೮. ವಿತಕ್ಕವಿಪ್ಫಾರಸದ್ದಕಥಾವಣ್ಣನಾ

೫೬೩. ಇದಾನಿ ವಿತಕ್ಕವಿಪ್ಫಾರಸದ್ದಕಥಾ ನಾಮ ಹೋತಿ. ತತ್ಥ ಯಸ್ಮಾ ‘‘ವಿತಕ್ಕವಿಚಾರಾ ವಚೀಸಙ್ಖಾರಾ’’ತಿ ವುತ್ತಾ, ತಸ್ಮಾ ಸಬ್ಬಸೋ ವಿತಕ್ಕಯತೋ ವಿಚಾರಯತೋ ಅನ್ತಮಸೋ ಮನೋಧಾತುಪವತ್ತಿಕಾಲೇಪಿ ವಿತಕ್ಕವಿಪ್ಫಾರೋ ಸದ್ದೋಯೇವಾತಿ ಯೇಸಂ ಲದ್ಧಿ, ಸೇಯ್ಯಥಾಪಿ ಪುಬ್ಬಸೇಲಿಯಾನಂ; ತೇ ಸನ್ಧಾಯ ಸಬ್ಬಸೋತಿ ಪುಚ್ಛಾ ಸಕವಾದಿಸ್ಸ ಪಟಿಞ್ಞಾ ಇತರಸ್ಸ. ಅಥ ನಂ ಯದಿ ವಿತಕ್ಕವಿಪ್ಫಾರಮತ್ತಂ ಸದ್ದೋ, ಫಸ್ಸಾದಿವಿಪ್ಫಾರೋಪಿ ಸದ್ದೋ ಭವೇಯ್ಯಾತಿ ಚೋದೇತುಂ ಸಬ್ಬಸೋ ಫುಸಯತೋತಿಆದಿಮಾಹ. ಇತರೋ ತಾದಿಸಂ ಸುತ್ತಲೇಸಂ ಅಪಸ್ಸನ್ತೋ ಪಟಿಕ್ಖಿಪತಿ. ವಿತಕ್ಕವಿಪ್ಫಾರೋ ಸದ್ದೋ ಸೋತವಿಞ್ಞೇಯ್ಯೋತಿ ವಿತಕ್ಕಸ್ಸ ವಿಪ್ಫಾರಮತ್ತಮೇವ ಸದ್ದೋತಿ ಕತ್ವಾ ಪುಚ್ಛತಿ, ನ ವಿತಕ್ಕವಿಪ್ಫಾರಸಮುಟ್ಠಿತಂ ಸುತ್ತಪಮತ್ತಾನಂ ಸದ್ದಂ, ಇತರೋ ಪಟಿಕ್ಖಿಪತಿ. ನನು ವಿತಕ್ಕವಿಪ್ಫಾರಸದ್ದೋ ನ ಸೋತವಿಞ್ಞೇಯ್ಯೋತಿ ಇದಂ ತಸ್ಸೇವ ಲದ್ಧಿಯಾ ದಸ್ಸೇತಿ. ಸೋ ಹಿ ವಿತಕ್ಕವಿಪ್ಫಾರಮತ್ತಮೇವ ಸದ್ದಂ ವದತಿ, ಸೋ ನ ಸೋತವಿಞ್ಞೇಯ್ಯೋತಿ. ಇತರೋ ಪನ ‘‘ವಿತಕ್ಕವಿಪ್ಫಾರಸದ್ದಂ ಸುತ್ವಾ ಆದಿಸತೀ’’ ತಿ (ದೀ. ನಿ. ೩.೧೪೮) ವಚನತೋ ಸೋತವಿಞ್ಞೇಯ್ಯೋವಾತಿ ವದತಿ.

ವಿತಕ್ಕವಿಪ್ಫಾರಸದ್ದಕಥಾವಣ್ಣನಾ.