೪. ಧಮ್ಮಾಭಿಸಮಯಕಥಾವಣ್ಣನಾ

೮೯೭. ಇದಾನಿ ಧಮ್ಮಾಭಿಸಮಯಕಥಾ ನಾಮ ಹೋತಿ. ತತ್ಥ ಅತೀತಭವೇ ಸೋತಾಪನ್ನಂ ಮಾತುಕುಚ್ಛಿಯಂ ವಸಿತ್ವಾ ನಿಕ್ಖನ್ತಂ ದಿಸ್ವಾ ‘‘ಅತ್ಥಿ ಗಬ್ಭಸೇಯ್ಯಾಯ ಧಮ್ಮಾಭಿಸಮಯೋ’’ತಿ ಯೇಸಂ ಲದ್ಧಿ, ಸೇಯ್ಯಥಾಪಿ ಏಕಚ್ಚಾನಂ ಉತ್ತರಾಪಥಕಾನಂ, ತೇ ಸನ್ಧಾಯ ಪುಚ್ಛಾ ಸಕವಾದಿಸ್ಸ, ಪಟಿಞ್ಞಾ ಇತರಸ್ಸ. ಅಥ ನಂ ‘‘ಯದಿ ತತ್ಥ ಧಮ್ಮಾಭಿಸಮಯೋ ಅತ್ಥಿ, ಧಮ್ಮಾಭಿಸಮಯಸ್ಸ ಕಾರಣೇಹಿ ಧಮ್ಮದೇಸನಾದೀಹಿ ಭವಿತಬ್ಬ’’ನ್ತಿ ಚೋದೇತುಂ ಅತ್ಥಿ ಗಬ್ಭಸೇಯ್ಯಾಯ ಧಮ್ಮದೇಸನಾತಿಆದಿಮಾಹ. ಸುತ್ತಸ್ಸಾತಿಆದಿ ಭವಙ್ಗವಾರಂ ಸನ್ಧಾಯ ವುತ್ತಂ. ಗಬ್ಭಸೇಯ್ಯಾಯ ಹಿ ಯೇಭುಯ್ಯೇನ ಭವಙ್ಗಮೇವ ಪವತ್ತತಿ. ತೇನೇವ ಸತ್ತೋ ಕಿರಿಯಮಯಪ್ಪವತ್ತಾಭಾವಾ ಸುತ್ತೋ, ಭಾವನಾನುಯೋಗಸ್ಸ ಅಭಾವಾ ಪಮತ್ತೋ, ಕಮ್ಮಟ್ಠಾನಪರಿಗ್ಗಾಹಕಾನಂ ಸತಿಸಮ್ಪಜಞ್ಞಾನಂ ಅಭಾವಾ ಮುಟ್ಠಸ್ಸತಿ ಅಸಮ್ಪಜಾನೋ ನಾಮ ಹೋತಿ, ತಥಾರೂಪಸ್ಸ ಕುತೋ ಧಮ್ಮಾಭಿಸಮಯೋತಿ?

ಧಮ್ಮಾಭಿಸಮಯಕಥಾವಣ್ಣನಾ.