೫. ನಿವುತಕಥಾವಣ್ಣನಾ

೬೬೫-೬೬೭. ಇದಾನಿ ನಿವುತಕಥಾ ನಾಮ ಹೋತಿ. ತತ್ಥ ಸುದ್ಧಸ್ಸ ಸುದ್ಧಕಿಚ್ಚಾಭಾವತೋ ನೀವರಣೇಹಿ ನಿವುತೋ ಓಫುಟೋ ಪರಿಯೋನದ್ಧೋ ಚ ನೀವರಣಂ ಜಹತೀತಿ ಯೇಸಂ ಲದ್ಧಿ, ಸೇಯ್ಯಥಾಪಿ ಉತ್ತರಾಪಥಕಾನಂ; ತೇ ಸನ್ಧಾಯ ನಿವುತೋತಿಪುಚ್ಛಾ ಸಕವಾದಿಸ್ಸ, ಪಟಿಞ್ಞಾ ಇತರಸ್ಸ. ರತ್ತೋ ರಾಗನ್ತಿಆದಿ ನಿವುತಸ್ಸ ನೀವರಣಜಹನೇ ದೋಸದಸ್ಸನತ್ಥಂ ವುತ್ತಂ. ಪರಿಸುದ್ಧೇ ಪರಿಯೋದಾತೇತಿಆದಿ ವಿಕ್ಖಮ್ಭನವಿಸುದ್ಧಿಯಾ ವಿಸುದ್ಧಸ್ಸ ಸಮುಚ್ಛೇದವಿಸುದ್ಧಿದಸ್ಸನತ್ಥಂ ವುತ್ತಂ. ತಸ್ಸ ಏವಂ ಜಾನತೋತಿಆದಿ ಜಾನತೋ ಪಸ್ಸತೋ ಆಸವಕ್ಖಯಂ ದೀಪೇತಿ, ನ ನಿವುತಸ್ಸ ನೀವರಣಜಹನಂ, ತಸ್ಮಾ ಅಸಾಧಕನ್ತಿ.

ನಿವುತಕಥಾವಣ್ಣನಾ.