೭. ಸಮಾಪನ್ನೋ ಅಸ್ಸಾದೇತೀತಿಕಥಾವಣ್ಣನಾ

೬೭೧-೬೭೩. ಇದಾನಿ ಸಮಾಪನ್ನೋ ಅಸ್ಸಾದೇತೀತಿಕಥಾ ನಾಮ ಹೋತಿ. ತತ್ಥ ‘‘ಪಠಮಂ ಝಾನಂ ಉಪಸಮ್ಪಜ್ಜ ವಿಹರತಿ, ಸೋ ತದಸ್ಸಾದೇತೀ’’ತಿಆದಿವಚನಂ (ಅ. ನಿ. ೪.೧೨೩) ನಿಸ್ಸಾಯ ‘‘ಸಮಾಪನ್ನೋ ಅಸ್ಸಾದೇತಿ, ಸಾ ಚಸ್ಸ ಝಾನನಿಕನ್ತಿ ಝಾನಾರಮ್ಮಣಾ ಹೋತೀ’’ತಿ ಯೇಸಂ ಲದ್ಧಿ, ಸೇಯ್ಯಥಾಪಿ ಅನ್ಧಕಾನಂ, ತೇ ಸನ್ಧಾಯ ಸಮಾಪನ್ನೋತಿ ಪುಚ್ಛಾ ಸಕವಾದಿಸ್ಸ, ಪಟಿಞ್ಞಾ ಇತರಸ್ಸ. ತಂ ಝಾನಂ ತಸ್ಸ ಝಾನಸ್ಸ ಆರಮ್ಮಣನ್ತಿ ಪಞ್ಹೇಸು ತಸ್ಸೇವ ತದಾರಮ್ಮಣತಂ ಅಪಸ್ಸನ್ತೋ ಸುತ್ತವಿರೋಧಭಯೇನ ಪಟಿಕ್ಖಿಪತಿ, ‘‘ತದಸ್ಸಾದೇತೀ’’ತಿವಚನಮತ್ತೇನ ಪಟಿಜಾನಾತಿ. ಸೋ ತದಸ್ಸಾದೇತೀತಿ ಸುತ್ತಂ ಝಾನಲಾಭಿನೋ ಝಾನಾ ವುಟ್ಠಾಯ ಝಾನಸ್ಸಾದಂ ಸಾಧೇತಿ, ನ ಅನ್ತೋಸಮಾಪತ್ತಿಯಂಯೇವ ಝಾನನಿಕನ್ತಿಯಾ ಝಾನಾರಮ್ಮಣತಂ, ತಸ್ಮಾ ಅಸಾಧಕನ್ತಿ.

ಸಮಾಪನ್ನೋ ಅಸ್ಸಾದೇತೀತಿಕಥಾವಣ್ಣನಾ.