೫. ಆಸವಕಥಾವಣ್ಣನಾ

೭೨೪-೭೨೫. ಇದಾನಿ ಆಸವಕಥಾ ನಾಮ ಹೋತಿ. ತತ್ಥ ಯಸ್ಮಾ ಚತೂಹಿ ಆಸವೇಹಿ ಉತ್ತರಿ ಅಞ್ಞೋ ಆಸವೋ ನಾಮ ನತ್ಥಿ, ಯೇನ ಚತ್ತಾರೋ ಆಸವಾ ಸಾಸವಾ ಸಿಯುಂ, ತಸ್ಮಾ ಚತ್ತಾರೋ ಆಸವಾ ಅನಾಸವಾತಿ ಯೇಸಂ ಲದ್ಧಿ, ಸೇಯ್ಯಥಾಪಿ ಹೇತುವಾದಾನಂ; ತೇ ಸನ್ಧಾಯ ಪುಚ್ಛಾ ಸಕವಾದಿಸ್ಸ, ಪಟಿಞ್ಞಾ ಇತರಸ್ಸ. ಅಥ ನಂ ‘‘ಯದಿ ತೇ ಆಸವಾ ಅನಾಸವಾ, ಏವಂ ಸನ್ತೇ ತೇಹಿ ಮಗ್ಗಾದಿಲಕ್ಖಣಪ್ಪತ್ತೇಹಿ ಭವಿತಬ್ಬ’’ನ್ತಿ ಚೋದೇತುಂ ಮಗ್ಗೋತಿಆದಿಮಾಹ. ಸೇಸಮೇತ್ಥ ಉತ್ತಾನತ್ಥಮೇವಾತಿ.

ಆಸವಕಥಾವಣ್ಣನಾ.