೩. ಅಡ್ಢಚೇಳಕತ್ಥೇರಅಪದಾನವಣ್ಣನಾ

ತಿಸ್ಸಸ್ಸಾಹಂ ಭಗವತೋತಿಆದಿಕಂ ಆಯಸ್ಮತೋ ಅಡ್ಢಚೇಳಕತ್ಥೇರಸ್ಸ ಅಪದಾನಂ. ಅಯಮ್ಪಿ ಥೇರೋ ಪುರಿಮಬುದ್ಧೇಸು ಕತಾಧಿಕಾರೋ ತತ್ಥ ತತ್ಥ ಭವೇ ವಿವಟ್ಟೂಪನಿಸ್ಸಯಾನಿ ಪುಞ್ಞಾನಿ ಉಪಚಿನನ್ತೋ ತಿಸ್ಸಸ್ಸ ಭಗವತೋ ಕಾಲೇ ಏಕೇನಾಕುಸಲೇನ ಕಮ್ಮೇನ ದುಗ್ಗತಕುಲಗೇಹೇ ನಿಬ್ಬತ್ತೋ ವುದ್ಧಿಮನ್ವಾಯ ಸದ್ಧಮ್ಮದೇಸನಂ ಞತ್ವಾ ಪಸನ್ನಮಾನಸೋ ಚೀವರತ್ಥಾಯ ಅಡ್ಢಭಾಗಂ ಏಕಂ ದುಸ್ಸಮದಾಸಿ. ಸೋ ತೇನೇವ ಪೀತಿಸೋಮನಸ್ಸೇನ ಕಾಲಂ ಕತ್ವಾ ಸಗ್ಗೇ ನಿಬ್ಬತ್ತೋ ಛ ಕಾಮಾವಚರಸಮ್ಪತ್ತಿಮನುಭವಿತ್ವಾ ತತೋ ಚುತೋ ಮನುಸ್ಸೇಸು ಮನುಸ್ಸಸಮ್ಪತ್ತೀನಂ ಅಗ್ಗಭೂತಂ ಚಕ್ಕವತ್ತಿಸಮ್ಪತ್ತಿಂ ಅನುಭವಿತ್ವಾ ಇಮಸ್ಮಿಂ ಬುದ್ಧುಪ್ಪಾದೇ ಏಕಸ್ಮಿಂ ಅದ್ಧಕುಲೇ ನಿಬ್ಬತ್ತೋ ವುದ್ಧಿಪ್ಪತ್ತೋ ಸತ್ಥು ಧಮ್ಮದೇಸನಂ ಸುತ್ವಾ ಪಸನ್ನಮಾನಸೋ ಪಬ್ಬಜಿತ್ವಾ ನಚಿರಸ್ಸೇವ ಅರಹಾ ಅಹೋಸಿ.

೧೪. ಸೋ ಅಪರಭಾಗೇ ಅತ್ತನೋ ಪುಬ್ಬಕಮ್ಮಂ ಸರಿತ್ವಾ ಸೋಮನಸ್ಸಜಾತೋ ಪುಬ್ಬಚರಿತಾಪದಾನಂ ಪಕಾಸೇನ್ತೋ ತಿಸ್ಸಸ್ಸಾಹಂ ಭಗವತೋತಿಆದಿಮಾಹ. ತಂ ಸಬ್ಬಂ ಉತ್ತಾನತ್ಥಮೇವಾತಿ.

ಅಡ್ಢಚೇಳಕತ್ಥೇರಅಪದಾನವಣ್ಣನಾ ಸಮತ್ತಾ.