೯. ತಿಕಿಚ್ಛಕತ್ಥೇರಅಪದಾನವಣ್ಣನಾ

ನಗರೇ ಬನ್ಧುಮತಿಯಾತಿಆದಿಕಂ ಆಯಸ್ಮತೋ ತಿಕಿಚ್ಛಕತ್ಥೇರಸ್ಸ ಅಪದಾನಂ. ಅಯಮ್ಪಾಯಸ್ಮಾ ಪುರಿಮಜಿನವರೇಸು ಕತಾಧಿಕಾರೋ ತತ್ಥ ತತ್ಥ ಭವೇ ವಿವಟ್ಟೂಪನಿಸ್ಸಯಾನಿ ಪುಞ್ಞಾನಿ ಉಪಚಿನನ್ತೋ ವಿಪಸ್ಸಿಸ್ಸ ಭಗವತೋ ಕಾಲೇ ಬನ್ಧುಮತೀನಗರೇ ವೇಜ್ಜಕುಲೇ ನಿಬ್ಬತ್ತೋ ಬಹುಸ್ಸುತೋ ಸುಸಿಕ್ಖಿತೋ ವೇಜ್ಜಕಮ್ಮೇ ಛೇಕೋ ಬಹೂ ರೋಗಿನೋ ತಿಕಿಚ್ಛನ್ತೋ ವಿಪಸ್ಸಿಸ್ಸ ಭಗವತೋ ಉಪಟ್ಠಾಕಸ್ಸ ಅಸೋಕನಾಮತ್ಥೇರಸ್ಸ ರೋಗಂ ತಿಕಿಚ್ಛಿ. ಸೋ ತೇನ ಪುಞ್ಞೇನ ದೇವಮನುಸ್ಸೇಸು ಅಪರಾಪರಂ ಸುಖಂ ಅನುಭವನ್ತೋ ನಿಬ್ಬತ್ತನಿಬ್ಬತ್ತಭವೇ ಅರೋಗೋ ದೀಘಾಯುಕೋ ಸುವಣ್ಣವಣ್ಣಸರೀರೋ ಅಹೋಸಿ.

೩೯. ಸೋ ಇಮಸ್ಮಿಂ ಬುದ್ಧುಪ್ಪಾದೇ ಸಾವತ್ಥಿಯಂ ಗಹಪತಿಕುಲೇ ನಿಬ್ಬತ್ತೋ ವುದ್ಧಿಮನ್ವಾಯ ಸಬ್ಬಸಿಪ್ಪೇಸು ನಿಪ್ಫತ್ತಿಂ ಪತ್ತೋ ಅರೋಗೋ ಸುಖಿತೋ ವಿಭವಸಮ್ಪನ್ನೋ ರತನತ್ತಯೇ ಪಸನ್ನೋ ಸತ್ಥು ಧಮ್ಮದೇಸನಂ ಸುತ್ವಾ ಪಟಿಲದ್ಧಸದ್ಧೋ ಘರಾವಾಸಂ ಪಹಾಯ ಪಬ್ಬಜಿತ್ವಾ ನಚಿರಸ್ಸೇವ ಅರಹಾ ಹುತ್ವಾ ಪುಬ್ಬಕಮ್ಮಂ ಸರಿತ್ವಾ ಸೋಮನಸ್ಸಜಾತೋ ಪುಬ್ಬಚರಿತಾಪದಾನಂ ಪಕಾಸೇನ್ತೋ ನಗರೇ ಬನ್ಧುಮತಿಯಾತಿಆದಿಮಾಹ. ತಂ ಸಬ್ಬಂ ಹೇಟ್ಠಾ ವುತ್ತನಯತ್ತಾ ಉತ್ತಾನತ್ಥಮೇವಾತಿ.

ತಿಕಿಚ್ಛಕತ್ಥೇರಅಪದಾನವಣ್ಣನಾ ಸಮತ್ತಾ.