿತಾ ಯಾವ ಪರಿನಿಬ್ಬಾನದಿವಸಾ ನ ಉಪ್ಪಜ್ಜಿಂಸು ದಿವಸೇ ದಿವಸೇ ಸಮಾಪತ್ತೀಹಿ ಪಟಿಪಣಾಮನತೋ. ತಂ ದಿವಸಂ ಪನ ಪರಿನಿಬ್ಬಾಯಿತುಕಾಮೋ ‘‘ಕೋಟಿಸಹಸ್ಸಹತ್ಥೀನಂ ಬಲಂ ಧಾರೇನ್ತಾನಂ ವಜಿರಸಙ್ಘಾತಸಮಾನಕಾಯಾನಂ ಅಪರಿಮಿತಕಾಲಂ ಉಪಚಿತಪುಞ್ಞಸಮ್ಭಾರಾನಮ್ಪಿ ಭವೇ ಸತಿ ಏವರೂಪಾ ವೇದನಾ ಪವತ್ತನ್ತಿ, ಕಿಮಙ್ಗಂ ಪನ ಅಞ್ಞೇಸ’’ನ್ತಿ ಸತ್ತಾನಂ ಸಂವೇಗಜನನತ್ಥಂ ಸಮಾಪತ್ತಿಂ ನ ಸಮಾಪಜ್ಜಿ, ತೇನ ವೇದನಾ ಖರಾ ವತ್ತಿಂಸು. ಆಯಾಮಾತಿ ಏಹಿ ಯಾಮ.

ಚುನ್ದಸ್ಸ ಭತ್ತಂ ಭುಞ್ಜಿತ್ವಾತಿಆದಿಕಾ ಅಪರಭಾಗೇ ಧಮ್ಮಸಙ್ಗಾಹಕೇಹಿ ಠಪಿತಾ ಗಾಥಾ. ತತ್ಥ ಭುತ್ತಸ್ಸ ಚ ಸೂಕರಮದ್ದವೇನಾತಿ ಭುತ್ತಸ್ಸ ಉದಪಾದಿ, ನ ಪನ ಭುತ್ತಪಚ್ಚಯಾ. ಯದಿ ಹಿ ಅಭುತ್ತಸ್ಸ ಉಪ್ಪಜ್ಜಿಸ್ಸಾ, ಅತಿಖರೋ ಅಭವಿಸ್ಸಾ, ಸಿನಿದ್ಧಭೋಜನಂ ಪನ ಭುತ್ತತ್ತಾ ತನುಕಾ ವೇದನಾ ಅಹೋಸಿ, ತೇನೇವ ಪದಸಾ ಗನ್ತುಂ ಅಸಕ್ಖಿ. ಏತೇನ ಯ್ವಾಯಂ ‘‘ಯಸ್ಸ ತಂ ಪರಿಭುತ್ತಂ ಸಮ್ಮಾ ಪರಿಣಾಮಂ ಗಚ್ಛೇಯ್ಯ ಅಞ್ಞತ್ರ ತಥಾಗತಸ್ಸಾ’’ತಿ ಸೀಹನಾದೋ ನದಿತೋ, ತಸ್ಸ ಸಾತ್ಥಕತಾ ದಸ್ಸಿತಾ. ಬುದ್ಧಾನಞ್ಹಿ ಅಟ್ಠಾನೇ ಗಜ್ಜಿತಂ ನಾಮ ನತ್ಥಿ. ಯಸ್ಮಾ ತಂ ಪರಿಭುತ್ತಂ ಭಗವತೋ ನ ಕಿಞ್ಚಿ ವಿಕಾರಂ ಉಪ್ಪಾದೇಸಿ, ಕಮ್ಮೇನ ಪನ ಲದ್ಧೋಕಾಸೇನ ಉಪ್ಪಾದಿಯಮಾನಂ ವಿಕಾರಂ ಅಪ್ಪಮತ್ತತಾಯ ಉಪಸಮೇನ್ತೋ ಸರೀರೇ ಬಲಂ ಉಪ್ಪಾದೇಸಿ, ಯೇನ ಯಥಾ ವಕ್ಖಮಾನಂ ತಿವಿಧಂ ಪಯೋಜನಂ ಸಮ್ಪಾದೇಸಿ, ತಸ್ಮಾ ಸಮ್ಮದೇವ ತಂ ಪರಿಣಾಮಂ ಗತಂ, ಮಾರಣನ್ತಿಕತ್ತಾ ಪನ ವೇದನಾನಂ ಅವಿಞ್ಞಾತಂ ಅಪಾಕಟಂ ಅಹೋಸೀತಿ. ವಿರಿಚ್ಚಮಾನೋತಿ ಅಭಿಣ್ಹಂ ಪವತ್ತಲೋಹಿತವಿರೇಚನೋವ ಸಮಾನೋ. ಅವೋಚಾತಿ ಅತ್ತನಾ ಇಚ್ಛಿತಟ್ಠಾನೇ ಪರಿನಿಬ್ಬಾನತ್ಥಾಯ ಏವಮಾಹ.

ಕಸ್ಮಾ ಪನ ಭಗವಾ ಏವಂ ರೋಗೇ ಉಪ್ಪನ್ನೇ ಕುಸಿನಾರಂ ಅಗಮಾಸಿ, ಕಿಂ ಅಞ್ಞತ್ಥ ನ ಸಕ್ಕಾ ಪರಿನಿಬ್ಬಾಯಿತುನ್ತಿ? ಪರಿನಿಬ್ಬಾಯಿತುಂ ನಾಮ ನ ಕತ್ಥಚಿ ನ ಸಕ್ಕಾ, ಏವಂ ಪನ ಚಿನ್ತೇಸಿ – ಮಯಿ ಕುಸಿನಾರಂ ಗತೇ ಮಹಾಸುದಸ್ಸನಸುತ್ತದೇಸನಾಯ (ದೀ. ನಿ. ೨.೨೪೧) ಅಟ್ಠುಪ್ಪತ್ತಿ ಭವಿಸ್ಸತಿ, ತಾಯ ಯಾ ದೇವಲೋಕೇ ಅನುಭವಿತಬ್ಬಸದಿಸಾ ಸಮ್ಪತ್ತಿ ಮನುಸ್ಸಲೋಕೇ ಮಯಾ ಅನುಭೂತಾ, ತಂ ದ್ವೀಹಿ ಭಾಣವಾರೇಹಿ ಪಟಿಮಣ್ಡೇತ್ವಾ ದೇಸೇಸ್ಸಾಮಿ, ತಂ ಸುತ್ವಾ ಬಹೂ ಜನಾ ಕುಸಲಂ ಕತ್ತಬ್ಬಂ ಮಞ್ಞಿಸ್ಸನ್ತಿ. ಸುಭದ್ದೋಪಿ ಕತ್ಥ ಮಂ ಉಪಸಙ್ಕಮಿತ್ವಾ ಪಞ್ಹಂ ಪುಚ್ಛಿತ್ವಾ ವಿಸ್ಸಜ್ಜನಪರಿಯೋಸಾನೇ ಸರಣೇಸು ಪತಿಟ್ಠಾಯ ಪಬ್ಬಜಿತ್ವಾ ಲದ್ಧೂಪಸಮ್ಪದೋ ಕಮ್ಮಟ್ಠಾನಂ ಭಾವೇತ್ವಾ ಮಯಿ ಧರನ್ತೇಯೇವ ಅರಹತ್ತಂ ಪತ್ವಾ ಪಚ್ಛಿಮಸಾವಕೋ ನಾಮ ಭವಿಸ್ಸತಿ. ಅಞ್ಞತ್ಥ ಮಯಿ ಪರಿನಿಬ್ಬುತೇ ಧಾತುನಿಮಿತ್ತಂ ಮಹಾಕಲಹೋ ಭವಿಸ್ಸತಿ, ಲೋಹಿತಂ ನದೀ ವಿಯ ಸನ್ದಿಸ್ಸತಿ. ಕುಸಿನಾರಾಯಂ ಪನ ಪರಿನಿಬ್ಬುತೇ ದೋಣಬ್ರಾಹ್ಮಣೋ ತಂ ವಿವಾದಂ ವೂಪಸಮೇತ್ವಾ ಧಾತುಯೋ ವಿಭಜಿತ್ವಾ ದಸ್ಸತೀತಿ ಇಮಾನಿ ತೀಣಿ ಕಾರಣಾನಿ ಪಸ್ಸನ್ತೋ ಭಗವಾ ಮಹತಾ ಉಸ್ಸಾಹೇನ ಕುಸಿನಾರಂ ಅಗಮಾಸಿ.

ಇಙ್ಘಾತಿ ಚೋದನತ್ಥೇ ನಿಪಾತೋ. ಕಿಲನ್ತೋಸ್ಮೀತಿ ಪರಿಸ್ಸನ್ತೋ ಅಸ್ಮಿ. ತೇನ ಯಥಾವುತ್ತವೇದನಾನಂ ಬಲವಭಾವಂ ಏವ ದಸ್ಸೇತಿ. ಭಗವಾ ಹಿ ಅತ್ತನೋ ಆನುಭಾವೇನ ತದಾ ಪದಸಾ ಅಗಮಾಸಿ, ಅಞ್ಞೇಸಂ ಪನ ಯಥಾ ಪದುದ್ಧಾರಮ್ಪಿ ಕಾತುಂ ನ ಸಕ್ಕಾ, ತಥಾ ವೇದನಾ ತಿಖಿಣಾ ಖರಾ ಕಟುಕಾ ವತ್ತಿಂಸು. ತೇನೇವಾಹ ‘‘ನಿಸೀದಿಸ್ಸಾಮೀ’’ತಿ.

ಇದಾನೀತಿ ಅಧುನಾ. ಲುಳಿತನ್ತಿ ಮದ್ದಿತಂ ವಿಯ ಆಕುಲಂ. ಆವಿಲನ್ತಿ ಆಲುಲಂ. ಅಚ್ಛೋದಕಾತಿ ತನುಪಸನ್ನಸಲಿಲಾ. ಸಾತೋದಕಾತಿ ಮಧುರತೋಯಾ. ಸೀತೋದಕಾತಿ ಸೀತಲಜಲಾ. ಸೇತೋದಕಾತಿ ನಿಕ್ಕದ್ದಮಾ. ಉದಕಞ್ಹಿ ಸಭಾವತೋ ಸೇತವಣ್ಣಂ, ಭೂಮಿವಸೇನ ಕದ್ದಮಾವಿಲತಾಯ ಚ ಅಞ್ಞಾದಿಸಂ ಹೋತಿ, ಕಕುಧಾಪಿ ನದೀ ವಿಮಲವಾಲಿಕಾ ಸಮೋಕಿಣ್ಣಾ ಸೇತವಣ್ಣಾ ಸನ್ದತಿ. ತೇನ ವುತ್ತಂ ‘‘ಸೇತೋದಕಾ’’ತಿ. ಸುಪತಿತ್ಥಾತಿ ಸುನ್ದರತಿತ್ಥಾ. ರಮಣೀಯಾತಿ ಮನೋಹರಭೂಮಿಭಾಗತಾಯ ರಮಿತಬ್ಬಾ ಯಥಾವುತ್ತಉದಕಸಮ್ಪತ್ತಿಯಾ ಚ ಮನೋರಮಾ.

ಕಿಲನ್ತೋಸ್ಮಿ ಚುನ್ದಕ, ನಿಪಜ್ಜಿಸ್ಸಾಮೀತಿ ತಥಾಗತಸ್ಸ ಹಿ –

‘‘ಕಾಳಾವಕಞ್ಚ ಗಙ್ಗೇಯ್ಯಂ, ಪಣ್ಡರಂ ತಮ್ಬಪಿಙ್ಗಲಂ;

ಗನ್ಧಮಙ್ಗಲಹೇಮಞ್ಚ, ಉಪೋಸಥಛದ್ದನ್ತಿಮೇ ದಸಾ’’ತಿ. –

ಏವಂ ವುತ್ತೇಸು ದಸಸು ಹತ್ಥಿಕುಲೇಸು ಕಾಳಾವಕಸಙ್ಖಾತಾನಂ ಯಂ ದಸನ್ನಂ ಪಕತಿಹತ್ಥೀನಂ ಬಲಂ, ತಂ ಏಕಸ್ಸ ಗಙ್ಗೇಯ್ಯಸ್ಸಾತಿ ಏವಂ ದಸಗುಣಿತಾಯ ಗಣನಾಯ ಪಕತಿಹತ್ಥೀನಂ ಕೋಟಿಸಹಸ್ಸಬಲಪ್ಪಮಾಣಂ ಸರೀರಬಲಂ. ತಂ ಸಬ್ಬಮ್ಪಿ ತಸ್ಮಿಂ ದಿವಸೇ ಪಚ್ಛಾಭತ್ತತೋ ಪಟ್ಠಾಯ ಚಙ್ಗವಾರೇ ಪಕ್ಖಿತ್ತಉದಕಂ ವಿಯ ಪರಿಕ್ಖಯಂ ಗತಂ. ಪಾವಾಯ ತಿಗಾವುತೇ ಕುಸಿನಾರಾ. ಏತಸ್ಮಿಂ ಅನ್ತರೇ ಪಞ್ಚವೀಸತಿಯಾ ಠಾನೇಸು ನಿಸೀದಿತ್ವಾ ಮಹನ್ತಂ ಉಸ್ಸಾಹಂ ಕತ್ವಾ ಆಗಚ್ಛನ್ತೋ ಸೂರಿಯತ್ಥಙ್ಗಮನವೇಲಾಯ ಭಗವಾ ಕುಸಿನಾರಂ ಪಾಪುಣೀತಿ ಏವಂ ‘‘ರೋಗೋ ನಾಮ ಸಬ್ಬಂ ಆರೋಗ್ಯಂ ಮದ್ದನ್ತೋ ಆಗಚ್ಛತೀ’’ತಿ ಇಮಮತ್ಥಂ ದಸ್ಸೇನ್ತೋ ಸದೇವಕಸ್ಸ ಲೋಕಸ್ಸ ಸಂವೇಗಕರಂ ವಾಚಂ ಭಾಸನ್ತೋ ‘‘ಕಿಲನ್ತೋಸ್ಮಿ, ಚುನ್ದಕ, ನಿಪಜ್ಜಿಸ್ಸಾಮೀ’’ತಿ ಆಹ.

ಸೀಹಸೇಯ್ಯನ್ತಿ ಏತ್ಥ ಕಾಮಭೋಗೀಸೇಯ್ಯಾ ಪೇತಸೇಯ್ಯಾ ತಥಾಗತಸೇಯ್ಯಾ ಸೀಹಸೇಯ್ಯಾತಿ ಚತಸ್ಸೋ ಸೇಯ್ಯಾ. ತತ್ಥ ‘‘ಯೇಭುಯ್ಯೇನ, ಭಿಕ್ಖವೇ, ಕಾಮಭೋಗೀ ವಾಮೇನ ಪಸ್ಸೇನ ಸೇಯ್ಯಂ ಕಪ್ಪೇನ್ತೀ’’ತಿ (ಅ. ನಿ. ೪.೨೪೬) ಅಯಂ ಕಾಮಭೋಗೀಸೇಯ್ಯಾ. ‘‘ಯೇಭುಯ್ಯೇನ, ಭಿಕ್ಖವೇ, ಪೇತಾ ಉತ್ತಾನಾ ಸೇನ್ತೀ’’ತಿ (ಅ. ನಿ. ೪.೨೪೬) ಅಯಂ ಪೇತಸೇಯ್ಯಾ. ಚತುತ್ಥಜ್ಝಾನಂ ತಥಾಗತಸೇಯ್ಯಾ. ‘‘ಸೀಹೋ, ಭಿಕ್ಖವೇ, ಮಿಗರಾಜಾ ದಕ್ಖಿಣೇನ ಪಸ್ಸೇನ ಸೇಯ್ಯಂ ಕಪ್ಪೇತೀ’’ತಿ (ಅ. ನಿ. ೪.೨೪೬) ಅಯಂ ಸೀಹಸೇಯ್ಯಾ. ಅಯಞ್ಹಿ ತೇಜುಸ್ಸದಇರಿಯಾಪಥತ್ತಾ ಉತ್ತಮಸೇಯ್ಯಾ ನಾಮ. ತೇನ ವುತ್ತಂ – ‘‘ದಕ್ಖಿಣೇನ ಪಸ್ಸೇನ ಸೀಹಸೇಯ್ಯಂ ಕಪ್ಪೇಸೀ’’ತಿ. ಪಾದೇ ಪಾದನ್ತಿ ದಕ್ಖಿಣಪಾದೇ ವಾಮಪಾದಂ. ಅಚ್ಚಾಧಾಯಾತಿ ಅತಿಆಧಾಯ, ಗೋಪ್ಫಕಂ ಅತಿಕ್ಕಮ್ಮ ಠಪೇತ್ವಾ. ಗೋಪ್ಫಕೇನ ಹಿ ಗೋಪ್ಫಕೇ, ಜಾಣುನಾ ಜಾಣುಮ್ಹಿ ಸಙ್ಘಟ್ಟಿಯಮಾನೇ ಅಭಿಣ್ಹಂ ವೇದನಾ ಉಪ್ಪಜ್ಜನ್ತಿ, ಸೇಯ್ಯಾ ಫಾಸುಕಾ ನ ಹೋತಿ. ಯಥಾ ಪನ ನ ಸಙ್ಘಟ್ಟೇತಿ, ಏವಂ ಅತಿಕ್ಕಮ್ಮ ಠಪಿತೇ ವೇದನಾ ನುಪ್ಪಜ್ಜನ್ತಿ, ಸೇಯ್ಯಾ ಫಾಸುಕಾ ಹೋತಿ. ತಸ್ಮಾ ಏವಂ ನಿಪಜ್ಜಿ.

ಗನ್ತ್ವಾನ ಬುದ್ಧೋತಿ ಇಮಾ ಗಾಥಾ ಅಪರಭಾಗೇ ಧಮ್ಮಸಙ್ಗಾಹಕೇಹಿ ಠಪಿತಾ. ತತ್ಥ ನದಿಕನ್ತಿ ನದಿಂ. ಅಪ್ಪಟಿಮೋಧ ಲೋಕೇತಿ ಅಪ್ಪಟಿಮೋ ಇಧ ಇಮಸ್ಮಿಂ ಸದೇವಕೇ ಲೋಕೇ. ನ್ಹತ್ವಾ ಚ ಪಿವಿತ್ವಾ ಚುದತಾರೀತಿ ಗತ್ತಾನಂ ಸೀತಿಕರಣವಸೇನ ನ್ಹತ್ವಾ ಚ ಪಾನೀಯಂ ಪಿವಿತ್ವಾ ಚ ನದಿತೋ ಉತ್ತರಿ. ತದಾ ಕಿರ ಭಗವತಿ ನ್ಹಾಯನ್ತೇ ಅನ್ತೋನದಿಯಂ ಮಚ್ಛಕಚ್ಛಪಾ, ಉದಕಂ, ಉಭೋಸು ತೀರೇಸು ವನಸಣ್ಡೋ, ಸಬ್ಬೋ ಚ ಸೋ ಭೂಮಿಭಾಗೋತಿ ಸಬ್ಬಂ ಸುವಣ್ಣವಣ್ಣಮೇವ ಅಹೋಸಿ. ಪುರಕ್ಖತೋತಿ ಗುಣವಿಸಿಟ್ಠಸತ್ತುತ್ತಮಗರುಭಾವತೋ ಸದೇವಕೇನ ಲೋಕೇನ ಪೂಜಾಸಮ್ಮಾನವಸೇನ ಪುರಕ್ಖತೋ. ಭಿಕ್ಖುಗಣಸ್ಸ ಮಜ್ಝೇತಿ ಭಿಕ್ಖುಸಙ್ಘಸ್ಸ ಮಜ್ಝೇ. ತದಾ ಭಿಕ್ಖೂ ಭಗವತೋ ವೇದನಾನಂ ಅಧಿಮತ್ತಭಾವಂ ವಿದಿತ್ವಾ ಆಸನ್ನಾ ಹುತ್ವಾ ಸಮನ್ತತೋ ಪರಿವಾರೇತ್ವಾವ ಗಚ್ಛನ್ತಿ. ಸತ್ಥಾತಿ ದಿಟ್ಠಧಮ್ಮಿಕಸಮ್ಪರಾಯಿಕಪರಮತ್ಥೇಹಿ ಸತ್ತಾನಂ ಅನುಸಾಸನತೋ ಸತ್ಥಾ. ಪವತ್ತಾ ಭಗವಾ ಇಧ ಧಮ್ಮೇತಿ ಭಾಗ್ಯವನ್ತತಾದೀಹಿ ಭಗವಾ ಇಧ ಸೀಲಾದಿಸಾಸನಧಮ್ಮೇ ಪವತ್ತಾ, ಧಮ್ಮೇ ವಾ ಚತುರಾಸೀತಿಧಮ್ಮಕ್ಖನ್ಧಸಹಸ್ಸಾನಿ ಪವತ್ತಾ ಪವತ್ತೇತಾ. ಅಮ್ಬವನನ್ತಿ ತಸ್ಸಾ ಏವ ನದಿಯಾ ತೀರೇ ಅಮ್ಬವನಂ. ಆಮನ್ತಯಿ ಚುನ್ದಕನ್ತಿ ತಸ್ಮಿಂ ಕಿರ ಖಣೇ ಆಯಸ್ಮಾ ಆನನ್ದೋ ಉದಕಸಾಟಿಕಂ ಪೀಳೇನ್ತೋ ಓಹೀಯಿ, ಚುನ್ದಕತ್ಥೇರೋ ಸಮೀಪೇ ಅಹೋಸಿ. ತಸ್ಮಾ ತಂ ಭಗವಾ ಆಮನ್ತಯಿ. ಪಮುಖೇ ನಿಸೀದೀತಿ ವತ್ತಸೀಸೇನ ಸತ್ಥು ಪುರತೋ ನಿಸೀದಿ ‘‘ಕಿಂ ನು ಖೋ ಸತ್ಥಾ ಆಣಾಪೇತೀ’’ತಿ. ಏತ್ತಾವತಾ ಧಮ್ಮಭಣ್ಡಾಗಾರಿಕೋ ಅನುಪ್ಪತ್ತೋ. ಏವಂ ಅನುಪ್ಪತ್ತಂ ಅಥ ಖೋ ಭಗವಾ ಆಯಸ್ಮನ್ತಂ ಆನನ್ದಂ ಆಮನ್ತೇಸಿ.

ಉಪದಹೇಯ್ಯಾತಿ ಉಪ್ಪಾದೇಯ್ಯ, ವಿಪ್ಪಟಿಸಾರಸ್ಸ ಉಪ್ಪಾದಕೋ ಕೋಚಿ ಪುರಿಸೋ ಸಿಯಾ ಅಪಿ ಭವೇಯ್ಯ. ಅಲಾಭಾತಿ ಯೇ ಅಞ್ಞೇಸಂ ದಾನಂ ದದನ್ತಾನಂ ದಾನಾನಿಸಂಸಸಙ್ಖಾತಾ ಲಾಭಾ ಹೋನ್ತಿ, ತೇ ಅಲಾಭಾ. ದುಲ್ಲದ್ಧನ್ತಿ ಪುಞ್ಞವಿಸೇಸೇನ ಲದ್ಧಮ್ಪಿ ಮನುಸ್ಸತ್ತಂ ದುಲ್ಲದ್ಧಂ. ಯಸ್ಸ ತೇತಿ ಯಸ್ಸ ತವ. ಉತ್ತಣ್ಡುಲಂ ವಾ ಅತಿಕಿಲಿನ್ನಂ ವಾ ಕೋ ತಂ ಜಾನಾತಿ, ಕೀದಿಸಮ್ಪಿ ಪಚ್ಛಿಮಂ ಪಿಣ್ಡಪಾತಂ ಭುಞ್ಜಿತ್ವಾ ತಥಾಗತೋ ಪರಿನಿಬ್ಬುತೋ, ಅದ್ಧಾ ತೇನ ಯಂ ವಾ ತಂ ವಾ ದಿನ್ನಂ ಭವಿಸ್ಸತೀತಿ. ಲಾಭಾತಿ ದಿಟ್ಠಧಮ್ಮಿಕಸಮ್ಪರಾಯಿಕಾ ದಾನಾನಿಸಂಸಸಙ್ಖಾತಾ ಲಾಭಾ. ಸುಲದ್ಧನ್ತಿ ತುಯ್ಹಂ ಮನುಸ್ಸತ್ತಂ ಸುಲದ್ಧಂ. ಸಮ್ಮುಖಾತಿ ಸಮ್ಮುಖತೋ, ನ ಅನುಸ್ಸವೇನ ನ ಪರಮ್ಪರಾಯಾತಿ ಅತ್ಥೋ. ಮೇತನ್ತಿ ಮೇ ಏತಂ ಮಯಾ ಏತಂ. ದ್ವೇಮೇತಿ ದ್ವೇ ಇಮೇ. ಸಮಸಮಫಲಾತಿ ಸಬ್ಬಾಕಾರೇನ ಸಮಾನಫಲಾ.

ನನು ಚ ಯಂ ಸುಜಾತಾಯ ದಿನ್ನಂ ಪಿಣ್ಡಪಾತಂ ಭುಞ್ಜಿತ್ವಾ ತಥಾಗತೋ ಅಭಿಸಮ್ಬುದ್ಧೋ, ತಂ ಕಿಲೇಸಾನಂ ಅಪ್ಪಹೀನಕಾಲೇ ದಾನಂ, ಇದಂ ಪನ ಚುನ್ದಸ್ಸ ದಾನಂ ಖೀಣಾಸವಕಾಲೇ, ಕಸ್ಮಾ ಏತಾನಿ ಸಮಫಲಾನೀತಿ? ಪರಿನಿಬ್ಬಾನಸಮತಾಯ ಸಮಾಪತ್ತಿಸಮತಾಯ ಅನುಸ್ಸರಣಸಮತಾಯ ಚ. ಭಗವಾ ಹಿ ಸುಜಾತಾಯ ದಿನ್ನಂ ಪಿಣ್ಡಪಾತಂ ಭುಞ್ಜಿತ್ವಾ ಸಉಪಾದಿಸೇಸಾಯ ನಿಬ್ಬಾನಧಾತುಯಾ ಪರಿನಿಬ್ಬುತೋ, ಚುನ್ದೇನ ದಿನ್ನಂ ಭುಞ್ಜಿತ್ವಾ ಅನುಪಾದಿಸೇಸಾಯ ನಿಬ್ಬಾನಧಾತುಯಾ ಪರಿನಿಬ್ಬುತೋತಿ ಏವಂ ಪರಿನಿಬ್ಬಾನಸಮತಾಯಪಿ ಸಮಫಲಾನಿ. ಅಭಿಸಮ್ಬುಜ್ಝನದಿವಸೇ ಚ ಅಗ್ಗಮಗ್ಗಸ್ಸ ಹೇತುಭೂತಾ ಚತುವೀಸತಿಕೋಟಿಸತಸಹಸ್ಸಸಙ್ಖಾ ಸಮಾಪತ್ತಿಯೋ ಸಮಾಪಜ್ಜಿ, ಪರಿನಿಬ್ಬಾನದಿವಸೇಪಿ ಸಬ್ಬಾ ತಾ ಸಮಾಪಜ್ಜಿ. ಏವಂ ಸಮಾಪತ್ತಿಸಮತಾಯಪಿ ಸಮಫಲಾನಿ. ವುತ್ತಞ್ಹೇತಂ ಭಗವತಾ –

‘‘ಯಸ್ಸ ಚೇತಂ ಪಿಣ್ಡಪಾತಂ ಪರಿಭುಞ್ಜಿತ್ವಾ ಅನುತ್ತರಂ ಅಪ್ಪಮಾಣಂ ಚೇತೋಸಮಾಧಿಂ ಉಪಸಮ್ಪಜ್ಜ ವಿಹರತಿ, ಅಪ್ಪಮಾಣೋ ತಸ್ಸ ಪುಞ್ಞಾಭಿಸನ್ದೋ ಕುಸಲಾಭಿಸನ್ದೋ’’ತಿಆದಿ. –

ಸುಜಾತಾ ಚ ಅಪರಭಾಗೇ ಅಸ್ಸೋಸಿ ‘‘ನ ಕಿರ ಸಾ ರುಕ್ಖದೇವತಾ, ಬೋಧಿಸತ್ತೋ ಕಿರೇಸ, ತಂ ಕಿರ ಪಿಣ್ಡಪಾತಂ ಪರಿಭುಞ್ಜಿತ್ವಾ ಅನುತ್ತರಂ ಸಮ್ಮಾಸಮ್ಬೋಧಿಂ ಅಭಿಸಮ್ಬುದ್ಧೋ, ಸತ್ತಸತ್ತಾಹಂ ಕಿರಸ್ಸ ತೇನ ಯಾಪನಾ ಅಹೋಸೀ’’ತಿ. ತಸ್ಸಾ ಇದಂ ಸುತ್ವಾ ‘‘ಲಾಭಾ ವತ ಮೇ’’ತಿ ಅನುಸ್ಸರನ್ತಿಯಾ ಬಲವಪೀತಿಸೋಮನಸ್ಸಂ ಉದಪಾದಿ. ಚುನ್ದಸ್ಸಪಿ ಅಪರಭಾಗೇ ‘‘ಅವಸಾನಪಿಣ್ಡಪಾತೋ ಕಿರ ಮಯಾ ದಿನ್ನೋ, ಧಮ್ಮಸೀಸಂ ಕಿರ ಮಯಾ ಗಹಿತಂ, ಮಯ್ಹಂ ಕಿರ ಪಿಣ್ಡಪಾತಂ ಪರಿಭುಞ್ಜಿತ್ವಾ ಸತ್ಥಾ ಅತ್ತನಾ ಚಿರಕಾಲಾಭಿಪತ್ಥಿತಾಯ ಅನುಪಾದಿಸೇಸಾಯ ನಿಬ್ಬಾನಧಾತುಯಾ ಪರಿನಿಬ್ಬುತೋ’’ತಿ ಸುತ್ವಾ ‘‘ಲಾಭಾ ವತ ಮೇ’’ತಿ ಅನುಸ್ಸರತೋ ಬಲವಪೀತಿಸೋಮನಸ್ಸಂ ಉದಪಾದಿ. ಏವಂ ಅನುಸ್ಸರಣಸಮತಾಯಪಿ ಸಮಫಲಾನಿ ದ್ವೇಪಿ ಪಿಣ್ಡಪಾತದಾನಾನೀತಿ ವೇದಿತಬ್ಬಾನಿ.

ಆಯುಸಂವತ್ತನಿಕನ್ತಿ ದೀಘಾಯುಕಸಂವತ್ತನಿಕಂ. ಉಪಚಿತನ್ತಿ ಪಸುತಂ ಉಪ್ಪಾದಿತಂ. ಯಸಸಂವತ್ತನಿಕನ್ತಿ ಪರಿವಾರಸಂವತ್ತನಿಕಂ. ಆಧಿಪತೇಯ್ಯಸಂವತ್ತನಿಕನ್ತಿ ಸೇಟ್ಠಭಾವಸಂವತ್ತನಿಕಂ.

ಏತಮತ್ಥಂ ವಿದಿತ್ವಾತಿ ಏತಂ ದಾನಸ್ಸ ಮಹಪ್ಫಲತಞ್ಚೇವ ಸೀಲಾದಿಗುಣೇಹಿ ಅತ್ತನೋ ಚ ಅನುತ್ತರದಕ್ಖಿಣೇಯ್ಯಭಾವಂ ಅನುಪಾದಾಪರಿನಿಬ್ಬಾನಞ್ಚಾತಿ ತಿವಿಧಮ್ಪಿ ಅತ್ಥಂ ಸಬ್ಬಾಕಾರತೋ ವಿದಿತ್ವಾ ತದತ್ಥದೀಪನಂ ಇಮಂ ಉದಾನಂ ಉದಾನೇಸಿ.

ತತ್ಥ ದದತೋ ಪುಞ್ಞಂ ಪವಡ್ಢತೀತಿ ದಾನಂ ದೇನ್ತಸ್ಸ ಚಿತ್ತಸಮ್ಪತ್ತಿಯಾ ಚ ದಕ್ಖಿಣೇಯ್ಯಸಮ್ಪತ್ತಿಯಾ ಚ ದಾನಮಯಂ ಪುಞ್ಞಂ ಉಪಚೀಯತಿ, ಮಹಪ್ಫಲತರಞ್ಚ ಮಹಾನಿಸಂಸತರಞ್ಚ ಹೋತೀತಿ ಅತ್ಥೋ. ಅಥ ವಾ ದದತೋ ಪುಞ್ಞಂ ಪವಡ್ಢತೀತಿ ದೇಯ್ಯಧಮ್ಮಂ ಪರಿಚ್ಚಜನ್ತೋ ಪರಿಚ್ಚಾಗಚೇತನಾಯ ಬಹುಲೀಕತಾಯ ಅನುಕ್ಕಮೇನ ಸಬ್ಬತ್ಥ ಅನಾಪತ್ತಿಬಹುಲೋ ಸುವಿಸುದ್ಧಸೀಲಂ ರಕ್ಖಿತ್ವಾ ಸಮಥವಿಪಸ್ಸನಞ್ಚ ಭಾವೇತುಂ ಸಕ್ಕೋತೀತಿ ತಸ್ಸ ದಾನಾದಿವಸೇನ ತಿವಿಧಮ್ಪಿ ಪುಞ್ಞಂ ಅಭಿವಡ್ಢತೀತಿ ಏವಮೇತ್ಥ ಅತ್ಥೋ ವೇದಿತಬ್ಬೋ. ಸಂಯಮತೋತಿ ಸೀಲಸಂಯಮೇನ ಸಂಯಮನ್ತಸ್ಸ, ಸಂವರೇ ಠಿತಸ್ಸಾತಿ ಅತ್ಥೋ. ವೇರಂ ನ ಚೀಯತೀತಿ ಪಞ್ಚವಿಧವೇರಂ ನ ಪವಡ್ಢತಿ, ಅದೋಸಪಧಾನತ್ತಾ ವಾ ಅಧಿಸೀಲಸ್ಸ ಕಾಯವಾಚಾಚಿತ್ತೇಹಿ ಸಯಂಮನ್ತೋ ಸುವಿಸುದ್ಧಸೀಲೋ ಖನ್ತಿಬಹುಲತಾಯ ಕೇನಚಿ ವೇರಂ ನ ಕರೋತಿ, ಕುತೋ ತಸ್ಸ ಉಪಚಯೋ. ತಸ್ಮಾ ತಸ್ಸ ಸಂಯಮತೋ ಸಂಯಮನ್ತಸ್ಸ, ಸಂಯಮಹೇತು ವಾ ವೇರಂ ನ ಚೀಯತಿ. ಕುಸಲೋ ಚ ಜಹಾತಿ ಪಾಪಕನ್ತಿ ಕುಸಲೋ ಪನ ಞಾಣಸಮ್ಪನ್ನೋ ಸುವಿಸುದ್ಧಸೀಲೇ ಪತಿಟ್ಠಿತೋ ಅಟ್ಠತಿಂಸಾಯ ಆರಮ್ಮಣೇಸು ಅತ್ತನೋ ಅನುರೂಪಂ ಕಮ್ಮಟ್ಠಾನಂ ಗಹೇತ್ವಾ ಉಪಚಾರಪ್ಪನಾಭೇದಂ ಝಾನಂ ಸಮ್ಪಾದೇನ್ತೋ ಪಾಪಕಂ ಲಾಮಕಂ ಕಾಮಚ್ಛನ್ದಾದಿಅಕುಸಲಂ ವಿಕ್ಖಮ್ಭನವಸೇನ ಜಹಾತಿ ಪರಿಚ್ಚಜತಿ. ಸೋ ತಮೇವ ಝಾನಂ ಪಾದಕಂ ಕತ್ವಾ ಸಙ್ಖಾರೇಸು ಖಯವಯಂ ಪಟ್ಠಪೇತ್ವಾ ವಿಪಸ್ಸನಾಯ ಕಮ್ಮಂ ಕರೋನ್ತೋ ವಿಪಸ್ಸನಂ ಉಸ್ಸುಕ್ಕಾಪೇತ್ವಾ ಅರಿಯಮಗ್ಗೇನ ಅನವಸೇಸಂ ಪಾಪಕಂ ಲಾಮಕಂ ಅಕುಸಲಂ ಸಮುಚ್ಛೇದವಸೇನ ಜಹಾತಿ. ರಾಗದೋಸಮೋಹಕ್ಖಯಾ ಸ ನಿಬ್ಬುತೋತಿ ಸೋ ಏವಂ ಪಾಪಕಂ ಪಜಹಿತ್ವಾ ರಾಗಾದೀನಂ ಖಯಾ ಅನವಸೇಸಕಿಲೇಸನಿಬ್ಬಾನೇನ, ತತೋ ಪರಂ ಖನ್ಧನಿಬ್ಬಾನೇನ ಚ ನಿಬ್ಬುತೋ ಹೋತೀತಿ ಏವಂ ಭಗವಾ ಚುನ್ದಸ್ಸ ಚ ದಕ್ಖಿಣಸಮ್ಪತ್ತಿಂ, ಅತ್ತನೋ ಚ ದಕ್ಖಿಣೇಯ್ಯಸಮ್ಪತ್ತಿಂ ನಿಸ್ಸಾಯ ಪೀತಿವೇಗವಿಸ್ಸಟ್ಠಂ ಉದಾನಂ ಉದಾನೇಸಿ.

ಪಞ್ಚಮಸುತ್ತವಣ್ಣನಾ ನಿಟ್ಠಿತಾ.