೬. ಪಿಲಿನ್ದವಚ್ಛಸುತ್ತವಣ್ಣನಾ

೨೬. ಛಟ್ಠೇ ಪಿಲಿನ್ದವಚ್ಛೋತಿ ಪಿಲಿನ್ದಾತಿಸ್ಸ ನಾಮಂ, ವಚ್ಛೋತಿ ಗೋತ್ತವಸೇನ ಥೇರಂ ಸಞ್ಜಾನನ್ತಿ. ವಸಲವಾದೇನ ಸಮುದಾಚರತೀತಿ ‘‘ಏಹಿ, ವಸಲ, ಅಪೇಹಿ, ವಸಲಾ’’ತಿಆದಿನಾ ಭಿಕ್ಖೂ ವಸಲವಾದೇನ ವೋಹರತಿ ಆಲಪತಿ. ಸಮ್ಬಹುಲಾ ಭಿಕ್ಖೂತಿ ಬಹೂ ಭಿಕ್ಖೂ. ತೇ ಥೇರಂ ತಥಾ ಸಮುದಾಚರನ್ತಂ ದಿಸ್ವಾ ‘‘ಅರಹಾವ ಸಮಾನೋ ಅಪ್ಪಹೀನವಾಸನತ್ತಾ ಏವಂ ಭಣತೀ’’ತಿ ಅಜಾನನ್ತಾ ‘‘ದೋಸನ್ತರೋ ಮಞ್ಞೇ ಅಯಂ ಥೇರೋ ಏವಂ ಸಮುದಾಚರತೀ’’ತಿ ಚಿನ್ತೇತ್ವಾ ಉಲ್ಲಪನಾಧಿಪ್ಪಾಯಾ ತಂ ತತೋ ವುಟ್ಠಾಪೇತುಂ ಭಗವತೋ ಆರೋಚೇಸುಂ. ತೇನ ವುತ್ತಂ – ‘‘ಆಯಸ್ಮಾ, ಭನ್ತೇ, ಪಿಲಿನ್ದವಚ್ಛೋ ಭಿಕ್ಖೂ ವಸಲವಾದೇನ ಸಮುದಾಚರತೀ’’ತಿ. ಕೇಚಿ ಪನಾಹು – ‘‘ಇಮಂ ಥೇರಂ ಭಿಕ್ಖೂ ‘ಅರಹಾ’ತಿ ಸಞ್ಜಾನನ್ತಿ, ಅಯಞ್ಚ ಭಿಕ್ಖೂ ಫರುಸವಚನೇನ ಏವಂ ಸಮುದಾಚರತಿ, ‘ಅಭೂತೋ ಏವ ನು ಖೋ ಇಮಸ್ಮಿಂ ಉತ್ತರಿಮನುಸ್ಸಧಮ್ಮೋ’ತಿ ವಾಸನಾವಸೇನ ತಸ್ಸ ತಥಾ ಸಮುದಾಚಾರಂ ಅಜಾನನ್ತಾ ಅರಿಯಭಾವಞ್ಚಸ್ಸ ಅಸದ್ದಹನ್ತಾ ಉಜ್ಝಾನಸಞ್ಞಿನೋ ಭಗವತೋ ತಮತ್ಥಂ ಆರೋಚೇಸು’’ನ್ತಿ. ಭಗವಾ ಥೇರಸ್ಸ ದೋಸನ್ತರಾಭಾವಂ ಪಕಾಸೇತುಕಾಮೋ ಏಕೇನ ಭಿಕ್ಖುನಾ ತಂ ಪಕ್ಕೋಸಾಪೇತ್ವಾ ಸಮ್ಮುಖಾ ತಸ್ಸ ‘‘ಪುಬ್ಬಾಚಿಣ್ಣವಸೇನಾಯಂ ತಥಾ ಸಮುದಾಚರತಿ, ನ ಫರುಸವಚನಾಧಿಪ್ಪಾಯೋ’’ತಿ ಆಹ. ತೇನ ವುತ್ತಂ – ‘‘ಅಥ ಖೋ ಭಗವಾ ಅಞ್ಞತರಂ ಭಿಕ್ಖುಂ ಆಮನ್ತೇಸೀ’’ತಿಆದಿ.

ತತ್ಥ ಪುಬ್ಬೇನಿವಾಸಂ ಮನಸಿ ಕರಿತ್ವಾತಿ ಸತ್ಥಾ ‘‘ಸಚ್ಚಂ ಕಿರ ತ್ವಂ, ವಚ್ಛ, ಭಿಕ್ಖೂ ವಸಲವಾದೇನ ಸಮುದಾಚರಸೀ’’ತಿ ಥೇರಂ ಪುಚ್ಛಿತ್ವಾ ತೇನ ‘‘ಏವಂ, ಭನ್ತೇ’’ತಿ ವುತ್ತೇ ‘‘ಅಯಂ ವಚ್ಛೋ ಕಿಲೇಸವಾಸನಾಯ ವಸಲವಾದಂ ನ ಪರಿಚ್ಚಜತಿ, ಕಿಂ ನು ಖೋ ಅತೀತೇಸುಪಿ ಅತ್ತಭಾವೇಸು ಬ್ರಾಹ್ಮಣಜಾತಿಕೋ ಅಹೋಸೀ’’ತಿ ಆವಜ್ಜೇನ್ತೋ ಪುಬ್ಬೇನಿವಾಸಞಾಣೇನ ಸಬ್ಬಞ್ಞುತಞ್ಞಾಣೇನ ವಾ ತಸ್ಸ ಪುಬ್ಬೇನಿವಾಸಂ ಅತೀತಾಸು ಜಾತೀಸು ನಿವುತ್ಥಕ್ಖನ್ಧಸನ್ತಾನಂ ಮನಸಿ ಕರಿತ್ವಾ ಹತ್ಥತಲೇ ಠಪಿತಂ ಆಮಲಕಂ ವಿಯ ಪಚ್ಚಕ್ಖಕರಣವಸೇನ ಅತ್ತನೋ ಮನಸಿ ಕತ್ವಾ. ಭಿಕ್ಖೂ ಆಮನ್ತೇಸೀತಿ ತೇ ಭಿಕ್ಖೂ ಸಞ್ಞಾಪೇತುಂ ಆಲಪಿ, ಅಭಾಸಿ. ತೇನ ವುತ್ತಂ ‘‘ಮಾ ಖೋ ತುಮ್ಹೇ, ಭಿಕ್ಖವೇ’’ತಿಆದಿ.

ತತ್ಥ ಮಾತಿ ಪಟಿಸೇಧೇ ನಿಪಾತೋ, ತಸ್ಸ ‘‘ಉಜ್ಝಾಯಿತ್ಥಾ’’ತಿ ಇಮಿನಾ ಸಮ್ಬನ್ಧೋ. ಮಾ ಉಜ್ಝಾಯಿತ್ಥಾತಿ ಮಾ ಹೇಟ್ಠಾ ಕತ್ವಾ ಚಿನ್ತಯಿತ್ಥ, ಓಲೋಕಯಿತ್ಥಾತಿ ಅತ್ಥೋ. ವಚ್ಛಸ್ಸ ಭಿಕ್ಖುನೋತಿ ಚ ಉಜ್ಝಾಯನಸ್ಸ ಉಸೂಯನತ್ಥತ್ತಾ ಸಮ್ಪದಾನವಚನಂ. ಇದಾನಿಸ್ಸ ಅನುಜ್ಝಾಯಿತಬ್ಬೇ ಕಾರಣಂ ದಸ್ಸೇನ್ತೋ ‘‘ನ, ಭಿಕ್ಖವೇ, ವಚ್ಛೋ ದೋಸನ್ತರೋ ಭಿಕ್ಖೂ ವಸಲವಾದೇನ ಸಮುದಾಚರತೀ’’ತಿ ಆಹ. ತಸ್ಸತ್ಥೋ – ಭಿಕ್ಖವೇ, ಅಯಂ ವಚ್ಛೋ ದೋಸನ್ತರೋ ದೋಸಚಿತ್ತೋ ದೋಸೇನ ಬ್ಯಾಪಾದೇನ ದೂಸಿತಚಿತ್ತೋ ಹುತ್ವಾ ಭಿಕ್ಖೂ ವಸಲವಾದೇನ ನ ಸಮುದಾಚರತಿ, ಮಗ್ಗೇನೇವ ಚಸ್ಸ ಬ್ಯಾಪಾದೋ ಸಮುಗ್ಘಾತಿತೋ. ಏವಂ ಅದೋಸನ್ತರತ್ತೇಪಿ ತಸ್ಸ ತಥಾ ಸಮುದಾಚಾರಸ್ಸ ಪುರಿಮಜಾತಿಸಿದ್ಧಂ ಕಾರಣಂ ದಸ್ಸೇನ್ತೋ ‘‘ವಚ್ಛಸ್ಸ, ಭಿಕ್ಖವೇ’’ತಿಆದಿಮಾಹ.

ತತ್ಥ ಅಬ್ಬೋಕಿಣ್ಣಾನೀತಿ ಖತ್ತಿಯಾದಿಜಾತಿಅನ್ತರೇಹಿ ಅವೋಮಿಸ್ಸಾನಿ ಅನನ್ತರಿತಾನಿ. ಪಞ್ಚ ಜಾತಿಸತಾನಿ ಬ್ರಾಹ್ಮಣಕುಲೇ ಪಚ್ಚಾಜಾತಾನೀತಿ ಸಬ್ಬಾನಿ ತಾನಿ ವಚ್ಛಸ್ಸ ಪಞ್ಚ ಜಾತಿಸತಾನಿ ಪಟಿಪಾಟಿಯಾ ಬ್ರಾಹ್ಮಣಕುಲೇ ಏವ ಜಾತಾನಿ, ಅಹೇಸುನ್ತಿ ಅತ್ಥೋ. ಸೋ ತಸ್ಸ ವಸಲವಾದೋ ದೀಘರತ್ತಂ ಸಮುದಾಚಿಣ್ಣೋತಿ ಯೋ ಏತರಹಿ ಖೀಣಾಸವೇನಪಿ ಸತಾ ಪವತ್ತಿಯತಿ, ಸೋ ತಸ್ಸ ವಚ್ಛಸ್ಸ ಭಿಕ್ಖುನೋ ವಸಲವಾದೋ ದೀಘರತ್ತಂ ಇತೋ ಜಾತಿತೋ ಪಟ್ಠಾಯ ಉದ್ಧಂ ಆರೋಹನವಸೇನ ಪಞ್ಚಜಾತಿಸತಮತ್ತಂ ಕಾಲಂ ಬ್ರಾಹ್ಮಣಜಾತಿಕತ್ತಾ ಸಮುದಾಚಿಣ್ಣೋ ಸಮುದಾಚರಿತೋ ಅಹೋಸಿ. ಬ್ರಾಹ್ಮಣಾ ಹಿ ಜಾತಿಸಿದ್ಧೇನ ಮಾನೇನ ಥದ್ಧಾ ಅಞ್ಞಂ ವಸಲವಾದೇನ ಸಮುದಾಚರನ್ತಿ. ‘‘ಅಜ್ಝಾಚಿಣ್ಣೋ’’ತಿಪಿ ಪಠನ್ತಿ, ಸೋ ಏವ ಅತ್ಥೋ. ತೇನಾತಿ ತೇನ ದೀಘರತ್ತಂ ತಥಾ ಸಮುದಾಚಿಣ್ಣಭಾವೇನ, ಏತೇನಸ್ಸ ತಥಾ ಸಮುದಾಚಾರಸ್ಸ ಕಾರಣಂ ವಾಸನಾತಿ ದಸ್ಸೇತಿ. ಕಾ ಪನಾಯಂ ವಾಸನಾ ನಾಮ? ಯಂ ಕಿಲೇಸರಹಿತಸ್ಸಾಪಿ ಸನ್ತಾನೇ ಅಪ್ಪಹೀನಕಿಲೇಸಾನಂ ಸಮಾಚಾರಸದಿಸಸಮಾಚಾರಹೇತುಭೂತಂ, ಅನಾದಿಕಾಲಭಾವಿತೇಹಿ ಕಿಲೇಸೇಹಿ ಆಹಿತಂ ಸಾಮತ್ಥಿಯಮತ್ತಂ, ತಥಾರೂಪಾ ಅಧಿಮುತ್ತೀತಿ ವದನ್ತಿ. ತಂ ಪನೇತಂ ಅಭಿನೀಹಾರಸಮ್ಪತ್ತಿಯಾ ಞೇಯ್ಯಾವರಣಪ್ಪಹಾನವಸೇನ ಯತ್ಥ ಕಿಲೇಸಾ ಪಹೀನಾ, ತತ್ಥ ಭಗವತೋ ಸನ್ತಾನೇ ನತ್ಥಿ. ಯತ್ಥ ಪನ ತಥಾ ಕಿಲೇಸಾ ನ ಪಹೀನಾ, ತತ್ಥ ಸಾವಕಾನಂ ಪಚ್ಚೇಕಬುದ್ಧಾನಞ್ಚ ಸನ್ತಾನೇ ಅತ್ಥಿ, ತತೋ ತಥಾಗತೋವ ಅನಾವರಣಞಾಣದಸ್ಸನೋ.

ಏತಮತ್ಥಂ ವಿದಿತ್ವಾತಿ ಏತಂ ಆಯಸ್ಮತೋ ಪಿಲಿನ್ದವಚ್ಛಸ್ಸ ಸತಿಪಿ ವಸಲಸಮುದಾಚಾರೇ ದೋಸನ್ತರಾಭಾವಸಙ್ಖಾತಂ ಅತ್ಥಂ ವಿದಿತ್ವಾ. ಇಮಂ ಉದಾನನ್ತಿ ತಸ್ಸ ಅಗ್ಗಫಲಾಧಿಗಮವಿಭಾವನಂ ಇಮಂ ಉದಾನಂ ಉದಾನೇಸಿ.

ತತ್ಥ ಯಮ್ಹಿ ನ ಮಾಯಾ ವಸತಿ ನ ಮಾನೋತಿ ಯಸ್ಮಿಂ ಅರಿಯಪುಗ್ಗಲೇ ಸನ್ತದೋಸಪ್ಪಟಿಚ್ಛಾದನಲಕ್ಖಣಾ ಮಾಯಾ, ‘‘ಸೇಯ್ಯೋಹಮಸ್ಮೀ’’ತಿಆದಿನಾ ಸಮ್ಪಗ್ಗಹವಸೇನ ಪವತ್ತೋ ಉಣ್ಣತಿಲಕ್ಖಣೋ ಮಾನೋ ಚ ನ ವಸತಿ, ಮಗ್ಗೇನ ಸಮುಗ್ಘಾತಿತತ್ತಾ ನ ಪವತ್ತತಿ ನ ಉಪ್ಪಜ್ಜತಿ. ಯೋ ವೀತಲೋಭೋ ಅಮಮೋ ನಿರಾಸೋತಿ ಯೋ ಚ ರಾಗಾದಿಪರಿಯಾಯವಸೇನ ಪವತ್ತಸ್ಸ ಆರಮ್ಮಣಗ್ಗಹಣಲಕ್ಖಣಸ್ಸ ಲೋಭಸ್ಸ ಸಬ್ಬಥಾ ವಿಗತತ್ತಾ ವೀತಲೋಭೋ, ತತೋ ಏವ ರೂಪಾದೀಸು ಕತ್ಥಚಿ ಮಮಾಯನಾಭಾವತೋ ಅಮಮೋ ಅಪರಿಗ್ಗಹೋ, ಅನಾಗತಾನಮ್ಪಿ ಭವಾದೀನಂ ಅನಾಸೀಸನತೋ ನಿರಾಸೋ. ಪನುಣ್ಣಕೋಧೋತಿ ಕುಜ್ಝನಲಕ್ಖಣಸ್ಸ ಕೋಧಸ್ಸ ಅನಾಗಾಮಿಮಗ್ಗೇನ ಸಬ್ಬಸೋ ಪಹೀನತ್ತಾ ಪನುಣ್ಣಕೋಧೋ ಸಮುಚ್ಛಿನ್ನಾಘಾತೋ. ಅಭಿನಿಬ್ಬುತತ್ತೋತಿ ಯೋ ಏವಂ ಮಾಯಾಮಾನಲೋಭಕೋಧಾನಂ ಸಮುಗ್ಘಾತೇನ ತದೇಕಟ್ಠತಾಯ ಸಬ್ಬಸ್ಸ ಸಂಕಿಲೇಸಪಕ್ಖಸ್ಸ ಸುಪ್ಪಹೀನತ್ತಾ ಸಬ್ಬಸೋ ಕಿಲೇಸಪರಿನಿಬ್ಬಾನೇನ ಅಭಿನಿಬ್ಬುತಚಿತ್ತೋ ಸೀತಿಭೂತೋ. ಸೋ ಬ್ರಾಹ್ಮಣೋ ಸೋ ಸಮಣೋ ಸ ಭಿಕ್ಖೂತಿ ಸೋ ಏವರೂಪೋ ಖೀಣಾಸವೋ ಸಬ್ಬಸೋ ಬಾಹಿತಪಾಪತ್ತಾ ಬ್ರಾಹ್ಮಣೋ, ಸೋ ಏವ ಸಮಿತಪಾಪತ್ತಾ ಸಮಚರಿಯಾಯ ಚ ಸಮಣೋ, ಸೋ ಏವ ಚ ಸಬ್ಬಸೋ ಭಿನ್ನಕಿಲೇಸತ್ತಾ ಭಿಕ್ಖು ನಾಮ. ಏವಂಭೂತೋ ಚ, ಭಿಕ್ಖವೇ, ವಚ್ಛೋ ಸೋ ಕಥಂ ದೋಸನ್ತರೋ ಕಿಞ್ಚಿ ಕಾಯಕಮ್ಮಾದಿಂ ಪವತ್ತೇಯ್ಯ, ಕೇವಲಂ ಪನ ವಾಸನಾಯ ಅಪ್ಪಹೀನತ್ತಾ ವಸಲವಾದೇನ ಸಮುದಾಚರತೀತಿ.

ಛಟ್ಠಸುತ್ತವಣ್ಣನಾ ನಿಟ್ಠಿತಾ.